DUKH-TRASAN BHORLOLEA SONVSARANT

4 | Bhorvonso Soddun Dium Nakat

HEM KITEAK MHOTVACHEM?

Sonvsarantlea dukh-trasank lagon, choddxea lokank khub usko zata ani hacho tanchea bholaikecher ani bhavnancher vaitt porinnam poddtta. Tankam khoinch bhorvonso disona. Oslea vellar tim kitem kortat?

Thoddim zannam fuddara vixim chintpachench soddun ditat.
Thoddim zannam dukh-trasancho fuddo korunk soro pietat vo drugs ghetat.
Toxench, thoddim zannam jieunchi axa soddun ditat. “Jieun kitem faido?” oxem tim chintʼtat.

Ami Kitem Ugddas Dovrunk Zai?

Tumche thodde tras unne zaunk xoktat vo purnn toren kabar zaunk xoktat.
Tumche tras kabar zainant zalear pasun tumi tancho fuddo korunk kitem tori korunk xoktat.
Bible amkam bhorvonso dita ki beginuch amche sogle dukh-tras sodankala pasot kabar zatoleo.

Ami Atam Kitem Korunk Zata?

Bible mhunntta: “Faleanchea disa vixim kednanch usko korinakat, karonn faleanchea disache aplech uske astole. Aichea disak aichech uske puro.”—Matev 6:34.

Faleancho usko korun tumcho aicho dis padd korinakat.

Faleanchea disa vixim chodd chintit ravlear aichea disachem kam korunk tumkam kotthin zatolem. Faleam oxem zatolem vo toxem zatolem, mhunn chintit ravlear tumi anikui niraxi zatolim ani tumcho bhorvonso soddun ditolim.

FUDDO KOSO KORCHO? Thodde Solʼle

BOREA VOSTUNCHER DHEAN DIAT

Bible mhunntta: “Dublleanche dis sodanch huskean bhorlole, Punn jea monxachem kalliz khuxalkaien bhorlam, to sodanch khuxal astolo.” (Mhonnʼnneo 15:15) Tumi fokot tumchea trasam vixim chintit ravlear tancho fuddo korunk vatt aslear pasun tumkam ti dischina. Punn tumi borea vostuncher dhean ditat zalear tumchea oddchonneancho fuddo korunk tumkam sompem zatolem.

Chodd vell news polloit ravonakat ani tea vixim chintit ravonakat.
Dor disa, oslea don vo tin vostum vixim chintat, jea pasot tumi upkari asat.
Aichea disa tumi khoinchim-khoinchim kamam kortolim tem boroiat. Ek kam khub vhoddlem asa zalear, tem dor disa thoddem-thoddem korun koxem sompounk zata tem tharaiat. Oxem kelʼlean, dor disak tumi kitem tori kam kelam tem polloun tumkam borem distolem.

MODOT GHEIAT

Bible mhunntta: “Eksuro jieta to . . . faideak poddtta tosli zannvai nakarta.” (Mhonnʼnneo 18:1, NW) Tumi eka vhoddlea fonddant poddleant zalear, tumi svota tea fonddantlean bhair soronk xokonant. Tumkam dusreanchea adarachi goroz poddttoli.

Tumchea ghorcheanchi ani ixttanchi modot gheiat.
Toxench, tumi-i dusreank modot korat. Tumi oxem kortat tednam tumkam tumcheo oddchonneo ekdom vhodd discheo nant.
Jieun kainch faido na oxem tumkam dista zalear, ghoddie tumkam khub niraxiponn vo depression zalam zait. Oslea vellar tumi dotoracho adar gheunk zata. Depression zalʼlea zaitea lokank, dotora lagim vochon boreak poddlam.a

a Hem masik umkech torecho ilaz ghe mhunn sangona.

Bible Amkam Khoro Bhorvonso Dita

Devachea eka adlea sevokan magnneant oxem mhunnttlem: “Mhojea panvlank Tujem utor ubarlolo divo, uzvadd mhoje vattecho!” (Stotr 119:105) Bible amkam koso vatt dakhoita tem polloiat.

Zoso ek divo vo torch kallkhant amkam vatt dakhoita, tosoch Bible amkam jivitant vatt dakhoita. Tantunt asloli zannvai amkam bore nirnnoi gheunk modot korta.

Ani zoso ek torch amkam pois kitem asa tem dakhoita, teach toren Bible amkam fuddarak kitem zaunchem asa tem dakhoita.

Bible ek povitr pustok. Tantunt fokot munxancho itihas ani aiz kitem ghoddtta tench nhoi, punn fuddarak kitem ghoddttolem tem pasun sanglolem asa. Tantunt, amkam hea prosnanche zobab mellttat:

Koxe?

Dukh-tras koxe suru zale? Bible mhunntta: “Eka munxa udexim patok hea sonvsarant bhitor sorlem ani patka udexim moronn. Hea toren moronn soglea munxam modem posorlem karonn tannim sogleamnim patok kelʼlem.”—Romkarank 5:12.

Kiteak?

Munxachean dukh-tras kiteak kaddun uddounk zaina? Bible sangta: “Aplim panvlam nitt vatter ghalunk tanche adhin na.” (Jeremias 10:23) Him utram khorim zaun asat mhunn sonvsarachi poristhiti polloilear kollon ieta.

Kitem?

He dukh-tras kaddunk Dev kitem kortolo? Bible sangta: “To tanchea dolleantlim soglim dukam pusun kaddttolo, hea fuddem moronn anik aschem na, dukh anik korchimnant vo roddnnem anik aschem na, ani koslech tras aschenant. Karonn adleo vostu nanch zaleo.”—Prokasovnni 21:4.