Dezembr—Jivit ani Porgottnni Mittingechea Pustike Pasot Modot
DEZEMBR 2-8
DEVACHEA UTRANTLE THEVE
“Mezunk Zaina Titlea Vhodd Urponjek Jehovachem Besanv Melltta”
(Prokasovnni 7:9) Hache uprant ovchit ek bhov vhodd lokachi urponz hanvem polleli, konnachean mezunk zainasli titli! Sogllea desantli, sogllea kullantli, sogllea porzantli ani sogllea bhasanchi ti urponz; ani dhovi nhesonn ghalun ani aplea hatamnim tallio dhorun, xinvasona mukhar ani Menddrea mukhar ti ubi asli.
it-1 997 ¶1
Vhodd Urponz
Ek prosn ubo zata: ‘Vhodd urponz’ taronn zhoddun prithumer jietole munis zaun asat zalear, ti ‘xinvasona mukhar ani Menddrea mukhar ubi’ asa mhunn koxem mhunnonk zata? (Prok. 7:9) Thodde pavtti Bible-ant ek munis vo ek urponz ‘ubi ravlea,’ him utram, to vo ti zachea fuddem ubi ravlea, tachi tannim maniotai melloun ghetlea mhunn dakhounk uzar kelam. (St. 1:5; 5:5; Mho. 22:29, AT; Luk. 1:19) Toxench, Prokasovnni pustokachea sovea odheai-ant “sonvsarantle patxai, razpal ani senapoti, girest ani podvedar monxam, sogllim gulamam ani svotontr monxam,” apnnank “xinvasonar boslolo asa tachea mukha velim ani Menddreachea krodhantlim” lipounk sodhtat mhunn dakhoita, “karonn tachea krodhacho bhirankull dis pavla, ani tache mukhar ubo ravonk konn xokta?” (Prok. 6:15-17; Luk. 21:36 sor kor.) Tor ‘vhodd urponjent’ oslim munxam asat mhunn kollon ieta, zankam tea krodhachea disamnim surokxotai melltta ani Devachi ani Menddreachi maniotai mellun tim tanchea fuddem “ubi” asat.
(Prokasovnni 7:14) Hanvem oso zobab dilo: “Tunch sang mhaka, dhonia.” Tannem mhaka sanglem: “Nixttur dhumalleantlo solamoti pavlo to lok ho. Tannim aplim vostram Menddreachea rogtan dhuleant ani dhovim keleant.
it-2 1127 ¶4
Sontap
Jerusalemacho nas zaun sumar tis vorsam uprant, apostl Juanvak soglea raxttrantlea, kullantlea ani lokankchea vhodd urponje vixim oxem sanglem, “Nixttur dhumalleantlo solamoti pavlo to lok ho.” (Prok. 7:13, 14) ‘Nixttur dhumalleantlo vo vhodd sontapantlo solamoti pavlo to lok,’ hea utram vorvim ti vhodd urponz, vhodd sontapantlean salvar zata mhunn kollon ieta. Hem khorem mhunn, Itihas 7:9, 10-ant aslolim oslinch utram khatri ditat. Thoim oxem sangta: “Dev tache [Juze] sovem aslo; ani tannem taka sogllea vignantlo vattailo.” Juzek soglea vignantlo vo dhumalleantlo vattailo, hacho orth taka fokot tras sosunk modot zali titlench nhoi, punn tacher ailolea trasantlean to salvar pasun zaunk pavlo.
(Prokasovnni 7:15-17) Hea pasot tim Devachea xinvasona mukhar ubim asat ani Tachea Gabhareant dis ani rat Tachi seva kortat. Xinvasonar bosun asa To tanche modem tthikann korun tankam xeronna ghetolo. 16 Tankam anink kednanch bhuk lagchi na, tan-ui lagchi na; suriachem unet tankam hulpaunchem na, nhoi mhonn kosloch dusro zall, 17 kiteak xinvasonachea mazar asa to Menddro tancho Gonvlli zatolo, ani To tankam jivea udkachea zhorim-xim pavoitolo; ani Dev tanchea dolleantlim sogllim dukam pusun kadtolo.”
it-1 996-997
Vhodd Urponz
Tanchi Vollokh. Prokasovnni odheai 7-ant, sanglolea ‘vhodd urponjek’ vollkhonk amkam teach odheaia vorvim ani tanchea vixim sangta tea her odheaiam vorvim modot zata. Prokasovnni 7:15-17-ant Dev “tankam xeronnam ghetolo,” toxench “jivea udkachea zhorim-xim pavoitolo,” ani “tanchea dolleantlim sogllim dukam pusun kadtolo” mhunn sangta. Prokasovnni 21:2-4-ant teach vella vixim oxem sangta: “Monxam modem Devacho Tombu” astolo, “tanchea dolleantlim sogllim dukam to pusun kaddtolo,” ani “moronn anik aschem na.” Hem dorxon, sorgar asloleanchea vixim sangona zoim thaun ‘Novem Jerusalem denvon ieta’ punn tem prithumer aslolea munxam vixim sangta.
Bible-ant Motiam Sodhum-ia
(Prokasovnni 7:1) Hache uprant sonvsarachea char konnxeancher char devdut aslole hanvem pollele. Sonvsaracher vo doriacher, vo khoichea-i zhaddar varo marchoch nhoi mhonn, sonvsarache char-ui vare te addaun dhortale.
re 115 ¶4
Devachea Israelacher Xikʼko Marop
4 He char devdut, char devdutanchea zomeank suchit korta, zankam Jehova aplea tharailolea vella porian apli zhoddtti addaunk uzar korta. Te Devdut Devachea krodhachem varem utʼtor, dokxinn, udent ani poschim thaun vangddach soddttole tednam vhodd promannan nas zatolo. Adlea Elamkarank ximpddaunk Jehovan char-ui varem uzar korun jea toren tancho sarko nas kelʼlo, teach toren, punn vhodd promannan to nas kortolo. (Jeremias 49:36-38) Hem ek sarkem vhodd vadoll zaun astolem. Jehovan Amʼmon raxttracher haddlolea ‘vadolla’ vorvim zalolea nasa poros ekdom chodd promannan nas zatolo. (Amos 1:13-15) Jehova aplea ragachea disa, sasnachea sasnak aplo raz-odhikar sarko asa mhunn dakhoun ditolo tednam, prithumer aslolem Soitanachem khoinchench songotton urchem na.—Stotr 83:15, 18; Izaias 29:5, 6.
(Prokasovnni 9:11) Tankam ek patxai aslo, ani to mhollear Patallacher podvi aslolo devdut; Hebrev bhaxen tachem nanv Abbadon, ani Grik bhaxen Apolʼlion, mhonnge nisontton korpi.
it-1 12
Abbadon
Patallacher podvi aslolo devdut Abbadon—to konn?
Prokasovnni 9:11-ant “Abbadon” hem utor, ‘patallacher podvi aslolo devdutachem’ nanv mhunn uzar kelam. Hea utrak sombond aslolem Grek nanv Apolʼlion-acho orth “Nas Korpi” zaun asa. Hem vers patxai Vespasian, Muhammad, ani Napolean-a vixim pasun sanglolem ek bhakit zaun asa, ani tea devdutacher Soitanacho probhav asa mhunn dakhounk 19-avea xekddeant proitn kelolo. Punn, hanga dhean diunk zai ki, Prokasovnni 20:1-3-ant “patallachi chavi” aslolo Devdut, sorga voilo Devacho protinidhi mhunn dakhoun dilam. Ani to “soitanachea probhavant” na, punn to Soitanak bandun patallant xevttita. Prokasovnni 9:11 vixim, The Interpreter’s Bible oxem sangta: “Tor Abbadon, Soitanancho devdut nhoi punn Devacho, zo Devachea hukuma pormonnem nas korta.”
Ami atanch polloilam tea Hebrev bhaxen boroilʼlea pustokamnim ʼavad·dohnʹ hem utor Sheol ani mornna vixim sangonk uzar kelam. Prokasovnni 1:18-ant Jezu Krist oxem sangta: “Hanv sorvkallak jivo asam, mornnacheo ani patallacheo chavio mhoje adhin asat.” Patallacher taka aslolea xokte vixim Lukas 8:31-ant sanglam. Taka nas korchi xokti asa, Soitanak nas korchi xokti pasun asa mhunn Hebrevank 2:14, udexim kolltta, zoim Jezu “aplea mornna udexim, mornnacher podvi choloitalo tacho, mhonnge devcharacho” nas korunk lagon masa-rogtacho zalo mhunn sangta. Prokasovnni 19:11-16-ant taka Devan nemlolo Vinas Korpi mhunn sarkem dakhoun dilam.—APOLLYON polloi.
DEZEMBR 9-15
DEVACHEA UTRANTLE THEVE
“‘Dog Sakxidarank’ Jivexim Marle ani Tankam Jivont Kele”
(Prokasovnni 11:3) Punn sakotto nheslolea Mhojea dogam sakxidarank Hanv dhaddtolom ani te baraixim-satth dis Mhozo sondex porgottʼtole.”
w14 11/15 30
Vachpeam Thaun Prosn
Prokasovnni odheai 11-ant sanglole dog sakxidar konn?
◼ Prokasovnni 11:3-ant don sakxeam vixim sanglam je 1,260 dis bhakit kortole. Magir monzat tankam “haroitoli ani jivexi martoli” mhunn thoim sangta. Punn “sadde-tin disam” uprant he dog sakxidar jivont zatole, ani tankam polloitat tim soglim ojap zatolim.—Prok. 11:7, 11.
Hem dog sakxidar konn? Hea ghoddnne vixim diloli bariksannechi mahiti tankam vollkhonk modot korunk xokta. Poilem, ‘te dog sakxidar mhollear ajetinachim don zhaddam ani don divlio’ mhunn amkam sanglam. (Prok. 11:4) Hem amkam Zekariachea bhakitant sanglolem diveachem pedd ani don zoitunanchim zhaddam ugddasak haddtta. Tim zoitunachim zhaddam, ‘dog obhixek kelʼlea munxank,’ mhunnche Rajpal Jerubbabel ani Porom Iadnik Joshua-k suchit kortat, je “sogllea sonvsarachea Sorvesporache sevek raji asat.” (Zek. 4:1-3, 14) Dusrem, te dog sakxi Moizes ani Elijan kelolea vizmitam sarki khunnam kortat mhunn thoim sanglam.—Prokasovnni 11:5, 6 hem vers Lokgonnti 16:1-7, 28-35 ani 1 Raza 17:1; 18:41-45-a sangata sor kor.
Hea donui pustokamnim sanglam tanchea modem ek sarkem asa tem kitem? Dor eka pustokant, topasnni zaunchea eka kotthin vellar, Devachea obhixiktamnim fuddakar ghetlolo tea vixim sangta. Tor 1914-ant Devachem Raj sorgar stapon zalem tea vellar fuddakar ghetlolea obhixikt bhavamnim “sakotto” ghalun sadde tin vorsam porgottnni keli tednam, Prokasovnni odheai 11-ant sanglolem bhakit purnn zalem.
Sakotto ghalun porgottnni kelea uprant, hea obhixikt bhavank sadde tin dis, mhunnche thoddea tempam pasot bondkhonnint ghatlole tednam tankam eke toren jivexim marlea sarkem zalem. Devachea lokanchea dusmananchea nodren, tanchea kamak jivexim marlem koxem zalem, zaka lagon te dusman khub khuxal zale.—Prok. 11:8-10.
Punn bhakitant sanglolea pormonnem, sadde tin disachea xevottak, tea dog sakxidarank jivont kele. Hea obhixiktank fokot bondkhonni thaun suttka mellʼlli titlench nhoi, punn visvaxi ravle tankam Somi Jezu Krista vorvim Devan eka khas kamank nemle. Hea nimannea disamnim Devachea lokamnim, Deva sangata ixttagot dovrunk goroz tem diunk lagon 1919-ant tankam ‘visvaxi and xanno chakor’ mhunn nemle.—Mt. 24:45-47; Prok. 11:11, 12.
Mhotvachem mhunnttlear, heo ghoddnneo Devachea devmondirachem zok kaddcho vo topasnni korcho vell mhunn Prokasovnni 11:1, 2 dakhoita. Malaki odheai 3 osleach eka topasnne vixim sangta, zachea uprant ek nitoll korchem kam zaunchem asa. (Mal. 3: 1-4) Topasnni ani nitoll korchem kam kitlem lamb aslem? Tem 1914 thaun 1919-achea thoddea mhoineache survatek porian chalu aslem. Hea vellant 1,260 disam (42 mhoinnem) ani Prokasovnni odheai 11-ant sanglole suchit kortat te sadde tin dis mellon asat.
Borea kamank lagon eka khas lokank nitoll korunk Jehovan hea otmik nitoll korchea kamachi manddavoll kelea mhunn ami kitlim khuxal! (Titak 2:14) Tea bhair, topasnni korchea vellar obhixikt bhavamnim fuddakar gheun suchit korta toslea dog sakxidaranchem kam kelam. Hea obhixiktanchea udharonnachi ami toknnai kortat.
(Prokasovnni 11:7) Tancho sondex porgottun zatoch, Patallantli voir choddun ieta ti monzat tancher virudh zhuz kortoli; ti tankam haroitoli ani jivexim martoli.
(Prokasovnni 11:11) Punn sadde-tin disam uprant Devan jivitacho svas tanche bhitor ghalo ani te aplea paiancher ube zale; hem pollelem tim sogllim bharim kamplim.
Bible-ant Motiam Sodhum-ia
(Prokasovnni 10:9, 10, NW) Hanv tea devduta-xim gelom ani ti dhaktti kovlli mhaka di mhonn hanvem tache lagim maglem. Tannem mhaka mhollem: “Ti ghe ani kha; tujea pottant ti koddu zatoli, punn tujea tonddant mhonva sarki godd.” 10 Devdutachea hatantli ti dhaktti kovlli hanvem ghetli ani khali, ani ti mhojea tonddant mhonva sarki godd lagli. Punn khalea uprant, pottant ti koddu zali.
it-2 880-881
Kovllo
Suchit Korunk Uzar Kortana. “Kovllo” hem utor Bible-ant zaite pavtti kitem tori suchit korunk uzar kelam. Ezekiel-an ani Zekaria-n don-ui vatten boroilolo ek-ek kovllo polloilo. Kovlleacher chodd korun fokot ekuch vatten boroitale, punn tea kovlleacher donui vatten boroilolem aslem. Tor tantunt boroilolim zhoddttechim utram kitlim mhotvachim, kitlea vhodd promannan tim ghoddttolim, ani tim kitlim gombhir tem kollttalem. (Ez. 2:9–3:3; Zek. 5:1-4) Prokasovnni pustokant aslolea dorxonant, xinvasonar boslolo asa tachea uzvea hantant sat xikʼke marlolo ek kovllo aslo zo Devacho Menddro ukto korum porian tantunt kitem boroilam tem konnakuch kollchem naslem. (Prok. 5:1, 12; 6:1, 12-14) Uprant, Juanvak dorxonant ek kovllo dilolo ani to taka khavunk adnea diloli. To Juanvak khatana godd laglolo, punn tea kovllean tachem pott koddu kelem. Tea kovlleacher xikʼko marlolo naslo, to ukto aslo. Tor eklo to vachun somzonk xoktalo. Juanvak tea kovlleantlo sondex mellʼllo tednam taka to “godd” vo boro laglo, punn taka sanglolem toxem, tannem tea kovlleantlean chodd korun koddu ghoddnneam vixim bhakit korchem aslem. (Prok. 10:1-11) Ezekiel-akui “vilap, mornnagitam ani pinrgonni” aslolo ek kovllo dilʼlo tednam taka osloch onnbhov zalʼlo.—Ez. 2:10.
(Prokasovnni 12:1-5) Tednam sorgar ek vichitr khunna dixtti poddli; suriachea porzollan nhesloli ek bail; tichea paiam tolla aslo chondrim ani tichea mathear bara noketrancho mukutt. 2 Ti ballont zaunchi asli ani aplea porsutt-vennink lagun ti bobo-huieli martali. 3 Anink ek khunna sorgar dixtti poddli: ovchituch ek vorixtt tambddo-lal sat tokliancho ani dha xingancho ar; tache dor-eke tokler ek mukutt aslo. 4 Tannem aple xempdden mollba velea noketrancho ek tisro vantto konsllaun prithumer uddoilo; ani porsutt zaunchi asli te bailek bhurgo zaina fuddem taka girasunk, tiche mukhar ar ubo ravlo. 5 Bailek ek bhurgo zolmolo: to lokhonddache betkattien sogllea porzancher raj choloitolo. Punn hea bhurgeak Deva sorxim ani Tachea xinvasona sorxim nitt ubarun vhelo.
it-2 187 ¶7-9
Porsutt-venninchem Dukh
Prokasovnni pustokant apostl Juanvan polloilolea dorxonant taka ek sorginchi bail dixtti poddtta, ji “aplea porsutt-vennink lagun” roddttali. Tea “bailek ek bhurgo zolmolo, to lokhonddache betkattien sogllea porzancher raj choloitolo.” Aran tea bhurgeak girascho proitn kelo zalear pasun, tea “bhurgeak Deva sorxim ani Tachea xinvasona sorxim nitt ubarun vhelo.” (Prok. 12:1, 2, 4-6) Adlea tempar eka zolmololea bhurgeak tachea bapaichi maniotai mellonk lagon taka tachea bapai-xim vhortale. Teach toren, Devan tea bhurgeak aplea sorxim vhoron, apnnem tea bhurgeak aplo bhurgo mhunn manun ghetlo mhunn dakhoun dilem. (BIRTH polloi.) Tor ti “bail,” “Devachi bail” zaun asa, ‘sorgar thaun denvlolem Jerusalem,’ Kristachi ani tachea otmik bhavanchi “avoi.”—Gal. 4:26; Heb. 2:11, 12, 17.
Devachi sorginchi “bail,” poripurnn astolich, ani tika zolm ditana dukh tor zaunchem na. Tor porsutt-venninchem dukh zata hacho orth, tea bailek apunn beginuch zolm diunchi asa mhunn kolltta, ani ti tachi vatt polloit asta.—Prok. 12:2.
Ho “bhurgo” vo cheddo bhurgo konn astolo kai? To bhurgo “lokhonddache betkattien sogllea porzancher raj choloitolo.” Hem Stotr 2:6-9-ant Devachea Mesias Raza vixim bhakit kelolem. Punn Juanvan hem dorxon prithumer Kristacho zolm, moronn ani punorjivontponn zaun zaitea tempa uprant polloilem. Tor hem dorxon Devacho Put Jezu Kristachea hatant aslolea Mesias Rajeachea zolma vixim sangta mhunn sangonk zata. Ho Jezu zo melʼleantlo jivont zalo, ani “atam Devachea uzveak bosla. Ani tednam thaun to, Dev Aplea dusmanank tachea paiam tolla ghaltolo te ghoddiechi vatt polleit asa.”—Heb. 10:12, 13; St. 110:1; Prok. 12:10.
DEZEMBR 16-22
DEVACHEA UTRANTLE THEVE
“Bhirankull Monzatink Bhienakat”
(Prokasovnni 13:1, 2) Tednam somdirantlem ek savoz voir sorta tem hanvem pollelem. Taka dha xingam ani sat toklio asleo; tachea dor-eka xingacher ek mukutt ani dor-eke toklecher Devachi ninda kortolem ek nanv aslem. 2 Hanv dekhtalom tem savoz bibttea vaga sarkem distalem: tache pai vansvelachea paiam sarke asle ani tachem tondd xinvachea tondda sarkem. Aran tea savzak apli podvi dili ani tiche borabor apli sodor ani aplo vhodd odhikar.
w12 6/15 8 ¶6
Jehova “Gutt Ukte Korpi” Zaun Asa
6 Kristi Xokachea poilea xekddeachea xevottak, punorjivont zalolo Jezu apostl Juanvak eka fattlean ek veg-vegllea bhaxechim dorxonam dita. (Prok. 1:1) Eka dorxonant, Juanvan Devcharak suchit korta toslea eka savzak doriachea toddier ubem ravlam tem polloilem. (Prokasovnni 13:1, 2 vachat.) Tea somdirantlean ek vegllench savoz voir sorta, ani taka Devchara thaun vhodd odhikar melltta tem pasun Juanvan polloilem. Ek tambddea savzacheo sat tokleo, “sat patxai” vo sorkarank suchit kortat mhunn ek devdut Juanvak uprant sangta. Hi savoz, Prokasovnni 13:1-ant sanglolea savzachi murti zaun asa. (Prok. 13:14, 15; 17:3, 9, 10) Juanvan hem pustok borounchea vellar, tea tokleam modleo panch tokleo soron gelʼleo, ek raj choloitali, ani ek ‘ozun ieunk nasli.’ Tim rajeam, vo Sonvsaracheo Vorixtt Razvottkeo konn? Prokasovnni pustokant sanglolea savzachea sat toklencher dhean dium-ia. Hantuntlim zaitim rajeam, ostitvant ieunchea poilinch hanchea vixim Daniel-an boroilem tantunt bariksannechi mahiti koxi melltta, tem pasun ami polloitolim.
(Prokasovnni 13:11) Uprant anink ek savoz zomnintlem voir sortalem tem hanvem dekhlem. Taka eka menddrea vori don xingam aslim, ani tem eka ara bhaxen uloitalem.
(Prokasovnni 13:15) Poilea savzache murti bhitor jivitacho svas ghalun tika ulounk porian diunk dusrea savzak podvi dilli asli; ani jim konn dusrea savzache murtik nomoskar korina zatit, tancho jiv-ui kaddunk taka podvi dilli asli.
re 194 ¶26
Don Ragixtt Monzateancho Fuddo Korop
26 Tem kitem zaunk xokta? Sonvsarachi Vorixtt Razvottki, Anglo-Amerika. Hem poilea savzachi satvi tokli zaun asa, punn atam taka ek khas kam mellʼllam! Dorxonant taka ek vegllem savoz mhunn suchit kelolean, munxanchea itihasant tem svotontr toren koxem kam korta tacher dhean diunk amkam anik sompem zata. Hem don xingachem savoz don razvottkeank suchit korta, jeo ekach tempar raj choloitat, ek-dusrea thaun svotontr asat, punn mellon kam kortat. Taka “menddrea vori” don xingam asat. Hacho orth hi razvottki apunn xant ani akromonn korina tosli mhunn dakhoun dita. Hea toren ti apunn sonvsarantlea soglea lokamnim apnnaunk zata toslo ek boro sorkar mhunn dakhoita. Punn tea savzache ulovop “eka ara bhaxen” asa. Hacho orth tachi razvottki manun ghena tednam ti lokancher dobhav ghalta, dhomkaita ani toxench maramari pasun korta. Devachea Menddreachea odhikara khala aslolea Devachea Rajeak khalti zaunk ti urba dina. Bodlek, vhodd ar Soitana pasot kam korta. Raxttram modem zhogddim ani dves upzoita. Hea toren ti tea poilea savzachi bhokti korunk urba dita.
re 195 ¶30-31
Don Ragixtt Monzateancho Fuddo Korop
30 Itihas polloitat tednam hi murti mhunnttlear League of Nations, hem songotton mhunn kollon ieta. Hea songottnnechi survat korunk, taka urba diunk, ani tenko diunk Britain ani United States-acho hat asa. Uprant, Prokasovnni odheai 17-ant, hi murti ek novo akar gheun, svotontr zaun jietolea, eka jivea, svas gheupi tambddea rongacho savoz zaun uprasta. Hem ontoraxttria songotton ‘uloita,’ mhunnche fokot apunn xanti ani surokxotai haddunk xokta mhunn tem boddaio marta. Punn khorem mhunnttlear, hem songotton ek oslo zago zaun gelam zoim tantunt aslolim raxttram eka-meka sangata ninda kortat ani ragan bhorlolim utram uloitat. Toxench, tachea odhikarak nomoskar korina tea raxttrak vo lokank tem nakarta, vo tim jivim astanach tanchea lagim tem melolea sarkem vagta. Aplea ievzonnea pormonnem cholonant toslea raxttrank League of Nations-an bhair ghatleant. Vhodd sontapachea survatek, hea savzachea murtechim “xingam” mhunnche tachi zhuz korchi xokti nas korchea kamant uzar zatoli.—Prokasovnni 7:14; 17:8, 16.
31 Sonvsarachea dusrea zhuza uprant thaun atam United Nations songotton zaun aslolea hea savzachea murten dusreank jivexim marlea. Udharonnak, 1950-ant Utʼtor Korea ani Dokxinn Korea modem choltolea zhuzant, UN soin-an vantto ghetlo. UN soin, Dokxinn Korea sangata sumar 14,20,000 Utʼtor Korea-ntlea ani China-chea lokank jivexim marle. Toxench, 1960 thaun 1964-a modem, United Nations-ache soinen, Congo-nt (Kinshasa-nt) kam kelem. Tea bhair, sonvsarache fuddari pope Paul VI ani John Paul II hannim pasun hi murti munxakulla pasot xanti haddunk, xevottacho ani sogleam poros boro bhorvonso mhunn te sangot astat. Munis tea murtechi seva korinant zalear, te apnnachoch nas korun uddoitole mhunn te sangtat. Hea toren, murtechem manun ghenant tea munxank, ani tachi bhokti korinant tea munxank te eke bhaxen jivexim martat.—Dusri Somurt 5:8, 9.
(Prokasovnni 13:16, 17) Lhanank toxem vhoddank, girestank toxem goribank, nagrikank toxem gulamank, hankam soglleank aplea uzvea hatar vo kopalar ek xikʼko marunk tem boll kortalem. 17 Ani savzachea nanvacho vo tachea nanvachea ankddeacho xikʼko aslea bogor konnakuch vikunk vo viktem gheunk rojia nasli.
w09 2/15 4 ¶2
Prokasovnni—II Pustokantle Mukhel Mudʼde
13:16, 17. ‘Vikchem vo viktem gheunchea’ sodanchea kamant amkam kotthinaio aslear pasun, ami savzak amchea jivitacher hukum cholounk diuncho nhoi. Amchea ‘hatir vo kopolacher savzacho xikʼko’ marunk diuncho orth, amcheo korneo vo amchem chintop savzachea tabeant soddun divop.
Bible-ant Motiam Sodhum-ia
(Prokasovnni 16:13, 14) Tednam tin mhelle atme hanvem dekhle: te bebe koxe distale. Tantlo ek atmo arachea tonddantlo, dusro savzachea tonddantlo ani tisro khottea provadiachea tonddantlo bhair sorlo. 14 Vismitam kortat tosle devcharanche atme te. Te tin atme Sorpodvedar Devachea Vhoddlea Disachea zhuzak sonvsarantlea razank ektthai kortat.
w09 2/15 4 ¶5
Prokasovnni—II Pustokantle Mukhel Mudʼde
16:13-16. “Mhelle atme” vo ‘mhellim prerit utram’ (NW) hem, Devchar sogleak pavoitat tea mahitik suchit korta. Hi mahiti, Devachea ragachea sat aidonantlean otoita tednam prithumer aslolea razank Jehovachea vatten voichea bodlek tachea add vochonk uksaita.—Mt. 24:42, 44.
(Prokasovnni 16:21) Korveanche vhoddle fator, dor-ek sumar ponʼnas kilogramanchea vozonacho, mollbar thaun monxancher poddle. Ani korveanchea pausachea noxttak lagun, tem marekar vign zalʼlean, monxamnim Devacher jastio marleo.
w15 7/15 16 ¶9
“Tumchi Soddvonn Lagim Pavlea”!
9 To vell “Rajeachi bori khobor” porgottcho vell ascho na. To vell tednam meren soron gelʼlo astolo. Tednam “xevott” ieuncho vell ailʼlo astolo! (Mt. 24:14) Devache lok gombhir zhoddttecho sondex dhiran porgottʼttole. Te ghoddie Soitanachea noxttea sonvsaracho sompurnn toren nas zatolo mhunn porgottʼttole. Ho sondex korveam sarko astolo mhunn Bible-ant sanglam. Thoim mhunntta: “Korveanche vhoddle fator, dor-ek sumar ponʼnas kilogramanchea vozonacho, mollbar thaun monxancher poddle. Ani korveanchea pausachea noxttak lagun, tem marekar vign zalʼlean, monxamnim Devacher jastio marleo.”—Prok. 16:21.
DEZEMBR 23-29
DEVACHEA UTRANTLE THEVE
“Devachem Zhuz Soglea Zhuzancho Xevott Kortolem”
(Prokasovnni 19:11) Tednam mhaka sorg ukto zalʼlo dixtti poddlo, ani thoi ek dhovo ghoddo aslo. Tacher boslolo aslo Tachem nanv Visvaxi ani Satvik; To nitivontponnan monsubi korta ani nitivontponna pasot zhuzta.
(Prokasovnni 19:14-16) Tache pattlean vetalim dhovea ghoddeancher bosun ani dhovem-ful sonnachem nhesun sorginchim loskoram. 15 Raxttrank harounk Tachea tonddantli ek pazloli torsad bhair sortali. Eke lokhonddache betkattien To tancher raj choloitolo, ani Sorvpodvedar Devachea krodhacho ghanneant dako mollun soro bhair kaddtolo to Toch. 16 Tachea vostracher ani Tachea zangllacher boroilʼlem asa hem nanv: patxaiancho Patxai ani dhoniancho Dhoni!
w08 4/1 8 ¶3-4
Armagedʼdon—Soglim Zhuzam Kabar Korunk Devachem Zhuz
Noxtte lok odhikar choloitat titlea meren, nitivont lokank xanti ani surokxotaien ravonk mellchena. (Mhonnʼnneo 29:2; Upodexok 8:9) Khorem mhunnttlear, broxttachar ani noxtteponn kortat toslea lokam thaun ami he gunn kaddunk xokonant. Tor, sasnachi xanti ani neai bexttich mellchina, punn noxttea munxank kaddlea uprantuch mellttoli. Solomon-an oxem boroilem, “noxtto promannikak vaitt korta tem takach favo zatolem.”—Mhonnʼnneo 21:18.
Dev neai korta dekhun, noxtteam vixim to gheta to dor ek nirnnoi nitin ghetlolo astolo. “Akʼkhe prithumecho Monʼsubidar nit korcho na?” mhunn Abraham-an vicharlolem. Ani taka, Jehova sodanch sarkem tem korta! mhunn zobab mellʼllo. (Utpoti 18:25) Tea bhair, noxtteank nas korunk Jehova khuxal zaina, punn sogle proitn kelea uprantuch to xevottak noxtteancho nas korta mhunn Bible amkam bhorvonso dita.—Ezekiel 18:32; 2 Pedru 3:9.
it-1 1146 ¶1
Ghoddo
Apostl Juanvan polloilolea suchit korta toslea dorxonant, mhoimebhorit aslolo Jezu Krist dhovo ghoddo choloita ani tachea sangata dhovea ghoddeancher boson ek fouz asa ti tannem polloili. Aplo Dev ani Bapui Jehovachea sogllea dusmanam add Krist nitivontponnan ani neai-an zhuz kortolo mhunn dakhounk, hem dorxon Juanvak dilʼlem. (Prok. 19:11, 14) Hachea poilim, dorxonant veg-veglle ghoddesvar kitem-kitem gheun asat tem dakhoun, Krist Raza zaunchea vixim ani tednam prithumer zata tea vaittponna vixim chitrailam.—Prok. 6:2-8.
(Prokasovnni 19:19, 20) Uprant savzak ani sonvsarantlea patxaiank ani tanchea loskorank hanvem pollelim; Ghoddesvaracher ani Tache foujecher zhuz manddunk tim zomlolim. 20 Savzak dhorlem, ani tache borabor fottkirea provadiak; savzachea nanvan tannem vismitam kelʼlim tanche vorvim tea savzacho xikʼko ghetloleank ani tache murtik bhozloleank tannem fosoilʼlim. Ani savzak ani khottea provadiak zolltea gondhokachea ujeachea konddant jivinch xevttun uddoilim.
re 286 ¶24
Zhuzari-Raza Armagedʼdonant Zoit Vhorta
24 Somdirantlean bhair sorta teo sat tokleo ani dha xinganchem savoz Soitanachea Rajki songottnnek suchit korta, jem khotto provadi mhunnche sonvsarache vorixtt satve razvottke sangata nas zatolem. (Prokasovnni 13:1, 11-13; 16:13) Tem ‘jivench’ astana vo tem ektthaim zaun prithumer aslolea Devachea lokancho virodh kortana, tankam “zolltea gondhokachea ujeachea konddant” xevttile. Ho kondd khoreanich ek zago zaun asa kai? Na, karonn tem savoz ani khotto provadi pasun khorim zonvaram nhoi. Mornnak ani patallak vo mornnachea fonddak, toxench Devcharak uprant hangach xevttitole. (Prokasovnni 20:10, 14) Ho kondd noxttea lokank sasnak zolloita toslem ek ifern nhoi, karonn oslea eka zagea vixim chintunk pasun Jehovak kanttalo ieta.—Jeremias 19:5; 32:35; 1 Juanv 4:8, 16.
(Prokasovnni 19:21) Urlolea soglleancho Ghoddesvarachea tonddantli bhair sortali te torsadin jiv kaddlo, ani sogllim suknnim tanchem mas khaun dhadoxi zalim.
re 286 ¶25
Zhuzari-Raza Armagedʼdonant Zoit Vhorta
25 Sorkaranchea rajkaronnant bhag ghenant tosle, punn sudhorna toslea hea broxtt munxakullachea sonvsaracho bhag aslolea lokancho pasun “ghoddesvarachea tonddantli bhair sortali te torsadin jiv kaddlo.” Jezu tancher mornnachem formonn martolo. Tankam ujeachea konddant ghalchea vixim sangonk na dekhun, tanchem punorjivontponn zatolem mhunn ami mhunnonk zata kai? Jehovachea neai korpeachea hatan jivexim marlolea konnachench punorjivontponn zatolem mhunn sangona. Jezun khud sanglolem toxem, ‘xelli’ nhoi tankam “devcharak ani tachea dutank toiar kelʼlea sasnnachea ujeant,” ghaltole. (Matev 25:33, 41, 46) Hem “obhokti monxanchi zhoddti zaun tancho bhosm zatolo” tea disachea xevottak zatolem.—2 Pedru 3:7; Nahum 1:2, 7-9; Malaki 4:1.
Bible-ant Motiam Sodhum-ia
(Prokasovnni 17:8) Tunvem dekhlai tem savoz ekdam jivem aslem, punn atam jivem na; tem patallantlem voir sorchem asa ani tachem nisontton zatolem. Sonvsarachea orombak thaun jea monxanchim nanvam jiveanchea pustokar boroilʼlim nant, tim sogllim savzak polleun thottaktolim, karonn tem ekdam jivem aslem, uprant jivem na zalem, punn novean portun dixtti poddtolem.
re 247-248 ¶5-6
Ek Vhodd Gutt Ukto Zata
5 “Tem savoz . . aslem.” Hoi, Janer 10, 1920-a thaun hem savoz League of Nations zaun aslem zantunt 63 raxttram khoinchea-i eka vellar tacho bhag aslim. Punn uprant Japan, Germany, ani Italy tantuntlean bhair sorlim, ani adlea Soviet Union-ak League-a thaun bhair kaddlem. Setembr 1939-ant, Germany-chea Nazi fuddarean Sonvsarachem Dusrem Zhuz suru kelem. League of Nations sonvsarant xanti samballunk xokonk na dekhun tem kainch kam korunk xokona toslea eka patallant vo fonddant poddlea sarkem zalem. 1942 hem voros pavta toxem tem ani jivem uronk na. Hachea poilim vo hachea uprant Jehovan hea dorxonacho purnn orth somzaunk na, punn teach vellar somzailo! New World Theocratic Assembly-nt, N. H. Knorr-an hea bhakitachea adarit “tem savoz . . aslem” mhunn sangonk pavlo. Tannem uprant ho prosn vicharlo, “League, patallant vo fonddantuch urtolem kai?” Prokasovnni 17:8-a pormonnem tannem oso zobab dilo: “Sonvsarachea raxttranchem songotton portun voir sortolem.” Ani toxench ghoddlem. Jehovachea utrant sanglolem tem khorem zalem!
Patalleantlean Voir Sorta
6 Tambddea rongachem savoz patall vo fonddantlean bhair sorlem. Jun 26, 1945-ant khub bovall marun San Francisco, U.S.A.-ant, 50 raxttramnim United Nations songottnecho Charter ekmotan manun ghetlem. Hea songottnnen “sonvsarbhor xanti ani surokxotai samballunk” zai asli. League ani UN-a modem zaite vixoi ek-sarke asat.” The World Book Encyclopedia mhunntta: “Thoddea baptint UN, League of Nations-a sarkem asa, jem Sonvsarachea Poilea Zhuza uprant staplolem . . . League stapon kelolea choddxea raxttramnim UN pasun stapon kelem. League-a sarkem UN pasun raxttram modem xanti samballunk staplolem. UN-ache mukhel bhag, League-ant asat tachea sarke asat. Tor tambddea rongachem savoz porot jivem zavop, khoreamnim UN stapon zavop suchit korta. Fokot 63 raxttram League-ache sodoxio asle, punn UN-ant aslole sodoxio tachea poros chodd, mhunnche 190 raxttram asat. Tea bhair, UN-an, League-a poros chodd zobabdari samballʼllea.
(Prokasovnni 17:16, 17) Punn tunvem polleleai tim dha xingam ani savoz xindoll-bailecho dves kortolim; tiche lagim asa titlem-i luttun kaddtolim, ani tika nagddi korun soddtolim; tichem mas khatolim ani ujean ticho bhosm kortolim. 17 Kiteak Devachem utor pallon ie porian, Devan Aplo hetu tanchea monant ghala ani oso tannim aplo razodhikar savzache adhin korcho mhonn Tannem tankam ekmotache keleat.
w12 6/15 18 ¶17
“Rokddea-Rokddem Kitem-Kitem Ghoddchem Asa” Tem Jehova Kolloita
17 Khotto dhorm hollu-hollu kabar zauncho na. Xindoll bailecho dobhav chodd astolo. Odhikar asloleanchea monant Dev apli ievzonn ghalta tea meren, ti apnnank zai toxi razank aplea tambeant gheunk proitn korit ravtoli. (Prokasovnni 17:16, 17 vachat.) Beginuch Jehova United Nations-ak, jem Soitanchea sonvsarache rajki xoktenk suchit korta, taka uzar korun khottea dhormacho nas kortolo. Te ticho probhav ani tichi girestkai nas kortole. Thoddeach vorsam poilim hem zaunkuch xokona oxem distalem. Punn aiz ti xindoll bail tambddea rongachea savzacher halot-dolot boslea. Hacho orth, ti sovkas nisron poddttoli oxem na. Ti ovchit ani zobordosten poddttoli.—Prok. 18:7, 8, 15-19.
DEZEMBR 30–JANER 5
DEVACHEA UTRANTLE THEVE
“Polleiat, Soglleo Vostu Hanv Noveo Kortam”
(Prokasovnni 21:1) Hanvem ek novem mollob ani ek novi prithum dekhlim. Poilem mollob ani poili prithum nanch zalim, ani somdir-ui nanch zalo.
re 301 ¶2
Ek Novem Mollob ani Ek Novi Prithum
2 Juanv jieunchea xemboramnim vorsam poilim, Jehovan Izaias-ak oxem sanglolem: “Atam Hanv novo sorg ani novi prithum rochunk vetam, adlea kallachi anink iad aschi na, monxachea monant anink tacho ugddas ieuncho na.” (Izaias 65:17; 66:22) 537 K.X.A.-ant visvaxi Judev, 70 vorsam Babilon-ant koidi zaun porot Jerusalem-ant aile tednam hem bhakit poile pavtt purnn zalem. Te porot aile tednam, te ek “novi prithum” zale mhunnche ek nitoll somaz, jem eka ‘novea sorga’ khala asle, mhunnche eka novea sorkarachea manddavolle khala asle. Punn, hem bhakit anik ek pavtt purnn zatolem mhunn apostl Pedrun sanglem. Tannem mhunnttlem: “Ami novea mollbachi ani nove prithumechi vatt polletanv, kiteak oxi Devan amkam bhas dilea: thoi sogllem Devak manta toxem zatolem.” (2 Pedru 3:13) Atam Juanvan, hi bhasaunni Somiachea Disamnim purnn zatoli mhunn dakhoun dili. “Poilem mollob ani poili prithum,” mhunnche Soitan ani tachea dutanchea probhavant aslolo ho sonvsar, zantunt sonvsarantlim sorkaram mellon asat tim soron voitolim. Uchamboll ‘somdira’ sarke aslole noxtte, Deva add vochpi munxakull ostitvant aschem na. Tachea bodlek, ek “novem mollob ani ek novi prithum” mhunnche Devachem Raj, hea novea sorkara khala munxancho ek novo somaz astolo.—Prokasovnni 20:11, sor kor.
(Prokasovnni 21:3, 4) Ho polleiat monxam modem Devacho Tombu! To tanchea sangata ravtolo, tim zatolim Tachi porza ani Hoch tanchea-sangata-Dev zatolo tancho Dev. 4 Tanchea dolleantlim sogllim dukam To pusun kaddtolo; moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott soron gelem.”
w13 12/1 11 ¶2-4
“Polleiat, Soglleo Vostu Hanv Noveo Kortam”
“Tanchea dolleantlim sogllim dukam To [Dev] pusun kaddtolo.” (Prokasovnni 21:4) Koslea torechi dukam to pustolo? Khuxalkaiechi dukam vo amchea dolleanchi rakhonn kortat tim dukham nhoi. Dev hanga tras ani dukhak lagon ietat tea dukam vixim bhasaita. Toslim dukam to fokot bhailean puschona; punn oslim dukam vhanvchim karonnam pasun mhunnche tras ani dukh pasun kaddttolo.
“Moronn anink aschem na.” (Prokasovnni 21:4) Moronn amchea hea dusmanak lagon ami jitlim dukam golloitat, titlim ami anik khoincheach karonnak lagon golloinant. Aplem aikotat tea munxank, Jehova mornnachea fasantlo soddoitolo. Koso? To, munis moronk mukhel karonn mhunnche Adanvam thaun ailolem patok kabar korun uddoitolo. (Romkarank 5:12) Jezuchea soddvonnechea bolidana udexim Jehova aplem utor aikotoleank poripurnn kortolo. Tednam nimanno dusman moronn, hacho ‘bhosm zatolo.’ (1 Korintkarank 15:26) Devan ievjilam toxem, visvaxi aslole munis jieunk pavtole, mhunnche poripurnn bolaiken sasnank jietole.
“Dukh anik . . . aschem na.” (Prokasovnni 21:4) Kosle toreche dukh aschem na? Patok ani opurnnotaiek lagon zalam tem soglea torechem mansik, bhavnatmik, ani kuddichem dukh zannem mezunk zaina titlea lakʼkhamnim lokanchem jivit trasamnim bhoron dovorlam.
(Prokasovnni 21:5) Uprant xinvasonar boslolo asa Tannem mhollem: “Polleiat, soglleo vostu Hanv noveo kortam!” Tannem mhaka anink-ui sanglem: “Hem boroun dovor, kiteak him utram khatrechim ani sotachim.”
w03 8/1 12 ¶14
Sotacho Dev, Jehova
14 Jehova amkam aplea utra udexim jem sangta, tem ami korunk zai. To aplea vixim kitem sangta tem khorem zaun asa, ani to jem kortolo mhunn sangta, tem to kortoloch. Ami Jehovacher purnn bhorvonso dovrunk zata. “Devak vollkhun ghenant ani amchea Somia Jezuchem Xubhvortoman manun gheunk kobul nant tankam to xikxa laitolo” mhunn Jehova sangta tednam, tacher ami patieunk zata. (2 Tesalonikekarank 1:8) Toxench, Jehova apunn nitivontponnan jietoleancho mog korta, bhavarth tthevtat tankam sasnachem jivit dita, ani dukh, rudon, ani moronn kaddtta mhunn sangta tednam pasun ami tacher khatri dovrunk zata. Apli hi xevottachi bhasaunni khori mhunn zor diunk Jehovan apostl Juanvak oxem borounk preronna dili: “Hem boroun dovor, kiteak him utram khatrechim ani sotachim.”—Prokasovnni 21:4, 5; Mhonnʼnneo 15:9; Juanv 3:36.
Bible-ant Motiam Sodhum-ia
(Prokasovnni 20:5) Hem poilem punorjivontponn. Hozar vorsam bhorche adim her melʼlim monxam punorjivont zaunk nant.
it-2 249 ¶2
Jiv
Adanvak dilolea adnea vorvim, Adanvan aplem aikolem zalear to morcho na mhunn Dev sangonk sodhtalo. (Ut. 2:17) Tor munxacho nimanno dusman, mornnacho bhosm zatolo tednam, Devachem utor pallttolea munxakullak moronn haddunk tanchea kuddi bhitor patok aschem na. Tim ani kednanch morchimnant. (1Kor. 15:26) Kristachea razvottkechea xevottak mornnacho bhosm zatolo. Ti razvottki, Prokasovnni pustoka pormonnem ek hozar voros lamb kallachi astoli. Tea bhair Krista sangata Raza ani iadnik mhunn astoleam vixim oxem sanglam: “Tim sogllim novean jivim zalim ani hozar vorsam-bhor tannim Krista borabor razvottki choloili.” Ani fuddem sangleant tim, “hozar vorsam bhorche adim” punorjivont zaunk nant tim “her melʼlim monxam” tim munxam zait, jim hozar vorsachea xevottak punn Soitanak patall vo fondda thaun suttounchea poilim jivim astolim. Hozar vorsachea xevottak pavtana prithumer aslole lok, Adanv ani Eve patok korchea poilim aslolim tea toren poripurnn zatole. Tankam khoreamnich poripurnn jivit mellttolem. Tachea uprant, Soitanak patallantlean thoddeach vellak lagon suttka mellttoli. Tea vellar zatolea porikxent je konn visvaxi ravtole tankam sasnachem jivit onnbhovunk mellttolem.—Prok. 20:4-10.
(Prokasovnni 20:14, 15) Tednam mornnak ani patallak ujeachea konddant xevttilim. (Hem ujeachem kondd mhollear dusrem moronn.) 15 Zanchim nanvam jiveanchea pustokar boroilʼlim naslim, tankam soglleank ujeachea konddant xevttilim.
it-2 189-190
Ujeachem Kondd
Him utram fokot Prokasovnni pustokant uzar keleant ani hem kitem tori suchit korunk uzar kelam. Bible hacho orth oso dita: “Hem ujeachem kondd mhollear dusrem moronn.”—Prok. 20:14; 21:8.
Prokasovnni pustokant ujeachea kondda vixim zoim sanglam, tachea bhonvtonnchea versancher ami dhean ditat tednam, hem kondd suchit korta toslem mhunn kollon ieta. Mornnak, hea ujeachea konddant xevttitolem mhunn sanglam. (Prok. 19:20; 20:14) Mornnak khoreamnim zollounk zaina. Toxench, Devchar pasun dolleak disona toslo vaitt ainz zaun asa, zaka ujeachea konddant xevttila. To otmo zalʼlean taka khorea ujeant xevttilo zalear taka kainch zaunchem na.—Prok. 20:10; Sutt. 3:2 ani Fudd. 13:20 sor kor.
Ujeachem kondd ‘dusrea mornnak’ suchit korta. Toxench, Prokasovnni 20:14 “mornnak ani patallak” konddant xevttitolim mhunn sangta tednam hem kondd Adanvam thaun munxak ailolea mornnak (Rom. 5:12), vo patall (Sheol) vo fonddak suchit korina mhunn kollon ieta. Tor hem anik eka torechea mornnak suchit korta, oslem moronn zachea uprant eklo porot jivont zaunk xokona, karonn Adanva udexim ailolea moronnan ani patallan (Sheol) aplea adhin aslolea munxank porot dile mhunn Bible sangta. Punn, ‘kondda’ vixim oxem khoinch sangona. (Prok. 20:13) Toxem zalʼlean, zanchem nanv “jiveanchea pustokar” boroilolem na, zoxem te lok je poschatap korinastana Devachea Raz-odhikara add voitat tankam hea ujeachea konddant xevttitole. Hacho orth tancho sasnank nas zatolo mhunnche tankam dusrem moronn favo zatolem.—Prok. 20:15.