Mars—Jivit ani Porgottnni Mittingechea Pustike Pasot Modot
MARS 5-11
DEVACHEA UTRANTLE THEVE | MATEV 20-21
“Tumche Modem Konn Vhoddlo Zaunk Sodit To Tumcho Sevok Zauncho”
(Matev 20:3) Sumar nnov vaztam bhair sorun tinttear bekar aslolea herank tannem dekhle;
nwtsty media
Tintto vo bazar
Hanga dakhoila toslo bazar rosteachea deger astalo. Veapari rostear itlem saman dovortale ki rostear vochpi lokank addkholl zatali. Ganvantle lok dispottʼttea jivitant uzar kortat teo vostu, zoxem matiechim aidonam, kanchiecheo mharog vostu ani tajem jevonn-khann gheunk bazarant ietale. Tea tempar frij naslolea karonnan lokank sodanch bazarant ieunk poddttalem. Oslea bazarant vikpeank, veapaream ani dusrea lokam thaun hanga-thoincheo khobro aikonk mellttaleo, bhurgeank khellonk mellttalem ani bekar aslolea lokank konnui kamank vhortolo mhunn thoim ieun ubem ravonk mellttalem. Oslea eka bazarant, Jezun piddest lokank bore kele ani Paulun porgottnnechem kam kelem. (D.I. 17:17) Punn, gorvixtt dhormxastri ani Farizev oslea tinttear vo bazarant ube astana, lokamnim apnnank polloilʼlem ani nomoskar kelʼlo tankam zai aslo.
(Matev 20:20, 21) Tednam Zebedevachea putanchi avoi Tache sorxem aplea putank gheun aili ani Tache kodde kitem magunk ailole bhaxen Tachea paiam poddli. 21 Tannem tika mhollem: “Tuka kitem zai?” Tinnem mhollem: “Hea mhojea dogam putank, ekleak Tujea uzvea hata ani dusreak davea hata, Tujea Rajeant bosunk lai.”
nwtsty obheasachi ttipnni Mt. 20:20, 21
Zebedevachea putanchi avoi: Ti, Jakob ani Juanvachi avoi. Marku-chea xubhvortomana pormonnem Jakob ani Juanv, Jezu lagim vinoti korunk ietat mhunn sanglam. Tor hi vinoti Jakob ani Juanva thaunuch ailʼli punn tannim ti vinoti apli avoi, Salome udexim keli, jem ghoddie Jezuchem maxen aslem.—Mt. 27:55, 56; Mk. 15:40, 41; Ju. 19:25.
ekleak Tujea uzvea hata ani dusreak davea hata: Heo donui podveo man ani odhikar suchit kortat. Punn uzvea vatten asloleak chodd man astolo.—St. 110:1; D.I. 7:55, 56; Rom. 8:34.
(Matev 20:25-28) Punn Jezun tankam Apnna sorxem apoun haddun sanglem: “Videxiam modem tanche odhikari tancher apli podvi zobordosten choloitat mhonn ani toxench tanche vhoddil aple sotʼtecho bhar tancher ghaltat mhonn tumi zannont. 26 Tumche modem oxem zaunchem nhoi! Na, tumche modem konn vhoddlo zaunk sodit to tumcho sevok zauncho; 27 tumche modem konn poilo zaunk sodit to tumcho gulam zauncho. 28 Oxench Monxacho Put herank Aple chakrek launk ieunk na, bogor heranchi chakri korunk ani somestanche soddvonne pasot Aplo jiv diunk aila.”
nwtsty obheasachi ttipnni Mt. 20:26, 28
sevok: Bible-ant hea utrak uzar kelʼlem Grek utor di·aʹko·nos oslea munxak uzar kortale zo khaltikaien dusreanchi seva korunk sodanch toiar asta. Hem utor, Kristak (Rom. 15:8), Kristachea sevokank (1Kor. 3:5-7; Kol. 1:23), sobhechea sevokank (Filp. 1:1; 1Tim. 3:8), ghoramnim kam kortat tea chakrank (Ju. 2:5, 9) ani sorkari odhikareank (Rom. 13:4) uzar kelam.
herank Aple chakrek launk ieunk na, bogor heranchi chakri korunk: Vo “apleachi nhoi, punn dusreanchi seva korchi.”
Bibe-ant Motiam Sodhum-ia
(Matev 21:9) Fuddlean ani pattlean vetalo to lok bob marun mhonnttalo: “Davidachea Putak zoi! Sorvesporachea nanvan ieta taka zoi! Bhov vortea Devak zoi! zoi.”
nwtsty obheasachi ttipnni Mt. 21:9
zoi: Vo “Hosanna.” Hosanna hem Grek utor “salvar kor mhunn ami magtanv” vo “doia korun salvar kor” hea Hebrev utram thaun ailam. Hanga hem utor salvar kor vo zoit di mhunn vinoti korun Deva lagim magonk uzar kelʼlem asa. Tacho orth, “doia korun salvar kor” oso-i zaunk xokta. Him utram sovkas-sovkas, magnneant ani vakhannunk uzar korunk lagle. Hebrev bhaxen him utram ‘Hallel’ Stotramnim mellttat zoxem, St.118:25-ant. Him ‘Hallel’ Stotram chodd korun Paskachea Utsova disamnim gaitale. Taka lagon, hea utsovachea vellar him utram lokanchea monant rokddinch ailim. Jezuk meloleantlo jivont kelʼlo tednam eke ritin Devan “Davidachea Putak zoi!” hea magnneak zap dilʼlea sarkem zalem. Mt. 21:42-ant Jezu, St. 118:22, 23-antlim utram uzar korun Mesiasak lagu korta.
Davidachea Putak: Him utram Jezuch Davidachea vonxavollintlean ieunk aslolo to Mesias mhunn dakhoun dita.
(Matev 21:18, 19) Sokallim Xarant portun ietana Taka bhuk lagli. 19 Ek anjirachem zhadd vatteche degek polleun, To tache sorxem ailo ani panam bogor tacher kaich Taka mellllem na. Ani Tannem taka mhollem: “Hea fuddem kednanch tuka foll zaum noie!” Ani tem anjirachem zhadd teach vellar suklem.
jy 244 ¶4-6
Bhavartha Vixim Lisanv Xikounk Anjirachem Zhadd Uzar Kelem
Jezu tea zhaddak kiteak xirapta? Tachea utrantlean tem karonn kollon ieta: “Tumkam bhavarth asot ani kosloch dubav tumi dhorina zaxat, anjirachea zhaddak Hanvem kelam tem tumi-i kortoleat; itlench nhoi, punn hea dongrak porian tumi oxem mhonnxat zalear: ‘Umtton voch ani doriant vochun podd!,’ toxem ghoddtolem. Ani prarthon kortana bhavarthan tumi magxat titlem-i tumi ghetoleat.” (Matev 21:21, 22) Hea vixim, Jezun poilim pasun sanglolem. Tannem mhunnttlolem, zor tachea xisamnim bhavarthan, dongrak eka zagear thaun dusrea zagear vochonk sanglem zalear toxem ghoddttolem mhunn.—Matev 17:20.
Tor, anjirachea zhaddak xirap diun, Jezun Devacher bhavarth dovrop kitlem gorjechem tea vixim ek lisanv xikoilem. To mhunntta, “tumi prarthun magxat titlem-i tumkam mellʼlem mhonn bhavarth dhorat, ani tem tumchench zatolem.” (Marku 11:24) Khorench, Jezuchea xisank kitlem mhotvachem lisanv nhoi! Beginuch soschi asa tea kotthin poristhiticho fuddo korunk tankam bhavarthachi goroz asli. Punn, sukhlolem anjirachem zhadd ani bhavarth hea gunna modem anik ek sombond asa.
Hea anjirachea zhadda bhaxen Israel raxttr khottem aslem. Hea raxttrachea lokam sangata Devan korar kelolo ani tannim tachi kaide pallunk zai asle. Bhailean te kaide palltat oxem distalem. Punn tem akʼkhem raxttr foll dina toslea zhadda porim aslem, tankam bhavarth naslo. Tannim Devachea Putak sudʼda nakarlo! Tem anjirachem zhadd sukhoun, Jezu tea foll dinaslolea raxttracho koso xevott zatolo tem dakhoita.
MARS 12-18
DEVACHEA UTRANTLE THEVE | MATEV 22-23
Somurticheo Vhoddleo Don Adnea Pallat
(Matev 22:36-38) “Guruji, Somurtichi vhoddli adnia ti khoichi?” 37 Jezun portipall kelo: “‘Sogllea tujea kallzan, sogllea tujea jivachea bollan, ani sogllea tujea monan, Sorvespora tujea Devacho mog kor.’ 38 Hi soglleam-von vhoddli ani poili adnia.
nwtsty obheasachi ttipnni Mt. 22:37
kallzan: Hem utor, ek munis bhitorlean koso asa tem dakhoun dita. Punn jednam hem utor jivachea bollan ani monan, hea utram sangata uzar kortat tednam tacho orth eka munxachim bhavnam ani anvdde dakhoun dita. Hea versant tin utram uzar keleant: kalliz, jivachem boll ani mon. Punn hea versant hea tin-ui utrank veg-vegllo orth na. Him tin-ui utram mellon, Deva pasot eka munxak asonk zai to purnn torecho mog dakhoun dita. Hea toren, Devak mog dakhovop kitlem gorjechem tem ekdom borea ritin sanglam.
jivachea bollan: vo “munis.”
mon: Hacho orth chintpachi tank vo xokti. Devak zannam zaunk vo vollkhun gheunk ani tache pasot mog vaddunk eka munxean apli monachi xokti uzar korunk zai. (Ju. 17:3, ftn. (NW); Rom. 12:1) Hea versantlim utram Dusri Somurt 6:5-antlean kaddleant. Thoim, Hebrev bhaxent kalliz, otmo ani boll him tin utram uzar keleant. Punn, Grek bhaxen boroilolea Matev-achea pustokant “boll” hem utor uzar korchea bodlek “mon” hem utor uzar kelam. Oxem korunk zaitim karonnam asonk puro. Poilem, adle Hebrev bhaxen “mon,” hea utrak umkech utor naslem, punn “kalliz” hem utor uzar kortana “mon” vo chintpachi xokti ho orth tantunt ietalo. “Kalliz” hem utor, ek munis bhitorlean koso asa tem dakhounk uzar kortat tednam, tantunt eka munxachim chintnam, bhavnam, sobhav ani preronnam mellon asa. (D.S. 29:4; St. 26:2; 64:6; hea versant aslolem utor, kallzan, hachi obheasachi ttipnni polloi.) Tor hea karonnank lagon, Hebrev bhaxen “kalliz” hem utor uzar kelam thoim Grek Septuagint-ant “mon” hea utracho orth diupi utor uzar kelam. (Ut. 8:21; 17:17; Mho. 2:10; Iz. 14:13) Dusri Somurt 6:5-antlim utram uzar kortana, Matevan “boll” hea utrachea bodlek “mon” hea utracho orth diupi Grek utor uzar korunk anink ek karonn aslem. Tem mhunnttlear, Hebrev bhaxen “boll” vo ‘akʼkhi xokti’ hea utrak, eka munxachi sokot ani chintpachi tank he donui orth mellon asat. Karonn kitem-i asom, Hebrev ani Grek bhaxechea utram modem aslolo sombond somzolear, xubvortomanam boroilʼlea boroupeamnim, Dusri Somurt hea pustokantlean ulʼlekh kortana tinch utram kiteak uzar korunk na tem kollon ieta.
(Matev 22:39) Punn hichech sarki dusri asa ti hi: ‘Tuzoch kortai toso, tujea peleacho mog kor.’
nwtsty obheasachi ttipnni Mt. 22:39
dusri: Jezun Farizevanchea prosnak dilʼlo zobab Mt. 22:37-ant vachunk melltta. Punn tanchea prosnak zobab dilea uprant, Jezun dusre adneacho ulʼlekh kelo. (Lev. 19:18) Oxe toren, heo donui adnea mellon asat ani somurtiche her sogle kaide ani Provadianchi xikvonn tea donui adneant attapun asa mhunn to dakhounk sodhtalo.—Mt. 22:40.
peleacho: “Pelo” vo xezari (vo “lagincho”) hea utrak uzar kelʼlea Grek utracho orth, fokot ghora lagim ravtat tinch nhoi, punn khoincho-i munis zaunk xokta zanchea lagim ami uloitat vo vell sartat.—Luk. 10:29-37; Rom. 13:8-10.
(Matev 22:40) Hea don adniancher dhorloli asa soglli Somurt ani Provadianchi xikovnn.”
nwtsty obheasachi ttipnni Mt. 22:40
Somurt ani Provadianchi xikovnn: “Somurt” mhunnche, Utpoti thaun Dusri Somurt porian aslolim Bible-antlim pustokam. “Provadianchi xikovnn” mhunnche, Hebrev bhaxen boroilʼlim bhakitanchim pustokam. Punn, him don-ui utram sangata uzar kortat tednam, tim Hebrev bhaxen boroilʼlea Bible-antlea soglea pustokank suchit kortat.—Mt. 7:12; 22:40; Luk. 16:16.
dhorloli: Hea utrak uzar kelʼlea Grek kriapodak, hea versant “ovlombun asa; vo adharit asa” oso orth dila. Hanga Jezun fokot Dha Updes ani her somurtichea kaideam vixim nhoi punn, Hebrev bhaxent boroilʼlim soglim pustokam mog hea gunnacher adharit asa mhunn dakhoun dilem.—Rom. 13:9.
Bible-ant Motiam Sodhum-ia
(Matev 22:21) Tannim zobab dilo: “Somrazachem.” Tednam Jezun tankam sanglem: “Borem tor, Somrazachem tem Somrazak diat, ani Devachem tem Devak diat.”
nwtsty obheasachi ttipnni Mt. 22:21
Somrazachem tem Somrazak diat: Romi somraza vixim Jezun fokot ekuch favtt sanglolem. Tem amkam hea versant, Mk. 12:17-ant, ani Luk. 20:25-ant vachunk melltta. “Somrazachem tem somrazak diat” mhunnche sorkar amchea pasot korta te sevek lagon ami farik kortat tem mol. Ani toxench sorkari odhikareank ami diunk zai to man ani khaltikai.—Rom. 13:1-7.
Devachem tem Devak diat: Hacho orth, eka munxan aplea jivitant purnn kallzan Devachi bhokti korchi, purnn ritin tacho mog korcho ani purnn toren taka visvaxiponn dakhounchem.—Mt. 4:10; 22:37, 38; D.I. 5:29; Rom. 14:8.
(Matev 23:24) Ek zollar gallun kaddtat ani akʼkhem untt gilltat tosle kuddʼdde fuddari tumi.
nwtsty obheasachi ttipnni Mt. 23:24
zollar gallun kaddtat ani akʼkhem untt gilltat: Lhan kiddeam modli zollar ani vhodd zonvaram modlo untt, heo donui rochnna oxudʼd mhunn Israelitkarank khobor asli. (Lev. 11:4, 21-24) Tor Jezun apunn sangta tea vixoi-acher zhor diunk hea toren sor kelem ani thoddim fokannam-i kelim. Karonn dhormik fuddari kaide pormonnem oxudʼd zaunk zaina mhunn zollara sarke aslole vixoi gallun kaddttale, punn, Somurtiche chodd mhotvache vixoi te sarkech soddun ditale, jem unttak gillʼllea sarkem aslem.
MARS 19-25
DEVACHEA UTRANTLE THEVE | MATEV 24
“Hea Xevottachea Disamnim Devachi Khuxi Korit Ravat”
(Matev 24:12) ani khotteponn vaddta tea mapan zaiteancho mog xellmoddo zatolo.
it-2 279 ¶6
Mog
Ekleacho mog xellmoddo zaunk xokta. Jezun aplea xisank fuddarak zaunchea ghoddnea vixim sangtana, Devacher bhavarth asa mhunn sangtat tancho mog (a·gaʹpe) xellmoddo zatolo mhunn sanglem. (Mt. 24:3, 12) Apostl Paulun munxam “girestkaieche axechim” zatolim, hi nimannea disanchi ek khunna mhunn sanglem. (2Tim. 3:1, 2) Hachea voilean, sarkea totvancher aslolo eka munxacho mog unno zaun to mog chukichea vixoiacher vaddonk xokta mhunn kolltta. Tor, eka munxan Devachea utracher niall korop ani aplea jivitant Devachim totvam apnnaun mog (a·gaʹpe) vaddovop kitlem gorjechem tem kollon ieta.—Ef. 4:15, 22-24.
(Matev 24:39) ani poriallo ieun tancho soglleancho nas zai porian, tankam kai ek kolllem na; toxench Monxacho Put ietolo tednam zatolem.
w99 11/15 19 ¶5
Devak Diunk Zai Tem Soglem Tumi Ditat Kai?
5 Ami jietat tea nimannea disam vixim Jezu Kristan sangon mhunnttlem: “Noahchea disamnim zoxem zalem, toxench Monxacho Put ieta tednam zatolem. Buddte adlea disamnim Noah pett-tarvant bhitor sorlo to dis meren lok khata-pietalo, logn zaun ani logn korun diun aslo, ani poriallo ieun tancho soglleancho nas zai porian, tankam kai ek kollʼlem na; toxench Monxacho Put ietolo tednam zatolem.” (Matev 24:37-39) Khatana vo pietana ami hisba bhair vochonant zalear khavop-pievop chukichem nhoi. Toxench, kazar Devan ghoddoun haddloli ek manddavoll zalolean kazar zavop chukichem nhoi. (Utpoti 2:20-24) Punn, jivitacheo sodancheo rattavolleo amchea jivitantlo chodd mhotvacho vixoi zata zalear hache vixim magnnem korop gorjechem. Karonn Jehova amkam aplem Raj poilea zagear dovrunk, sarkem asa tem korunk ani Jehovak diunk zai tem soglem taka diunk to amkam modot kortolo.—Matev 6:33; Romkarank 12:12; 2 Korintkarank 13:7.
(Matev 24:44) Mhonnttoch tumi-i toiar ravat, kiteak tumi chintinant te ghoddier Monxacho Put ietolo.
jy 259 ¶5
Apostlamnim Ek Khunna Magli
Aplea xisamnim chotur, zagrut ani toiar asonk zai mhunn Jezun sanglem. Hi xittkaunni kitli gorjechi tem somzaunk tannem anik ek vopar uzar keli. To mhunntta: “Hem mat monant dhorat: konn-ui ghorkar ratichea khoichea parar chor ietolo mhonn zanno aslo zalear, to zagrut ravtolo aslo ani aplem ghor foddun nagounk diuncho naslo. Mhonnttoch tumi-i toiar ravat, kiteak tumi chintinant te ghoddier Monxacho Put ietolo.”—Matev 24:43, 44.
Bible-ant Motiam Sodhum-ia
(Matev 24:8) Punn hem sogllem fokot porsuttvenninchi survat.
nwtsty obheasachi ttipnni Mt. 24:8
porsuttvenninchi survat: Hea utrank, uzar kelʼlea Grek utracho orth, zolmak haddtta tednam sosunk poddtta te vollvolle. Matev 24:21-ant vhodd sontapa vixim sanglolem asa. Tachea poilim bhogunk poddttole te dukh-tras kitlea pormannan vaddttole ani kitlo temp porian astole tem somzaunk, Jezun hanga, bhurgeak zolmak haddtta tednam bhogunk poddttat tea dukh-trasank sor korun dakhoilam.
(Matev 24:20) Tumchi pollapoll hinvalleant vo Sonvara disa zaina zaunk magat;
nwtsty obheasachi ttipnni Mt. 24:20
hinvalleant: Hea kallar, ghoxghoxeacho paus, buddtti ani thonddai aslolean provas korunk toxench, asro mellonk ani jevonn mellonk pasun kotthin zatalem.—Ezd. 10:9, 13.
Sonvara disa: Judea sarkea vattarant, sonvara disacho kaido pallʼllolean, lokank pois provas korunk ani saman ubarunk pasun dina asle. Hea disa xarache darvonntte pasun bond astale.—D.I. 1:12 ani Jezuchea Jivitachem Nimannem Suman polloi.
MARS 26–ABRIL 1
DEVACHEA UTRANTLE THEVE | MATEV 25
“Zagrut Ravat”
(Matev 25:1-6) “Dha ankvari apleo divlio gheun novreak ievkar diunk bhair sorleo: tankam zalem toxem Sorginchea Rajeant zatolem. 2 Tanche modleo panch pisatt ani panch xanneo asleo. 3 Panch pisatt ankvarimnim divlio ghetleo, punn apnnam borabor tel ghetlem na; 4 xanneamnim divliam borabor aplea xinsliamnim tel-ui vhelem. 5 Novreak uxir zalo ani teo soglleo jemeunk lagleo ani nhidleo. 6 Punn modianir oso avaz zalo: ‘Ho polle novro! Taka svagot diunk bhair sorat’
(Matev 25:7-10) Tednam teo soglleo ankvari zageo zaleo ani apleo divlio toiar korunk lagleo. 8 Pisattamnim xanneank mhollem: ‘Tumchem ilem tel amkam diat, amcheo divlio palovtat.’ 9 Punn xanneamnim oxi zap dili: ‘Tumkam ani amkam tem bilkul pavchem na. Viktoleager vochat ani tumkam gheiat: hench odik borem.’ 10 Teo tel viktem gheunk vetat mhonnosor novro pavlo; toiar asleo teo ankvari tache borabor lognachea vosreant bhitor geleo ani dar bond kelem.
(Matev 25:11, 12) Xekim dusreo ankvari pavleo ani mhonnunk lagleo: ‘Saiba, Saiba, amkam dar ugodd!’ 12 Punn tannem zap dili: ‘Hanv tumkam khoreponnim sangtam, hanv tumkam vollkhona.’
Bible-ant Motiam Sodhum-ia
(Matev 25:31-33) “Jednam Monxacho Put sogllea Aplea dutank gheun mhoimen ietolo, tednam To Aplea mhoimechea xinvasonar bostolo, 32 ani Tache mukhar sogllim raxttram zomtolim, ani zoso gonvlli xelliank ani bokddiank kuxin-kuxin kaddta, toso To-i sogllea raxttrank kuxin-kuxin dovortolo: 33 xelliank Aplea uzveak ani bokddiank Aplea daveak dovortolo.
w15 3/15 27 ¶7
Kristachea Bhavank Visvaxiponnim Tenko Diat
7 Aiz, amkam xellianchea ani bokddeanchea voparechi sarki somzonni asa. Tea voparent asloleanchi vollokh kitem? “Monxacho Put,” vo Raza mhunnttlear Jezu. ‘Mhojim bhav-bhoinnim’ vo bhav mhunnche povitr xokte vorvim obhixikt zalʼle dadle ani bailo, jim Krista sangata sorgar razvottki choloitolim. (Rom. 8:16, 17) “Xelli” ani “bokdde” mhunnttlear soglea raxttrantle lok. Hea lokank povitr xokte vorvim obhixikt korunk nant. Xellianchi ani bokddeanchi zhoddtti kednam zatoli? Beginuch ieunk asa tea vhodd sontapachea xevottak hi zhoddtti zatoli. Jezu lokank xelleo ani bokddeo mhunn kiteachea adarit kuxin kaddttolo? Prithumer aslolea Kristachea urlolea obhixikt bhavam thaim te koxe vagtat tachea adarit to hem kortolo. Xevott lagim pavlolea hea disamnim, Jehovan Matev 24 ani 25-ant aslolea hea ani hache sombondit aslolea her voparenchi somzonni vella-vellar dilea mhunn ami kitlim upkari asat nhoi!
(Matev 25:40) Ani zap diun Raza tankam mhonnttolo: ‘Hanv tumkam sot sangtam: Mhojea lhanantlea lhanam bhavam-bhoinnim modlea ekleak jem tumi kelem, tem tumi Mhakach kelem.’
w09 10/15 16 ¶16-18
“Tumi Mhoje Ixtt”
16 Tumkam Devachea Rajea khala hea prithumer jieuncho bhorvonso asa zalear Kristachea bhavank tumchi ixttagot tumi koxi dakhounk zata? Ami atam tin vatto polloum-ia. Poili, porgottnnechea kamant soglea kallzant bhag gheun. Sonvsarbhor bori khobor porgottunk zai mhunn Kristan tachea bhavank adnea dili. (Mt. 24:14) Punn her menddrancho tenko naslo zalear hi zobabdari purnn korunk tankam chodd kotthin zata aslem. Dor ek pavtt porgottnnechea kamant her menddram bhag ghetat tednam Kristachea bhavank Devan dilʼli hi zobabdari purnn korunk tim tankam tenko ditat. Visvaxi ani xanno chakor ani toxench Jezu Krist, her menddranchea hea ixttagoticho valor kortat.
17 Kristachea bhavank modot korchi dusri vatt mhunnttlear, porgottnnechea kama pasot dan diun. Jezun aplea xisank ‘girestkaiecho upeog korun’ ixttagot zhoddat mhunn sanglem. (Luk. 16:9) Hacho orth, ami Jezuchi vo Jehovachi ixttagot vikti gheunk zata oxem nhoi. Punn amchea lagim asloleo vostu Devachea Rajea pasot uzar korun, ami amchi ixttagot ani mog dakhoitat. Ani tem ami fokot utramnim nhoi punn “kornniamnim” dakhoun ditat. (1 Ju. 3:16-18) Hem ami koxem korunk zata? Porgottnnechea kamant bhag gheun, holachea bandkamant toxench tachi dekhrekh korchea kamank poixe diun, ani sonvsarbhor porgottnnechea kama pasot dan diun. Ami ditat tem dan thoddem vo chodd asum, hanstea tonddan ditat tednam Jehova ani Jezu tacho valor kortat.—2 Kor. 9:7.
18 Ami Kristache ixtt mhunn dakhounchi tisri vatt mhunnttlear, sobhentle vhoddil ditat tem margdorxon pallun. Hea vhoddilank, Kristachea margdorxona khala povitr xokte vorvim nemleat. (Ef. 5:23) ‘Tumche vhoddilanchem utor aikat ani tankam khaltim ravat,’ mhunn apostl Paulun boroilem. (Heb. 13:17) Thodde pavtt amche sobhentle vhoddil amkam Bible-acher adarit margdorxon ditat tednam tem pallunk kotthin zaunk xokta. Ami tanchim unneponnam zannam aslolean tanche solʼle manunk amkam kotthin zaunk xokta. Tori astana, sobhecho mostok, Jezu Krist oslea opurnn munxank uzar korta. Tor ami vhoddilank jea toren lekhtat tacho porinnam, Krista lagim aslolea amchea ixttagoticher poddtta. Vhoddilancheo chukeo pollenastana te ditat tem margodorxon ami khuxalkaien pallttat tednam amkam Kristacho mog asa mhunn ami dakhoitat.