Novembr—Jivit ani Porgottnni Mittingechea Pustike Pasot Modot
NOVEMBR 4-10
DEVACHEA UTRANTLE THEVE
“Sonvsaracho ani Sonvsarantlea Vostuncho Mog Korum Nakat”
(1 Juanv 2:15, 16) Sonvsaracho ani sonvsarantlea vostuncho mog korum nakat. Sonvsaracho mog kortat tea monxam sovem Bapacho mog na; 16 kiteak sonvsarant mellta tem itlench: kuddichi moriadi-bhaili vondovnni, dolleanchi lobhi axa ani girestkaiechi boddai. Hem sogllem Bapa-sun nhoi punn sonvsarantlem upzota.
w05 1/1 10 ¶13
Jezun Dovorloli Dekh Apnnaiat
13 Sonvsarant asa tem soglem chukichem nhoi mhunn thoddim sangonk puro. Toripunn, sonvsar ani tachem akorxonn, Jehovachea sevecher aslolem amchem dhean sompeponnim dusrea vostuncher vhoronk xokta. Ani sonvsar dita ti khoinchich vost amkam Devachea lagim haddina. Tor, ami sonvsarachea vostuncho, mhunnche jeo vostu ghoddie chukicheo pasun nasot tacho mog kelo zalear tem dhokeachem zaunk xokta. (1 Timotak 6:9, 10) Tea bhair, sonvsarant asa teo choddxeo vostu sarkeoch vaitt asat ani teo amkam broxtt korunk xoktat. Ami hinvsa, girestkai, vo loingik onoitiktai oslea vostunk urba ditat toslim cholchitram vo TV program polloitat zalear, ami hollu-hollu teo vostu chukicheo nhoi mhunn chintunk lagot, ani uprant teo vostu amkam ek tallnni zaunk xoktat. Aplea jieunchea ritint sudharnni korop vo poixe korunk veg-veglleo vatto sodop, osleach vostumnim dhean-mon aslolea lokam sangata ami vell sartat zalear, amkam pasun teo vostu chodd gorjecheo distoleo.—Matev 6:24; 1 Korintkarank 15:33.
(1 Juanv 2:17) Tor sonvsar ani tacheo vondovnnio don disam bhitor nanch zatat. Punn jim konn Devachi khuxi palltat, tim sasnnak togtat.
w13 8/15 27 ¶18
Tumi Kosle Torechim Munxam Zaunk Zai Tem Polloiat
18 ‘Sonvsarantleo vostu’ nakarunk anik ek modot mhunnttlear, Juanvan preronnan boroilolim utram ugddas dovrop: “Tor sonvsar ani tacheo vondovnnio don disam bhitor nanch zatat. Punn jim konn Devachi khuxi palltat, tim sasnnak togtat.” (1 Juanv 2:17) Soitanacho sonvsar sodam urta toslo ani khoro mhunn disonk puro. Punn, ek dis to kabar zatolo. Soitanacho sonvsar amkam sodanch urta toslem kainch diunk xokona. Hem motin dovorlolean, Devcharachea tallnneant poddonastana ravonk amkam modot zatoli.
Bible-ant Motiam Sodhum-ia
(1 Juanv 2:7, 8) Mhojea mogachea bhurgeamno, hanv tumkam novi adnia boroun dhaddina, punn ek adli adnia, survatek thaun tumi ghetlea tich. Hi adli adnia mhollear tumi poilim thaun ghetlo toch sondex. 8 Tori astana, hanv tumkam novean boroun dhaddtam ti khorench novi adnia: Karonn kallokh ubun veta ani khoro uzvadd porzollunk laglo.
w13 9/15 10 ¶14
Jehovacheo Suchounneo Patieupa Sarkeo
14 Grek Bhaxen Boroilolim Bible-antlim Pustokam, ami eka-mekak mog dakhounk zai mhunn zaite pavtti amchea ugddasak haddttat. Somurtichi dusri vhoddli adnea, “tuzoch kortai toso, tujea peleacho mog kor” mhunn Jezun sanglem. (Mt. 22:39) Toxench, Jezucho sauto-bhav Jakob-an, mogak, “Rajeacho mukhel kaido” mhunnttlo. (Jak. 2:8) Apostl Juanv-an boroilem: “Mhojea mogachea bhurgeamno, hanv tumkam novi adnia boroun dhaddina, punn ek adli adnia, survatek thaun tumi ghetlea tich.” (1 Juanv 2:7, 8) Tor “adli adnia” mhunnttana, Juanv khoinchea adnea vixim sangtalo? To mog korchea kaidea vixim sangtalo. Ti “adli” asli, karonn Jezun ti adnea zaitim vorsam poilim diloli, mhunnche “survatek.” Punn ti “novi” pasun asli, karonn tantunt svotacho teag korta toslo mog mellon aslo zo novea oddchonneancho fuddo korunk xisank gorjecho aslo. Sonvsaracho ap-svarthi sobhav xezaream pasot amkam aslolo mog unno korunk xokta. Tor, Kristache xis zalolean oslea sobhava thaun pois ravonk amkam mellttat tea xittkaunneancho ami valor korinant kai?
(1 Juanv 5:16, 17, Povitr Pustok – Novo Korar) Konn eklo aplo bhav moronn-haddinam toslem patok korta mhonn pollet zalear tache khatir tannem prarthon korchem ani Dev toslea patkeak jivit ditolo. Moronn-haddta toslem patok asa: oslem patok korteleam khatir tumim prarthon korchem mhonn hanv sanginam. 17 Koxe-i bhaxen vaitt korunk mhollear patok, punn moron haddinam toslem patok asa.
it-1 862 ¶5
Bhogsonnem
Dusreanchea patkam pasot, eka akʼkhea sobhe pasot pasun Deva lagim bhogsonnem magop sarkem zaun asa. Moizesan Israel raxttra pasot tem kelem, tannem tanchea patkam pasot bhogsonnem maglem, ani Jehovan tachem aikolem. (Lok. 14:19, 20) Toxench, Solomonan Jehovak Devmondir bhettounchea vellar pasun, lokamnim patok kelem tednam, tim apli chukichi vatt soddun Jehova lagim ietat tednam tankam bhogos mhunn maglem. (1Raz. 8:30, 33-40, 46-52) Aplea desant porot ailolea Judev lokam pasot uloun Ezran sogleam mukhar tanchea patkam vixim sanglem. Tannem kallzant thaun maglem, ani lokank urba dili dekhun lokamnim Jehovachem bhogsonnem mellonk pavl ghetlem. (Ezd. 9:13–10:4, 10-19, 44) Jakoban, eka orthant duent aslolea, vo Jehovachi ixttagot hogddailolea munxan, sobhentlea zantteank apoun aplea pasot magnnem korunk urba dili. Ani tednam tea munxan ‘patok kelam zalear, taka Devachem bhogsonnem mellttolem.’ (Jak. 5:14-16) Punn, “moronn-haddta toslem patok” pasun asa. Hacho orth, eklo zannam zaun mudʼdom patok korit ravta zalear to povitr xokte add patok korta ani taka bhogsonnem na. Osle torechem patok kortoleam pasot eka Kristanvan magnnem korchem nhoi.—1Ju. 5:16; Mt. 12:31; Heb. 10:26, 27; SIN, I; SPIRIT polloi.
NOVEMBR 11-17
DEVACHEA UTRANTLE THEVE
2 JUANV 1–JUDAS
“Sotant Ravonk Ami Zhuzonk Zai”
(Judas 3) Mhojea pritichea bhavam- bhoinnimno, amam-somestanchea taronna vixim hanv tumkam borounk axen otrektalom; punn hea vellar tumkam hanvem borounchi vhodd goroz asa mhonn mhaka dislem; ani ti mhollear Devachea sogllea bhoktank dilʼlea bhavartha pasot tumi dhiran zhuzchem mhonn tumkam ulo marunk.
w04 9/15 11-12 ¶8-9
“Somiachea Podvechea Bollan, Tumi Ghott Zait Ravat”
8 Bible-ant Soitanachea naddbudi vixim sanglam dekhun ami tachi chal vollkhotat. (2 Korintkarank 2:11) Soitanan, nitivont munis Job-ak ekdom gorib kelo, tachea mogacheank marun udoilim, tache bailen tacho virodh kelo, tacher duens ailem, ani khottea ixttamnim tachi ninda keli. Job niraxi zalo ani Devan taka soddun dilo mhunn taka dislem. (Job 10:1, 2) Job-acher tras haddle toxe ghoddie Soitan amcher aiz haddchona punn, osle tras amcher ghoddie ie-it, ani Devchar tacho faido kaddunk xokta.
9 Hea xevottachea disamnim Deva lagim ixttagot moddunk pavoitat tosle dhoke vaddleat. Devachea sevent dhei dovorchea poros girestkai melloun gheunk amchem dhean voddtta toslea sonvsarant ami jietat. Kazara bhair kuddicho sombond dovorlolean dukh nhoi, punn sontos melltta mhunn aiz sonvsarant ami polloitat ani aikotat. Ani choddso lok “Deva poros chodd kuddichea sukhancho mog korpi” zaleat. (2 Timotak 3:1-5) Hea torechem chintop Jehova sangata asloli amchi ixttagot ami dokheant ghalunk xoktat. Taka lagon ami ‘bhavartha pasot dhiran zhuzonk’ zai.—Judas 3.
Bible-ant Motiam Sodhum-ia
(Judas 21) Devachea mogant thir ravat, ani amcho Somi Jezu Krist aple kaklutin ditolo tea Sasnnik Jivitachi vatt polleit ravat.
lv 5-7¶3
3 Aplea moga thaun amkam sodanch faido mellʼllolo Jehovak zai. Punn ami to faido melloun ghetolim vo na tem amcher asa. Devachem Utor amkam xittkaita: “Devachea mogant thir ravat . . . Sasnnik Jivitachi vatt polleit ravat.” (Judas 21) “Devachea mogant thir ravat” him utram Devachea mogant ravonk zai zalear, ami kitem tori korunk zai mhunn dakhoun ditat. Ami taka omke-omke toren mog dakhounk zai. Tor ami amkanch vicharunk zai to mhotvacho prosn ho zaun asa, ‘Deva pasot aslolo mog hanvem koso dakhounk zata?’ Hacho zobab apostl Juanvan preronnan boroilolea utram thaun amkam melltta. Thoim oxem mhunntta, “Devacho mog korop mhonnge tacheo adnia pallop; Ani tacheo adnia zhodd nhoi.” (1 Juanv 5:3) Ami amchea Devacho kitlo mog kortat mhunn dakhounk sodhtat dekhun, hea utrancho orth ami bariksannen zannam zavop gorjechem.
(Judas 14, 15) Adanva pattlo satvo mull-purux Enok, hannem tanche vixim adim-fuddem oxem bhakit korun dovorlam: “Ho polleiat, hozaranche hozar aplea povitr dutank gheun Sorvespor ieta. Soglleanchi monsubi korunk ani devdhorm nasloleancher tanchea odhormi kortubam pasot ani tannim Devachi ninda kelʼlea pasot khastichem formonn marunk To ieta.”
wp17.1 12 ¶1
“To Devak Manovlolo Monis”
Enokan kitem bhakit kelʼlem? Tem bhakit oxem mhunntta: “Ho polleiat, hozaranche hozar aplea povitr dutank gheun Sorvespor ieta. Soglleanchi monsubi korunk ani devdhorm nasloleancher tanchea odhormi kortubam pasot ani tannim Devachi ninda kelʼlea pasot khastichem formonn marunk To ieta.” (Judas 14, 15) Dhean diat, hanga Enok butkallant uloilo, zoxem Devan tem bhakit adinch purnn kelʼlem. Tachea uprant kelʼlea zaitea bhakitamnim pasun hich rit apnnailea. Tor hacho orth oso asa: Tem bhakit ghoddttolench mhunn itli khatri asli, ki provadi ti fuddarachi ghoddnni adinch ghoddlolea bhaxen uloile!—Izaias 46:10.
wp17.1 12 ¶3
“To Devak Manovlolo Monis”
Enokachea bhavartha vixim ami niallttat tednam, ami amkanch vicharunk puro, Dev ho sonvsar jea toren polloita teach toren ami pasun polloitat kai? Enokan dhiran jea zhoddtte vixim bhakit kelolem tem tachea disamnim lagu zatalem toxench tem aiz pasun lagu zata. Enokan dilolea xittkaunne pormonnem, Noahchea disamnim Devachi bhokti korinaslolea tea sonvsaracho Jehovan vhodd buddtti haddun nas kelo. Tosle torechem nisontton fuddarakui vhodd promannan ghoddchem asa. (Matev 24:38, 39; 2 Pedru 2:4-6) Tea tempar zalolem toxem, aiz pasun Devachi bhokti korinaslolea hea sonvsaracher zhoddtti korunk, Dev hozaranche-hozar povitr dutam sangata toiar asa. Ami dor eklean Enokan dilolea xittkaunnecher dhean diun, ti dusreank pasun sangonk zai. Ami amchea famili vo ixttam poros vegllim aslolean amkam ghoddie kednam-kednam eksurponn disot. Punn Jehovan Enokak soddun diunk na, ani aiz pasun aplea visvaxi sevokank to kednanch soddcho na!
NOVEMBR 18-24
DEVACHEA UTRANTLE THEVE
“Tunvem Kitem-Kitem Kam Kelai Tem Hanv Zannom”
(Prokasovnni 1:20) Mhojea hatant dhorlolim sat noketram tunvem polleleai ani toxench sat bhangaracheo divlio, tanchi gupit somzonni hi: sat noketram mhollear sat povitr-sobhanche dut, ani sat divlio mhonnge sat Povitr-Sobha.
w12 10/15 14 ¶8
Tumi Koslo Sobhav Dakhoitat?
8 Jezuchea “hatant . . . sat noketram” asat mhunn Bible dakhoita hem ami ugddasak dovrunk zai. “Noketram,” obhixikt vhoddilank, ani her soglea vhoddilank pasun suchit korta. Jezu aplea hatant asat tea ‘noketrank’ apleak zai toxi vatt dakhounk xokta. (Prok. 1:16, 20) Tor Kristi sobhecho Mostok zaun aslolea Jezuk vhoddilancher purnn tabo asa. Khoinchea-i vhoddilak nittaier haddchi khoreanich goroz asa zalear, zache ‘dolle ujea porim zhogzhokta’ to, aplea vellar ani aplea toren tem kortoloch. (Prok. 1:14) Titlea meren, povitr xokten nemleat tankam ami kallzant thaun resped ditat. Karonn Paulun boroilem: “Tumche vhoddil bhar gheun tumchea jivachi kallji ghetat, kiteak tannim aplea vavracho Devak hixob diunk zai; tor tanchem utor aikat ani tankam khaltim ravat. He bhaxen, te aplo vavr khuxal monan kortole; na zalear, te aplo vavr kortole punn haskar-suskar soddun, ani hem tumkam faideachem zaunchem na.”—Heb. 13:17.
(Prokasovnni 2:1, 2) Efezantle Povitr-Sobhechea dutak oxem boroi: Aplea hatant sat noketram dhorun asa ani sat bhangarachea divliam modem bhonvta tacho sondex ho: 2 Tunvem kitem-kitem kam kelai tem hanv zannom, kitlo bhar tunvem ghetlai ani kitle thiraien tum vavurlai, tachi mhaka khobor asa; khotte monis tuka manonant mhonn hanv zannom; ani konn dhormdut nhoi astana apunn dhormdut mhonn sangtat tanchi porikxa tunvem keleai, ani te fottkire mhonn tuka kollon ailam.
w12 4/15 29 ¶11
Taronn Mellonk Jehova Amkam Rakhta
11 Prokasovnni odheai 2 ani 3-ant aslolea dorxonant, mhoimebhorit Jezu Krist, Azia Minor-ant aslolea sat sobhanchi topasnni korta. Sobha chodd korun koslo sobhav dakhoitat tacheruch nhoi, punn umkeach poristhitint ti sobha kitem korta tacher Krist dhean dita mhunn hem dorxon dakhoita. Thodde pavtti, to umko bhav vo bhoinnim vixim sangta, ani dor ek pavtti to xabaski vo solʼlo dita. Hem kitem dakhoun dita? Hem dorxon purnn zalem tednam, teo sat sobha 1914-a uprant aslolea obhixikt Kristanvank suchit kortat ani tea sat sobhank dilolo solʼlo, Devachea lokancheo, sonvsarbhor aslolea soglea sobhank lagu zata. Toxem zalolean Jehova aplea Puta udexim aplea lokank bore toren margdorxon di-it asa mhunn ami mhunnonk zata. Tea margdorxonacho amkam koso faido zata?
w01 1/15 20-21 ¶20
Jehovachea Songottnne Sangata Cholat
20 Vaddavoll zata toslea Jehovache songottnne sangata cholonk, ami Jezu Kristak, zaka ‘sobhecher odhikar’ asa vo zaka Sobhecho Mostok mhunn Devan nemla, tachi podvi vollkhon gheunk zai. (Efezkarank 5:22, 23) Izaias 55:4-ant jem sanglam tem pasun mhotvachem asa. Thoim mhunntta: “Polle, porzam mukhar Hanvem [Jehovan] taka sakxi korun dovorla; raxttrancho fuddari ani odhipoti Hanvem taka nemla.” Amkam koxi vatt dakhounchi ti Jezuk khoreanich khobor asa. To aplea xelleam vixim ani tanchea kamam vixim zannam. Azia Minor-ant aslolea sat sobhank tannem topasnni keloli tednam tannem panch pavtti oxem mhunnttlem: “Tunvem kitem-kitem kam kelai tem hanv zannom.” (Prokasovnni 2:2, 19; 3:1, 8, 15) Jezucho Bapui Jehova zannam toso Jezu pasun amcheo gorzo zannam. Magnnem koxem korchem tem sangchea poilim, Jezun mhunnttlem: “Tumkam kitem goroz tem tumi Tache lagim magche adinch tumcho Bap zanno.”—Matev 6:8-13.
Bible-ant Motiam Sodhum-ia
(Prokasovnni 1:7) Ho polleiat kupam voir To ieta! Sogllim, Taka topla tim legun, Taka polletolim. Ani sonvsarantleo soglleo porza Tachem dukh kortoleo! Hem khorem! Amen!
kr 226 ¶10
Devachem Raj Aplea Dusmanancho Nas Kortolem
10 Zhoddttechem Formonn. Devachea Rajeachea soglea dusmanank magir ek ghoddnni pollouchich poddttoli, ji tanchem dukh anik vaddoitoli. Jezun sanglem: “Ani tednam soglle podven ani dobajean kupancher ietolea Monxachea Putak dekhtolim.” (Marku 13:26) Hi sorga voili xokti polloitana Jezu zhoddttechem formonn marunk aila mhunn kollttolem. Jezun sanglolea nimannea disam vixim aslolea hea bhakitachea anik eka bhagant, to hea vellar zatolea zhoddttechea formonnachi anik bariksannechi mahiti dita. Ti mahiti amkam xelleachea ani bokddeachea voparent melltta. (Matev 25:31-33, 46 vachat.) Devachea Rajeachea visvaxi sevokancho, ‘xelli’ mhunn zhoddtti zatoli ani tanchi ‘soddvonn lagim pavlea’ mhunn tim ‘[tancheo] toklio uklun dhortolim.’ (Lukas 21:28) Ani Rajeacho virodh kortoleancho, ‘bokde’ mhunn zhoddtti zatoli ani tankam ‘sasnak khast’ favo asa mhunn zannam zaun tim aplim “hoddʼddim boddoitolim.”—Mt. 24:30; Prok. 1:7.
(Prokasovnni 2:7) Jem kitem Atmo Povitr-Sobhank sangta, tem kan asloleamnim aikunchem: zoit vhortoleank Devachea Voikunttant asa tea Jivitachea rukhachem foll Hanv khaunk ditolom.
w09 1/15 31 ¶1
Prokasovnni Pustokantle Mukhel Mudʼde—I
2:7—‘Devachem Voikutt’ mhunnttlear kitem? Him utram obhixiktank mhunnttleant dekhun, hem voikutt, sorgar voikutta sarko aslolo zago, mhunnche Dev asa to zago asonk zai. Visvaxi obhixiktank “jivitachea rukhachem foll” khauncho inam mellttolo. Tankam omor jivit mellttolem.—1 Kor. 15:53.
NOVEMBR 25–DEZEMBR 1
DEVACHEA UTRANTLE THEVE
“Char Ghoddesvaranchi Dhanvott”
(Prokasovnni 6:2) Ani polle zalear, ek dhovo ghoddo hanvem dekhlo. Ghoddear boslolo aslo tache kodde ek dhonu aslem: taka ek mukutt dilo. To jikit jikit gelo ani zoita pattlean zoit vhorunk bhair sorlo.
wp17.3 4 ¶3
Char Ghoddesvar—Te Konn?
Dhovo ghoddo cholovpi konn? Tachi vollokh sodhun kaddunk Bible-antlem Prokasovnni pustok modot korta, zoim tea sorga voilea ghoddesvarachi vollokh uprant “Devacho Sobd” mhunn dilea. (Prokasovnni 19:11-13) Sobd, oxem Jezu Kristak mhunnttlam, karonn to Devacho sondex diupi zaun asa. (Juanv 1: 1, 14) Tea bhair, taka “Patxaiancho Patxai ani Dhoniancho Dhoni,” ani “Visvaxi ani Satvik” mhunn vornnon kelam. (Prokasovnni 19:16) Toxem zalolean, ek zhuzari raza zauncho odhikar taka asa, ani to apli xokti broxtt ritin, vo vaitt toren uzar korina. Punn, thodde prosn upzotat.
wp17.3 4 ¶5
Char Ghoddesvar—Te Konn?
Ghoddesvaranchi dhanvott kednam suru zali? Dhean diat, poilo ghoddesvar Jezun, apleak mukutt mellʼllo tednam apli dhanvott suru keli. (Prokasovnni 6:2) Jezuk sorgar mukutt kednam mellʼllo? To moron sorgar vochon taka rokddoch to mukutt mellonk na, punn taka thoddo temp ravcho poddlo mhunn Bible dakhoita. (Hebrevank 10:12, 13) Apnnank ravcho poddlo to temp sompon to sorgar raza zalo to vell vollkhonk Jezun aplea xisank ek vatt dakhoili. Aplea razvottkechea survatek, sonvsarantli poristhiti chodd ani chodd vaitt zatoli, jednam zhuzam, dukholl ani pidda astoli mhunn tannem sanglem. (Matev 24:3, 7; Lukas 21:10, 11) 1914-ant Sonvsarachem poilem zhuz suru zalem tednam, munxakull oslea eka tempar jieunk laglem mhunn kollon ailem. Hea trasant bhorlolea prithumechea poristhitik Bible-ant “nimanne dis” mhunnttlam.—2 Timotak 3:1-5.
(Prokasovnni 6:4-6) Dusro ek ghoddo bhair sorlo; to tambddo-lal aslo. Tacher boslolo aslo taka sonvsarant xanticho nas korunk ani monxamnim eka-mekacho jiv kaddche khatir tankam challounk podvi dili; dekhun tachea hatant ek vhoddli torsad ghali. 5 Uprant Menddrean tisro xikʼko foddlo, ani tisri jivi rochnna Ie mhonntta tem hanvem aikolem. Polle zalear, ek kallo ghoddo mhaka dixtti poddlo; tacher boslolo aslo tachea hatant ek tagddi asli. 6 Char jivea rochnnam modlo ailʼle porim ek tallo hanvem aikolo. To oxem sangtalo: “Eka dinarak xer-bhor gonv, ani eka dinarak zovache tin xer. Zoitunanchea ani dakvelinchea molleank mat nuksann dium nakat.”
wp17.3 5 ¶2
Char Ghoddesvar—Te Konn?
Ho ghoddesvar zhuzak suchit korta. Dhean diat, to fokot thoddea raxttranchi nhoi punn akʼkhea sonvsarachi xanti kaddun uddoita. 1914 hea vorsa, itihasant poilech pavtti, sonvsarbhor ek zhuz suru zalem. Tea uprant sonvsarachem dusrem zhuz zalem, zantunt anik chodd nas zalo. Zhuzank lagon ani hotiaram udexim zalolea zhogddek lagon 1914-a thaun aiz meren 10 korodd-a poros lokancho jiv gela mhunn thoddeamnim odmas kaddla! Tea bhair, zaite lok zokhmi zaun oskot zaleat.
wp17.3 5 ¶4-5
Char Ghoddesvar—Te Konn?
“Polle zalear, ek kallo ghoddo mhaka dixtti poddlo; tacher boslolo aslo tachea hatant ek tagddi asli. Char jivea rochnnam modlo ailʼle porim ek tallo hanvem aikolo. To oxem sangtalo: ‘Eka dinarak xer-bhor gonv, ani eka dinarak zovache tin xer. Zoitunanchea ani dakvelinchea molleank mat nuksann dium nakat.’”—Prokasovnni 6:5, 6.
Ho ghoddesvar dukhollak suchit korta. Hanga jevnnachem unneponn itlem zatolem mhunn sangta ki eka dinarak ekuch xer-bhor (1.08 L) gonv mellttolo! Poilea xekddeant eklean ek dis kam kelear ek dinar pagar mhunn mellttalo. (Matev 20:2) Teach nanneak, tin xer-bhor (3.24 L) zov mellttole, je gonvam poros unnea molache konne asle. Eka vhodd familik itleant pott bhoronk zata? Tor hanga, lok sodanchea jevnnant pasun chamtteponn kortole mhunn sanglam, zoxem zoitunachem tel ani dakhancho soro osleo vostu uzar kortana pasun. Heo vostu tea tempar eka familik gorjecheo asleo.
(Prokasovnni 6:8) Polle zalear, mhaka pachvea rongacho ek ghoddo dixtti poddlo. Tacher boslolo aslo tachem nanv Moronn, ani tache pattapatt melʼleancho patall vetalo. Torsadin, bhuken, pidden ani ranvott zonavoram udexim sonvsarachea chovthea vantteak marun uddounk tankam podvi dili.
wp17.3 5 ¶8-10
Char Ghoddesvar—Te Konn?
Chovto ghoddesvar, piddek ani dusrea karonnak lagon ieta tea mornnak suchit korta. 1914 uprant, Spanish flu-ak lagon lakʼkhamnim lokancho jiv gelo. Ghoddie, sumar 50 korod lokank ti pidda lagli, mhunnche tea tempar jietolea munxam modem tinantlea ekleak hi pidda lagli!
Punn Spanish flu fokot ek survat asli. Zannkaranchea odmasa pormonnem, 20-avea xekddeant tis korodd poros chodd lok smallpox hea duensak lagon meleat. Aiz poriant, bariksannen vokhdancho sodh korun pasun AIDS, TB, ani malariak lagon lakhamnim lokanchem jivit lhan zalam.
Porinnam toch, moronn—zaum tem zhuzak, bhukek, vo piddek lagon. Churchure nastana mornnacho fondd tankam axeun asa.
Bible-ant Motiam Sodhum-ia
(Prokasovnni 4:4) Hea xinvasona bhonvtim chovis sodro asleo ani tancher dhovem nheslole ani tokler bhangarache mukutt ghalun aslole chovis zannte aslev.
(Prokasovnni 4:6) Toxench xinvasona mukhar suriakanta vori aspas porzolltolo konvchecho somdir koso aslo. Modem xinvasona bhonvtonnim, pattlean ani fuddlean zaitea dolleancheo char jiveo rochnna asleo.
re 76-77 ¶8
Jehovachea Sorginchea Xinvasonachi Sobitkai
8 Adlea tombunt seva korunk iadnikank nemlole mhunn Juanv zannam aslo. To fuddem jem kitem sangta tem polloun to ojap zalo astolo: “Hea xinvasona bhonvtim chovis sodro asleo ani tancher dhovem nheslole ani tokler bhangarache mukutt ghalun aslole chovis zannte asle.” (Prokasovnni 4:4) Hoi, iadnikam bodlek, 24 zantte vo vhoddil razam sarkem mukutt ghalun xivasonar bosleat. He vhoddil konn? Te Kristi sobheche obhixikt Kristanv zaun asat je Jehovan bhasailʼlea porim punorjivont zaun sorginchem stan gheun asat. Tem ami koxim zannant?
re 80 ¶19
Jehovachea Sorginchea Xinvasonachi Sobitkai
19 Heo rochnnam konnak suchit kortat? Hacho zobab mellonk provadi Ezekiel-an polloilʼlem ek dorxon amkam modot korta. Jehova sorginchea rothacher boson asa tem Ezekiel-an polloilem. Tea rotha sangata jiveo rochnna asleo jeo Juanvan vornnon kelʼlea rochnnam sarkeo asleo. (Ezekiel 1:5-11, 22-28) Uprant, Ezekiel-an jivea rochnna sangata aslolem tem roth portun polloilem. Hea vellar, tannem hea jivea rochnnank, kerubi mhunnttlem. (Ezekiel 10:9-15) Tor Juanvan polloilʼleo char jiveo rochnna, Devachea zaitea kerubiank suchit korta zankam tachea otmik songottnnent unch stan asa. Hea kerubiank Jehovachea itlea lagim polloun Juanvak vegllem disonk na astole, karonn adlea tombuchi manddavollint, korarachea arkpettachea dhampnnea voir don bhagarache kerubi asle je Jehovachea xinvasonak suchit kortale. Tea don kerubiam modem, Jehova uloun raxttrak adnea ditalo.—Suttka 25:22; Stotr 80:1.
(Prokasovnni 5:5) Tednam zannteam modlea eklean mhaka mhollem: “Roddum naka; polle, Judachea kullantlea Xinvan, Davidache Kombren, zoit vhelem; te sat xikʼke foddunk ani kovllo ugddunk Taka tank asa.”
cf 36 ¶5-6
“Polle! Judachea Kullantlo Xinv”
5 Choddxe pavtt xinv ani dhir hea gunna modem sombond dakhoila. Eka vhoddlea xinva mukhar tumi kednam-i ubim ravleant kai? Ravleant zalear, tumi chodd korun surokxitponnim pois ravlolim astolim, ghoddie vhoddlea zonvarachea panzrea bhair ubim aslim astolim. Toriastana tea vellar ami bhieunk xoktat. Oslea vhodd ani xoktivont xinvachem tondd polloitana, to xinv tumkam polloun dhanv martolo mhunn tumi kednanch chintchimnant. Bible sangta, “xinv sogllea zonavoram modlo podvedar, vatter melltole koslei vostuk bhieun to pollun vochona.” (Mhonnʼnneo 30:30) Tor, Krist pasun osoch dhirvont asa.
6 Jezun tin ritimnim xinvam sarko dhir koso dakhoilo tem ami bhasabhas korum-ia: sota pasot ubim ravtana, neai-ak tenko ditana, ani virodhacho fuddo kortana. Ami dhirvont asum vo nasum, dhir dakhounchea vixim ami Jezuchi dekh koxi gheunk zata, tem pasun ami polloitolim.