18
Jezu Milagreo Korta
Jezu Raza zatoch apli podvi koxi upeog kortolo tem tannem milagream udexim dakoilem
DEVAN monxam lagim ghoddonam tosleo vostu korpachi podvi Jezuk dili. Jezun zaite pavtti zomea fuddeant vhoddleo milagreo keleo. Te milagream udexim Jezun dakoun dilem ki taka dusmanank ani odchonneank pois korunk podvi asli, jem opurnn monxam lagim kednanch korunk zavunk na. Thoddim udharonam polloumia.
Bhuk. Poilech milagrint Jezun udkacho boro soro kelo. Dusrea don ghoddneanim, thodde undde ani nistim ghevun tannem bhukelʼle hozaranim lokak jevunk dilem. Hea donui pavtti, jevonn puro zavun urlem.
Duvensam. Jezu lokancho “sogllea jinsancho pidda-rog boro kortalo.” (Matev 4:23) Kudde, bhere, koddkar, morlukar, thontte, panglle Jezu-xim ieun bore zale. Tachean boro korunk zaina toslo rog naslo.
Bhirankull vadoll. Jezu ani tache xis ek pavtti hoddeant bosun Galileachea somdirantlean vetale, tedna ek vhoddlem vaddoll suttlem. Xis tharea bhiele. Jezun vaddollak polloun mhonnttlem: “Gopchip! Thondd za!” Ani teach vellar vaddoll thamblem ani sogllem xhant zalem. (Marku 4:37-39) Anink ek pavtti, to bhirankull vaddollant udkacher cholʼlo.—Matev 14:24-33.
Noxtte Atme. Noxtte Atme monxam poros chodd bolladik asat. Devachea hea noxtte dusmanachea chopkeantlim suttonk zaitea lokank kottin zalam. Jezun zaite pavtti hea khottea atmeank bhair sorat mhonn hukum dilo, ani zaitea zannank tanchea chopkeantle soddoile. To tea noxtte atmeank bhienaslo. Jezucho odhikar te zannom asle dekhun te taka bhietale.
Moronn. “Nimanno dusman” moronn, tacher konnachean zoit voronk zaina. (I Korintkarank 15:26) Punn Jezun melʼleank novean jivont kele. Ek pavtti tannem ek vidvechea putak jivont kelo, anink ek pavtti ek lhan cheddvak jivont korun tache dukhest avoi-bapaik dilem. Anink ek kherit ghoddnent, Jezun aplea mogachea ixttak Lazarusak, char disam uprant dukhest lokam mukhar novean jivont kelo! Hi milagre kelea mhonn tachea nixttur dusmananim legun kobul korchem poddlem.—Juanv 11:38-48; 12:9-11.
Jezun heo soglleo milagreo kiteak keleo? Itleim korun tannem mozot kelʼle lok xevttim moronk na kai? Hoi. Punn Jezuchea milagream udexim fuddarak togta toslo porinam zalo. Heo milagreo Mesias Razachi razvottkechim ojeapanchim bhakitam ghoddon ieunk buniad asa mhonn siddh kortat. Devan nomiarlelea Razachean bhuk, duvens, bhirankull vaddoll, noxtte atme ani moronn kaddunk zaunchem na mhonn kaim dubavuch na. Devan tachea hatant soglli osli podvi dilea mhonn tannem dakoilem.