Magnnem Kelʼlean Kosle Faide Asat?

Pamela nanvache eke bailek cancer aslo. Tinnem dotora lagim aplo ilaz kelo. Ani duensacho fuddo korunk apleak modot kor mhunn tinnem Deva lagim magnnem kelem. Magnnem kelʼlean tika faido zalo kai?

Pamela sangta: “Zaite pavtti mhozo ilaz cholu astana hanv khub bhietalem. Punn hanv Jehova Deva lagim magnnem kortalem tednam mhojea monak xanti mellttali ani hanv tea poristhiticho fuddo korunk pavtalem. Atam-i mhaka khub tras zata. Punn magnnem kelʼlean, trasancher dhean diunchea bodlek hanv borea vostuncher dhean diunk pavtam. Lok mhaka koxem asa mhunn vicharta tednam hanv tankam sangtam, ‘mhoji bholaiki titli bori na, punn hanv khuxal asam!’”

Amcho jiv dhokeant asta vo ami duent astat tednanch ami magnnem korunk zai oxem na. Amkam aslolea lhan-vhodd trasam pasotui ami magnnem korunk zata.

Bible-ant boroilam: “Sorvesporachea Kallzant ghal tuje huske: Toch tuka samballtolo. Sugunni monxak To kodinch poddunk-halunk diuncho na.” (Stotr 55:22) Hea utrantlean amkam kitli bhuzvonn melltta nhoi! Ami sarke toren magnnem kelem zalear, amchea trasancho fuddo korunk Dev amkam modot kortolo.—“Magnnem Kelʼlean Tumkam . . . ” hem boks polloiat.

Magnnem Kelʼlean Tumkam

Monachi xanti mellttoli

“Devak tumcheo vinoteo kolloiat. Tednam Devachi xanti ji somzon gheupachea tanki poros vorti asa, ti Krist Jezu udexim tumchea kallzanchi ani tumchea chintnanchi rakhonn kortoli.” (Filipkarank 4:6, 7) Tumi Devak tumche uske sangle zalear tumchea monak xanti mellttoli ani kotthin poristhitint pasun tumi sarke nirnnoi gheunk pavtolim.

Deva koddlean zannvai mellttoli

“Tumchea modlea konnankui zannvaiechi goroz asa zalear tannem ti Deva lagim magot ravchi, ani Dev ti taka ditolo. Karonn Dev konnakuch unno mhunn lekhinastana, sogleank udar kallzan dita.” (Jakob 1:5) Ami tension-ant astat tednam amkam sarke nirnnoi gheunk kotthin zata. Oslea vellar, amkam zannvai di mhunn ami Deva lagim magnnem korunk zata. Dev amkam Bible-antlean osle mudʼde ugddasak haddunk xokta, jea udexim ami sarke nirnnoi gheunk pavtolim.

Dhir ani bhuzvonn mellttoli

“Zo mhaka boll dita tacheach udexim soglea vostunt mhaka xokti melltta.” (Filipkarank 4:13) Jehova Sorvxoktivont Dev, dekhun to amkam kotthin poristhitincho bhienastana fuddo korunk dhir diunk xokta. Amcher kosle-i tras ietat tednam to amkam bhuzvonn pasun dita. (Izaias 40:29) Karonn, to “sogle torechi bhuzvonn diupi Dev” oxem Bible-ant boroilam.—2 Korintkarank 1:3, 4.

TUMI MAGNNEM KORTOLIM?

Jehova Dev, aplea lagim magnnem korchem mhunn amcher dobhav ghalina. Punn ami khuxe monan tachea lagim magnnem kortat tednam, to amchim magnnim aikon khuxal zata. (Jeremias 29:11, 12) Devan tumchem magnnem aikonk na, oxem tumkam kednam-i dislam? Toxem zalear pasun tumi magnnem korop soddun dium nakat. Udharonnak, bhurgeam vixim chintat: Zaite pavtti tankam kosli-i vost zai zalear tim aplea avoi-bapai lagim magot ravtat ani ti tankam rokddich zai asta. Punn tanchim avoi-bapui tim jem magtat, tem thodde pavtt tankam dinant astolim vo tednanch dinant astolim. Tannim ghoddie tankam anik kitem tori borem diunk chintlam astolem. Karonn avoi-bapui aplea bhurgeancho mog kortat ani tanchem borem zalʼlem tankam zai.

Toxench ami soglim Jehova Devachim bhurgim zaun asa. To amcho khub mog korta ani taka amchem borem zalʼlem zai. Tor, atam meren ami magnnea vixim jem zanna zaleant tea pormonnem ami magnnem kelem zalear to amchem aikotoloch.—Stotr 34:15; Matev 7:7-11.