Jezu Krist Konn?

1. Jezu khoim thaun ailo?

Jezu sogllea munxam thaun vegllo, karonn To ekloch hea prithumecher zolmun ieunche adim, ek bollvont dut mhunn sorgar aslo. (Juanv 8:23) To zaun asa Devachi poili rochna, ani her soglleo vostu rochun haddunk, Deva sangata to vavurlo. Taka ekleakuch Jehova Devan svota rochlo, ani tea khatir Jezuk, Devacho ‘ekloch’ Put mhunnttla. (Juanv 1:14) Devacho munniari koso Jezu uloilo, dekhun taka “Sobd” mhunnttla.​—Mhonnʼnneo 8:22, 23, 30; Koloskarank 1:15, 16 vachat.

2. Jezu prithumecher kiteak ailo?

Jezuk prithumecher dhaddunk, Devan sorgar thaun tachem jivit Judevam modle Mari nanvache, ankvarichea kusveant ghatlem. (Luk 1:30-35) Taka lagun Jezuk sonvsari bapui naslo. Jezu hea prithumecher tin karonnak lagun ailo (1) Deva vixim sot xinkounk, (2) kottin poristhitint porian, amchean Devachi adnea pallunk zata, tea vixim dekh diunk, ani (3) aplem khot naslolem jivit bolidan korun, munxank ‘soddvonn’ diunk.​—Matev 20:28 vachat.

3. Amkam soddvonn kiteak zai?

Mornnantlim salvar zaunk amkam soddvonn zai. Soddvonn mhunnttlear eka munxak mornnachea fasantlo vattaunk kelʼlea farikponnachem mol. (Suttka 21:29, 30) Munis zanntto zaun morcho, ho Devacho mull udhex naslo. Hem amkam koxem kollon ieta? Devan poilea munxak Adanv-ak sanglem, tannem zor “patok” korit zalear mhunnge Devachi adnea moddit zalear, to mortolo. Zor Adanv-an patok korunk naslem, to kednanch morcho naslo. (Utpoti 2: 16, 17; 5:5) Bible-a pormonnem, Adanv-a udhexim sonvsarant moronn “bhitor sorlem” mhunnge sogllea munxakullacher moronn ailem. Taka lagun Adanv-achi soglli sonsot patki zaun mornnache khastik sampoddli. Dekhun amkam Adanv-a thaun ailʼlea mornnache khastintli suttka diunk, soddvonn zai. ​—Romkarank 5:12; 6:23 vachat.

Mornnachea khastintli amkam suttka diunk, konn soddvonn diunk xokta? Mortat tedna, ami fokot amchea svotachea patkanchem farikponn ditat. Khoinchea-i opurnn munxachean dusream khatir farikponn diunk zaina.​—Stotram 49:7-9 vachat.

4. Jezu kiteak melo?

Jezu munxam bhaxen patki nhoi, punn sopurnn aslo. Tannem koslench patok korunk nam, tea passot svotachea patkak lagun, taka morchi goroz nasli. Torui, Jezu dusreanchea patkam passot melo. Devan aplea putak, munxakulla khatir moronn favo korun, amkam vorto mog dakhoilo. Aplea Bapaichem utor pallun ani munxakulla khatir aplem jivit bolidan korun, Jezun-ui amkam aplo mog dakhoilo.​—Juanv 3:16; Romkarank 5:18, 19 vachat.

Jezu Kiteak Melo? ho viddeo polloiat

5. Jezu atam kitem korta?

Prithumecher astana, Jezun lokank duensantlim borim kelim, melʼleantlim jivont kelim, ani her koxttantlim soddoilim. He porim Devacheo adnea pallttolea munxank, fuddarak to kitem boreponn haddtolo tem tannem dakhoilem. (Matev 15:30, 31; Juanv 5:28) Jezu moron thoddea disam uprant, Devan taka portun atmik kuddin jivont kelo. (1 Pedru 3:18) Tea uprant, Jehova Devan taka akʼkhe prithumecher razvott cholounk odhikar dium porian, to Devachea uzveak bosun ravlo. (Hebrevank 10:12, 13) Atam Raza zaun Jezu sorgar raj choloita ani tache pattlavdar hi bori khobor akʼkhea sonvsaracher porgottʼttat. ​—Daniel 7:13, 14; Matev 24:14 vachat.

Veginnuch, Jezu aple raz podven, sogllea noxttea lokancho xevott kortolo ani soglle koxtt sompoitolo. Jim konn Jezucher bhavart dovrun tachea utra pormonnem choltat, tankam he prithumecher sasnak jivit bhogunk mellttolem.​—Stotram 37:9-11 vachat.