Dezembr—Jivit ani Porgottnni Mittingechea Pustike Pasot Modot
DEZEMBR 3-9
DEVACHEA UTRANTLE THEVE | ITIHAS 9-11
“Dhumallo Diupi Krur Munis Nettan Sakxi Diupi Munis Zata”
(Itihas 9:1, 2) Itlea mhonnosor, Saulu Somia chea xisancho apunn jiv kaddtolo mhonn tankam bhenkddaunk bhonvtalo ani he axen tacheach jivak thar naslo. To porom-iadnika-xim gelo 2 ani he Vattecheam apnnak melltit tea pattlavdarank, dadleank toxench bailank, dhorun Jeruzaleak haddunk Damaskachea devsthananchea vhoddilank diunchim tannem potram maglim.
Sobha “Sovosthaien Jietali”
KRUR provasi Damask ganvant pavot aile zoim tanchi krur ievzonn atam xarti pavchi asli. Te Jezuchea xisancho dves kortale. Tor te atam tankam ghorantle bhair kaddun, bandun, lojek ghalun, ani bollan Jerusalemant Mha-sobhechea krodak tondd diunk voddun vhortole.
2 Tancho fuddari, Saulun hachea poilim dusreachem rogot vhanvoilolem. Jezuchea eka bhoktivont xis, Istevak Judev lok jivexi martale tednam tannem apli maniotai diun tankam sangat dilo. (Itihas 7:57–8:1) Jerusalemant jietolea Jezuchea xisank tras diun dhadoxi zainastana, to eka ujeachea zollttolea ingllea bhaxen soglea zagear dhumalleacho uzo fankounk bhair sorlo. To ‘Hi Vatt,’ mhunn nanv aslolea pongoddak nanch korunk sodhtalo.”—Itihas 9:1, 2; pan 61-cher aslolem “Saul’s Mandate in Damascus,” boks polloi.
(Itihas 9:15, 16) Somian taka zobab dilo: “Tori astana tum voch, kiteak, raxttram toxench razam mukhar ani Israel-porje mukhar, Mhojem nanv porgottunk ho monis Mhojem vinchun kaddlolem hatiar. 16 Mhojea Nanva pasot tannem kitlem sosunk poddtolem tem Hanv taka dakhoitolom.”
w16.06 7 ¶4
Amcho Kumbar Jehovak Upkari Asop
4 Jehova eka munxak polloita tednam to tachem bhailem rup polloina. Punn kallzam polloita, tanche gunn polloita. (1 Samuel 16:7b vachat.) Hem amkam tannem Kristi sobha ghoddoun haddli tantuntlean kollon ieta. Munxachea nodren valorache nasle tankam tannem aplea lagim ani aplea Puta lagim voddun haddleat. (Juanv 6:44) Toslo ek muniszaun aslo, ek Farizev, Saulu nanvancho zo ‘ninda kortalo,dhumallo ditalo ani okman kortalo.’ (1 Tim. 1:13) Punn, “kallzanchi porikxa” korpean, Sauluk, upeogak poddona tosli mati mhunn lekhunk na. (Mho. 17:3) Devan taka, akar diunk zata toslea matiechem ek valorachem aidon mhunn polloilo. Khorem mhunnttlear, to “raxttram toxench razam mukhar, ani Israel-porje mukhar” sakxi diunk “vinchun kaddlolem hatiar” [“aidon,” NW] zaunk xoktalo. (Itihas 9:15) Eka vellar bebdim, pozddim ani chor aslolea lokank pasun Devan “kherit somoiar vaprunk” zata toslem aidon mhunn lekhlim. (Rom. 9:21; 1 Kor. 6:9-11) Tim Devachea Utrantlem khorem ginean gheun bhavarth dovortat tednam, tim apleak akar diunk Jehovachea hatant soddttat.
(Itihas 9:20-22) Jezu Devacho Put mhonn to devsthanamnim rokddoch porgottunk laglo. 21 Taka aikotalim tim sogllim ojap zaun mhonnttalim: “Hem Nanv uchartoleancho Jeruzaleant bhosm korunk vavurtalo to ani hanga aslolea xisank dhorun mukhel iadnikam fuddem vhorunk hangasor ailʼlo to monis hoch nhoi?” 22 Punn Saulu odik-odik bollixtt zait vetalo ani, Jezu Krist mhonn ruzu korun, Damaskant ravtolea Judevank gondhollak ghaltalo.
Sobha “Sovosthaien Jietali”
15 Saulu devsthanant Jezu vixim porgottunk laglo tednam thoim aslolo lok kitlo ojap zalo, tankam kitlo dokʼko boslo ani te kitle ragar zale astole tem tumchean chintunk zata? “Hem Nanv uchartoleancho Jeruzaleant bhosm korunk vavurtalo to ani hanga aslolea xisank dhorun mukhel iadnikam fuddem vhorunk hangasor ailʼlo to monis hoch nhoi?” mhunn tannim vicharlem. (Itihas 9:21) Jezu vixim aplem kalliz koxem bodolʼlem tea vixim somzaitana, Saulun “Jezu Krist mhonn ruzu” korun dakhoilem. (Itihas 9:22) Punn bexttench ruzu kelem mhunn zaina. Zanchi monam rit-rivazank lagon ani kallzam gorvak lagon bond zalʼlim asat, tanchem mon ani kalliz ugddunk khub kotthin. Tori astana, Saulun soddun diunk na.
Bible-ant Motiam Sodhum-ia
(Itihas 9:4) To dhornnir xevttolo ani tednam tannem ek tallo aikolo. To Taka oxem mhonnttalo: “Saulu, Saulu, kiteak mhonn tum Mhaka piddapidd ditai?”
Sobha “Sovosthaien Jietali”
5 Saulu Damaskak voitana addaun Jezun taka: “Kiteak mhonn tum mhojea xisank piddapidd ditai?” mhunn vicharunk na. Ami bhasabhas kelolea bhaxen, tannem taka: “Kiteak mhonn tum Mhaka piddapidd ditai?” mhunn vicharlem. (Itihas 9:4) Hoi, aplea xisancher ietat te dukh-tras polloun Jezuk tem dukh apleakuch bhoglea sarkem zalem.—Mt. 25:34-40, 45.
6 Tumchea bhavarthak lagon tumkam dhomkavnneo sosunk poddttat tednam Jehova ani Jezu tumche dukh-tras bore zannant mhunn tumi khatri dovrunk zata (Mt. 10:22, 28-31) Tumcher ietat te tras-dhumalle atam kaddun uddounk zainant. Ugddas dovrat, lok Istevak martana, Saulun mellon aslo, ani tannem Jerusalemant aslolea visvaxi xisank voddun haddle tem soglem Jezun polloilem. (Itihas 8:3) Tori punn, Jezun tea vellar kainch korunk na. Punn, Krista vorvim Jehovan, Istevak ani her xisank visvaxi ravonk ghottai dilʼli.
(Itihas 10:6) To eka Simanv chamarager vostek asa ani hachem ghor doriache kinarer.”
nwtsty obheasachi ttipnni D.I. 10:6
Simanv chamarager: Ek chamar zonvaranchea katincher chuneachem udok ghalun tea katicher urloli lhonv, vo urlolem mas ani chorob kaddpachem kam kortalo. Uprant, anik ek rosaion uzar kelea uprant to chamddeacheo vostu toiar kortalo. Chamddem toiar korchem kam kortana khub vas martalo ani taka lagon chodd udok zai poddttalem. Heach karonnak lagon Simanv ghoddie doria deger ravtalo astolo, jem ghoddie Jopʼpa nograchea deger poddttalem. Moizesachea Somurti pormonnem, zonvaranchem moddem uzar korun kam kortat tankam oxudʼd mhunn lekhtale. (Lev. 5:2; 11:39) Taka lagon, zaite Judev lok chamarank kainch resped dina aslole ani tanchea sangata ravonk fatti sortale. Toxench, Talmud hea pustokant uprant, chamarachem kam ek xenn ektthaim korpea poros lhan mhunn sanglem. Punn Pedrun bhed-bhavak lagon Simanva sangata ravonk nakarunk na. Hea vellar uktem mon dovorlolean Pedru, fuddem apleak mellchi asli ti zobabdari bore toren suru korunk pavlo—eka Videxeachea ghora bhett diunchi. Thodde ponddit “chamar” hea utrak uzar kelolem Grek utor (byr·seusʹ) Simanvachem addnanv mhunn mantat.
DEZEMBR 10-16
DEVACHEA UTRANTLE THEVE | ITIHAS 12-14
“Barnabas ani Paulu Poixilʼlea Zageamnim Vochon Xis kortat”
(Itihas 13:2, 3) Ek dis, te upas kortale ani Somiak bhozunk ektthai asle tednam, Povitr Atmean tankam mhollem: “Barnabasak ani Sauluk kuxin kaddat: eka kherit kama khatir Hanvem tankam apoileat.” 3 Tednam upas ani magnnem korun, tannim tancher hat dovorle ani tankam dhaddle.
“Khuxalkaien ani Povitr Atmean Bhorle”
4 Povitr xokten “kama khatir” Barnabas ani Sauluk kuxin kaddunk kiteak margdorxon dilem? (D.I. 13:2) Bible tea vixim sangona. Punn hea dadleank vinchun kaddunk povitr xokten margdorxon dilem mhunn ami zannant. Antiokantle provadi ani xikoupi hea nirnnoi-a add gele mhunn amkam khoinch vachunk mellona. Tache bodlek, tannim hea nemnnukek purnn kallzan tenko dilo. Tanchea bhavamnim, nattkai korinastana “upas ani magnnem korun, . . . tancher hat dovorle ani tankam dhaddle” tednam Barnabas ani Sauluk koxem bhoglem tem amchean chintunk zata. (D.I. 13:3) Devachea sevent dusreank zobabdari mellttat tednam ami pasun tankam tenko diunk zai, zoxe sobhechi dekhrekh korunk nemlolea vhoddilank. Osle sueog mellttat mhunn tanchi nattkai korchea bodlek ami “tanchea vavrak lagun tankam vhodd man ani opurbai” dakhounk zai.—1 Tes. 5:13.
(Itihas 13:12) Hem ghoddlem tem polleun, ani Somia vixim ji xikovnn taka mellʼlli tiche pasot soglloch ojap zaun, razpalan bhavarth dhorlo.
(Itihas 13:48) Hem aikun videxi khuxal zalim ani Somiachea sondexak lagun tannim Taka vakhannlo, ani Sasnnik Jivit zoddunk adim fuddem nemlolim aslim titleamnim bhavarth dhorlo.
(Itihas 14:1) Ikoniumant pavtoch, Paulu ani Barnabas borabor Judevanchea devsthanamnim gele ani itlea nettan uloile ki Judevanchea ani Grikanchea puskoll lokan bhavarth dhorlo.
‘Jehova Koddcho Dhir Gheun, Bhiranti Vinnem Sakx Dili’
5 Survatek, Paulu ani Barnabas Ikoniumant ravle. Grek sonskruti aslolem hem ek xar aslem. Ani tem Romi raj Galasiechea mukhel xaram modlem aslem. Hea xarant, odhikar aslole Judev lok ani zaite Judev dhorm apnnailole lok ravtale. Sonvoim-e pormonnem, Paulu ani Barnabas Devsthanant vochon porgott korunk lagle. (D.I. 13:5, 14) Te “itlea nettan uloile ki Judevanchea ani Grikanchea puskoll lokan bhavarth dhorlo.”—D.I. 14:1.
(Itihas 14:21, 22) Tea xarant Xubhvortoman porgottun zaite xis kelea uprant, Paulu ani Barnabas Listrek, Ikoniumak ani Antiokiek portole. 22 Tannim xisank ghottai dili ani bhavarthant thir ravat mhonn sanglem. “Devachea Rajeant bhitor sorunk zaite koxtt-dogd ami sosunk zai, oxem te mhonnttale.”
w14 9/15 13 ¶4-5
“Zaite Koxtt-dogd” Aslear Pasun Devachi Seva Visvasan Korat
4 Derbek bhett kelea uprant, Paulu and Barnabas Listrek, Ikoniumak ani Antiokiek portole. Tannim xisank ghottai dili ani bhavarthant thir ravonk urba dili: “Devachea Rajeant bhitor sorunk zaite koxtt-dogd ami sosunk zai, oxem te mhonnttale.” (D.I. 14:21, 22) Hem poilinch aikotana ghoddie vegllench disot. Karonn, “zaite koxtt-dogd” sosunk zai mhunn aikon konnankuch urba mellona, bodlek niraxi zatat. Toxem zalear, anik chodd tras ietole mhunn sangon Paulu ani Barnabas “xisank ghottai” koxe diunk pavle?
5 Pauluchim utram bariksannen topaslear amkam tacho zobab melltta. Tannem ami bexttech, “koxtt-dogd . . . sosunk zai” mhunn sangonk na. Bodlek, tannem mhunnttlem: “Devachea Rajeant bhitor sorunk zaite koxtt-dogd ami sosunk zai.” Tor Paulun, visvaxi ravlolean mellttat tea boreponnam vixim sangon xisank ghottai dili. Mellcho aslo to inam ek sopon naslem. Jezun sanglem: “Xevottak porian thir ravtit tinch taronn zoddtolim.”—Mt. 10:22.
Bible-ant Motiam Sodhum-ia
(Itihas 12:21-23) Eka nemlolea disa Herodin aplim raiponnachim vostram ghalim ani eka xinvasonar bosun tannem porjek ek boli keli; 22 Lok gorozlo: “Uloita to ek dev, to monis nhoi.” 23 Punn teach vellar thoiche-thoich Sorvesporachea dutan taka xikxa dili, kiteak tannem Devak man dilo na; ani kiddeamnim khaun to melo.
w08 5/15 32 ¶7
Itihas Pustokantle Mukhel Mudʼde
12:21-23; 14:14-18. Fokot Devakuch vochonk zai ti vakhannʼnni Herodan apnnank ghetli. Hem Paulu ani Barnabasak sor kelear kitlem vegllem! Tankam favo na ti vakhannʼnni ani man mellʼllo tednam tannim ti rokddich nakarli. Jehovachea sevent ami kortat tea kamant ies melltta tednam vakhannʼnni mellonk zai mhunn ami kednanch opekxa korchi nhoi.
(Itihas 13:9) Punn Saulun-haka Paulu-i mhonn nanv aslem-Povitr Atmean bhoron, nitt tea ghaddiak tellun
nwtsty obheasachi ttipnni D.I. 13:9
Saulun-haka Paulu-i mhonn nanv aslem: Hea ghoddnne uprant Sauluk Paulu mhunn ulo korunk lagle. Ho apostl zolma thaun Hebrev, punn taka Romi nagrikponn aslem. (D.I. 22:27, 28; Filp. 3:5) Taka lagon, chodd korun bhurgeaponnar thaun taka Hebrev nanv Saulu ani Romi nanv Paulu aslem. Tea tempar, chodd korun Israela bhair jietolea Judevank don nanv asop sobhavik aslem. (D.I. 12:12; 13:1) Pauluchea thoddea soireank pasun Romi ani Grek nanvam aslim. (Rom. 16:7, 21) “Videxiancho Dhormdut” zalolean Pauluk, Judev nasloleank porgott korunk nemlolo. (Rom. 11:13) Tor, aplem Romi nanv uzar kelear, lok ghoddie apnnak chodd manun ghetole oxem taka dislem astolem. (D.I. 9:15; Gal. 2:7, 8) Thoddim mhunnttat, tannem Romi nanv Sergius Paulusak man diunk apnnailem. Punn hem khorem disona, karonn Siprus soddlea uprant pasun tannem hench nanv uzar kelem. Pauluchem Hebrev nanv Grek bhaxen mhunnttana, aikonk gorvan cholta toslea eka munxak (vo zonvarak) uzar kortolea nanva sarkem distalem dekhun Paulu aplem Hebrev nanv uzar korinaslo oxem thoddim zannam sangtat.—D.I. 7:58 obheasachi ttipnni polloi.
Paulu: Latin bhaxen, Paulus hea nanvacho orth “Lhan; Dhakttem,” zaun asa. Hea nanva thaun ailolem nanv Pauʹlos, Grek Bhaxen Boroilʼlea Pustokamnim 157 pavtt apostl Paulu vixim sangtana uzar kelam ani ek pavtt Siprusacho Razpal Sergius Paulusa vixim sangtana uzar kelam.—D.I. 13:7.
DEZEMBR 17-23
DEVACHEA UTRANTLE THEVE | ITIHAS 15-16
“Devachea Utracher Adarit Eka Monan Ghetlolo Nirnnoi”
(Itihas 15:1, 2) Tednam Judeiak thaun kai monis ieun amchea bhavam-bhoinnink oxem xikounk lagle: “Moizesan sthaplole chali pormannem tumi sunot kelea xivai, tumi taronn zoddunk xokonant.” 2 He vixim he monis Paulucher ani Barnabasacher uprasle ani tanche modem motto vad-vivad zalo. Xekim oso tharav zalo: Paulun ani Barnabasan ani tanche modlea thoddea zannamnim Jeruzaleak vochun hea tonttea vixim Dhormdutam ani zanntteam kodde bhasabhas korchi.
“Tanche Modem Motto Vad-Vivad Zalo”
8 Lukan fuddem mhunttlem: “He vixim he monis [“kai monis”] Paulucher ani Barnabasacher uprasle ani tanche modem motto vad-vivad zalo. Xekim oso tharav zalo [vhoddilamnim ghetlo]: Paulun ani Barnabasan ani tanche modlea thoddea zannamnim, Jeruzaleak vochun hea tonttea vixim Dhormdutam ani zanntteam kodde bhasabhas korchi.” (D.I. 15:2) Tednam “vad-vivad” zalʼlo mhunnche don-ui vatten tanche bhitor kholaiechim bhavnam upzolʼlim ani dor ekleacho nichov ghott aslo dekhun Antiokient aslole sobhechean to vad-vivad suttavo korunk zaunk na. Tor, xanti ani ekvott rakhonk lagon, sobhen “Jeruzaleak vochun hea tonttea vixim Dhormdutam ani zanntteam koddem (jem tednanche sonchalon monddoll aslem) bhasabhas” korunk manddavoll keli. Antiokientlea vhoddilam thaun ami kitem xikonk zata?
(Itihas 15:13-20) Tanchem ulovop zatoch, Jakoban oxem aplem mot sanglem: “Bhavam-bhoinnimno, mhojem aikat: 14 Aplea nanvank bhettoilʼli videxiam modli ek porza survatek thaun vinchun kaddunk Devachi khuxi mhonn Simeianvan tumkam atanch sanglam. 15 Ani hem provadianchea utram pormannem asa, kiteak oxem boroilʼlem asa: 16 ‘Hea uprant, Hanv portun ietolom, ani Davidacho moddon poddlolo tombu Hanv novean tanntolom. To Hanv ghorttannantlo ubo kortolom ani novean bandtolom. 17 Tednam sogllim monxam Sorvesporak sodtolim, Mhojea nanvak bhettoilʼlim asat tim sorv raxttram. 18 Zannem zaitea kalla thaun hem kollit kelam, to Sorvespor oxem sangta.’ 19 Mhonnttoch mhojem mot oxem: Deva-xim portun ietat tea videxianchem jivit ami odik avghodd korchem nhoi. 20 Punn tankam oxem ami boroun dhaddchem: kuddea devank bhettoun bhoxttailʼleo vostu tannim khauncheo nhoi, Somurtichea kaideam add logn korchem nhoi, ani gomtti pillun marlole monzatichem mas khaunchem nhoi ani rogot xevchem nhoi.
w12 1/15 5 ¶ 6-7
Khore Kristanv Devachea Utrak Man Ditat
6 Ho vad-vivad suttavo korunk Amos 9:11, 12-antlean tankam modot mellʼlli. D.I. 15:16, 17-ant (Povitr Pustok - Novo Korar) tim versam oxim ulʼlekh keleant: “Hea uprant, hanv portun ietolom, Ani Davidacho moddon poddlolo tombu novean tannʼtolom. To ghorttanantlo Hanv ubo kortolom ani to novean bandtolom. He porim her monis [“urlole munis,” NW] Sorvesporak sodtele ani toxinch Mhojea nanvak bhettoilelim asat tim soglim raxttram, oxem Sorvespor sangta, Tachench hem kam.”
7 ‘Hea versant tor bhavarthi zalʼlea Videxi lokank sunot korchi goroz na mhunn hanga kainch sangona’ oxem konnui mhunnot. Tem khorem, punn Judev Kristanv tea versancho orth somzole astole. Te sunot korunk naslolea Videxiank ‘porke munis’ nhoi punn aple bhav mhunn lekhtale. (Sutt. 12:48, 49) Udharonnak, Septuagint-achea Bagster’s version-ant Esther 8:17 oxem sangta: “Zaitea Videxi lokamnim sunot keli, ani Judev zale.” Tor, Amos pustokant bhakit kelolea porim Israelachea ghorantle urlole munis (Judev ani sunot korun Judev dhorm apnnailole) toxench ‘soglea raxttrantle lok’ (sunot korunk naslole Videxi) Devachea nanvak bhettoilole lok zaunche asle. Tor hanga zobab spoxtt aslo. Kristanv zaunk sodhtolea Videxiank sunot korchi goroz nasli.
(Itihas 15:28, 29) Hea gorjechea kaideam bhair anink koslench vozon tumcher ghalina zaunk Povitr Atmeak ani amkam borem dislem: 29 kuddea devank bhettoilʼlem jevonn tumi jevchem nhoi, rogot xevchem nhoi, ani gomtti pillun marlole monzatichem mas khaunchem nhoi; Somurtichea kaideancher add logn korchem nhoi. Hea vostunk patt korun tumi borea rostear astoleat. Noman!”
(Itihas 16:4, 5) Nogram-nogramnim bhonvtana, Jeruzaleak Dhormdutamnim ani zannteamnim tharav ghetlole tanchi khobor tannem tankam dili ani te pallunk zai mhonn sanglem. 5 He bhaxen teo Povitr-Sobha odik-odik bhavarthan mozbut zaleo ani disan dis tanchi sonkia-i vaddon geli.
“Povitr Sobhank Ghottai Diun”
18 Paulun ani Timotan zaitim vorsam sangata kam kelem. Bhonvddi kortana tannim sonchalon monddolla pasot zaite torechem kam kelem. Bible sangta: “Nogram-nogramnim bhonvtana, Jeruzaleak Dhormdutamnim ani zannteamnim tharav ghetlole tanchi khobor tannem tankam dili ani te pallunk zai mhonn sanglem.” (D.I. 16:4) Jerusalemantlea dhormdutamnim vo apostlamnim ani zanntteamnim dilolem margdorxon sobhamnim pallʼllem mhunn dison ieta. Tannim toxem kelem dekhun, “Povitr-Sobha odik-odik bhavarthan mozbut zaleo ani disan dis tanchi sonkia-i vaddon geli.”—D.I. 16:5.
Bible-ant Motiam Sodhum-ia
(Itihas 16:6-9) Frijient ani Galasiechea prantant bhonvlea uprant, Devachem utor Aziechea prantant porgott korunk Povitr Atmean tankam addvarle. 7 Misieche ximer te pavle tednam, ti utrun te Bitinient vochunk kortale, punn Jezuchea Atmean tankam vochunk diunk na. 8 Mhonnttoch Misientlean bhonvon te Troasak gele. 9 Ani eke rati Paulun ek dixttavo dekhlo: Masedoniecho ek monis ubo aslo ani tache lagim oxem magtalo: “Masedoniek ieun amkam adar di.”
w12 1/15 10 ¶8
Jezuchea Apostlam Thaun Zagrutaie Vixim Xikat
8 Hea ghoddnnentlean ami kitem xikonk zata? Paulu Aziek vochonk bhair sorlea uprantuch, Devachea xokten modot keli. Magir, Paulu Bitiniechea lagim pavlea uprantunch, Jezun modot keli. Xevttak, Paulu Troasak pavlea uprantuch, Jezun taka Masedonie vochonk margdorxon dilem. Sobhecho Mostok Jezu, aiz pasun amkam oxich modot korunk xokta. (Kol. 1:18) Udharonnak, tumi ghoddie pioneering korunk vo chodd goroz asa toslea zageamnim vochon porgottunk chintat astolim. Punn osle dhei mellounk tumi pavl ghetlea uprantuch, Devachea xokte udexim Jezu tumkam vatt dakhoitolo. Udharonnak, ek kar fuddem voita zalearuch tacho drivor tea gaddiek davea vo uzvea vatten vhoronk xokta. Teach porim, ami amcho dhei melloun gheunk vavrun, fuddem sortat zalearuch Jezu amkam amchi seva vaddounk vatt dakhounk xokta.
(Itihas 16:37) Punn Paulun tankam mhollem: “Ami Romi nagrik zaun-ui, tannim amkam sobhemazar mar dilo, nit korinastana amkam bondkhonnint ghale, ani atam guptim amkam soddunk sodtat? Oxem zaum nozo! Apunnuch ieun tannim amkam bhair kaddche.”
nwtsty obheasachi ttipnni D.I. 16:37
Ami Romi: Mhunnche Romi nagrik. Paulu ek Romi nagrik aslo ani Silas pasun ghoddie Romi nagrik aslo astolo. Romi kaidea pormonnem, ek Romi nagrik guneanvkari asa vo na tem tharaunk korttan sarki choukoxi korunk zai asli. Hem kelea bogor, soglea lokam hujir taka kednanch xikxa diunk zaina asli. Romi nagrikponn aslolo ek munis, Romi somrajant khoinsor-ui gelear taka umke odhikar ani sueog astale. Taka Romi somraja bhitor aslolea xaranche kaide nhoi, punn Romi kaide lagu zatale. Tacher arop ghatlo zalear, apli choukoxi tea xarachea kaidea khala aslolea korttant zaunchi mhunn tannem manun gheunk zatalem. Tori astana, taka zai zalear apli choukoxi Romi korttan korchi mhunn sangonk taka hokʼk aslo. Moronn favo aslolo guneanv kelo zalear, Romi nagrikak Somratta fuddem apli kes manddunk hokʼk aslo. Apostl Paulun akʼkhea Romi Somrajant porgott kelem. Taka aslolo Romi nagrikponnacho hokʼk tannem tin pavtti uzar kelo mhunn vachunk melltta. Filipi xarantlea neai-odhikareamnim taka zhoddtti korinastana marlo tednam te tachea hokʼka add gele mhunn sangon, tannem ho hokʼk poile pavtt uzar kelo.—anik don pavtt to hokʼk kednam uzar kelo tem zannam zaunk, D.I. 22:25; 25:11 obheasachi ttipnni polloi.
DEZEMBR 24-30
DEVACHEA UTRANTLE THEVE | ITIHAS 17-18
“Porgottʼttana ani Xikoitana Apostl Pauluchi Dekh Gheiat”
(Itihas 17:2, 3) Aple sodanche sonvoie pormannem, Paulu tanche zomatik gelo. Ani tin Sonvar porian tannem tanche lagim Povitr Pustok dhorun bhasabhas keli; 3 ani Kristan sosunk zai aslem ani To melʼleantlo punorjivont zaunk zai aslo mhonn tankam somzonni diun dakhoilem. To oxem sangtalo: “Hanv tumkam porgott kortam to Jezu, hoch Krist!”
nwtsty obheasachi ttipnni D.I. 17:2, 3
bhasabhas keli: Paulun tankam bori khobor bexttich sangonk na. Tannem tankam somzonni dili ani Povitr Pustok uzar korun, apunn jem sangta tem Hebrev Bhaxen Boroilʼlea Pustokamnim asa mhunn dakhoilem. Tannem fokot versam vachun dakhounk nant punn tea versancher bhasabhas keli ani hem tannem aiknnareank somzota tea toren kelem. Grek kriapod di·a·leʹgo·mai hacho orth “eka-meka lagim ulovop; bhasbhas korop.” Hantunt lokam sangata bhasabhas korop mellon asa. Hem Grek utor D.I. 17:17; 18:4, 19; 19:8, 9; 20:7, 9 hantunt pasun uzar kelam.
dakhoilem vo asa mhunn puravo dakhoilo: Hea utrak uzar kelolea Grek utracho orth, “boglek dovrop (sangata dovrop).” Hacho orth, Paulun Mesiasa vixim Hebrev Bhaxen Boroilʼlea Pustokamnim aslolim bhakitam Jezuchea jivitak sor korun, Jezun tim bhakitam koxim purnn kelim tem dakhoilem.
(Itihas 17:17, 18) Judevam lagim ani Devak bhoztoleam kodde to devsthanant bhasabhas kortalo; 18 ani toxench chouker thoichean ieteam-veteam kodde vad-vivad kortalo.
nwtsty obheasachi ttipnni D.I. 17:18
chouker: Ho Atenacho bazar (Grek, a·go·raʹ) Acropolisachea utʼtor-poschim vatten aslo zo sumar 5 ha (12 ac) zageacher aslo. Ho bazar fokot vikunk ani viktem gheunk nhoi, punn to xaracho karbar cholouncho, rajki kamam korcho ani sonskrutaiecho kendr zaun aslo. Atenachea lokank hea zagear mellon ieun vhoddlea-vhoddlea gineamnim vixoi-am vixim bhasabhas korunk avoddttalem.
(Itihas 17:22, 23) Paulu Areiopagache Mha-Sobhe fuddem ubo ravlo ani oso uloilo: “Atenkaramno, sogllech vatten tumi ekdom dhorm-pallpi monxam mhonn hanv polletam. 23 Tor tumchea xarant bhonvtana ani tumcheo dharmik iadgiri ekan-ek polletana, ‘Onvollkhi devak’ ho boroilʼlo namlekh asloli ek vedi-i hanvem dekhli. Borem tor: tumi vollkhonastana bhoztat toch Dev hanv tumkam porgott kortam.
nwtsty obheasachi ttipnni D.I. 17:22, 23
Onvollkhi devak: A·gnoʹstoi the·oiʹ him Grek utram Atenantle eka vedicher boroilolim aslim. Atenachea lokank devanchi bhirant astali dekhun te zaitim devsthanam ani vedeo bandtale. Te itle bhietale, ki tannim Famad, Mannsugi, Xokti, Somzavop, ani Doia hea gunnanchea nanvamnim pasun vedi bandleo. Khoinchea-i eka devachi vedi bandunk chukot, ani to ragar zait mhunn tannim ek vedi eka “Onvollkhi devak” pasun bandli. Hea vedi udexim tea lokamnim apunn vollkhona toslo ek Dev asa mhunn manun ghetlem. Hea vedichem udharonn uzar korun Paulun aplea aiknnareank Deva vixim vollokh dili—khoro Dev—zachea vixim tea meren konnuch noko aslo.
Bible-ant Motiam Sodhum-ia
(Itihas 18:18) Borech-xe dis Korintant ravlea uprant, bhavam-bhoinnincho nirop gheun, Prisila ani Akuila borabor tarvan Paulu Siriek gelo. Kenkresak pavtoch, apnnem ek angovnn kelʼli ti pallunk, Paulun aple kens tasle.
w08 5/15 32 ¶5
Itihas Pustokantle Mukhel Mudʼde
18:18—Paulun kosli angovnn keli? Thodde ponddit, Paulun Nazarit zaunchi angovnn keloli mhunnttat. (Lok. 6:1-21) Punn Bible, Paulun kosli angovnn keloli tem sangona. Toxench, Paulun hi angovnn Kristanv zaunchea poilim vo Kristanv zalea uprant keloli tem sangona. Ani tea vellar, to ti angovnn suru kortalo vo sompoitalo hem pasun sangona. Kitem-i zaum, tosli angovnn ghevop patok naslem.
(Itihas 18:21) punn tancho nirop ghetana mhollem: “Devak zai zalear, hanv portun ietolom.” Oso to tarvar bosun Efezantlo bhair sorun gelo.
nwtsty obheasachi ttipnni D.I. 18:21
Devak zai zalear: Kitem-i kortana, vo kitem tori korunk ievjitana, Devachi khuxi kitem asa tem ugddasak haddop gorjechem mhunn him utram dakhoun ditat. Apostl Paulun hem totv sodanch ugddas dovorlem. (1Kor. 4:19; 16:7; Heb. 6:3) Jakob pasun vachnnareank urba dita: “Devak zai zalear ami jivim astoleanv ani hem vo tem kortoleanv.” (Jak. 4:15) Him utram bexttinch sangchim nhoi. Jim konn “Devak zai zalear” mhunn sangtat tannim Jehovache khuxe pormonnem kam korcho proitn korunk zai. Him utram soglech pavtt tonddan sangchi goroz na, tim chodd korun fokot kallzant mhunnttlear puro.—D.I. 21:14; 1Kor. 4:19; Jak. 4:15 obheasachi ttipnni ani App. C-E polloi.
DEZEMBR 31–JANER 6
DEVACHEA UTRANTLE THEVE | ITIHAS 19-20
“Tumche Vixim ani Akʼkhea Hindda Vixim Tumi Zagrut Ravat”
(Itihas 20:28) Devache Povitr-Sobhecho samball korunk Povitr Atmean tumkam odhikari keleat, tor tumche vixim ani akʼkhea hindda vixim tumi zagrut ravat; hi povitr-sobha Tannem Apleach Putachea rogta vorvim Apli kelea.
w11 6/15 20-21 ¶5
“Tumchea Adhin Kelʼlea Devachea Hinddachi Gonvlliam Vori Rakhonn Korat”
5 Apostl hanga, zantteamnim tanchea ‘adhin kelolea Devachea hinddachi gonvlliam vori rakhonn korunk’ zai mhunn sangta. Hindd Jehova ani Jezu Kristacho mhunn tannim vollkhon ghevop chodd gorjechem aslem. Vhoddilamnim apnnem Devachea menddrank koxe toren rakhlam tacho hixob diunk zai aslo. Chintat, tumchea eka lagxilʼlea ixttan apunn na tea vellar aplea bhurgeank samballunk tumchea hatant dileant. Tumi tanchi bori kallji gheun tankam vellar jevonn-khann diunchimnant kai? Tanchea modlem ek bhurgem duent zalem zalear, taka dotora lagim vhoron tumi tachi bori kallji gheunchimnant kai? Teach bhaxen sobhentlea vhoddilamnim, Devan aplea “Putachea rogta vorvim” viktim ghetlolea “Povitr-Sobhecho samball korunk” zai. (Itihas 20:28) Dor eka menddrak Jezuchea rogta vorvim viktim ghetleant mhunn te sodanch ugddas dovortat. Tannim hixob diunk zai taka lagon vhoddil tea hinddak choroitat, tankam rakhtat, ani tanchi kallji ghetat.
(Acts 20:31) “Tea khatir zagrut ravat, ani hanvem dukam varoun tin vorsam porian thambonastana dis-rat tumche modlea zonn-ekleak budh dilea ani xiddkaila mhonn ugddas dhorat.
w13 1/15 31 ¶15
Kristi Vhoddil—“Tumche Borabor Vavrunk Amchi Khuxi”
15 Eka gonvlleachea kamant koxtti vavr mellon asa. Thodde pavtti tor, Devachea hindda pasot magnnem korunk vo Deva thaim ixttagot ghott korunk tankam tenko diunk vhoddil rat-bhor pasun vavurtat. (2 Kor. 11:27, 28) Tori astana, vhoddil apli zobabdari Paulu bhaxen purnn ritin ani khuxalkaien kortat. Paulun Korintkarank boroilem: “Tumche khatir mhoje kodde asa titlem-i khorchunk, mhozo jiv porian khorchunk, hanv bhov khuxi.” (2 Kor. 12:15) Khorench, Pauluk aplea bhavancho mog aslo dekhun, tankam ghottai diunk tannem apnnank khorchilo. (2 Korintkarank 2:4 vachat; Filp. 2:17; 1 Tes. 2:8) Hea karonnak lagon bhav tacho khub mog kortale.—Itihas 20:31-38.
(Itihas 20:35) ‘Dusream koddchem gheunche poros dusreank divop odik vhodd bhag hea Somia Jezuchea khaxa utrancho ugddas dhorun, koxtt korun osoktank adar diunk zai mhonn soglle bhaxen hanvem tumkam dakhoilam.’”
“Soglleam Modem Konnachea-i Jivacho Zor Nas Zalo, Hanv Zobabdar Nhoi”
20 Je konn uprant hinddacho faido ghetole vo tancho samball korche nant tosleam thaun Pauluchea jivitachi chal, veglli asli. Sobhecher kosloch bhar poddcho nhoi mhunn to kam korun aplem pott bhortalo. To bhav-bhoinnam pasot vavurlo tednam pasun tannem tem aplea faideak lagon korunk na. Paulun Efezachea vhoddilank svotacho teag korcho sobhav dovrunk sanglem. Tannem tankam, “Somia Jezuchea khaxa utrancho ugddas dhorun, koxtt korun osoktank adar diunk zai” mhunn sanglem, ani “Dusream koddchem gheunche poros dusreank divop odik vhodd bhag” mhunnttlem.—Itihas 20:35.
Bible-ant Motiam Sodhum-ia
(Itihas 19:9) Punn tantuntlim thoddim, aplea vadeachim zaun, bhavarth dhorunk kobul naslim, punn sobhemazar he nove Vatte vixim vaitt ulounk laglim. Hea pasot, Paulun tankam sanddlim ani aplea xisank tanche modle kuxin kaddle ani tankam gheun konn-eklea Tiranusache xallent to dispottim vad-vivad kortalo.
Dhumallo Aslear Pasun “Ximpoddtale ani Ghott Zatale”
11 Tea iskolachea holant Paulu dor disa sokallim 11 thaun sanjer 4 poriant xikoitalo astalo. (Itihas 19:9) Disacho ho vell, ghoddie xant astalo zait ani tednam bori gormi astali astoli. Zaite lok hea vellar jevunk ani visov gheunk aplem kam bond kortale. Chintat, don vorsam chukoinastana Paulu oxem korit aslo zalear, tannem ghoddie soglim mellon 3,000 voram xikoilem astolem. Tor Devachem utor vaddot vochonk ani ghott zait ravonk hem anik ek karonn aslem. Paulu koxtti vavr kortalo ani poristhiti pormonnem xikoitalo. Tea vattarantlea, lokancheo gorzo kitem asat tem monant dovrun Paulu tea bhaxen veg-vegllea vellar porgottʼttalo. Hacho porinnam kitem zalo? “Aziechea prantant jietalo to lok, zaum Judev, zaum Grik, Somiachem utor aikunk pavlo.” (Itihas 19:10) Tannem kitle bore toren sakx dili nhoi!
(Itihas 19:19) Ani jadu kortolea modlea zaitea zannamnim aplim pustokam punzaun haddlim ani soglleam hujir tankam uzo lailo. Hea pustokanchem mol ponnas hozar rupeache nanne zatole mhonn odmas kelo.
Dhumallo Aslear Pasun “Ximpoddtale ani Ghott Zatale”
15 Skivachea putanchi loz zalea uprant, bhonvtonnche lok Devachea bhirantin jieunk lagle zachea vorvim zaite bhavarthant ieunk ani ghaddieponn soddun diunk pavle. Efezachi sonskrutai jadu korcheant buddloli. Boroilolim montram mhunnop, jadu korop ani taviz bandop chaltem aslem. Punn zaitea Efezkaramnim aplim jadu korchim pustokam sogleam fuddem haddun zolloilim. Hachem mol aichea kallant ghoddie dha hozar dollar aslem astolem. Lukas sangta: “Vhodda nettan Somiachem [“Jehovachem,” NW] utor odik-odik ximpoddtalem ani ghott zatalem.” (Itihas 19:17-20) Fottingponnam add and devcharponnam add kitlem vhoddlem zoit! Tea visvaxi lokamnim amchea pasot ek borem udharonn dovorlam. Aiz pasun ghaddieponnan bhorlolea sonvsarant ami jietat. Amchea lagim ghaddieponnam sombondit kosleo-i vostu asat mhunn amkam kollon ailem zalear, teo ami rokddeoch kaddun uddoum-ia! Tosle bhurxe chali thaun pois ravonk ami amchean zata tem soglem korum-ia.