Devachea razvottke khala soglim rochnna xantin ani ekvottan jietalim

Devachea Rajeachi Amkam Kiteak Goroz Asa?

Poilea zoddpeak, Adanv ani Evek hea prithumer rochlim tednam, Jehova Dev, amcho Rochnnar, ekloch Raza aslo. Ani to tancher mogan raj choloitalo. Tannem tankam Eden nanvachea eke sobit bagent ravonk dilem, zoim bhorpur jevonn aslem ani khuxalkai haddtta toslem kam aslem. (Utpoti 1:28, 29; 2:8, 15) Tor tannim ani tanchea bhurgeamnim Devachem aikolʼlem zalear tim sodanch xantin jietolim aslim.

Devan khainaka mhunn sanglolem foll Even Adanvam lagim dilam ani to tem hatant dhorun asa. — Poilea zoddpean Devak aplo Raza mhunn nakarlo

Bible sangta ki ek ainz, Devachea add gelo. Ani taka Soitan mhunn nanv poddlem. Devak munxancher razvottki cholouncho hokʼk na mhunn tannem sanglem. Devachi razvottki nastana ani tachem margdorxon nastana munis khuxal ravonk xokta mhunn to sangonk sodhtalo. Punn dukhachem mhunnttlear amchim poilim avoi-bapui, Adanv ani Even Soitanachem aikolem ani tim Devachea add gelim.—Utpoti 3:1-6; Prokasovnni 12:9.

Hea toren tannim Jehova Devak aplo Raza mhunn nakarlo dekhun kitem zalem? Tankam Eden bagent anik ravonk mellonk na. Toxench tannim bori bholaiki ani sasnak jieunchi sondhi hogddaili. (Utpoti 3:17-19) Tea bhair, tacho vaitt porinnam tanchea bhurgeankui bhogcho poddlo. Bible sangta, Adanvan patok kelem ani ‘tache udexim patok hea sonvsarant bhitor sorlem ani patka udexim moronn.’ (Romkarank 5:12) Patkak lagon anik ek vaitt ghoddlam, tem mhunnttlear: ‘Sonvsarant thoddeach lokank podvi asta, ani urlole tanchea khala koxttovtat.’ (Upodexok 8:9) Hacho orth, munxam raj choloitat tednam tacho khub vaitt porinnam zata.

MUNXANCHEA RAZVOTTKECHI SURVAT

Nimrod gorvan ubo ravla. Fattlean lok bildding bandtat. — Nimrod Jehovachea odhikara add gelo

Bible sangta, munxam modlo poilo raza Nimrod zaun aslo. To Devachea odhikara add gelo. Tor tednam thaun aiz meren podvi aslolea munxamnim tanchea khala aslolea lokancher vaitt toren odhikar choloila. Taka lagon sumar 3,000 vorsa poilim, Raza Solomonan oxem boroilʼlem: “Zulum sonstole roddttale. Punn tankam konnuch adar dinaslo. Kiteak tancher zulum cholovpeam sangata podvi asli.”—Upodexok 4:1.

Aizui poristhiti toxich asa. Karonn 2009-ant, United Nations-achea eka prokaxonant sanglolem, aiz sonvsarant jem vaitt ghoddtta tachem “mukhel karonn mhunnttlear sonvsarantle sorkar sarke toren raj choloinant.”

BEGINUCH EK BODLAV ZATOLO!

Munxank ek boro sorkar ani boro raj choloupeachi goroz asa. Tor amcho Rochnnar amkam osloch sorkar ditolo mhunn tannem amkam bhas dilea!

Sangata dovorlole fottu: Munxanchea sorkarancho porinnam. 1. Asia-ntli ek bail, aplea roddtta tea bhurgeak dhorun mhelle svater bosloli asa. 2. Ek duent zanntto dadlo hospital-ant khattir asa. 3. Soinik zhuzachea moidanar firing kortat. 4. Ragixtt lokancho zomo bovall korta ani banner dhorun asa. 5. Ek bail ani tichi dhuv ghora bhair ubim asat, tanchea ghorachea fuddlea daracho glass futtlolo asa. 6. Ek produxonn aslolem xar ani wire distat. — Hea sonvsarantlea borea sorkaram lagim pasun munxanche tras kaddun uddounk zaunk nant

Tor Devan ek sorkar vo ek Raj atanch stapon kelam jem beginuch munxanchi razvottki nas korun “apunnuch sodankal togtolem.” (Daniel 2:44) Heach Rajea pasot lakʼkhamnim lok magnnem korit asat. (Matev 6:9, 10) Punn hea Rajeacho vo sorkaracho Raza Jehova Dev aschona. Tachea bodlek tannem konnak tori vinchun kaddla zo eka tempar hea prithumer jielʼlo. To konn?