Otumbr—Jivit ani Porgottnni Mittingechea Pustike Pasot Modot
OTUMBR 1-7
DEVACHEA UTRANTLE THEVE| JUANV 9-10
“Jezu Aplea Menddranchi Kallji Gheta”
(Juanv 10:1-3) “Khorench khorem, Hanv tumkam sangtam: zo menddranchea oddpant darantlean nhoi punn dusre vatten choddun bhitor sorta, to chor ani nagovnno. 2 Punn zo darantlean bhitor sorta, to menddrancho gonvlli. 3 Taka dar-rakhnno dar ugoddta; menddram tacho tallo aikotat ani aplea menddrank to ap-aplea nanvan ulo korta ani tankam bhair vhorta.
(Juanv 10:11) Hanv boro Gonvlli. Boro gonvlli menddram pasot aplo jiv dita.
(Juanv 10:14) Hanv boro Gonvlli; toso Hanv Mhojeank vollkhotam ani Mhojim tim Mhaka vollkhotat,
nwtsty media
Menddranchem Oddop
Menddranchem oddop vo menddrancho gotto mhunnttlear, menddrank choram thaun ani tankam khatolea zonvaram thaun rakhunk, bhonvtonnim ghatlolem ek durig. Gonvlli aplea menddrank surokxit dovrunk ratchea vellar tankam eka oddpant vo gotteant dovortale. Bible-achea kallar menddranche gotte, voilean ukte astale, tacheo vontteo choddxe pavtt fatramnim bandtale. Tem durig veg-vegllea akarachem astalem. Tachi lambai ani rundai ekuch torechi asonasli ani bhitor soronk ekuch vatt astali. (Lok. 32:16; 1Sam. 24:3; Zef. 2:6) Juanv hanga, menddranchea gotteak aslolea “darantlean bhitor” sorchea vixim uloita, jea gotteachi rakhonn korunk ek “dar-rakhnno” astalo. (Ju. 10:1, 3) Thoddea gotteamnim, ratik eka poros chodd hindd astale, ani dar-rakhnno tanchi rakhonn kortalo. Sokallim, to dar-rakhnno gonvlleank lagon gotteachem dar ugoddttalo. Dor ek gonvlli aplea menddrank ulo martalo, ani tim menddram tacho tallo aikon tache fattlean voitalim. (Ju. 10:3-5) Jezun gonvlleachem udharonn uzar korun apunn aplea xisanchi koxi kallji gheta tem dakhoilem.—Ju. 10:7-14.
w11 5/15 7-8 ¶5
Kristi Kuttumb—“Zagrut Ravat”
5 Ek gonvlleacho ani menddrancho sombond ginean ani bhorvonxeacher adarit asa. Eka gonvlleak aplea menddranchi vollokh asta, ani menddram pasun aplo gonvlli konn to vollkhotat ani tankam tacher bhorvonso asta. Tim tacho tallo vollkhotat ani tea pormonnem kortat. Jezun mhunnttlem: “Hanv Mhojeank vollkhotam ani Mhojim tim Mhaka vollkhotat.” Jezuk sobhechi fokot voileavoiruch vollokh na. Hanga “vollkhota” hea utrak uzar kelʼlea Grek utracho orth, “lagxilʼlem, kholaiechem ginean.” Hoi, Boro Gonvlli aplea menddrank lagxilʼlean vollkhota. To tanchi ek-ek goroz, tancheo oskotaieo, tanchi sokot bore bhaxen zannam. Ami dekh gheun choltat tea Gonvlleachea nodre thaun aplea menddram vixim kainch chukona. Menddram aplea gonvlleak vollkhotat ani to gheta tea fuddakaracher tankam bhorvonso asa.
(Juanv 10:4, 5) Aplea menddrank bhair haddtoch to tanche fuddem cholta, ani tacho tallo vollkhotat dekhun, menddram tache pattlean vetat. 5 Porkea pattlean tim vochonant, punn tache sorxilim tim pollun vetat, kiteak porkeancho tallo tim vollkhonant.”
cf 124-125 ¶17
“Voparim Bogor To Tanche Kodde Uloinaslo”
17 George A. Smith-an, svota polloilʼlem tea vixim, aplem pustok The Historical Geography of the Holy Land hantunt oxem boroilem: “Kednam-kednam ami eka Judeantle bainche lagim donparcho visov ghetale. Tin vo char gonvlli aplea menddranchea hinddam sangata thoim ietale. Te menddranche hindd dusrea hinddam sangata misoll zatale. He gonvlli aplea menddrank koxe vollkhon ektthaim kortole kai mhunn ami chintale. Aplea menddrank udok diun, ani tanchem khellon zalea uprant, te gonvlli tea falkeachea veg-veglle vatten cholon gele. Punn, dor eklean eke khas toren aplea menddrank ulo kelo ani tem aikon dor ek menddro ap-aplea gonvllea lagim gelo. Ani tim soglim menddram veg-vegllo hindd zaun manddavollin ailʼlim toxinch porot gelim.” Jezu sangonk sodhtalo tem somzaunk hachea poros borem udharonn taka ghoddie mellchench naslem. Ami Jezuchi xikounn manun, ti pallttat zalear ani tachea fuddakarak man ditat zalear ami amchi bori kallji gheta tea ‘Borea Gonvllechea’ hata khala astolim.
(Juanv 10:16) “Ani Mhaka anink-ui menddram asat; tim hea oddpantlim nhoi; tankam-i Hanvem haddunk zai. Tim-i Mhozo tallo aikotolim. Ani oso ekuch hindd zatolo ani ekuch Gonvlli.
nwtsty obheasachi ttipnni Ju. 10:16
haddunk zai: Vo “vatt dakhounk zai.” Hea utrak uzar kelʼlem Grek kriapod aʹgo uzar kortat tea pormonnem, tacho orth, “(bhitor) haddop” vo “vatt dakhounk zai” oso zata. Sumar 200 K.X.-antlea eka Grek hostolekhant, (sy·naʹgo) hem Grek utor uzar kelam, zacho orth choddso “ektthaim korop” oso zata. Boro Gonvlli Jezu, hea oddpant aslolea menddrank (Luk. 12:32-ant tankam ‘supurlo hindd’ pasun mhunnttlam) ani her menddrank ektthaim korta, tankam vatt dakhoita, rakhta ani choroita. Him menddram, ek gonvllea khala ek hindd zatat. Hea utramnim, Jezuche pattlavdar onnbhovtat to ekvott chitraila.
Bible-ant Motiam Sodhum-ia
(Juanv 9:38) Tannem mhollem: “Saiba, hanv bhavarth dhortam.” Ani paiam poddun, tannem Jezuk nomoskar kelo.
nwtsty obheasachi ttipnni Ju. 9:38
nomoskar kelo: Vo “tache fuddem bagvolo; zomnir umto poddon nomoskar kelo; man dilo.” Pro·sky·neʹo, hem Grek kriapod eka devak vo devtak ditat te bhoktek lagu korun bhaxantor kortana, tacho orth “bhokti korop” oso zata. (Mt. 4:10; Luk. 4:8) Hea ghoddnnent, boro zalʼlo munis zo zolma thaun kuddʼddo aslo, tannem Jezuk Devacho protinidhi mhunn vollkholo dekhun taka nomoskar kelo. Tannem taka Dev vo devta mhunn nhoi, punn Devan dilʼlo odhikar aslolo bhasailʼlo Mesias, ‘Munxacho Put’ mhunn vollkholo. (Ju. 9:35) Tannem Jezuk nomoskar kelo tednam chodd korun, lok provadiank, razank, vo Devachea her protinidhink melltta tednam kortale, toxem kelem astolem. Hebrev Bhaxen Boroilʼlea Pustokamnim amkam hea vixim vachunk melltta. (1Sam. 25:23, 24; 2Sam. 14:4-7; 1Raz. 1:16; 2Raz. 4:36, 37) Zaite pavtti Jezuk lokamnim nomoskar kelo tednam, tim tache thaun Devachim utram zannam zalim, vo tacher Devachi maniotai asa mhunn kollʼllem dekhun aple upkar attounk tannim toxem kelem.—Mt. 2:2; 8:2; 14:33; 15:25 obheasachi ttipnni polloi.
(Juanv 10:22) Hinvalleachea somoiar Jeruzaleant Bhettovnnecho Utsov choltalo,
nwtsty obheasachi ttipnni Ju. 10:22
Bhettovnnecho Utsov: Hea festak Hebrev bhaxen dilʼlem nanv Hanukkah (chanuk·kahʹ), zacho orth “Udgatton vo Somorponn.” Hem fest att disanchem astalem, ani Chislev mhoineachea 25 tarker suru zatalem. Ho dis Dezembr mhoineachea xevottachea disamnim poddttalo (hea versachi, obheasachi ttipnni Hinvalleachea somoiar ani App. B15-E polloi.) 165 K.X.A.-ant Jerusalemachea devmondirachi porot bhettovnni kelʼle te dis ugddas korunk, hem fest monoitale. Siriecho Raza Antiochus IV Epiphanes-an devmondir oxudh korun, Judevancho Dev Jehovachi beporva keli. Udharonnak, te sodam iodn bhettoitale tea Dev-mondirachea vhoddlea vedicher, tannem anik ek vedi bandli. Magir, Chislev 25, 168 K.X.A.-ant Jehovachem devmondir sompurnn toren oxudh korunk, Antiochus-an tea vedicher dukrak iodn mhunn bhettoilo ani tea dukrachea masa thaun ailʼlo sop vo kald, akʼkhea devmondirant ximpddailo. Tannem devmondirache darvontte zolloile, iadnikanchim kuddam foddlim, ani toxench bhangarachi vedi, Sorvesporak undde dovorchem mez, ani bhangarachem divea-sthan gheun gelo. Uprant, tannem Jehovachem devmondir porot Olympusacho onbhavarti dev Zeus-ak somorpit kelem. Don vorsam uprant, Judas Makabeus-an xaracher ani devmondiracher porot kobzo kelo. Magir devmondir nitoll kelea uprant, Chislev 25, 165 K.X.A. hea vorsa tem portun somorpit kelem. Hem soglem, Antiochus-an Zeusachea vedicher burxe iodn bhettoun, tin vorsam uprant ghoddlem. Jehovak sodam iodn bhettoitale ti chal porot suru zali. Jehovan Judas Makabeus-ak zoit melloun dilo ani devmondir porot stapon korunk taka adnea dili mhunn Bible-ant spoxtt ritin khoinsoruch sanglolem na. Punn, Jehovan aple bhokte sombondit aplo udʼdhex purnn korunk Persiechea Sirus-a sarke, videxi raxttrantlea munxank uzar kelʼle. (Iz. 45:1) Toxem zalʼlean, Jehovan apleak somorponn kelʼlea lokam modlea eka munxak aplo udʼdhex purnn korunk uzar kelo astolo mhunn ami somzonk zata. Devachea utram pormonnem Mesiasa vixim, tachea porgottnne vixim ani tachea bolidana vixim bhakitam purnn zaunk ek devmondir asonk zai aslem ani tem chalu aschi goroz asli. Toxench, Mesias ieun vhodd bolidan, aplo jiv munxakulla pasot dium porian iadnikamnim iodn bhettoit ravonk zai asle. (Dan. 9:27; Ju. 2:17; Heb. 9:11-14) Bhettovnnecho Utsov monounk Kristachea pattlavdarank adnea diunk nasli. (Kol. 2:16, 17) Punn, Jezun vo tachea xisamnim hem fest monovop chukichem mhunn amkam khoinsoruch vachunk mellona.
OTUMBR 8-14
DEVACHEA UTRANTLE THEVE | JUANV 11-12
“Jezuchea Doia-Maiechi Dekh Gheiat”
(Juanv 11:23-26) Jezun tika mhollem: “Tuzo bhav novean jivo zatolo.” 24 Martan Taka mhollem: “To nimannea disa, punorjivontponnachea somoiar, novean jivont zatolo mhonn hanv zannom.” 25 Jezun tika portipall kelo: “Punorjivontponn ani Jivit Hanvuch. Jim konn Mhojer bhavarth dovortat, tim melim-i zalear jivim astolim; 26 ani jim konn jivim asat ani Mhojer bhavarth dovortat tim sasnnak morchim nant. Ho bhavarth asa mum tuka?”
nwtsty obheasachi ttipnni Ju. 11:24, 25
novean jivont zatolo mhonn hanv zannom: Jezu nimannea disa, ghoddttolea tea fuddarachea punorjivontponna vixim uloitalo mhunn Marta-n chintlem astolem. (Ju. 6:39 obheasachi ttipnni polloi.) Tea xikounnecher tika aslo toso bhavarth zaiteank naslo. Ti jietali tea tempar, Saduki mhunnttlole thodde dhormik fuddari Devachea utrant spoxtt ritin sanglolea punorjivontponnacher visvas ghali nasle. (Dan. 12:13; Mk. 12:18) Ani Farizevam vixim polloit zalear, te otmo morona mhunn mantale. Tori astana, Jezu punorjivontponnachea bhorvonxea vixim xikoitalo ani tannem meloleank jivont pasun kelʼle mhunn Marta zannam aslem. Punn Lazar melʼlo titlo temp melolea khoinchea-i munxak Jezun jivont korunk naslo.
Punorjivontponn ani Jivit Hanvuch: Jezuchea mornna udexim ani punorjivontponna vorvim meloleank porot jivont zaunk ek vatt ukti zali. Jezu porot jivont zalea uprant, Jehovan taka meloleank jivont korche xokte bhair, munxank sasnachem jivit diunchi xokti dili. (Ju. 5:26 obheasachi ttipnni polloi.) Prok. 1:18-ant Jezu apnnak, “Jivo asa To” mhunn sangta, zachea lagim “Mornnacheo ani Patallacheo chavio” asat. Tor, Jezu jietoleancho ani meloleancho bhorvonso zaun asa. Tannem apunn somadheo ukteo korun meloleank jivont kortolo mhunn bhasailam. Thoddeank sorgar tachea sangata raza zaunk vo sorginchea sorkara khala tachea novea prithumer jieunk.—Ju. 5:28, 29; 2Ped. 3:13.
(Juanv 11:33-35) Maria roddtali ti ani tiche sangatim ailʼlim tim Judeikaram roddtalim tim polleun, Jezu bhov kollvollʼlo ani soglloch thorthorlo. 34 Tannem vicharlem: “Taka tumi khoi ghala?” Tannim Taka sanglem: “Somia, ie ani polle.” 35 Jezuk roddunk ailem.
nwtsty obheasachi ttipnni Ju. 11:33-35
roddtali: Hea utrak uzar kelʼlea Grek utracho orth vhoddlean roddop. Jezun Jerusalemachea nisonttonna vixim sangtana hench kriapod uzar kelam.—Luk. 19:41.
bhov kollvollʼlo ani soglloch thorthorlo: Hea don utrank uzar kelʼlim Grek utram sangata uzar kortana, Jezuchea kallzantlim kholaiechim bhavnam ami somzonk zata. “Kollvollʼllo” (em·bri·maʹo·mai) hea utrak uzar kelʼlem Grek kriapod kholaiechim bhavnam dakhoita. Punn hanga, Jezu samko dukhest zaun to kollvollʼllo mhunn sangta. “Thorthorlo” hea utrak uzar kelʼlea Grek utracho orth (ta·rasʹso) khub chintest zavop zaun asa. Hem utor hea versant uzar kelʼlem tednam tacho orth, “monant guspop; odik dukh vo khont bhogop” mhunn ek ponddit sangta. Judas apleak ghat kortolo mhunn Jezun monant chintlem tednam taka koxem bhoglem tea vixim vornnon kortana Ju. 13:21-ant hench kriapod uzar kelam.—Ju. 11:35 obheasachi ttipnni polloi.
roddunk ailem: Hea utrank uzar kelʼlem Grek utor (da·kryʹo), “dukham” hea utrak uzar kelʼlea Grek utrachem kriapod zaun asa. Hem utor Luk. 7:38; D.I. 20:19, 31; Heb. 5:7; Prok. 7:17; 21:4 hea versamnim uzar kelam. Hea versant, vhoddlean roddopacher nhoi punn golloilʼlea dukhancher dhean dilam. Kristi Grek Bhaxen Boroilʼlea Pustokamnim, hem Grek kriapod fokot heach versant uzar kelam. Ani Ju. 11:33-ant (obheasachi ttipnni polloi) Mariechea ani Judevanchea roddnnea vixim vornnon kortana uzar kelʼlea utram poros vegllem asa. Lazarak apunn jivont kortolo mhunn Jezu zannam aslo. Tori punn, aplim mogachim dukhest asat tem polloun taka khub dukh bhoglem. Aplea ixtta pasot kallzant thaun mog ani doia-maia aslolean, sogleam mukhar tannem dukham golloilim. Adanva thaun ailolea mornna udexim jim konn aplea mogacheank mornnant hogddaitat, tanchea vixim Jezuk dukh bhogta mhunn ami hea ghoddnnentlean xiktat.
(Juanv 11:43, 44) Hem mhonnlea uprant to vhoddlean oso arddolo: “Lazar, bhair sor!” 44 Melʼlo to bhair ailo, tache hat ani pai falliamnim bandlole, ani tachem tondd rumalan dhamplolem. Jezun tankam sanglem: “Tache bandpas soddat, taka vochum-di.”
Bible-ant Motiam Sodhum-ia
(Juanv 11:49) Tanche modlo eklo, Kaifas nanvacho, tea vorsacho porom- iadnik aslo; tannem tankam mhollem: “Tumi kaich somzonant,
nwtsty obheasachi ttipnni Ju. 11:49
porom-iadnik: Israel ek svotontr raxttr aslem tednam, porom-iadnik moro-sor aplem porom-iadnikachem kam samballtalo. (Lok. 35:25) Punn Romi lokamnim Israelacher kobzo kelea uprant, porom-iadnikank nemop korop ani tanchi zobabdari kaddun gheuncho odhikar Romi somrajan nemlolea Romi odhikariank aslo. (Utravoll, “High priest” polloi.) Romi lokamnim nemlolo, Kaifas, Romi sorkara sangata boro sombond koso dovorcho tem to zannam aslo. Tachea thodde poilim aslolea porom-iadnikam poros, Kaifasan porom-iadnik mhunn chodd temp kam kelem. Taka sumar 18 K.X.-ant nemlolo ani to 36 K.X. porian porom-iadnik mhunn aslo. Kaifas tea vorsa porom-iadnik aslo mhunn sangon, Juanv ghoddie 33 K.X.-ant Jezuk jivexim marlolo tea khas vorsa, Kaifas porom-iadnik aslo mhunn sangonk sodhtalo zait.—Kaifas-achem ghor khoim aslem tem pollounk App. B12-E polloi.
(Juanv 12:42) Tori astana, odhikariantlea zaitea zannamnim Tacher bhavarth dovorlo, punn te hem bhailean dakhoinasle, kiteak tankam Farizevanchi bhirant asli ani apnnank devsthanantle bhair ghaltit mhonn te bhietale;
nwtsty obheasachi ttipnni Ju. 12:42
odhikariantlea: “Odhikari” hea utrak uzar kelʼlem Grek utor chodd korun Judevanche mukhel neaialoi-ant aslolea Mha-sobhentlea sodhoxiank suchit korta. Hem utor Nikodem-a vixim Ju. 3:1-ant sanglam tednam uzar kelam, zo tea neaialoi-acho ek sodoxio aslo.—Ju. 3:1 obheasachi ttipnni polloi.
devsthanantle bhair ghaltit: Vo “dhormantlean bhair ghalop; devsthana bhitor soronk divop na.” A·po·sy·naʹgo·gos, hem Grek utor fokot hanga, Ju. 12:42 ani 16:2-ant uzar kelam. Bhair ghatlolea munxak, somaza thaun pois kortale ani lok tachi ninda kortale. Hea toren her Judevancho sangat ttuttlolean, artik ritin tea familik khub luksann zatalem. Xikounn diunk uzar kortale, tim devsthanam, thodde pavtt ganvche neaialoi mhunn pasun uzar kortale. Tea neaialoiank, lokank chabkan marunk vo somaza thaun bhair ghalunk odhikar astalo.—Mt. 10:17 obheasachi ttipnni polloi.
OTUMBR 15-21
DEVACHEA UTRANTLE THEVE | JUANV 13-14
“Hanvem Tumkam Dekh Dilea”
(Juanv 13:5) Uprant, eka tostant udok otun, To xisanche pai dhuunk laglo, ani Apnnak bandlolo tea rumalak te pusunk laglo.
nwtsty obheasachi ttipnni Ju. 13:5
xisanche pai dhuunk laglo: Adlea tempar Israelant lok chodd korun vhanno ghaltale. Vhanno mhunnttlear, te ek cheptto toll paiank ghalun bandtale. Tor ek provas korpi, dhulʼlin vo matien bhorlolea rosteamnim ani xetamnim cholon ailea uprant tache paim khub mhelle zatale. Toxem zalʼlean, eka ghora bhitor sortana, paianchi vhanno kaddun bhitor sorchi sonvoim lok pallttale. Tachea uprant ghorvalo soireache paim dhuvunk manddavoll kortalo. Hea riti vixim Bible-ant zaitea zagear vachunk melltta. (Ut. 18:4, 5; 24:32; 1Sam. 25:41; Luk. 7:37, 38, 44) Jezun aplea xisanche paim dhule tednam, tannem hi rit uzar korun khaltikai dakhounk ani eka-mekachi seva korchea vixim ek lisanv xikoilem.
(Juanv 13:12-14) Tanche pai dhuun zatoch, Aplim vostram ghalun, Jezu Aple svater portun ailo. Tannem mhollem: “Hanvem tumkam kitem kelam tem tumi somzoleat mum? 13 Tumi Mhaka ‘Guru’ ani ‘Somi’ mhonnttat; ani tumi sarkem uloitat, kiteak Hanv khorench Guru ani Somi. 14 Mhonnttoch, tumcho Somi ani Guru zaun-ui, Hanvem tumche pai dhule zalear, tumi-i ekamekache pai dhuunk zai.
nwtsty obheasachi ttipnni Ju. 13:12-14
zai: Vo “korunkuch zai.” Hea utrak uzar kelʼlem Grek kriapod chodd korun poixeam sombondit uzar kortale. Hacho orth, “konnachea tori rinnant asop; kitem tori konnank usnnem diunk asop.” (Mt. 18:28, 30, 34; Luk. 16:5, 7) Hea versant ani dusrea versamnim hem utor dusreank kitem diunkuch zai, vo dusreank kitem korunkunch zai, hea orthan uzar kelam.—1Ju. 3:16; 4:11; 3Ju. 8.
(Juanv 13:15) Hanvem tumkam dekh dilea: Hanvem tumkam kelam toxench tumi-i korat.
w99 3/1 31 ¶1
Sogleam Poros Xrextt Munis Ek Khaltikaiechem Kam Korta
Jezun aplea xisanche paim dhuvun, khaltikaie vixim ek mhotvacho lisanv xikoilem. Kristanvamnim, apunn dusream poros chodd valorachim mhunn chintun dusreamnim sodanch apli seva korunk zai mhunn chintunk nozo. Vo lokancho man ani vakhannʼnni mellonk podvi mellounchi as korchi nhoi. Punn, tannim Jezuchi dekh gheunk zai, zo “herank aple chakrek launk ieunk na, bogor heranchi chakri korunk ani somestanche soddvonne pasot aplo jiv diunk” ailo. (Matev 20:28) Hoi, Jezuchea pattlavdaramnim eka-meka pasot samki khaltikaiechi seva korunk toiar asonk zai.
Bible-ant Motiam Sodhum-ia
(Juanv 14:6) Jezun taka oxi zap dili: “Vatt, Sot ani Jivit Hanvuch; Konnuch Bapa-xim vochona bogor Mhoje-vorvim.
nwtsty obheasachi ttipnni Ju. 14:6
Vatt, Sot ani Jivit Hanvuch: Jezu vatt zaun asa, karonn ami fokot tacheach udexim Devak magnnem korunk xoktat. Munis Deva lagim sondan kortolo zalear pasun Jezuch “vatt” zaun asa. (Ju. 16:23; Rom. 5:8) Jezu sot uloilo ani sota pormonnem jielo dekhun to sot zaun asa. Tannem zaitim bhakitam pasun purnn kelolean, Devachea udʼdhexant tacho ek mukhel bhag asa mhunn kollon ieta. (Ju. 1:14; Prok. 19:10) Heo bhasaunneo tache vorvim “‘hoi’ [vo purnn zaleo] zaleo.” (2Kor. 1:20) Jezu jivit zaun asa, karonn tache soddvonne udexim, munxakullak “khorem jivit,” vo “sasnnik jivit” favo zata. (1Tim. 6:12, 19; Ef. 1:7; 1Ju. 1:7) Toxench, to lakʼkhamnim lokank meloleantlim porot jivont korun novea sonvsarant sasnnank jieonk ditolo tednam to zaiteancho “jivit” zatolo.—Ju. 5:28, 29.
(Juanv 14:12) Khorench khorem Hanv tumkam sangtam: jim konn Mhojer bhavarth dovortat, tim Hanv kortam tim kortutvam apunn-ui kortolim, ani tanche poros xrextt kortutvam kortolim, kiteak Hanv Bapa-xim vetam.
nwtsty obheasachi ttipnni Ju. 14:12
tanche poros xrextt kortutvam kortolim: Jezu hanga, aple xis aplea poros vhoddlim vizmitam kortole mhunn sangona. Punn, te porgottnnechem ani xikounchem kam aplea poros chodd kortole mhunn to khaltikaien manun gheta. Tache pattlavdar, zaitea vattaramnim seva kortole, zaitea lokank bhett ditole ani tachea poros chodd vell seva kortole. Jezuchea utram voilean, tachea xisamnim tachem kam korit ravonk zai mhunn to opekxa korta hem kollon ieta.
OTUMBR 22-28
DEVACHEA UTRANTLE THEVE | JUANV 15-17
“Tumi Sonvsarache Nhoi”
(Juanv 15:19) Tumi sonvsarache asleat tor, sonvsar tumkam aple mhonn manun tumcho mog kortolo aslo. Punn tumi sonvsarache nhoi mhonn ani Hanvem tumkam sonvsarantle vinchun kaddleat dekhun, sonvsar tumkam zollta.
nwtsty obheasachi ttipnni Ju. 15:19
sonvsar: Hea versant hea utrak uzar kelʼlem Grek utor koʹsmos, Devachea sevokank soddun tachea thaun koddsorlolea her onitivont munxank suchit korta. Xubhvortoman boroupeam modem fokot Juanv, aple xis sonvsarache bhag nhoi vo sonvsarache nhoi mhunn Jezun sanglolim utram boroita. Jezu aplea visvaxi apostlam sangata kelolea nimannea magnneant heach vixim anik don pavtti sangta.—Ju. 17:14, 16.
(Juanv 15:21) Punn hem sogllem Mhojea nanva pasot tim tumkam kortolim, kiteak Mhaka pattoila Tachi tankam vollokh na.
nwtsty obheasachi ttipnni Ju. 15:21
Mhojea nanva pasot: Bible-ant “nanv” hem utor jea munxak tem nanv dila taka, tacho sobhav, ani to koslo tem suchit korta. (Mt 6:9 obheasachi ttipnni polloi.) Jezuchea nanva vixim polloitana, tachem nanv tachea Bapain taka dilʼlea odhikarak ani podvek suchit korta. (Mt. 28:18; Filp. 2:9, 10; Heb. 1:3, 4) Jezu hanga, sonvsarache lok aplea pattlavdaram add kiteak voitat tem karonn sangta: Taka zannem dhaddla, taka tim vollkhonant. Devachi vollokh ghetlear, tim Jezuchem nanv kitem suchit korta tem somzonk ani manun gheunk pavtolim. (D.I. 4:12) Hantunt, Devan nemlolo Raza, patxaiancho Patxai mhunn Jezuchi podvi mellon asa zaka soglea munxamnim jivit mellonk khaltikaien nomoskar korchi goroz asa.—Ju. 17:3; Prok. 19:11-16; Sor kor St. 2:7-12.
(Juanv 16:33) Mhoje sovem tumkam xanti mellche khatir Hanv tumche kodde heo vostu uloilam. Sonvsarant tumkam khont astolich; punn kalljidar zaiat! Hanvem sonvsaracher zoit vhelem.”
it-1 516
Dhir
Eka Kristanvak, Jehova Deva add aslolea sonvsarachea sobhav ani kortubam thaun mhelle zainastana ravonk ani sonvsarantlean ieupi dhumalleacho fuddo korun Devak visvaxi ravonk, dhirachi goroz asa. Jezun aplea xisank sanglem: “Sonvsarant tumkam khont astolich; punn kalljidar zaiat! Hanvem sonvsaracher zoit vhelem.” (Ju. 16:33) Devachea Putan sonvsaracho probhav apleacher kednanch poddonk diunk na. To khoincheach ritin sonvsara sarko zaunk na dekhun to sonvsaracher zoit vhoronk pavlo. Zoit melloun gheupi mhunn Jezuchem ekdom borem udharonn ani tachem khot naslolea jivitacho porinnam polloun eka munxak dhir mellonk xokta. Ho dhir taka hea sonvsara thaun vegllo ani mhello zainastana ravon, Jezuchi dekh gheunk modot korta.—Ju. 17:16.
Bible-ant Motiam Sodhum-ia
(Juanv 17:21-23) Tim sogllim ek zaum. Zoxem Tum, Bapa, Mhoje sovem asai ani Hanv Tuje sovem asam, toxench tim-i Amche sovem ek zaum, ani, he porim, Tunvem Mhaka pattoilai mhonn sonvsar bhavarth dhorum. 22 Zoxem Ami Ek, toxim tim ek zaunche khatir, Tunvem Mhaka dileai ti mhoima Hanvem tankam dilea. 23 Hanv tanche sovem ani Tum Mhoje sovem asun tim sopurnnaien ek zaum; oxem, Tunvem Mhaka patthoilai mhonn, ani zoso Tunvem Mhozo mog kelai, tosoch Tunvem tancho mog kelai mhonn sonvsar vollkhun gheum.
nwtsty obheasachi ttipnni Ju. 17:21-23
ek: Vo “ekvottan.” Aple khore pattlavdar “ek” zatole mhunn Jezun magnneant sanglem. Zoso to ani tacho Bapui “ek”, toxem te pasun, ekuch udʼdhexak lagon ekvottan sangata kam kortole. Oxe toren te sangata mellon kam korpi ani ek-monache mhunn dakhoitole. (Ju. 17:22) Paulun, 1Kor. 3:6-9-ant Kristi seva korpi eka-meka sangata ani Deva sangata mellon kam kortat tanche modem aslole ekvottkaie vixim sanglem.—1Kor. 3:8 polloi ani Ju. 10:30; 17:11 obheasachi ttipnni polloi.
sopurnnaien ek zaum: Hea versant Jezu, sompurnn ekvott ani Bapui dakhoita to mog, hanche modem sombond dakhoita. Hem Kol. 3:14-ant sanglolea pormonnem asa, thoim mhunnttta: “Pritimog . . . sogllea sugunnancho sompurnn ekvott zata.” Ho sompurnn ekvott mogacher adarit asa. Hacho orth oso nhoi ki sogleanche sobhav ek toreche astole, zoxem dor ekleachi tank, sonvoim ani ontoskornn eke bhaxechem astolem. Punn, tacho orth Jezuche pattlavdar kornneamnim, bhavartan ani xikounnen ek asat.—Rom. 15:5, 6; 1Kor. 1:10; Ef. 4:3; Filp. 1:27.
(Juanv 17:24) Bapa, zoi Hanv asam, thoi Tunvem Mhaka dileai tim-i aschim mhonn Mhoji khuxi, ani oxem Tunvem Mhaka dileai ti mhoima tannim polleunchi, kiteak sonvsar rochche adim Tunvem Mhozo mog keloi.
nwtsty obheasachi ttipnni Ju. 17:24
sonvsar rochche adim: “Rochche” hea utrak uzar kelʼlem Grek utor, Heb. 11:11-ant eke sonstichi ‘avoi zaunche’ vixim sangtana uzar kelam. Hea versant uzar kelʼlim utram, “sonvsar rochche adim,” him ghoddie Adanv and Evek bhurgem zaunche vixim aslim astolim. Jezu hanga, “sonvsar rochche adim,” him utram Abelak lagu korta, zo soddvonn mellonk xokta tea munxam modem poilo aslo. Ani tachem nanv, “sonvsarache orombak thaun jea monxanchim nanvam jiveanchea pustokar” boroileant tantunt poilem asa. (Luk. 11:50, 51; Prok. 17:8) Jezun aplea Bapaik kelʼlea hea magnneant, Adanv ani Evek bhurgim zaunchea khub poilim, Devan aplea ekleach Putacho mog kelo mhunn sarkem kollon ieta.
OTUMBR 29–NOVEMBR 4
DEVACHEA UTRANTLE THEVE | JUANV 18-19
“Jezun Sota Vixim Govai Dili”
(Juanv 18:36) Jezun portipall kelo: “Mhojem raj hea sonvsarantlem nhoi; Mhojem raj hea sonvsarantlem zalʼlem zalear, Hanv Judevanchea hatant poddona zaunk Mhoje sevok zhuztole asle; punn Mhojem raj hangasorlem nhoi.”
(Juanv 18:37) Pilatan Taka mhollem: “Mhonnttoch, raza tum?” Jezun zobab dilo: “Hanv Raza mhonn tunvench sangleim. Heach pasot Hanv zolmolam, heach pasot sonvsarant ailam: sotak govai diunk. Jim konn sot manun gheunk toiar asat, tim Mhozo tallo aikotat.”
nwtsty obheasachi ttipnni Ju. 18:37
govai diunk: “Govai diunk” (mar·ty·reʹo) ani “govai” (mar·ty·riʹa; marʹtys) him Grek utram Grek Bhaxen Boroilʼlea Pustokamnim uzar kortat tednam tanche zaite orth zatat. Hea donui utrancho orth, eklean jem polloilam vo apleak jem ginean asa, tem khorem mhunn sangop. Punn tancho orth, “kollit korop, khatri korop, vo tea vixim borem sangop” oso pasun zaunk xokta. Apnnank khorem mhunn khatri aslolea sota vixim Jezun fokot sangon porgottunk na, punn aplem jivit pasun tea toren jieun, tannem aplea bapan bhakit kelʼlim utram ani bhasaunneo khoreo mhunn dakhoileo. (2Kor. 1:20) Mesiasachea Rajea vixim ani tachea Raza vixim Devacho udʼdhex bariksannen adinch kolloilolo. Jezuchea akʼkhea jivitant, to ek bolidan koso moro porian, Somurtichea Korarant sanglolim soglim bhakitam purnn zalim. Tantunt, taka suchit kortale te savlle sarke vixoi pasun purnn zale. (Kol. 2:16, 17; Heb. 10:1) Tor, Jezun utramnim ani kornneamnim, “sota vixim govai dili” mhunn sangonk zata.
sotak: Jezu hanga bexttea sota vixim sangonaslo, punn Devachea udʼdhexam vixim sot sangtalo. Devachea udʼdhexacho mukhel bhag, “Davidacho put” Jezu, Porom-iadnik ani Devachea Rajeacho Raza mhunn seva korta. (Mt. 1:1) Jezun, apunn hea sonvsarant ieunk, prithumer jieunk, ani porgottnni korunk, mukhel karonn Rajea vixim sot sangonk aslem mhunn kolloilem. David zolmolʼlo tem xar, Judeiantlea Bethlehem-ant devdutamnim osloch sondex Jezu zolmochea poilim ani zolmolʼlo tea vellar porgottlo.—Luk. 1:32, 33; 2:10-14.
(Juanv 18:38a) Pilatan Taka vicharlem: “Sot mhonnge kitem?”
nwtsty obheasachi ttipnni Ju. 18:38a
Sot mhonnge kitem?: Pilatan vicharlolo prosn, Jezun tednanch sanglolea sota vixim nhoi punn osoch vichartalo. (Ju. 18:37) Pilatan to prosn promannikponnan vicharlolo zalear, Jezu tacho zobab ditolo aslo. Pilatan chodd korun ho prosn zobab mellonk vicharunk na, punn dubhavan ani fokannan vo visvas naslolea porim vicharlo astolo. Zoxem, dusrea utramnim to oso sangonk sodhtalo astolo: “Sot? Tem ani kitem? Sot mhunn kai nanch!” Khorem mhunnttlear, Pilat prosn vicharlea uprant, Jezucho zobab aikonk ravona, punn thoinchean bhair soron Judevam lagim voita.
Bible-ant Motiam Sodhum-ia
(Juanv 19:30) Xirko chaklo tedna, Jezun mhollem: “Sompadlem!” Ani, tokli bagaun, Tannem prann soddlo.
nwtsty obheasachi ttipnni Ju. 19:30
Tannem prann soddlo: Vo “to melo; tannem svas soddlo.” Thodde lok, “prann soddlo” hea utrak uzar kelʼlea Grek utrancho orth, Jezun soglem sompadlem dekhun tannem jivo ravcho anik proitn korunk na oxem mhunnttat. Tannem “ap-khuxen moronn apnnacher ghetlem.”—Iz. 53:12; Ju. 10:11.
(Juanv 19:31) To Toiarecho dis aslo, ani kherit dobajeacho Sonvar lagim pavlolo. Dekhun, Sonvara disa kuddi khursar urona zaunk, tanche pai moddche ani tancheo kuddi kaddun vhorcheo mhonn Judevamnim Pilata kodde maglem.
nwtsty obheasachi ttipnni Ju. 19:31
kherit dobajeacho Sonvar: Pask zatoch fuddlo dis, Nisan 15, sumanachea khoinchea-i disa ailo zalear pasun to sonvaracho dis mhunn manun ghetale. (Lev. 23:5-7) Ho Sonvar dis, sodanchea Sonvara disak (mhunnche Judevanchea sumanacho satvo dis. To dis sukrara suria buddttokoch suru zaun Sonvara suria buddttokoch kabar zatalo) poddttalo tednam to “dobajeacho” Sonvar zatalo. Jezu melo to dis sukrar aslo dekhun fuddlo dis osloch ek sonvar zaun aslo. 29 tem 35 K.X., hea vorsam modem, 33 K.X. hem ekuch voros aslem, jednam Nisan 14 sukrara disa ailo. Tor, hantuntlean Jezu Nisan 14, 33 K.X. hea disa melo mhunn amkam khatri zata.