Kotthin Poristhitimnim Tumkam Xanti Koxi Mellonk Xokta?

1. “Devachi xanti” mhunnttlear kitem, ani hi xanti aslolean amkam koso faido zata? (Filipkarank 4:6, 7)

AMCHO sorgincho Bap Jehova sangata, lagxilʼli ixttagot aslolean amkam eke torechi xanti melltta. Ti mhunnttlear, “Devachi xanti.” Punn hea xanti vixim sonvsarantlea lokank kainch khobor na. Amkam Devachi xanti asta tednam ami surokxit asat oxem amkam dista. (Filipkarank 4:6, 7 vachat.) Toxench, Jehovacho mog kortat tanchea sangata ani ‘xanticho Dev’ Jehova sangata amchi ixttagot khub ghott zaunk pavta. (1 Tes. 5:23) Tor ami Jehovachi vollokh ghetat, tacher visvas dovortat ani tacheo adnea pallttat tednam kotthin poristhitimnim amche uske pois korun xant ravonk, Devachi xanti amkam modot korta.

2. Amkam Devachi xanti khorench mellonk xokta mhunn ami kiteak khatri dovrunk zata?

² Punn pidda, odruxtt, desa bhitor zhuz vo dhumallea sarkea kotthin poristhitincho fuddo korunk poddtta tednam amkam khorench Devachi xanti mellonk xokta kai? Karonn oslea poristhitimnim amcher bhirant ieunk puro. Tori astana, hea vellar ami Jezun aplea pattlavdarank dilʼlo solʼlo ugddas dovrunk zai. Tannem mhunnttlem, “Tumchim kallzam dukhi zaunk dium nakat vo bhiranten oskot zainakat.” (Ju. 14:27) Zaitea bhav-bhoinnamnim Jezucho ho solʼlo apnnaila. Oxem kelʼlean, kotthin poristhitim vellar xanti mellonk Jehovan tankam modot kelea.

PIDDA POSORTA TEDNAM AMKAM XANTI KOXI MELLONK XOKTA?

3. Eka zagear vo sonvsarbhor pidda posorta tednam kitem zaunk xokta?

³ Eka zagear vo sonvsarbhor pidda posorta tednam ratiam bhitor amchem jivit bodlonk xokta. Oxench, COVID-19 pidde vellar zalem. Ek survey keli tednam zaitea zannamnim tankam ratchi nhid poddonasli mhunn sanglem. Toxench, hea piddek lagon lokank chodduch usko zaunk laglo, tanchem depression vaddlem, tim chodduch soro pieunk laglim, toxench drugs gheunk laglim. Ghorant zhogddim ani maramari vaddonk lagli. Tea bhair, anikui zaitea zannamnim aplo jiv kaddunk proitn kelo. Tor tumi ravtat thoim ek pidda posorli zalear chodduch usko korina zaunk ani Devachi xanti mellonk, tumkam koxi modot zaunk xokta?

4. Nimannea disam vixim Jezun kitem sanglolem tem zannam zalʼlean amkam xanti koxi melltta?

⁴ Nimannea disamnim “veg-vegllea zageancher” pidda posortoleo mhunn Jezun adim fuddech sanglolem. (Luk. 21:11) Hem zannam zalolean amkam xanti koxi melltta? Aiz pidda posorta tednam ami ojap zainant. Karonn Jezun sanglolem toxench aiz ghoddtta mhunn ami zannant. Tea pasot, hea kallar jietolea lokamnim kitem korunk zai tea vixim Jezun dilʼlo solʼlo ami pallttat. Tannem mhunnttlolem, “Bhienakat.”—Mt. 24:6.

5. (a) Ek pidda posorta tednam ami kitea vixim magnnem korunk zai tem zannam zaunk Filipkarank 4:8, 9-antlean amkam koxi modot zaunk xokta? (b) Bible-achim audio rekorddingam aiklolean ek bhoinnik koxi modot zali, ani tiche thaun ami kitem xikonk zata?

⁵ Ek pidda posorta tednam amkam usko zaunk xokta vo ami bhieunk xoktat. Oxench, Desi nanvache eke bhoinnik ghoddlem.b COVID-19 piddek lagon ticho uncle, cousin bhav ani dotor bhair poddle tednam ho virus apleakui lagtolo kai, ani apleak lagon aple zanntte avoikui to lagtolo kai mhunn ti ekdom bhieli. Toxench, piddek lagon aplem kam gelem zalear, apunn bhaddem koxi bhortoli ani jevnnacho khorch koxi bhagoitoli mhunn ti chintunk lagli. Hea vixim tika itlo usko zaunk laglo ki tika ratchi nhid poddona zali. Punn uprant, apleak xant ravonk ani borea vostuncher dhean diunk modot kor mhunn tinnem Jehova lagim magnnem kelem. (Filipkarank 4:8, 9 vachat.) Toxench, ti Bible-achim audio rekorddingam aikonk lagli. Hea vorvim Jehova eka orthan, tichea lagim “uloita” oxem tika dislem ani tika xanti mellʼlli. Bhoinn mhunntta: “Vachpeamnim bore toren tim versam vachlolean, mhozo usko pois korunk ani Jehova mhoji kallji gheta mhunn ugddas dovrunk mhaka modot zali.”—St. 94:19.

6. Svotacho obheas kelolean ani mittingek hajir zalolean amkam koxi modot zatoli?

⁶ Ek pidda posorta tednam ami sodanch kortat tim soglinch kamam ami ghoddie korunk xokonant astolim. Punn svotacho Bible obheas korop ani mittingek hajir zavop ami kednanch chukounk zaina. Amchea prokaxonamnim ani video-nim oslea bhav-bhoinnanche onubhov dilʼle asat, jim amcheach sarkea oddchonneancho fuddo kortat. Tori astana, tim visvaxiponnan Jehovachi seva kortat. (1 Ped. 5:9) Toxench, mittingek hajir zalolean Bible-ant aslole urba ditat toslea vixoi-ancher niall korunk amkam modot zatoli. Tea bhair, dusreank urba diunk amkam sondhi mellttoli ani amkam pasun urba mellttoli. (Rom. 1:11, 12) Toxench, Jehovachim sevokam duent aslim, bhielʼlim vo eksurim aslim tednam, Jehovan tankam koso tenko dilo tacher niall kelolean, amcho bhavarth ghott zatolo ani to amkam-i tenko ditolo mhunn amchi khatri vaddttoli.

7. Ami apostl Juanva thaun kitem xikonk zata?

⁷ Ami korunk zata ti anik ek vost mhunnttlear, ami amchea bhav-bhoinnam lagim ulounk fuddem soronk zai. Punn pidda posorta tednam ami tankam mellonk xoktat zalear pasun, amkam eka-meka thaun favo titlo ontor dovrunk poddot. Oslea poristhitint amkam ghoddie apostl Juanva bhaxen disot. Apostl Juanv, tacho ixtt Gaius-ak mellon tache lagim ulounk sodhtalo. (3 Ju. 13, 14) Punn poristhiti oxi asli ki thoddea vella pasot te eka-mekak mellonk xokonasle. Tea pasot, apostl Juanvan Gaius-a lagim ulounk apleachean zatalem tem kelem. Tem mhunnttlear, tannem Gaius-ak chitt boroili. Tor piddek lagon vo her kosle-i poristhitik lagon ami amchea bhav-bhoinnank mellonk xokonant zalear ami tankam fon korun, video call korun vo message-o ghalun tanchea lagim ulounk zata. Oxem kelolean, ami eksurim asat oxem amkam dischem na ani amkam xanti mellttoli. Punn amkam chodduch usko zata zalear, ami vhoddilanchi modot gheunk zai. Karonn te amkam mogan urba ditat.—Iz. 32:1, 2.

ODRUXTT ZATA TEDNAM AMKAM XANTI KOXI MELLONK XOKTA?

8. Odruxttak lagon amchi xanti koxi piddʼddear zaunk xokta?

⁸ Tumi ravtat tea zagear kednam tori bhuimkamp vo buddtti ailea kai, vo uzo posorla kai? Hoi zalear, tednam tumkam koxem bhoglem tem tumchea monant zaito vell porian urlem astolem. Khas korun, tea odruxttant tumchim mogachim konnui bhair poddlim, vo tumchem ghor ani vostuncho nas zalo zalear tumkam khub dukh bhoglem zait, tumi niraxi zalim astolim, vo tumkam rag pasun ailo astolo. Punn hacho orth, tumkam tumchea vostuncho chodduch mog asa vo tumcho bhavarth unno asa, oxem nhoi. Tumi ek kotthin poristhitintlean bhair sorleant, tor tumi kitem-i vaitt uloilear vo tumkam rag ailear pasun, tantunt kainch vaitt na oxem thoddeank disot. (Job 1:11) Punn oslea poristhitint pasun, tumkam xanti koxi mellonk xokta?

9. Jezun oxem kitem mhunnttlem, jem amkam odruxttam pasot toiar ravonk modot korta?

⁹ Hea sonvsarantlo thoddo lok, tim ravtat thoim odruxttam kednanch zaunchimnant oxem chintʼtat. Punn ami, Jezun kitem bhasaunni kelʼli tem ugddas dovortat. Tor odruxttam anikui vaddttolim, ani thoddea odruxttancho porinnam amcherui zait mhunn ami vollkhon ghetat. Xevott ieunchea poilim “vhodd bhuimkamp,” toxench her odruxttam zatolim mhunn Jezun aplea pattlavdarank sanglolem. (Luk. 21:11) Toxench, tannem ‘khotteponn vaddttolem’ mhunn pasun sanglolem, jem aiz ghoddtta tem ami polloitat. Aiz kirmi, hinvsa ani atonkvad zatat. (Mt. 24:12) Heo ghoddnneo fokot Jehovachi seva korinant tankanch ghoddttoleo oxem Jezun sangonk na. Khorem mhunnttlear, aiz Jehovachim zaitim visvaxi sevokam oslea odruxttancho fuddo kortat. (Iz. 57:1; 2 Kor. 11:25) Tea soglea odruxttantlean Jehova ghoddie amkam ojapache ritin salvar korcho na. Punn oxem ghoddtta tednam xant ravonk to amkam modot kortolo.

10. Odruxttam pasot ami atanch toiari kortat tednam amkam bhavarth asa mhunn ami koxim dakhoun ditat? (Mhonnʼnneo 22:3)

¹⁰ Ami odruxtt zaunchea poilinch toiari kortat tednam odruxtta vellar xant ravonk amkam sompem zatolem. Punn poilinch toiari korop, hacho orth amkam Jehovacher bhavarth na, oxem kai? Na, toxem nhoi. Ami poilinch toiari kortat tednam Jehova aplea sevokanchi kallji korunk xokta, ho bhavarth amkam asa mhunn ami dakhoun ditat. Oxem ami kiteak mhunnonk zata? Karonn odruxttam pasot adim fuddench toiari korunk Devachem Utor amkam sangta. (Mhonnʼnneo 22:3 vachat.) Prokaxonamnim ietat tea lekham udexim, toxench mittingo ani kollounneam udexim, Jehovachem songotton amkam porot-porot odruxtt zaunchea poilinch toiari korunk urba dita.c Tor odruxtt zaunchea poilim, tem mhunnttlear, atanch amkam melltta tem margdorxon ami apnnaitat tednam amkam Jehovacher visvas asa mhunn ami dakhoun ditolim.

11. Margaret-achea onubhovantlean tumi kitem xiklim?

¹¹ Hea vixim ami Margaret nanvache eke bhoinnicho onubhov polloum-ia. Tichea ghora lagim aslolea eka ranant ek vhoddlo uzo laglo. Tea pasot, sorkari odhikareamnim tika tichea ghorantlean bhair soronk laili. Ani zaito lok ekuch vellar bhair sorlolean, rostear traffic jam zalem. Ujeak lagon, kallo dhunvor vareant itlo posorlo ki Margaret-ak thoddea vella pasot tichea gaddientlean bhair soronkuch mellonk na. Punn tinnem adim fuddench toiari kelʼli dekhun ticho jiv salvar zalo. Oslea vellar thoinchean bhair soronk ek dusri vatt mellonk, tinnem poilinch aple purse-int ek nokso dovorlolo. Itlench nhoi, tinnem to rosto pasun poilinch polloun dovorlolo. Tea pasot, uzo laglo tednam ti thoinchean sompeponnim bhair soronk pavli. Tor adim fuddench toiari kelolean tika khorench faido zalo nhoi!

12. Surokxit ravonk amkam melltta tem margdorxon ami kiteak pallunk zai?

¹² Ami ani dusrim surokxit uronk, odhikari thodde pavtti amkam curfew pallunk lait, amchea ghorantlean bhair soronk sangot, vo amkam her suchounneo diunk puro. Punn thoddim zannam, tanche lagim asloleo vostu soddunk sodhinant dekhun tim heo suchounneo pallinant, vo teo pallunk kallav kortat. Oslea vellar khorim Kristanvam kitem kortat? Tim Bible-antlim him utram pallttat, zoim sanglam: “Monxa-somazant odhikar aslolea soglleank Somia pasot khaltim ravat: zaum somrazak, taka soglleam voir odhikar asa dekhun; zaum razpalank . . . tannem tankam nemleat dekhun.” (1 Ped. 2:13, 14) Toxench, surokxit ravonk Jehovachem songotton pasun amkam margdorxon dita. Ami amcho halincho potʼto ani fon number vhoddilank diunk amkam porot-porot ugddas kortat. Karonn oxem kelʼlean odruxtt ghoddtta tednam vhoddilank amkam sompork korunk sompem zata. Tor songottnnechi hi suchounni tumi pallʼllea kai? Tea bhair, songotton amkam ami asat thoinch ravchea vixim, vo ghorantlean bhair sorchea vixim, ani odruxtta vellar gorjecheo vostu mellchea vixim, vo ami dusreank kednam ani koxi modot korunk zata, tea vixim pasun margdorxon diunk puro. Vhoddil amchea jivachi kallji gheta mhunn ugddas dovrat. Tor ami songottnnechem margdorxon pallinant zalear ami amcho, toxench tancho jiv pasun dhokeant ghalunk xoktat. (Heb. 13:17) Bhoinn Margaret-an hea vixim oxem sanglem: “Hanvem vhoddilam thaun ani songottnne thaun mellʼllolem margdorxon pallʼllem dekhunuch mhozo jiv salvar zaunk pavlo mhunn mhaka kainch dubhav na!”

13. Aplem ghor soddun dusrea zagear vochonk poddlolea bhav-bhoinnank khuxalkai ani xanti koxi mellʼllea?

¹³ Amchea zaitea bhav-bhoinnank, odruxttak vo zhuzak lagon tanchim ghoram soddun eka dusrea zagear ravonk poddlam. Punn tea vellar pasun, tea novea poristhitint jieunk ani Jehovachi seva korunk tannim apleachean zata tem soglem kelam. Dhumalleak lagon ximpoddlolim tea poilea xekddeantlea Kristanvanchi dekh gheun, tim ‘xubhvortoman porgottit ravtat.’ (D.I. 8:4) Oxem kelʼlean, tanchea kotthin poristhitincher nhoi, punn Devachea Rajeacher dhean diunk tankam modot zalea. Ani hea vorvim tankam khuxalkai ani xanti mellʼllea.

DHUMALLO IETA TEDNAM AMKAM XANTI KOXI MELLONK XOKTA?

14. Dhumalleak lagon ami amchi xanti koxi hogddaunk xoktat?

¹⁴ Ami sangata mellon mittingek hajir zatat, koslich bhirant nastana porgottnni kortat ani konnui amkam arrest korit mhunn bhirant nastana Jehovache bhokte sombondit kamam kortat tednam ami khuxal ani dhadoxi astat. Punn amcher dhumallo ieta tednam amkam hem soglem korunk mellona. Tea pasot ami amchi xanti hogddaunk puro. Toxench, amkam usko zaunk xokta ani fuddem kitem zatolem kai mhunn ami bhieunk xoktat. Oxem disop chukichem nhoi. Punn ami chotur asonk zai. Karonn Jezun, dhumalleak lagon tachea pattlavdarancho bhavarth haltolo mhunn sanglolem. (Ju. 16:1, 2) Tor dhumallo ieta tednam ami xant koxim ravonk xoktat?

15. Amcher dhumallo ietolo mhunn ami kiteak bhieunk zaina? (Juanv 15:20; 16:33)

¹⁵ Devachea Utrant sanglam: “Jezu Krista sovem bhoktiponnan jieunk sodtat tim sogllim dhumallo sostolinch!” (2 Tim. 3:12) Punn hem manun gheunk amche modlea thoddea zannank kotthin zaunk puro. Oxench Andrei nanvachea eka bhavak ghoddlem. To ravtalo tea desant Jehovachea Sakxeanchea kamacher bondi ghatli tednam tannem oxem chintlem: ‘Hanga tor kitlim Jehovachim Sakxi asat. Odhikari amkam sogleankuch arrest korunk xokchenant!’ To oxem chintʼtalo dekhun taka sogloch vell usko zaunk laglo. Punn her bhavamnim Jehovacher visvas dovorlo ani tankam kednam-i tori odhikari dhorun vhoronk xoktat mhunn tannim vollkhon ghetlem. Tor tankam chodd usko zainaslo. Bhav Andrei-n hea bhavancher dhean dilem tednam tannem tanchea sarkem chintop apnnaun Jehovacher visvas dovrunk tharailem. Oxem kelolean, taka rokddich xanti mellʼlli. Ani atam oddchonneo aslear pasun to khuxal asa. Ami pasun dhumallea vellar xant ravonk xoktat. Jezun sanglolea pormonnem amcher dhumallo ieunk xokta mhunn ami vollkhon ghetat. Punn teach borabor ami visvaxi ravonk xoktat mhunn Jezun amkam khatri dilea.—Juanv 15:20; 16:33 vachat.

16. Dhumallo ieta tednam ami kitem korunk zai?

¹⁶ Amchea kamacher bondi asta tednam amchi rakhonn korunk, Jehova sangata amchi ixttagot samballunk goroz teo sogleo vostu mellonk, ani amchean zata te bhaxen porgottnnechem kam korit ravonk, xakha ofis ani vhoddilam koddlean amkam suchounneo mellonk puro. Tea vellar amkam melltta tem margdorxon amkam purnn toren somzona zalear pasun, ami tem pallunk amchean zata tem soglem korunk zai. (Jak. 3:17) Toxench, amchea bhav-bhoinnam vixim vo sobhe vixim dusreank sangonk zaina ti mahiti ami kednanch sangchi nhoi.—Up. 3:7.

17. Poilea xekddeantlea apostlam bhaxen ami kitem korunk nichov kela?

¹⁷ Ami ‘Jezu vixim govai diupachem kam kortatʼ dekhun Soitan khas korun amcher dhumallo haddtta. (Prok. 12:17) Punn ami Soitanak ani tachea sonvsarak bhieunk zaina. Virodh aslear pasun ami porgottchem ani xikouchem kam korit ravonk zai. Karonn oxem kelolean amkam khuxalkai ani xanti melltta. Amkam poilea xekddeantlea apostlamnim ek bori dekh dovorlea. Judevanchea odhikareamnim tankam dhorun vhele, ani porgottnni bond korunk laili tednam tannim tanchem aikonk na. Tannim Devachea utrak pallo dilo ani te porgottnni korit ravle. Ani hea kama thaun tankam khub khuxalkai mellʼlli. (D.I. 5:27-29, 41, 42) Tor tanchi dekh gheun ami pasun porgottnni korit ravonk zai. Punn bondi aslolea zagear porgottʼttana ami chotrai dovrunk zai. (Mt. 10:16) Porgottnni korunk amchean zata tem soglem ami kortat tednam amkam xanti melltta. Karonn ami Jehovak manvota tem kortat ani dusreancho jiv salvar korpachem kam kortat.

“XANTIN BHORTA TO DEV TUMCHE SOVEM ASTOLO”

18. Amkam khori xanti konn diunk xokta?

¹⁸ Ami ekdom kotthin poristhitint astat tednam pasun, amkam xanti mellonk xokta mhunn ami khatri dovrunk zata. Hea vellar amkam Devachea xantichi goroz asa. Ani hi xanti fokot Jehova Devuch amkam diunk xokta. Tor pidda, odruxttam vo dhumallea vellar Jehovacher patieun ravat. Tache songottnnek chittkun ravat. Ani Jehovan bhasailʼlea ekdom sobit fuddaracher tumchi nodor dovrat. Oxem kelear, “xantin bhorta to Dev tumche sovem astolo.” (Filp. 4:9) Fuddlea lekhant, kotthin poristhitincho fuddo kortat tea bhav-bhoinnank Devachi xanti mellonk ami koxi modot korunk zata, tea vixim ami polloum-ia.