Novembr—Jivit ani Porgottnni Mittingechea Pustike Pasot Modot
NOVEMBR 5-11
DEVACHEA UTRANTLE THEVE| JUANV 20-21
“Hanche Poros Odik Mhozo Mog Kortai Mum Tum?”
(Juanv 21:1-3) Tea uprant, Tiberiasachea Doria-xim Jezu novean xisank dixtti poddlo. He porim To dixtti poddlo. 2 Simanv Pedru, Zonvllo mhonnlolo Tomas, Galileiantlea Kanacho Natanael, Zebedevache put, ani Tachea xisam modle anink dog ektthai asle. 3 Simanv Pedrun tankam mhollem: “Hanv maslli marunk vetam.” Tannim taka mhollem: “Ami-i tuje borabor ietanv.” Te gele ani hoddeant choddle; punn te rati tankam kaich mellʼllem na.
(Juanv 21:4-14) Sokall zatoch Jezu veller ubo aslo; to Jezu mhonn xisank kollʼllem na. 5 Jezun tankam mhollem: “Are babamno, maslli kitem tori poddlea mum?” Tannim Taka zobab dilo: “Kaich na.” 6 Tannem tankam sanglem: “Hoddeache uzve vatten ramponn ghalat ani tumkam maslli poddtoli.” Tannim ramponn ghali, ani maslli ekdom chodd poddli dekhun, tanchean ramponn oddunk zaina zali. 7 Jezu mog kori tea xisan Pedruk mhollem: “To Somi!” To Somi mhonn aikun, Simanv Pedrun aplem voilem anglem penkttak bandlem (kiteak to sarko nheslolo naslo) ani doriant uddki marli. 8 Punn her xis hoddear bosun ani masllen bhorloli ramponn oddit-oddit aile; te toddik laginch asle, sumar deddxem hat bhair. 9 Toddir pavle Tednam, tannim thoi unddo dekhlo ani kollxeanchea ujear dovorloli maslli. 10 Jezun tankam mhollem: “Tumi atam dhorlea tantli maslli hanga haddat.” 11 Hoddear choddun Simanv Pedrun ramponn toddir oddun haddli. Ti ekxem treponn vhoddlea maslliamnim bhòrloli asli; ani itleo masllio astana-i, ramponn pinzli na. 12 Jezun tankam mhollem: “Nasteak ieiat.” “Tum konn kai?” mhonn vicharunk nasteak bosloleantlea konnakuch kalliz zalem na; To Somi mhonn te zanno asle. 13 Tednam Jezun fuddem sorun unddo ghetlo ani tankam dilo; toxench maslli-i dili. 14 Melleantlo punorjivont zalea uprant Jezu xisank dixtti poddlo ti hi tisri pavtt.
(Juanv 21:15-19) Nasto zatoch Jezun Simanv Pedruk mhollem: “Simanv, Juanvachea puta, hanche poros odik Mhozo mog kortai mum tum?” Tannem Taka mhollem: “Hoi, Somia, hanv Tuzo mog kortam mhonn Tum zannoi!” Jezun taka mhollem: “Mhojea menddrank chorvak vhor.” 16 Dusre pavtti Tannem taka vicharlem: “Simanv, Juanvachea puta, Tum mhozo mog kortai?” Tannem Taka zobab dilo: “Hoi, Somia, hanv Tuzo mog kortam mhonn Tum zannoi.” Jezun mhollem: “Mhojea xelliank rakh.” 17 Tannem taka tisre pavtti vicharlem: “Simanv, Juanvachea puta, Mhozo mog kortai mum tum?” “Mhozo mog kortai mum tum?”, oxem apnnak tisre pavtt vicharlem dekhun Pedruk khont zali, ani tannem oso portipall kelo: “Somia, Tum sogllem zannoi; hanv Tuzo mog kortam mhonn Tum zannoi.” Jezun taka mhollem: “Mhojea xelliank chorvak vhor. 18 Khorench khorem Hanv tuka sangtam: tum lhan asloi Tednam, tujea penkttak bandtaloi ani tuka zai thoi tum vetaloi; punn tum mhataro zatoch, tuje hat vistartoloi ani dusro konn tujea penkttak bandtolo ani tuka naka thoi tuka gheun vetolo.” 19 Koslea mornna vorvim to Devak mhoima ditolo aslo tem dakhounk, Jezun toxem mhollem. Tea uprant mhollem: “Mhoje patthlean ie.”
nwtsty obheasachi ttipnni Ju. 21:15, 17
Jezun Simanv Pedruk mhollem: Pedrun Jezuk tin pavtti nakarun thoddeach tempa uprant, Jezu ani Pedru modem hi bhasabhas zalʼli. Jezun tin pavtti Pedruk aplea vixim koxem bhogta mhunn vicharlem, itlem ki “Pedruk khont zali.” (Ju. 21:17) Ju. 21:15-17-ant Juanvan, don vegllim Grek kriapodam vapurleant: a·ga·paʹo, mhunnche mog, ani phi·leʹo, mhunnche opurbai asop. Jezun Pedruk don pavtti vicharlem: “Mhozo mog kortai mum tum? Don-ui pavtti Pedrun apunn kallzant thaun Jezucho “mog kortam” mhunn zobab dilo. Xevottak, Jezun porot vicharlem: “Mhozo mog kortai mum tum?” Ani portun, Pedrun hoi mhunn sanglem. Pedrun dor ek pavtt apunn mog kortam mhunn sanglem tednam, Pedruk aslo to mog ani opurbai taka Jezuchea xisank chorvak vhoronk ani ‘rakhonk’ prerit korunk zai mhunn Jezun porot-porot sanglem. Hanga Jezun aplea xisank xelli vo menddram mhunnttleant, zankam Pedrun, Deva sangata ghott sombond samballunk modot korunk zai asli. (Ju. 21:16, 17; 1Ped. 5:1-3) Pedru aplo khoroch mog korta mhunn dakhoun diunk Jezun taka tin sondheo dileo ani tea uprant tannem taka menddrank rakhchi zobabdari dili. Hea toren, Jezuk tin pavtti nakarlea uprant, Jezun apleak bhogxila kai na mhunn Pedruchea monant aslole sogle dubav Jezun kaddun uddoile.
hanche poros odik Mhozo mog kortai mum tum?: Viakronna pormonnem, “hanche poros odik,” hea utrancho orth eka poros chodd ritin somzonk zata. Thodde ponddit hacho orth, “hea xisancho mog korta tache poros odik Mhozo mog kortai mum tum?” vo “he xis mhozo mog kortat, tachea poros odik Mhozo mog kortai mum tum?” mhunn somzotat. Punn hea utrancho orth chodd korun, ‘hea vostu poros odik Mhozo mog kortai mum tum?’ mhunnche, tannim dhorlolem nustem vo nusteachea veapara sombondit aslole vixoi. Tor hea versacho orth, Jezu tankam ‘Tum mhaka poixe vo her vostu melloun gheunchea poros chodd mog korta kai? Toxem zalear, mhojea xelleank chorvak vor.’ Pedruchem poilinchem jivit polloit zalear, ho prosn vicharop sarkem aslem. Pedru Jezuchea adlea xisam modem aslo toripunn (Ju. 1:35-42), tannem rokddoch purnn vell Jezucho pattlav korunk na. Punn to porot aplo kharveacho veapar korunk laglo. Thoddea mhoinea uprant, Jezun Pedruk tacho vhoddlo veapar soddun, ‘monxank dhorta toslo kharvi’ zaunk apounnem dilem. (Mt. 4:18-20; Luk. 5:1-11) Jezu moron thoddea tempa uprant, portun Pedrun apunn nustem marunk voita mhunn sanglem, ani her apostl pasun tachea sangata gele. (Ju. 21:2, 3) Jezu hanga ghoddie Pedrun ekuch vost vinchchi goroz asa mhunn taka somzaunk sodhtalo: Tanchea fuddem aslolea nusteanchea raxik, mhunnche nustem marpachea dhondeak poilo zago ditolo, vo Jezun taka aplea menddrank chorounchem, vo aplea xisank Deva vixim xikounchem kam dilam, taka poilo zago ditolo.—Ju. 21:4-8.
Tisre pavtti: Pedrun aplea Somiak tin pavtti nakarlolo. Tor atam taka Jezu vixim koslim bhavnam aslim tim dakhounk, Jezun taka tin sondheo dileo. Ani Pedrun tin pavtti apunn Jezucho mog korta mhunn sanglem tednam Jezun taka Devachi povitr seva soglea poros poilea zagear dovrun to aplo mog ani opurbai dakhounk xoktolo mhunn sanglem. Her zobabdari aslolea bhavam sangata, Pedrun Krisatachea hinddak mhunnche visvaxi pattlavdarank choroitolo, ghottai ditolo ani rakhtolo. Ho hindd obhixiktancho aslo, tori astana tankam Deva vixim xikounn diunchi goroz asli.—Luk. 22:32.
Bible-ant Motiam Sodhum-ia
(Juanv 20:17) Jezun tika mhollem: “Mhaka dhorun ravum naka! Hanv ozun Bapa sorxim choddunk na: Mhojea Bapa ani tumchea Bapa-xim, ‘Mhojea Deva ani tumchea Deva-xim, Hanv choddun vetam.’”
nwtsty obheasachi ttipnni Ju. 20:17
Mhaka dhorun ravum naka: Haʹpto·mai hea grek kriapodacho orth “hat lavop” vo “chittkon ravop; dhorun ravop.” Thoddea bhaxantoramnim, Jezuchea hea utrank, “mhaka hat lavum naka” mhunn bhaxantor keleam. Punn Jezu hanga, Magdalache Marien taka hat lailo tem chukichem mhunn sangona. Karonn tachea punorjivontponna uprant her bailamnim “tache pai dhorle” tednam-i Jezun tankam kainch mhunnonk na. (Mt. 28:9) Jezu tednanch sorgar voitolo mhunn Magdalache Maria ghoddie bhieli astoli. Tichea Somia thaun tika pois vochonk naka aslem dekhun, to apnnank soddun voicho nhoi mhunn ti taka ghott dhorun ravli. Apnnank vochonk anik vell asa mhunn tika khatri diunk, Jezun tika apleak dhorun ravchea bodlek vochon xisank aplea punorjivontponnachi khobor porgott kor mhunn sanglem.
(Juanv 20:28) Tomasan Taka zap diun mhollem: “Mhojea Somia ani mhojea Deva!”
nwtsty obheasachi ttipnni Ju. 20:28
Mhojea Somia ani mhojea Deva!: Thodde xastrache ponddit, him utram Tomasan ojapan Jezuk polloun mhunnttlolim tednam tim tannem khoreanich aplea Bap, Devak mhunttlolim oxem somzotat. Ani thodde mhunnttat, adlea Grek bhaxe pormonnem Tomasan Jezukuch Somia ani Dev mhunnttlolo. Hem khorem zalear pasun, him utram khoreanich konnank mhunnttlolim tem bhonvtonnchea her versam thaun borem kollon ieta. Hachea poilim, Jezun aplea xisank ho sondex dhaddlolo, “Mhojea Bapa ani tumchea Bapa-xim, Mhojea Deva ani tumchea Deva-xim, Hanv choddun vetam.” Tor Tomas, Jezu sorvpodvedar Dev mhunn somzolo astolo oxem mhunnonk koslench karonn naslem. (Ju. 20:17 obheasachi ttipnni polloi.) Jezu aplea “Bapa” lagim magnnem kortana tannem taka ‘ekloch khoro Dev’ mhunnttlolem tem Tomasan aikolʼlem. (Ju. 17:1-3) Tor Jezuk ‘mhozo Dev’ mhunn sangonk, Tomasak him karonnam aslim astolim: Tannem Jezuk ‘ek dev’ mhunnttlo, sorvpodvedar Dev nhoi. (Ju. 1:1 obheasachi ttipnni polloi.) Vo Hebrev Bhaxen Boroilolea Pustokamnim, Devache sevok Jehovan dhaddlolea devdutank jea toren ulo kortale, tea toren tannem-i ulo kelo astolo. Toxench, Devan dhaddlolea devdutam lagim uloitana lok Jehovach lagim uloilea sarke aslem mhunn Tomas zannam aslo astolo. Ani Bible boroupeamnim, osle ghoddne vixim boroitana to devdut Jehovach aslea porim boroilem mhunn taka khobor asli astoli. (Ut. 16:7-11, 13; 18:1-5, 22-33; 32:24-30; Fudd. 6:11-15; 13:20-22 sor kor.) Tor, Tomasan Jezu Devacho protinidhi vo sondex diupi mhunn manun, Jezuk ‘mhozo Dev’ mhunnttlem.
NOVEMBR 12-18
DEVACHEA UTRANTLE THEVE | ITIHAS 1-3
“Kristi Sobhecher Povitr Xokti Votoili”
(Itihas 2:1-8) Ponʼnasavea Disachea Utsovachea somoiar tim sogllim ekech svater zomlolim aslim. 2 Ovchituch zonnzonnit varea sarko sorga velo ek avaz aikunk ailo; hea avazan tim aslim tem akkhem ghor bhorlem. 3 Ani ujeacheo koxeo jibo tankam dixtti poddleo; teo fanttleo ani tancher ek-ekleacher bosleo, 4 Tim sogllim Povitr Atmean bhorlim ani, Atmean tankam dillo uloupacho gunn gheun, tim veg-vegllea bhasamnim ulounk laglim. 5 Mollba khala aslolea dor-eka raxttrachim bhoktivont Judev monxam Jeruzaleak vostek ailʼlim aslim. 6 Ho avaz aikun khub lok ghuspolo. 7 Thottakon ani ojap zaun to lok mhonnunk laglo: “Him uloitat tim sogllim Galileikaram nhoi? 8 Amche modlea zonn-ekleache avoi-bhaxen tim uloitat mhonn ami aikotanv tem koxem tor?
(Itihas 2:14) Tednam Pedru Ikram borabor ubo ravlo ani tallo ubarun oso uloilo: “Judevamno, ani Jeruzaleant vostek aslolea somestamno, hem zanno zaiat ani hanv sangtam taka chit diat.
(Itihas 2:37, 38) Him utram aikolim tankam vhodd khont bhogli ani Pedruk ani heram Dhormdutank tannim mhollem: “Bhavamno, ami kitem korchem?” 38 Pedrun zap diun mhollem: “Jivit bodlat, ani tumchea patkanchem bhogsonnem zhoddunk zonn-eklean Jezu Kristachea nanvan Snan gheunchem, ani tumkam Povitr Atmeachem dennem melltolem.
(Itihas 2:41) Tea disa sumar tin hozar lok tanchea zomeant bhitor sorlo.
(Itihas 2:42-47) Tim Dhormdutanchi xikovnn gheunk, bhavponnacho ektar samballunk, toxench Unddeache moddnnent ani magnneannim vantto gheunk kodinch chukonaslim. 43 Sogllo lok thottak zatalo, kiteak Dhormdutam vorvim puskoll vismitam ani khunna ghoddtalim. 44 Bhavarthi sogllim ekvottant jietalim ani tanchem sogllem bhaga aslem, 45 tim aplim bhattam-vittam viktalim ani vikrecho duddu zonn-ekleache gorje pormannem vanttʼtalim. 46 Ekach monan dispottim tim Devmondirant vetalim ani Unddo moddunk tanchea eka-eka ghorant ektthai zatalim, ani khuxalkaien ani kallzachea bholeponnan, 47 tim Devak vakhanntalim ani sogllea lokak manovtalim. Zankam taronn mellchem aslem, tankam tanchea vangdda haddun, disandis Sorvespor tanchi sonkia choddoitalo.
w86 12/1 29 ¶4-5, 7
Kalliz Khuxal Korta Toslim Denngim
33 K.X. vorsa Kristi sobha suru zali tea disa 3,000 novech bautizm gheun, Kristanv zaloleamnim ‘bhavponnacho ektar samballʼllo, toxench unddeache moddnnent ani magnneanim vantto’ ghetlo. Koslea karonnak lagon? “Dhormdutanchi xikovnn” gheun tankam aslolo bhavarth ghott korunk tannim toxem kelem.—D.I. 2:41, 42.
Judevamnim ani Judev dhorm apnnailolea lokamnim, Ponʼnasavea Disachea Utsova vellar Jerusalemant ieun ravtole mhunn tharailolem. Punn Kristanv zalʼle tannim thoim chodd vell ravon anik xikon aplo bhavarth ghott korunk chintlem. Hea karonnak lagon thoim tankam jevonn ani ravonk zai aslem. Bhett kortolea hea lokam modem thoddeam lagim zai titlo poiso aslo, punn thoddeam lagim unne asle. Tor thoddo temp gorjevontank modot korunk, gorjecheo vostu ektthaim korun vanttunk manddavoll kelʼli.—D.I. 2:43-47.
Aplim bhattam vo her vostu vikun melltta tem dusream lagim vanttcho nirnnoi tancho svotacho aslo. Bhattam vikunk vo dan korunk konnancheruch dobhav naslo vo tankam gorib korcho hetu naslo. Oxem-i nhoi ki girestamnim aplim soglim bhattam vikun gorib zaunchem. Punn, tea tempar aslolea poristhitik lagon, bhavarthant asloleancher doia-maia korun tannim aplim bhattam vikun tantunt mellʼllolo soglo poiso Rajeachea kamak tenko diunk uzar kelo.—2 Korintkarank 8:12-15 sor kor.
Bible-ant Motiam Sodhum-ia
(Itihas 3:14) 14 Jezu bhoktivont ani Promannik aslo, tori To tumkam naka zalo; eka khuniak mafi diun soddouncho mhonn tumi apnnank upkar maglo, punn Jivit-Datarak tumi jivexim marlo.
it-2 61 ¶1
Jezu Krist
‘Jivit-Datar.’ Tachea Bapan dakhoilolea doiek lagon Jezu Kristan munis mhunn aplem poripurnn jivit bolidan kelem. Taka lagon, Kristan vinchun kaddlolea pattlavdarank tachea sangata sorgar razvottki cholounk favo zalem. Toxench, Rajea khala aslolea lokank prithumer jieunk favo zalem. (Mt. 6:10; Ju. 3:16; Ef. 1:7; Heb. 2:5; RANSOM polloi.) Hea toren, to soglea munxancho ‘Jivit-Datar’ [“Kunvor,” KJ; JB] zalo. (D.I. 3:15) Hea utrak uzar kelʼlea Grek utracho orth, “mukhel fuddari,” jem Israelacher “raz cholovpi” Moizesak (D.I. 7:27, 35) lagu zatalem.
(Itihas 3:19, 20 a) 19 “Mhonnttoch, jivit bodlun tumi Deva sorxim portun ieiat; he porim tumchea patkanchem bhogsonnem tumkam melltolem 20 ani Sorvespora koddsun tumkam xanti-somadhanacho kall ietolo.
cl 265 ¶14
Bhogsunk Toiar Asa To Dev
14 Jehovachea bhogsunchea gunna vixim fuddem Itihas 3:19-ant sanglam: “Jivit bodlun tumi Deva sorxim portun ieiat; he porim tumchea patkanchem bhogsonnem tumkam melltolem.” Hanga addvim boroilolea utrank uzar kelolea Grek kriapodacho orth, “pusun kaddop, . . . rodʼd korop vo nas korop” zaun asa. Thodde xastrache ponddit hanga sanglolim utram, hatan boroilolem tem pusunk suchit korta mhunn sangtat. Hem koxem zaunk xokta? Adlea kallar borounk uzar kortale tem ink korunk karbon, gom ani udok uzar kortale. Hem ink uzar korun boroilea uprant, ekleachean ek volho kopddo gheun boroilam tem sompeponnim pusunk zatalem. Hem Jehovachea doiallaiechem ek borem udharonn. To amchim patkam bhogxita tednam, ek kopddo gheun tim pusun uddoilolea sarkim kaddun uddoita.
NOVEMBR 19-25
DEVACHEA UTRANTLE THEVE | ITIHAS 4-5
“Te Devachea Utra Vixim Dhiran Uloit Ravle”
(Itihas 4:5-13) Dusrea disa Judevanche fuddari, zannte ani xastri Jeruzaleant zomle, 6 ani tanche borabor porom-iadnik Annas, Kaifas, Juanv, Aleksandr ani porom-iadnikanchea ghoranneantle soglle. 7 Dhormdutank modem ube korun, tannim vicharlem: “Konnache podven vo konnachea nanvan tumi hem kelam?” 8 Tednam, Povitr Atmean bhoron, Pedrun tankam mhollem: “Porjechea fuddariamno ani zanntteamno! 9 Eka piddevonta thai ami ek doiall kornni keli mhonn tumi aiz amchi zhoddti kortat ani to konnache podven boro zalo tem tumi zanno zaunk sodtat. 10 Tor soglle tumi ani Israelachi akʼkhi porza hem zanno zaum: tumi khursar marlo punn Devan melʼleantlo punorjivont kelo tea Nazaretkar Jezu Kristachea nanvan ani Tachech podven ho monis hanga tumche mukhar boro zaun ubo asa. 11 ‘Tumi bandpiamnim soddun dilʼlo fator To, punn atam khorem mhollear Taka Devan konnxeasondhicho Fator kela.’ 12 Ani dusrea konnachech vorvim soddvonn mellunk xokona, kiteak amkam soddvonn diunk xokta toslem anink dusrem nanv mollba khala Devan monxank diunk na!” 13 Pedruchem ani Juanvachem kalljidarponn polleun Sobheche vangddi ojap zatale, kiteak te oxikxit ani chalte monis mhonn te somzotale; punn te Jezu borabor astale mhonn tankam khobor asli.
w08 9/1 15, boks
Uloilolea Utram Thaun Povitr Borounnim—Borounni ani Adle Kristanv
Apostl Xikop Naslole Asle Kai?
Jerusalemantle odhikari ani zantte, “Pedruchem ani Juanvachem kalljidarponn polleun . . . ojap zatale, kiteak te oxikxit ani chalte monis mhonn te somzotale.” (Itihas 4:13) Apostl khoreanich oxikxit vo xikop naslole asle kai? Hea vixim, The New Interpreter’s Bible oxem mhunntta: “Hea utrancho orth, Pedru [ani Juanv] iskolak vochonk naslole ani vachunk vo borounk khobor naslole oso nhoi. Te neai korpi lokam modem ani apostlam modem aslolo somajik dorjeancheo ontor hea utramnim dakhounk sodhtale.”
w08 5/15 30 ¶6
Itihas Pustokantle Mukhel Mudʼde
4:13—Pedru ani Juanv xikop naslole vo oxikxit asle kai? Na. Tankam “oxikxit ani chalte monis” mhunn somzotale karonn te dhorma vixim proxikxonn melltta toslea rabʼbi-nchea iskolant vochonk nant.
(Itihas 4:18-20) Tankam bhitor apoun, Jezuchea Nanvan koxech bhaxen anink uloina zaunk ani xikovnn dina zaunk tannim tankam formailem. 19 Punn Pedrun ani Juanvan portipallun mhollem: “Tumkam aikun Devak aikona zaunk, hem Devachea dolleam mukhar sarkem zalear tumich nirnnoi diat. 20 Ami kitem dekhlam ani aikolam tem porgott korinastana amchean ravunk zaina.”
(Itihas 4:23-31) Pedruk ani Juanvak soddlea uprant, te aplea zomea-xim gele ani mukhel-iadnikamnim ani zannteamnim tankam sanglolem titlem-i tannim tankam kollit kelem. 24 Tem aikolea uprant, tannim soglleamnim borabor aplo tallo Devak ubarun mhollem: “Dhonia, sorg, prithum, somdir ani tache bhitor asa titlem-i Tunvem rochlai. 25 Ani Povitr Atmea vorvim, amchea bapa Tujea sevoka Davidache tonddim sanglai: ‘Raxttram kiteak challovtat? Kiteak heo porza bextteo gunngunntat, kunnkunntat? 26 Pritumeche raza uprastat, Sorvesporacher ani Tachea Kristacher kunvor guddmell kortat.’ 27 Khorench, Herod ani Pons Pilat raxttram ani Israelache porje borabor ektthai zaun, Jezucher, Tunvem makhlolea Sevokacher, add guddmell kelo, 28 ani oxem, jem ghoddchem mhonn Tuje podven ani zannvaien Tunvem adim-fuddench tharailʼleim, tem tannim xarti pavoilem. 29 Ani atam, Sorvespora, tancheo dhomkavnnio Tum polle ani sogllea kalljidarponnan Tuzo nirop porgottunk Tujea sevokank nirmi; 30 ani Tujea povitr Sevoka Jezuche nanvim pidda kaddun uddounk ani ochoriam ani vismitam korunk Tujea hatachi podvi dakhoi.” 31 Oxem magnnem korta astana tim zomlolim ti dhornn kampli, tim sogllim Povitr Atmean bhorlim ani kalljidarponnan Devachem utor porgottit ravlim.
it-1 128 ¶3
Apostl
Kristi Sobhent Zaupi Kam. Ponʼnasavea Disachea Utsova vellar Devachi xokti tancher votoili tednam apostlank chodd ghottai mellʼlli. Dhormdutancho Itihas hea pustokachea poilea panch odheai-ant apostlamnim dhiran ani bhirant nastana bori khobor ani Jezuchea punorjivontponna vixim koxem porgottlem tea vixim sanglam. Tankam bondkhonnint ghatle, marle ani jivexim marchi dhomki dili, toriastana te porgott korit ravle. Ponʼnasavea Disachea Utsova uprant survatek, Povitr xoktechea adaran apostlamnim nettʼttan fuddakar ghetlo mhunn Kristi sobhechi vaddavoll zali. (D.I. 2:41; 4:4) Poilim tannim apli porgottnni Jerusalemant suru keli, uprant Samarient, ani vell gelo toso akʼkhea sonvsarant, mhunnche tea tempar lok chintalo tea sonvsarant porgotttlem.—D.I. 5:42; 6:7; 8:5-17, 25; 1:8.
Bible-ant Motiam Sodhum-ia
(Itihas 4:11) ‘Tumi bandpiamnim soddun dilʼlo fator To, punn atam khorem mhollear Taka Devan konnxeasondhicho Fator kela.’
it-1 514 ¶4
Konnxeasondhicho Fator
Zo fator bandpiamnim soddun dilʼlo toch zalo “konnxea-sondhicho fator” mhunn Stotr 118:22-ant sanglam (Heb., roʼsh pin·nahʹ). Jezun hem bhakit ulʼlekh korun apnnankuch lagu kelem (Gr., ke·pha·leʹ go·niʹas, konnxeasondicho fator). (Mt. 21:42; Mk. 12:10, 11; Luk. 20:17) Jea toren eka ghoracho soglea-von unchlo fator sogleank sompeponnim dixtti poddtta, teach bhaxen Jezu Krist eka devmondirak sor kelolea obhixiktanchea Kristi sobhecho mukhel fator zaun asa. Pedrun pasun Stotr 118:22 hem vers Kristak lagu kelem. Thoim tannem tea ‘fatrak’ munxamnim nakarlolo, punn Devan taka vinchun “konnxea-sondhicho fator” kelo mhunn dakhoilem.—D.I. 4:8-12; 1Ped. 2:4-7 pasun polloi.
(Itihas 5:1) Ananias mhonnlolo ek monis aslo; tache bailechem nanv Safira. Tannem aplea bhattacho ek kuddko viklo.
w13 3/1 15 ¶4
Pedrun ani Ananias-an Fott Marli—Amkam Koslem Lisanv Asa?
Novean bautizm ghetloleank modot korunk poixe zai mhunn Ananias ani tachea bailen aplea bhattacho ek kuddko viklo. Ananias apostlam-xim te poixe gheun ailo ani, he sogle poixe apnnem tem bhatt viklam tache mhunn sanglem Punn toxem naslem! Tannem tantuntle thodde poixe aplea pasot kaddun dovorlole! Hem Dev Pedruk kolloita ani Pedru Ananiasak sangta: “Tunvem fott marleai ti monxank nhoi punn Devak.” Teach vellar Ananias morta! Sumar tin voram uprant, tachi bail ieta. Tichea ghovak kitem zalʼlem tem ti noko asli, ti-ui fott marta ani ti pasun morta.
NOVEMBR 26–DEZEMBR 2
DEVACHEA UTRANTLE THEVE | ITIHAS 6-8
“Nove Kristi Sobhechi Porikxa Zata”
(Itihas 6:1) Tednam, xisanchi sonkia vaddot vetana, Grik bhas ulovpi Judev monxam Hebrev bhas ulovpi Judevancher gungunnunk laglim, kiteak dispottim jevonn vaddtana tanchea vidvanchi favo te fikirin seva zainasli.
“Devachi Adnia Ami Pallunk Zai”
17 Halinch survat zalʼlea sobhek eka novea dhokeak tondd diunchem poddlem. To koslo? Bautizm ghetlole zaite xis, Jerusalemant bhett korunk ailʼle ani aplea ghora voichea poilim tankam anik xikonk zai aslem. Jevonn ani her gorzo purnn korunk Jerusalemant ravpi xisamnim ap-khuxen denngim dilim. (Itihas 2:44-46; 4:34-37) Hea vellar ek nazuk poristhiti uprasli. “Dispottim jevonn vaddtana” Grek bhas ulovpi “vidvanchi favo te fikirin vo bore bhaxen seva zainasli.” (Itihas 6:1) Punn, Hebrev bhas ulovpi vidvam sangata toxem zaunk na. Tor hanga bhedbhav zalo. Ani futt poddonk hem ek vhodd karonn zaunk xoktalem.
(Itihas 6:2-7) Hea khatir Bara Zannamnim xisanchea somudaiachi ek zomat apoili ani tankam mhollem: “Devachem utor kuxin dovrun, jevonn vaddchi seva amkam bori sobona. 3 Tea pasot tumi, bhavam-bhoinnimno, tumche modlea sat dadleank sodun kaddat: te boro man aslole ani Povitr Atmean ani zannvaien bhorlole zaunche; ani hi jevnnachi seva ami tanchea hatant sompoitoleanv. 4 Magir ami sogllo amcho vell prarthon korunk ani Devachem utor porgottunk bhettoitoleanv.” 5 Hi ievzonn soglle sobhen manun ghetli, ani bhavarthan ani Povitr Atmean bhorlolea Istevak vinchun kaddlo, ani tache borabor Filipak, Prokorak, Nikanorak, Timonak, Parmenasak ani Nikolavak, Antiokiechea novxisak. 6 Hankam tannim Dhormdutam mukhar ube kele ani hannim magnnem korun tancher hat dovorle. 7 Sorvesporachem utor ximpddot vetalem ani Jeruzaleant xisanchi sonkia vaddot-choddot vetali, ani puskoll iadnikamnim porian bhavarth manun ghetlo.
“Devachi Adnia Ami Pallunk Zai”
18 Vaddtte sobhechem sonchalon monddol mhunn aslolea apostlank, “Devachem utor kuxin dovrun, jevonn vaddchi seva amkam bori sobona” mhunn kollon ailem. (Itihas 6:2) Ho vixoi suttavo korunk, tannim xisank “Povitr Atmean ani zannvaien bhorlole” sat dadleank sodhun kaddunk sanglem, zankam “jevnnachi seva” polloun gheunk apostl nemunk xoktale. (Itihas 6:3) He dadle tea kamank purte asonk zai asle, karonn tanchi zobabdari fokot jevonn vaddunkuch nhoi, punn poixe diunk ani gheunk, gorjecheo vostu vikteo gheunk ani tea vixim sarki mahiti borounk asli. Vinchun kaddlolea dadleank Grek nanvam aslolean, tea Grek vidvank ghoddie borem dislem astolem. Hea vinchlolea dadleam pasot magnnem korun chintlea uprant apostlamnim “jevnnachi seva” polloun gheunchi zobabdari tankam sompoili.
(Itihas 7:58–8:1) Uprant taka Xara bhair oddun vhelo ani fatramnim marlo. Ani sakxidaramnim aplim avoronnam Saulu nanvachea eka tornnatteachea paiam-xim dovorlim. 59 Istevak fatramnim martale tednam, tannem oxem magnnem kelem: “Somia Jezu, mhozo otmo Tujea hatant ghe.” 60 Magir, dimbi ghalun, vhoddlea tallean tannem oxi bob marli: “Somia, tankam hea patkache guneanvkar korum naka.” Ani hem mhonnun to ontorlo. Hea khunak Sauluchi soglli maniotai asli
8 Tedna Jeruzaleant aslole Povitr-Sobhecher add ek vhodd piddapidd suru zali ani sogllim, Dhormdut mat bhairaun, Judeiache ani Samarieche bhonvtonnchea ganvamnim ximpoddlim.
Bible-ant Motiam Sodhum-ia
(Itihas 6:15) Ani tellun tacher nodor mar zalear, neaisobhent boslole tankam tachem mukhamoll eka devdutachem mukhamoll koxem distalem.
Istev—“Vhoddleo Khunna Ani Vizmitam Kortalo”
2 Istevachea mukhamolla vixim kitem tori khas asa. Neai korpeamnim tachem tondd polloilem tednam tem “eka devdutacheam mukhamoll koxem distalem.” (Itihas 6:15) Devdut Jehova Devacho sondex porgottʼttat dekhun te bhienant, te xant ani thondd astat. Istev pasun tosoch aslo—dves korpi neai korpeank pasun hem dison ailem. To tea vellar itlo xant ani thondd koso ravonk xoklo?
(Itihas 8:26-30) Tednam, Sorvesporachea dutan Filipak uloun mhollem: “Utth ani dokhinnek Jeruzalea thaun Gaza denvun veta tea margan voch.” Hea margan atam konn vochona. 27 Mhonnttoch to utthun aple vattek laglo. Ovchituch taka ek Ethiopiekar dixtti poddlo; ho ek hizddo ani Ethiopieche Kandakechea vo Ranniechea akʼkhea bhanddaracho odhikari aslo. To Devak bhozunk Jeruzaleak gello ani 28 aple gaddier bosun to ghora portotalo. Vatter Izaias provadiachem pustok to vachtalo. 29 Atmean Filipak mhollem: “Voch ani gaddie lagim sor.” 30 Filip dhanvlo ani to Ethiopiekar Izaias provadiachem pustok vachta tem aikun tannem vicharlem: “Tum vachtai tem somzotai mum?”
“Jezu Kristachem Xubhvortoman” Porgottop
16 Filipan kelolem toslem kam korcho sueog aiz Kristanvank asa. Choddxe pavtt, lok mellttat thoim, zoxem provas kortana Rajeacho sondex porgottʼttat. Zaite pavtti, tankam promannik kallzache lok mellttat punn hem apxinch zaina. Karonn Bible spoxtt sangta ki porgottnnechea kamank devdut margdorxon ditat. Rajeacho sondex, “dor-eka desak, dor-eka kullak, dor-eke bhaxechea lokak ani dor-eke porjek” pavonk te modot kortat. (Prok. 14:6) Porgottnechea kamant devdut margdorxon ditole mhunn Jezun adim fuddench sanglolem. Gonv ani nerache voparent Jezun lunvnnechea vellar—kallache sompadnek—“lunvpi devdut” astole mhunn sanglem. He devdut “dusreank patok korunk oddun vhortat tea soglleank ani odhormi monxank Tachea Rajeantlim” zomoitole hem-ui sanglem. (Mt. 13:37-41) Ani teach vellar, Jehova aplea songottnnent oddun haddunk sodhtat tankam, mhunnche Rajeache daiji asloleank—ani uprant her menddranchi ‘ek vhodd urponjik,’ devdut ektthaim kortole.—Prok. 7:9; Juanv 6:44, 65; 10:16.