“Dev Bhedbhav Korina”

1-3. Pedruk dorxonant kitem dixtti poddlem, ani ami tea dorxonacho orth zannam zavop kiteak gorjecho?

PEDRU 36 K.X.-ant, doriachea dhokear thaun laginch aslolea Jopa xarant asa. To eka ghoracher voir vochon magnnem korta ani koddok vot asa. Hea ghorant aslear taka zaite dis zale. Tem ghor Simanvachem aslem, zo chambddeachem kam kortalo. Hantuntlean Pedru bhedbhav korinaslo mhunn kollon ieta. Karonn soglech Judev oslem kam kortat tea munxachea ghorant ravonk toiar zaunche nasle.a Tori astana, Jehova bhedbhav korina mhunn Pedru ek mhotvachem lisanv xikcho asa.

² Pedru magnnem kortalo tednam taka ek dorxon dixtti poddtta, jem polloun konnui Judev munis bejar zaunk xoktalo. Karonn tea dorxonant taka sorgar thaun denvta toslem ek chador koxem kitem tori dixtti poddtta, zacher zonvaram asat, jim Kaidea pormonnem mhellim asat. Uprant ek avaz taka tea zonvarank marun khaunk sangta. Tednam Pedru zobab dita: “Hanvem kednanch koslinch mhellim ani oxudʼdh zonvaram khaunk nant.” Punn taka tin pavtti ho avaz ieta: “Devan xudʼdh keleat tea vostunk tum mhelleo mhunnpachem bond kor.” (Itihas 10:14-16) Hacho orth kitem kai mhunn Pedru chintunk poddtta, punn uprant tem somzonk Jehova taka modot korta.

³ Pedruk dixtti poddlolea dorxonacho orth ami zannam zavop gorjecho. Karonn oxem kelear Jehova lokank koso lekhta tem amkam kollon ieta. Na tor, khorim Kristanvam zalʼlean ami lokank Devachea Rajea vixim bore bhaxen sakx diunk pavchimnant. Tor Pedruk dixtti poddlolea dorxonacho orth zannam zaunk, tea ghoddnne poilim ani uprant kitem zalem tem ami zannam zaum-ia.

“Devak Kallzant Thaun Sodanch Vinovnneo” Keleo (Itihas 10:1-8)

4, 5. Kornel konn aslo, ani to magnnem kortana kitem ghoddlem?

⁴ Pedruk dorxon mellchea ek disa poilim, Kornel nanvachea eka munxak pasun Deva thaun ek dorxon melltta. Ho munis Sezaria xarantlo aslo, jem Jopachea utʼtore vatten aslem ani Jopa thaun sumar 50 kilometr pois aslem. Kornel Romi foujecho ek odhikari aslo ani “to ek bhoktivont munis aslo. To ani tachi famil Devachea bhirantin choltalim.”b Toxench, to aplea familicho bore toren samball kortalo. To ek Judev naslo, punn sunot korunk naslolo ek Videxi aslo. Gorjek sampoddlolea Judevank to adar kortalo. Choddxe pavtt to tankam poixe vo her vostu diun modot kortalo. Tea bhair, to “Devak kallzant thaun sodanch vinovnneo kortalo.”—Itihas 10:2.

⁵ Donparchea sumar 3 vorancher Kornel magnnem korta ani tednam taka ek dorxon melltta. Tea dorxonant ek dut taka oxem mhunntta: “Tum kortalo tea magnneacher ani tum ditalo tea danancher Devan dhean dilam.” (Itihas 10:4) Ani uprant dutachea margdorxona pormonnem, Kornel aplea munxank dhaddun Pedruk aplea ghorant apoita. Chintat, beginuch hea sunot korunk naslolea Videxiak bori khobor aikonchi ek sondhi mellchi asli ani to Videxiam modem Kristanv zaunk poilo zauncho aslo.

6, 7. (a) Apleak sodhtolea khaltea kallzachea munxanchim magnnim Jehova aikota mhunn dakhounk ek onubhov sangat. (b) Oslea ghoddnneam thaun ami kitem xiktat?

⁶ Aiz Jehova aplea vixim zannam zaunk sodhtolea khaltea kallzachea lokanchim magnnim aikota kai? Hea vixim Albania-nt ravpi eke bailecho onubhov polloum-ia. Tika porgottunk ailʼlea Sakxeam koddlean, bhurgeank vaddounchea vixim aslolem Pahrogopur masik tinnem ghetlem.c Tinnem tea Sakxeank sanglem: “Tumi sot mantolim? Mhojea dhuvank koxim vaddounchim tea vixim hanv Deva lagim magnnem kortali ani tannem tumkam dhaddlim! Mhaka kiteachi goroz asli tacheach vixim tumi uloilim.” Ti bail ani ticheo dhuvo Bible xikonk laglim, ani uprant ticho ghov pasun Bible xikonk laglo.

⁷ Sonvsarbhor zaite pavtti osleo ghoddnneo amkam aikonk mellttat. Punn hem soglem bexttench ghoddona! Tor ami kitem xiktat? Poilem mhunnttlear, Jehovak sodhtolea khaltea kallzachea munxanchim magnnim to aikota. (1 Raz. 8:41-43; St. 65:2) Dusrem, porgottnnechea kamant devdut amkam modot kortat.—Prok. 14:6, 7.

“Pedru Chintunk Poddlo” (Itihas 10:9-23a)

8, 9. Aple povitr xokte udexim Jehovan Pedruk kosli adnea dili, ani tannem kitem kelem?

⁸ Ghora voir astana, Pedruk mellʼllolea dorxona vixim ‘to chintunk poddtta.’ Teach vellar, Kornelan dhaddlole sondexkar Simanvachea ghora lagim pavtat. (Itihas 10:17) Tor Judevam pormonnem oxudʼdh aslolem jevonn khaunk sodhinaslolo Pedru, atam hea Videxianchea ghora vochonk toiar zatolo kai? Aplea povitr xokte udexim, Jehova Pedruk oxi adnea dita: “Polloi! Tin munis tuka sodhunk aileat. Tor utth, ani sokol voch. Kainch dubhav dovornastana tanchea borabor voch, karonn hanvench tankam dhaddleat.” (Itihas 10:19, 20) Tor Pedru, povitr xokte udexim mellʼllolem hem margdorxon pallunk toiar zalo. Karonn taka mellʼllolea margdorxonantlean tachem mon toiar korunk taka modot zali.

⁹ Hea munxank dhaddunk, Kornelak devdutan sanglolem mhunn Pedruk kollon ailem tednam hea Videxi munxank tannem ghorant apoile “ani aple soire koxe tankam tea ghorant ravonk sanglem.” (Itihas 10:23a) Tor apnnem kitem kelʼlem Devak zai mhunn Pedruk kollʼllea uprant tannem aplem chintop bodlunk suru kelʼlem.

10. Jehova aplea lokank koso margdorxon dita, ani ami amkanch kosle prosn vicharunk zai?

¹⁰ Aiz pasun, Jehova aplea lokank sovkas-sovkas korun apli khuxi kitem ti somzonk modot korta. (Mho. 4:18) To aplea povitr xokte udexim, ‘visvaxi ani xannea chakrak’ margdorxon di-it asa. (Mt. 24:45) Thodde pavtti, Devachea Utra vixim asloli amchi poilinchi somzonni bodlonk xokta vo songottnnent jea toren kam choltalem tantunt bodol zaunk xokta. Tea vellar ami amkanch he prosn vicharunk zatat: ‘Osle bodlav zatat tednam, hanv mhojem chintop bodlunk toiar asam kai? Jehova aple povitr xokte udexim dita tem margdorxon hanv khuxalkaien pallunk toiar asam kai?’

Pedrun Tankam “Bautizm Gheuncho Mhunn Adnea Dili” (Itihas 10:23b-48)

11, 12. Sezarient pavlea uprant Pedrun kitem kelem, ani to kitem xiklo?

¹¹ Dusrea disa, Pedru ani nnov zann, te mhunnttlear, Kornelache tin sondexkar ani Jopantle “sov [Judev] bhav” Sezariek voitat. (Itihas 11:12) Pedru ieuncho aslo mhunn Kornelan “aplea soireank ani ixttank pasun aplea ghora apoilʼle.” (Itihas 10:24) Thoim pavlea uprant, apnnem kednanch chintunk na tem Pedru korta. Tem mhunnttlear, sunot zaunk naslolea eka Videxi munxachea ghora to bhitor sorta ani mhunntta: “Eka Judevak dusrea zatichea khoinchea-i munxak mellop vo tanger vochop, kitlem chukichem tem tumi bore bhaxen zannant. Tori astana hanvem khoincheach munxak mhello vo oxudʼdh mhunncho nhoi mhunn Devan mhaka dakhoilam.” (Itihas 10:28) Tea dorxonantlean Jehova Pedruk kitem xikounk sodhtalo tem to somzolo. Tem mhunnttlear, tannem fokot khoincheach jevnnakuch nhoi, punn “khoincheach munxak [eka Videxiak pasun] mhello vo oxudʼdh mhunncho nhoi.”

¹² Kornelachea ghorant aslole sogle lok Pedruchem aikonk sodhtale. Tor Kornel mhunntta: “Ami sogle Deva mukhar hajir asat ani Jehovan tuka jem kitem amkam sangpachi adnea dilea tem aikonk ami toiar asat.” (Itihas 10:33) Aikonk umed aslolo konn eklo tumkam him utram mhunntta zalear, tumkam koxem distolem aslem tem chintat! Uprant, him mhotvachim utram mhunnon Pedru aplem ulovop suru korta: “Dev bhedbhav korina mhunn atam hanv ekdom bore bhaxen somzolom. Punn dor ek munis zo tachi bhirant dhorta ani sarkem tem korta, to khoinchea-i raxttracho asum Dev taka svikar korta.” (Itihas 10:34, 35) Jehova eka munxacho des, kull, zat vo kat polloina mhunn Pedruk kollon ailem. Hem monant dovrun, to tankam Jezuchi porgottnni, moronn ani jivontponna vixim sakx dita.

13, 14. (a) 36 K.X.-ant, Kornel ani her Videxi lok Kristanv zale tednam kitem mhotvachem zaunk pavlem? (b) Porgottnni kortana ami bhedbhav kiteak korcho nhoi?

¹³ Uprant jem ghoddlem, tem hea poilim kednanch ghoddonk naslem. Tem mhunnttlear, ‘Pedru uloita astanach Videxi lokank’ povitr xokti melltta. (Itihas 10:44, 45) Bautizm gheunchea poilim povitr xokti mellʼlloli, hi Bible-ant sangloli ekuch ghoddnni zaun asa. Hea lokancher Devachi maniotai asa mhunn Pedrun vollkhon ghetlem. Taka lagon tannem, ‘tea Videxi zomeak bautizm gheunk adnea dili.’ (Itihas 10:48) Hea vellar, 36 K.X.-ant Videxi lok Kristanv zale tednam, Judev lok Devachi khas porza mhunn anik uronk na. (Dan. 9:24-27) Tor Pedru hea vellar, ‘sorginchea Rajeachea chaviam’ modli tisri ani nimanni chavi uzar korta. (Mt. 16:19) Hea chavie udexim, sunot zaunk naslolea Videxiank makhlolim Kristanvam zaunk sondhi mellʼlli.

¹⁴ “Dev munxam modem bhedbhav korina” ani “sogle toreche lok salvar zaunche” mhunn tachi khuxi asa hem ami vollkhon ghetat. (Rom. 2:11; 1 Tim. 2:4) Tea pasot ami porgottnni kortat tednam, lokanchem bhailem rup polloun ami bhedbhav korinant. Tanchem kull, des, rup vo dhorm khoincho-i asum, Jezun dilʼli adnea pallun ami soglea torechea lokank sakx ditat.

“Tannim Vad-vivad Korpacho Bond Kelo, Ani . . . Devachi Mhoima Keli” (Itihas 11:1-18)

15, 16. Thoddim Judev Kristanvam Pedru vixim vaitt kiteak ulounk laglim, ani Pedrun tankam koxim somzailim?

¹⁵ Kitem ghoddlem tea vixim bhavank sangonk Pedru Jeruzalemant vochonk sodhtalo. Punn to thoim pavchea poilim Videxi lokamnim, “Devachem utor manun ghetlem” mhunn Jeruzalemantlea bhavank kollon ailem. Tor Pedru thoim pavtach “sunot korunkuch zai oxem mhunnttale te lok tache vixim vaitt ulounk lagle.” Pedru, “sunot korunk na toslea lokanchea ghora gelo ani tanchea borabor jevlo” mhunn te bejar zale. (Itihas 11:1-3) Khorem mhunnttlear, Videxi lok Kristanv zalʼle mhunn te bejar zaunk nasle. Punn tea Videxiamnim Moizesa udexim dilʼlo Kaido pallun, sunot korunk zai oxem tankam distalem. Tor hantuntlean, to Kaido tannim atam pallchi goroz nasli mhunn manun gheunk, thoddea Judev Kristanvank khub kotthin zalʼlem mhunn dison ieta.

¹⁶ Punn Pedru tankam koso somzaita? Videxi lokamnim bautizm gheunk Devachi khuxi asli mhunn dakhounk, Itihas 11:4-16-nt sanglam toxem Pedru tankam char karonnam dita: (1) taka Deva thaun mellʼllolem dorxon (Versam 4-10); (2) povitr xokte udexim taka mellʼllolem margdorxon (Versam 11, 12); (3) devdutan Kornelak dilʼli bhett (Versam 13, 14); ani (4) Videxi lokank mellʼlloli povitr xokti. (Versam 15, 16) Tea uprant Pedru, ho mhotvacho prosn vicharun aplem ulovop sompoita. To mhunntta: “Somi Jezu Kristacher ami visvas dovorla dekhun, Devan amkam [Judevank] jem funkott dennem [povitr xoktechem] dilʼlem tench tankam-i [bhavarth dovorlolea Videxi lokank] dilem. Tor Devak addaupi hanv konn?”—Itihas 11:17.

17, 18. (a) Judev Kristanvamnim koslo nirnnoi gheunk zai aslo? (b) Sobhent ekvott samballunk kiteak kotthin zaunk xokta, ani ami amkanch kosle prosn vicharunk zai?

¹⁷ Pedrun somzailea uprant hea Judev Kristanvamnim ek nirnnoi gheunk zai aslo. To mhunnttlear, bhedbhav pois korun hea noveach bautizm ghetlolea Videxiank tim aplim bhav-bhoinnam mhunn manun ghetolim kai? Hea vixim Bible amkam sangta: “Hem aikolea uprant, tannim [apostlamnim ani her Judev Kristanvamnim] vad-vivad korpacho bond kelo, ani oxem mhunnon Devachi mhoima keli: ‘Hacho orth, Devan videxi lokankui jivit mellchem mhunn poschatap korpachi sondhi dilea.’” (Itihas 11:18) Tor Judev Kristanvam aplem chintop bodlunk toiar aslim dekhun tim sobhent ekvott samballunk pavlim.

¹⁸ Aiz pasun, Jehovachea lokam modem ekvott samballunk ghoddie kotthin zaunk xokta. Karonn Jehovachim sevokam, ‘soglea raxttram thaun, kullam thaun, zatim thaun ani bhaxe thaun’ asat. (Prok. 7:9) Toxench, tim veg-vegllea zageamnim ani poristhitimnim vaddleant ani tanchi sonskruti veg-veglli asa. Tor ami amkanch vicharunk zai: ‘Dusrim mhojea poros vegllim asat dekhun, hanv tanchea sangata bhedbhav kortam kai? Sonvsarachea lokam bhaxen hanv mhojea bhav-bhoinnam poros vorto asa mhunn dakhoun dina zaunk hanvem nichov kela kai?’ Videxi lok poilech pavtt Kristanv zaun thoddea vorsam uprant, Pedrun (Kefasan) kosli chuk kelʼli tem ugddas korat. Dusrim Videxi Kristanvank unnea molachim mhunn lekhtalim dekhun, Pedru pasun toxench korunk laglo. To Videxi Kristanvam thaun “kuxin sorlo ani tanchea thaun pois-pois ravonk laglo.” Ani hea pasot, Pauluk tachem chintop nittaier haddunk poddlem. (Gal. 2:11-14) Tor ami pasun chotrai dovrunk zai, ani dusrim amchea poros vegllim asat dekhun ami kednanch bhedbhav korunk zaina.

“Khub Lokamnim Bhavarth Dovorlo” (Itihas 11:19-26a)

19. Judev Kristanvam Antiokant konnank porgottnni korunk laglim, ani tacho porinnam kitem zalo?

¹⁹ Devan dilʼlea margdorxonacho orth tankam somzolea uprant, Kristanvamnim sunot korunk naslolea Videxi lokank porgottnni korunk suru keli kai? Uprant hea vixim Siriechea Antiokant kitem zalem tacher dhean diat.d Hea xarant khub Judev lok ravtale ani thoim ravtolea Videxi lokam lagim tancho sombond boro aslo. Tor Videxi lokank porgottnni korunk, Antiokacho vattar ekdom boro aslo. Ani heach vattarant thoddea Judev Kristanvamnim, “Grik uloupi lokank “porgottnni korunk suru keli. (Itihas 11:20) Tannim fokot Grik bhas uloupi Judevankuch nhoi, punn sunot korunk naslolea lokank pasun porgottnni keli. Jehovan tanchea hea vavracher besanv ghatlem ani “khub lokamnim bhavarth dovorlo.”—Itihas 11:21.

20, 21. Barnabasan khaltikai koxi dakhoili, ani ami porgottnnechea kamant tachi dekh koxi gheunk zata?

²⁰ Antiokant bori khobor aikonk umed dakhoitolea lokank porgottnni korunk, Jeruzalemantli sobha Barnabasak thoim dhaddtta. Hanga itlo lok aikonk sodhtalo, ki Barnabasan hem kam ekleacheanuch korunk zaunchem naslem. Tor hea vellar to Sauluchi modot gheunk chintʼta, karonn Jezun Sauluk apostl mhunn Videxi raxttrantlea lokam lagim dhaddunk vinchun kaddlolo. (Itihas 9:15; Rom. 1:5) Punn Saulu aplea poros ek boro xikoupi zatolo mhunn chintun Barnabas tachi modot gheunk fattim sortolo kai? Na. Tachea bodlek, tannem khaltikaien apleak modotichi goroz asa mhunn manun ghetli. Tannem svota panvl ghetlem. Tem mhunnttlear, to Tarsusak gelo, tannem Sauluk sodhlo, ani taka Antiokant haddlo. Ani sangata mellon thoim ek voros ravon tannim thoinchea sobhank urba dili.—Itihas 11:22-26a.

²¹ Porgottnni kortana ami aiz Barnabasachea khaltikaiechi dekh koxi gheunk zata? Amkam sogleank veg-veglli tank, kola ani unnemponnam asat mhunn ami vollkhon gheunk zai. Udharonnak, thoddim ghoddie, ghoran-ghor vo her torechi porgottnni korunk borim asat astolim. Punn tankam porot bhetto vo Bible obheas suru korunk kotthin zata zait. Tor tumi hea vattamnim vaddavoll korunk sodhtat zalear, dusream koddlean modot gheunk poilem panvl gheiat. Oxem kelolean, tumi anik borim Bible xikoupim zaunk pavtolim ani tumkam tumchea sevent anik chodd khuxalkai mellttoli.—1 Kor. 9:26.

‘Bhavank Modot Dhaddli’ (Itihas 11:26b-30)

22, 23. Antiokantlea Kristanvamnim mog koso dakhoilo, ani aiz Devache lok kitem kortat?

²² Antiokant, “Devachea margdorxona pormonnem . . . xisank poilech pavtt Kristanv mhunn nanv poddlem.” (Itihas 11:26b) Ani hem nanv tankam sarkem aslem, karonn tim Kristachi dekh gheun choltalim. Tor Videxi lok Kristanv zale tednam, tanchea modem ani Judev Kristanvam modem mog aslo kai? Hem zannam zaunk 46 K.X.-ant, vhodd promannan bhuk poddli tednam, kitem ghoddlem tacher dhean dium-ia.e Adlea kallar bhuk poddttali tednam choddxea gorib lokank khub tras sosche poddttale. Karonn tanchea lagim kuxin kaddun dovorlole poixe vo subez jevnnacheo vostu asonasleo. Tor Judeiant bhuk poddli tednam, thoim aslolea gorib Judev Kristanvank jevonn ani her vostunchi goroz poddli. Hea gorje vixim Antiokantlea bhavank kollon ailem tednam tannim, toxench Videxi Kristanvamnim, “Judeiant ravtolea bhavank . . . modot” dhaddli. (Itihas 11:29) Hantuntlean, tankam tanchea bhav-bhoinnancho kitlo mog aslo tem tannim dakhoun dilem!

²³ Aiz pasun Devache lok toxench kortat. Dusrea desant vo zagear aslolea amchea bhav-bhoinnank modotichi goroz asa mhunn amkam kollon ieta tednam, ami ap-khuxen tankam modot korunk fuddem sortat. Amchea bhav-bhoinnank vadoll, bhuimkamp ani tsunami oslea odruxttancho fuddo korunk poddtta tednam, Xakha Somiti rokddich hea bhav-bhoinnank modot korunk Odruxttank Sampoddloleank Modot Korpi Somitik nemta. Oxem korun goroz aslolea amchea bhav-bhoinnank ami modot kortat tednam, ami tancho kitlo mog kortat tem ami dakhoun ditat.—Juanv 13:34, 35; 1 Juanv 3:17.

24. Pedruk mellʼllolea dorxona thaun ami kitem xiktat?

²⁴ Jopant, ghora voir astana Pedruk jem dorxon mellʼllem tantuntlean amkam-i xikonk melltta. Tem mhunnttlear, ami bhokti kortat to Dev bhedbhav korina ani ami soglea torechea, kullanchea, ani desanchea lokank Rajea vixim bore bhaxen sakx diunchi mhunn tachi khuxi zaun asa. Tor aikonk sodhtolea sogleank ami porgottunk axetat. Karonn oxem kelolean, Jehova Devachi seva korunk ami tankam sondhi diunk pavtolim!—Rom. 10:11-13.