Vachpeam Thaun Prosn

Soitanan Evek borea ani vaittachea zannvai ditea rukhachem foll khailem zalear ti morchina oxem mhunnttlem tednam aiz choddxe lok mantat ti xikounn, ti mhunnttlear melea uprant pasun otmo jivo urta hem tichea monant ghalunk sodhtalo kai?

Chodd korun na. Devcharan Evek Devan khainaka mhunnttlam tem foll khailem zalear ti mortoli punn ticho otmo khoim tori jivo urtolo, oxem sangonk na. Soitanan sorpa udexim, tea rukhachem foll khailem zalear Eve kednanch ‘morchi na’ mhunn davo kelʼlo. Tor ti Devachem margdorxon nastana, hea prithumer sodanch khuxalkaien jietoli, oxem to mhunnonk sodhtalo.—Ut. 2:17; 3:3-5.

Otmo morona mhunn aiz lok mantat ti khotti xikounn Eden bagent suru zaunk na zalear kednam suru zali? Kednam mhunn ami khatren sangonk xokona. Punn Noah-chea disamnim ailolea Buddttʼtte vellar sogli khotti bhokti na zali mhunn ami zannant. Buddʼtte thaun fokot Noah ani tachi famil salvar zali ani tim soglim khori bhokti kortalim. Tor, khottea dhormachi xikounn diunk ani konn urlo na.

Tor munxacho otmo morona, hi aichea kallar asloli xikounn, Buddʼtte uprant suru zali astoli. Karonn lok Babel-ant xikloli hi khotti xikounn, Devan Babel-ant bhaxecho gondholl korun tankam “akʼkhe prithume voir” ximpddaile tednam, te ap-aple zagear ti gheun gele astole. (Ut. 11:8, 9) Hi khotti xikounn kednam-i suru zaum, ami ek vixoi zannant, to mhunnttlear, “fottincho bapui,” Soitan tea xikounne fattlean aslo ani ti pois-pois ximpoddli mhunn to khuxal zalo.—Juanv 8:44.