Khorem Dhadosponn Mellonk Ami Kitem Korunk Zai?
Ami ankvar zaum vo kazari, bhurgim zaum vo zannttim, amkam sogleank khuxalkaiechem jivit zai. Toxench, amchea Rochnnar Devak-ui ami khuxal jivit jielʼlim zai. Tea pasot, tannem amkam ekdom bore solʼle dileat.
Koxtti Vavr Korat
“Tumi aplea hatamnim koxtt korun koslo tori boro vavr korcho, ani oso gorjevontak adar diunk tumchea lagim kitem tori astolem.”—EFEZKARANK 4:28.
Amkam sogleank koxtti vavr korunk amcho Rochnnar Dev urba dita. Zo munis koxtti vavr korta to khuxal asta, karonn to apleo ani aplea familicheo gorzo purnn korta. Ani to gorjevontank pasun modot korunk xokta. Toxench, to koxtti vavr korta dekhun tacho patranv tacher khuxal asta ani to taka kamam voilo kaddcho na. Eka koxtti munxak aplea koxttanchem jem inam melltta taka Povitr Pustokant “Devachem dennem” mhunnttlam.—Upodexok 3:13.
Promannik Zaiat
“Amchea ontoskornnant koslich chuk na mhonn amkam khatri asa ani ami kortanv titleant-ui sarkem tem korunk amchi thir khuxi.”—HEBREVANK 13:18.
Ek munis promannik na zalear, tachem mon takach khata ani apnnem kelam tem chukichem kam lokank kollot mhunn taka sodanch bhirant asta. Pun zo munis promannik asta taka koslich bhirant asona ani tachem mon taka sotaina. To ratcho susegad nhidonk xokta. Dusrim tacher visvas dovortat ani taka resped ditat.
Poixeam Fattlean Dhanvo nakat
“Tumchea jivitant girestkaiechi axa dhorum nakat, ani tumche kodde asa titleanuch dhadoxi zaiat.”—HEBREVANK 13:5.
Jevnnam-khannak lagon vo her gorzank lagon munxak poixeanchi goroz asta. Punn eka munxak “girestkaiechi axa” asa zalear taka tacho vaitt porinnam bhogcho poddttolo. To munis dis-rat poixe zoddunk sodhta zalear, to aplea famili pasot vell diunk pavcho na, tachem kazari jivit tuttonk xokta, ani tachi bolaiki pasun piddʼddear zaunk xokta. (1 Timotak 6:9, 10) To chodd poixe zhoddunk vaitt kamam pasun korunk xokta. Taka lagon, eka xannea munxan oxem mhunnttlem: “Visvaxi monis axirvadan bhortolo, Punn, zo ratiant girest zaunk sodta tacher konnixttai ietoli.”—Mhonnʼnneo 28:20.
Boreantli Bori Xikounn Vinchun Kaddat
“Mhojea puta, he bore budʼdhik ani somjikaiek veng mar.”—MHONNʼNNEO 3:21.
Bori xikounn amkam ek zobabdar munis zaunk modot korta. Aiz khoinchea-i iskolant vo kolejint melltta ti xikounn amkam khori khuxalkai diunk xokona. Tor amkam khori khuxalkai mellonk zai zalear, Dev dita ti xikounn ami gheunk zai. Devache xikounne pormonnem cholta tea munxa vixim Povitr Pustok sangta ki “soglleo tacheo kornnio sufoll” zatat.—Stotr 1:1-3.