Melolim Khorench Jivont Zaunk Xokta?

1-3. Amchea sogleanchea fattlean khoincho dusman lagla? Bible tea dusmana vixim kitem sangta ani tem zannam zalʼlean amkam buzvonn kiteak melltta?

SOMOZ, tuzo ek dusman tujea fattlean lagla ani tum dhanvta. Tannem tujea eka ixttak marun uddoila tem tunvem polloilam. To tujea poros ghott asa, ani taka konnachich doia disona mhunn zannam zalʼlean, tum bhieun, anik begin dhanvta. Tunvem kitlea-i begin dhanvcho proitn kelear pasun, to tujea lagim pavot asa, ani tum kainch korunk xokona. Punn tednanch ek munis tujea adarak pavta. Ho munis tujea dusmana poros ghott asa, ani to tuka modot kortolo mhunn khatri dita. Tea vellar tujea kallzak kitlem borem distolem nhoi!

² Osloch ek dusman, amchea sogleanchea fattlean laglolo asa. Bible-ant, mornnak ek dusman mhunnttla, ani hea vixim ami fattlea odheai-ant xiklolim. Konnuch tachea thaun salvar zaunk xokona. Ami mog kortat tancho pasun, hea dusmanan jiv ghetla tem ami polloilam. Punn Jehova Dev tachea poros khub xoktivont asa. Hea dusmana thaun to amkam salvar korunk xokta mhunn tannem dakhoun dilam. Ani fuddem, apunn hea dusmanak, mhunnttlear mornnak nanch kortolo mhunn to amkam khatri dita. Bible sangta, “Bhosm zaupacho dusmanam modlo nimanno dusman mhollear Moronn.” (1 Korintkarank 15:26) Hi ek sogleant bori khobor nhoi!

³ Moronn, hea dusmanak lagon kitem ghoddtta tem ami zannanch. Amcho lagincho konnui morta tednam, amkam khub dukh bhogta. Punn Jehova hea vixim kitem korcho asa, tem zannam zalear ami khuxal zatolim. Melolim porot jivont zatolim mhunn Jehova Dev amkam khatri dita. (Izaias 26:19) To tankam porot jivont kortoloch ani hacher amchean purnn bhorvonso dovrunk zata.

KONNUI MORTA TEDNAM KOXEM DISTA?

4. (a) Konnui morta tednam Jehovak dukh bhogta hem amkam Jezu udexim koxem kolltta? (b) Jezuchi konnam thaim ghott ixttagot asli?

⁴ Tumcho-i konnui mela tednam, ghoddie tumchean sosunk zaina titlem dukh tumkam zalam astolem. Oslea vellar Devachem utor amkam buzvonn diunk xokta. (2 Korintkarank 1:3, 4 vachat.) Konnui morta tednam Jezuk ani Jehovak koxem bhogta tem Bible amkam dakhoita. Jezuk aplea bapa sarkech gunn asle. Tor aplo ixtt Lazar melo tednam Jezuk koxem bhoglem tem polloun Jehova Devakui koxem bhogta tem ami somzonk pavtat. (Juanv 14:9) Jeruzalem xarant aslo tednam Jezu, Lazar ani tacheo bhoinnim Mary ani Marthak mellonk, Bethany ganvant voitalo. Tanchi sogleanchi ghott ixttagot asli. Bible sangta, “Marta, tichi bhoinn Maria ani Lazar, hancho Jezu mog kori.” (Juanv 11:5) Punn fattlea odheai-ant xiklolea pormonnem ek dis Lazar morta.

5, 6. (a) Lazar melo mhunn tachim soirim ani ixtt roddttale tednam Jezucher kitem porinnam zalo? (b) Jezuk dukh zata hem polloun amkam kitem kollon ieta?

⁵ Jezucho ixtt melo tednam taka koxem dislem? Bible sangta, Lazar melo mhunn tachim soirim ani ixtt roddttale tem polloun, Jezukui khub vaitt dislem. To dukhi zalo, ani “bhov kollvollʼlo ani soglloch thorthorlo.” Bible fuddem sangta, “Jezuk roddunk ailem.” (Juanv 11:33, 35) Apleachean kainch korunk zaina mhunn Jezu dukhi zalo kai? Na. Karonn apunn kitem korcho asa tem taka khobor aslem. (Juanv 11:3, 4) Tori astana, moronn ieta tednam koxem bhogta tem zannam zalʼlean to dukhi zalo.

⁶ Jezukui dukh zata hem zannam zalʼlean amkam buzvonn melltta. To dukhi zalo tachea voilean, to ani tacho bap Jehova, mornnacho dves korta mhunn kollon ieta. Hea dusmanacher Jehova Dev, zoit vhoronk xokta. Oxem korunk, tannem Jezuk koso uzar kelo tem ami polloum-ia.

“LAZAR, BHAIR SOR!”

7, 8. Munxachea nodren dholicho fator kaddop kiteak faideachem naslem, punn Jezun kitem kelem?

⁷ Lazar melea uprant, taka eka dholint ghatlolo. Thoim ieun, Jezun tea dholichea mukhar aslolo fator kuxin kaddunk lailo. Punn, Marthan to fator kaddum naka mhunn sanglem, karonn Lazar moron char dis zalʼle ani taka ghann martoli asli. (Juanv 11:39) Eka munxachea nodren polloilear, to fator kaddun kainch faido naslo.

⁸ Torui, Jezuchem aikon tannim dholi mukhar aslolo fator kuxin kaddlo. Tea uprant Jezun, “Lazar, bhair sor!” oxem vhoddlean mhunnttlem. Ani polloilear kitem? Moron char dis zalʼlo munis “bhair ailo”. (Juanv 11:43, 44) Thoim aslolo lok kitlo khuxal zalo astolo tem tumchean chintunk zata. Lazar ghoddie tancho bhav, soiro, ixtt vo xezari aslo astolo, punn to melo mhunn tim zannam aslim. Ani atam toch munis, tanchea mukhar ubo aslo. Hem polloun tim sarkinch ojap zalim astolim. Khuxalkaien zaitea zannamnim taka vengui marli zait. Mornnacher kitlem vhoddlem zoit nhoi!

9, 10. (a) Jezun Lazarak apleach xokten jivont korunk na mhunn koxem dakhoun dilem? (b) Bible-ant boroilolea vizmitam vixim zannam zalʼlean amkam kitem kolltta?

⁹ Jezun hem vizmit, apleach xokten kelam oxem mhunnonk na. Lazarak jivont korchea adim tannem ek magnnem kelʼlem. Tea magnneant, Jehovan Lazarak jivont kelo mhunn Jezun dakhoun dilem. (Juanv 11:41, 42 vachat.) Heach pavtt apli xokti uzar korun, Jehovan munxak jivont kelʼlo oxem nhoi. Hem Devachea utrant boroun dovorlolea nov vizmitam modlem ek zaun asa.a Hea vizmitam vixim zannam zaun amkam khuxalkai melltta. Itlench nhoi, tantuntlean amkam Dev ontor korina hem-ui kollon ieta. Udharonnak, tannem lhanank ani vhoddank, dadleank ani bailank, toxench Israelitkarank ani je Israelitkar nasle tankam jivont kelʼle. Ani tankam kitli khuxalkai bhogli astoli, tem heo ghoddnneo dakhoitat. Ek pavtt Jezun eka lhan cheddvak jivont kelem tednam, tachim avoi-bapui ani je konn thoim asle te ojap zale. (Marku 5:42) Tim visronk xokona tosli khuxalkai tankam Jehovan diloli.

¹⁰ Jezun jivont kelʼlo lok porot melo hem ami zannam. Toxem zalear, tankam jivont korun kainch faido naslo oxem ami mhunnonk zata? Na. Karonn Jezun kelʼlea hea vizmitantlean amkam ek bhorvonso melltta.

JIVONT ZALʼLEA LOKANCHEA UDHARONNANTLEAN KITEM KOLLTTA

11. Upodexok 9:5-ant boroilolem asa tem sarkem mhunn Lazarachem udharonn koxem dakhoita?

¹¹ “Meloleank koslich khobor asona” mhunn Bible xikoita. (Upodexok 9:5) Melolim munxam jivim urona ani tim khoinch vochona. Lazarachea ghoddnnentlean hem amkam sarkem kollon ieta. Jivont zalea uprant Lazaran, sorg koso dista vo thoim kitem asa hem kainch sangonk naslem. Toxench, iferna vixim-i to ulounk na. Tannem sanglolem zalear, tem Bible-ant astolem aslem. Punn melea uprant char dis taka “koslich khobor” nasli. To mornnache nhident aslo.—Juanv 11:11.

12. Lazar khoreaninch jivont zalʼlo mhunn ami kiteak mhunnonk zata?

¹² Lazarachea udharonnantlean, ek munis khoreaninch jivont zaunk xokta, hem amkam kollon ieta. Jezu Lazarak jivont kortana zaitea lokamnim polloilem. Jezucho dves kortale tea dhormik fuddareamnim pasun, tannem hem vizmit kelʼlem mhunn manun ghetlem. Tannim mhunnttlem, “Ho monis zaiteo khunna korun dakhoita Ani ami kitem kortanv?” (Juanv 11:47) Lazarak jivont kelea uprantui, taka pollounk khub lok gelo. Oxe toren zaito lok Jezucher visvas dovrunk pavlo ani taka khoreaninch Devan dhaddla mhunn tankam khatri zali. Hem soglem polloun, Judevanchea dhormik fuddareamnim, Jezuk ani Lazarak marun uddounchem mhunn nirnnoi ghetlo.​—Juanv 11:53; 12:9-11.

13. Jehova meloleank jivont korunk xokta mhunn ami kiteak sangonk zata?

¹³ Melolim porot jivont zaunk xokta mhunn manunk kotthin asa kai? Na! Karonn ‘somadhimnim asat tim soglim’ jivont zatolim mhunn Jezun sanglolem. (Juanv 5:28) Jehova sogleancho rochnnar zaun asa. Ek munis melear pasun, to taka porot rochunk xokta. Punn oxem korunk, taka sogleancho ugddas asonk zai. Soglim meleant tancho, tachean ugddas dovrunk zata oxem tumkam dista? Ontorallant kotteamnim nokhetram asat, torui astana to tankam sogleank nanvan vollkhota. (Izaias 40:26) Toxench, meleant tanchea-i vixim to soglem zannam, ani tankam jivont korunk to toiar asa.

14, 15. Meloleank porot jivont korchea vixim Jehovak koxem dista?

¹⁴ Meloleank jivont korchea vixim Jehovak koxem dista? Meloleank porot jivont korunk Jehova axeta mhunn Bible sangta. Job nanvachea eka visvaxi munxan mhunnttlem, “Melolea monʼxachean anink jivont zaunk zata?” Devan jivont kori poriant, apunn fonddant astolo mhunn Jobak khobor asli. To fuddem mhunntta, “Tum ulo martoloi ani hanv tuka zap ditolom. Ani Tum mhaka, aple rochnnek polleun khoxi zatoloi [vo pollounk axen ravtolo, NW].”—Job 14:13-15.

¹⁵ Meloleank portun jivont korunk Jehova axen ravta hem zannam zaun, amkam kitlem borem dista nhoi! Punn fuddarak, Dev konnak jivont kortolo ani khoim?

“SOMADHIMNIM ASAT TIM SOGLLIM”

16. Jivont zatat tea lokank koslea poristhitint jieunk mellttolem?

¹⁶ Bible-ant ami, porot jivont zalʼlea lokanchim udharonnam polloilim. Tachea voilean, fuddarak zaupi jivontponnam vixim, amkam khub xikonk melltta. Adim hea prithumer jivont zalʼle lok, aplea ghorcheam sangata porot jiele. Toxench fuddarakui zatolem. Punn tednam, tankam hachea poros bore poristhitint jieunk mellttolem. Devak hi akʼkhi prithum ek sobit bag zalʼli zai, hem ami odheai 3-ant xiklim. Mhunnttoch, jivont zatat te lok, zhuzam, kirmi ani duensam na toslea sonvsarant jietole. Thoim tim xantin ani khuxalkaien sodankal ravtolim.

17. Kitlo lok jivont zatolo?

¹⁷ Konn-konn porot jivont zatolim? Jezun sanglem, “somadhimnim asat tim sogllim Tacho [Jezucho] tallo aikun tantlim bhair sortolim”. (Juanv 5:28, 29) Ani Prokasovnni 20:13 sangta, “Aplea pottant aslim tim melʼlim monʼxam somdiran portun dilim. Toxench mornnan ani patallan [Grik bhaxen “Hades”] apnnache adhin aslolim monʼxam portun dilim.” “Hades” mhunnttlear munxank puroitat to fondd vo zago. (Chodd mahiti, hantunt pan 242-243 polloiat.) Melolea lokanche fondd khali zatole ani tantunt aslolo lakʼkhamnim lok jivont zatolo. Apostl Paulun, “borea toxench vaitt monʼxanchem punorjivontponn astolem” oxem-i sanglem. (Itihas 24:15) Hea utrancho orth kitem?

18. Jivont zatole te ‘bore’ munis konn? Ani melole lok jivont zatole hem zannam zaun tuka koxem dista?

¹⁸ Apostl Paulun ‘bore’ munis mhunnttleat, te konn zait? Jezu prithumer ieunchea adim jielole, tea visvaxi lokank ‘bore’ munis mhunnttleat. Tanchea vixim amkam Bible-ant vachunk melltta. Tumkam Noah, Abraham, Sarah, Moizes, Ruth, Esther ani oslea zaitea munxancho ugddas ieta astolo. Hebrev pustokachea odheai 11-ant toslea thoddea dadleam ani bailam vixim boroilolem asa. Itlench nhoi, “borea” munxam modem, amchea disamnim visvaxi ravun meleat te Jehovache sevokui asat. Porot jivont zatolim ho bhorvonso amkam mornnache bhirantintlean suttka dita, ani hea bhorvonxak lagon ami Devache kitle upkari nhoi!—Hebrevank 2:15.

19. “Vaitt” lok mhunnttlear konn? Ani Jehova tankam kosli sondhi dita?

¹⁹ Thoddea lokank Jehova vixim khobor nasli, ani taka lagon te tachi seva korunk pavle na. Hea lokam vixim kitem? Hea lakʼkhamnim “vaitt” lokank Dev visorchona. To tankam-i jivont korun, aplea vixim xikonk ani seva korunk vell ditolo. Ek hozar vorsam bhitor, melole lok jivont zatole. Ani tankam, hea prithumer aslolea visvaxi munxam sangata bhokti korunk, sondhi mellttoli. Ho khub khuxalkaiecho vell astolo. Bible-ant, hea vellak zottʼttecho dis mhunnttla.b

20. Gehenʼna mhunnttlear kitem, ani thoim konn voita?

²⁰ Toxem zalear, sogle melole lok porot jivont zatole kai? Na. Meleat tantuntle thodde, “Gehenʼna” hea zagear asat oxem Bible sangta. Thoddea Bible-amnim Gehenʼna hea utra pavtti, ‘iemkondd’ hem utor uzar kelam. (Lukas 12:5) Adlea Jerusalem xara bhair lok koir uddoitale, ani tea zageak te Gehenʼna mhunnonk lagle. Thoim kochrea borabor meloleancheo kuddi-i lasoitale. Ani jea lokancheo kuddi thoim uddoiloleo, tankam purunk, ani porot jivont zaunk favo naslem, oxem Judev lok mantale. Hache voilean, Gehenʼna mhunnttlear, sasnachem nisontton mhunn kollon ieta. Jezu, jiveanchi ani meloleanchi zottʼtti kortolo tem khorem, punn nimanne kodden zottʼtti kornnaro Jehova Dev zaun asa. (Itihas 10:42) Je lok vaitt kortat ani zannam zaun bodlonk sodhinant, tankam Jehova Dev porot kednanch jivont korchona.

SORGAR JIVONTPONN

21, 22. (a) Thodde lok khoim jivont zatole? (b) Hea toren poilo konn jivont zalʼlo?

²¹ Anik ek torechem jivontponn asa. Bible sangta meloleam modle thodde lok sorgar ainz koxe porot jivont zatole. Hea toren Jezu ekloch jivont zalo mhunn Bible-ant vachunk melltta.

²² Prithumer astana Jezucher moronn ailem. Jehovan, aplea hea visvaxi putak, fonddant uronk diunk na. (Stotr 16:10; Itihas 13:34, 35) Tannem Jezuk jivont kelo, punn munxa bhaxen nhoi. To “vinaxi monʼxasoimbacho aslo dekhun, Tacho jiv kaddunk pavle; punn Devan Taka punorjivont kelo tednam, To Atmean bhorlolo ovinaxi zalo” mhunn Apostl Pedru kolloita. (1 Pedru 3:18) Hem kitlem vhoddlem vizmit! Jezu ek ainz koso porot jivont zalo. (1 Korintkarank 15:3-6 vachat.) Hea toren jivont zaupi, Jezu poilo aslo. Ani oxe ritin mukhar, zaite jivont zaunche asle.—Juanv 3:13.

23, 24. Jezun konnak ‘supurlo hindd’ mhunnttla, ani tantunt kitle lok asat?

²³ Jezuk, apunn melea uprant sorgar voitolo mhunn khobor asli. Taka lagon tannem, morchea thoddea disam poilim, apunn “tumkam svat toiar korunk vetam”, oxem aplea xisank sanglem. (Juanv 14:2) Jea lokank sorgar jivontponn mellchem aslem, tankam Jezun ‘supurlo hindd’ mhunnttla. (Lukas 12:32) Hea lhan zomeant kitle lok asat? Hacho zobab ditana, Apostl Juanv Prokasovnni 14:1-ant mhunntta, “Magir polle zalear, ovchit Sion Dongracher ubo aslolea Menddreak hanvem dekhlo; Tache borabor ekxem-chovechallis hozar (1,44,000) lok aslo: tanchea kopalar Tachem Nanv ani Tachea Bapaichem Nanv boroilʼlem aslem.”

²⁴ Sorgar voitolea 1,44,000 Kristanvam modem, Jezuche apostlui asat. Hem jivontponn kednam zatolem? Kristachea ienneachea kallar hem jivontponn zatolem mhunn Apostl Paulun boroilam. (1 Korintkarank 15:23) Ami teach kallant jietat, ani hea vixim odheai 9-ant amkam anik zannam zaunk mellttolem. 1,44,000 lokam modlim amchea disamnim mortat tim, rokddinch jivont zaun sorgar voitolim. (1 Korintkarank 15:51-55) Punn choddso lok, heach prithumer jivont zaun sobit bagent jietolo.

25. Ami fuddlea odheai-ant kitem xiktolim?

²⁵ Jehova Dev amchea dusmanak, mhunnttlear mornnak khoreaninch kaddun uddoitolo mhunn amkam kollon ailem. (Izaias 25:8 vachat.) Punn, sorgar jivont zata to lok thoim kitem kortolo, hea vixim ghoddie tumi chintʼta astolim. Sorgar, te Devachea Rajeache vo sorkarache bhag zatole. Hea sorkara vixim ami fuddlea odheai-ant xiktolim.