Dhormdut Bhirantivinnem Porgottʼtat

JEZU sorgar choddon 10 disam uprant, 33 C.E. vorsak, sumar 120 tache xis Judevanchea Pentekost Porbechea somoiar Jerusalemant eka ghorant ektthaim zalʼle. Okosmat, zonnzonnit varea sarkea avazan tem ghor bhorlem. Xis milagreanim noko asleleo bhaso ulounk lagle. He vichitr ghoddnechi somjikai koxi meutoli? Devan xisank Povitr Atmo dilo.

Bhair, ek zomo aslo karann zaite raxttranche lok he porbek ailʼle. Jezuche xis suddsuddaien tanchea bhasanim uloitatle tem aikon te thottakle. Hem koxem ghoddlem ti sozmonni ditana Pedru, Joel provadeachem bhakit ugddas korta ki Dev aplo Atmo ‘ottoitolo’ ani ho Atmo ghetoleank milagrechim dennim melltolim. (Joel 2:28, 29) Povitr Atmeachi bolladik xokti spoxtt puravo korta ki ek mhotvacho bodol ghoddla. Devan Israel porje veli kurpa kaddun atam novich sthapon zalʼle Kristanv sobhek dili. Devachi seva korunk svikar kortat tannim atam Kristache pattlavdar zavunkuch zai.

Tea mhonnosor, dhumalle vaddle ani dusmananim xisank bondkhonint ghatle. Punn tea ratrik, Jehovahchea dutan bondkonnichim daram ugoddlim ani xisank porgottni chalu dovrunk sanglem. Dis uzvaddtoch, te porgottunk lagle. Te mondirant bhitor sorle ani Jezuchem xubhvortoman xikounk lagle. Dhormik virodhi tancher ekdom ragan bhorle ani tankam porgottni bond korunk hukum ghalo. Bhirantivinnem, dhormdutamnim portipall kelo “Monʼxanchi adnia nhoi, punn Devachi adnia ki ami pallunk zai.”—Dhormdutancho Itihas 5:28, 29.

Dhumalle aninkui vaddle. Kaim Judevanim, Istev xisacher devnindecho arop lailo ani taka fatranim jivexim marlo. Tarsusacho ek tornatto Saulu hanga hajir aslo, tannem hea khunnak maniatai dili. Uprant Kristacho pattlav kortat tankam dhorun haddunk to Damaskak gelo. Saulu xara lagim pavtam, ovchit sorga velo ek uzvadd tache sorvbhontovnim porzollʼllo ani tedna tannem ek tallo aikolo: “Saulu, Saulu, kiteak mhonn tum mhaka piddapidd ditai?” Uzvaddan kuddo zalʼlo Saulu vincharta: “Tum konn Saiba?” Tallean zap dili: “Hanv Jezu.”—Dhormdutancho Itihas 9:3-5.

Tin disam uprant, Jezun Ananias nanvachea eka xisak Sauluchi nodor porot diunk dhaddlo. Saulun bautizm ghetlo ani dhiran Jezuk porgottunk laglo. Sauluk uprant dhormdut Paulu mhonn ollkhunk lagle ani to Kristanv sobhecho urbhevont bhageli zalo.

Jezuche xis razvottkechem xubhvortoman fokot Judevank ani Samarikarank porgottʼtale. Ek dev-dutan Kornel nanvacho bhoktivont Romi foujecho xotpotik dorxon dilem anik dhormdut Pedruk apounk sanglem. Pedrun herank sangatak ghevun, Kornelak ani tachea ghorabeak porgott kelem. Pedru uloita thoinch astana, te videxi bhavarteancher Povitr Atmo devun ailo, dhormdutan tankam Jezuchea nanvan bautizm gheiat mhonn sanglem. Atam sogllea raxttranchea lokank sasnnachea jivitachi vatt ukti zali. Hi sobha atam xubhvortoman sonvsarachea ximam porian govai diunk lagli.

​—Dhormdutancho Itihas 1:1–11:21 hacher adarlelem asa.