Zhuz Ani Hinvsa Munis Kabar Korunk Xokta Kai?
Zhuzam zaite karonnank lagon zatat. Udharonnak, sorkar bodlunk, arthik ani somajik poristhiti sudharunk vo dusreanchi zomin tabeant korunk. Toxench, soimbant mellttat teo vostu zoxem, hire, kollso, tel, bhangar ani osleo her vostu tabeant korunk. Tea bhair, zaitim zhuzam zat-kat ani dhormank lagon zatat. Him zhuzam thambounk ani xanti haddunk munxam zaito proitn kortat. Punn tankam ies mellonk xokta kai?
Drazen_/E+ via Getty Images
ARTHIK PORISTHITI SUDHARUNK
Dhei: Ho zhuzam zavpacho ek mukhel karonn. Tor sogleank boreo suvidha mellttoli tednanch gorib ani girestam modem aslolo ontor kabar zaunk xokta.
Oddchonn: Sorkar jea toren aplo poiso khorch korta tantunt tankam bodol korcho poddttolo. 2022 heach vorsak pollounk gelear sonvsarbhor xanti samballunk ani lokanchem jivit sudharunk sumar 2,65,000 korodd rupea khorch kelʼlo. Punn teach vorsak foujek kelʼlo khorch sor kelear, xanti samballunk kelʼlo khorch khub unno asa mhunn kollon ieta, tem mhunnttlear fokot 0.4 tokʼke.
“Zhuz thambounk ani xanti samballunk jitlo poiso ani sadhonam uzar kortat tachea poros chodd poiso ani sadhonam zhuzam korunk uzar kortat.”—António Guterres, secretary-general of the United Nations.
Bible kitem sangta? Sonvsarantle sorkar ani songottnneo goribank modot korunk xoktat, punn tim sonvsarbhor asloli goribi purnn toren kednach kaddun uddounk xokchimnant.—Dusri Somurt 15:11; Matev 26:11.
SORKARAMNIM EKA-MEKAK SOMZON GHEVOP
Dhei: Des eka-meka sangata xantin uloun sogleank faido zata tosle nirnnoi gheunk, jea vorvim tanchea modem zhogddim zainastana oddchonn suttavo zatolo.
Oddchonn: Soglim raxttram eka-mekachem aikonk vo eka mud’deacher ek chintop dovrunk toiar zainant. Ani xanti korunk tharav ghetlear pasun te tim rokddich moddttat.
“Xanti samballunk je proitn raxttram kortat te iesosvi zainant. Karonn zhuz sompounk tanchem modem keloli koblat faideachi asona ani oslea koblatik lagon thodde pavtti zhuzam anikui vaddttat.”—Raymond F. Smith, American Diplomacy.
Bible kitem sangta? Lokamnim “xanti” samballunk proitn korunk zai. (Stotr 34:14) Punn aiz pollounk gelear choddso lok “ovisvaxi, . . . koslea-i vixoi-acher kobul zainant tosle, . . . ghatki” asat. (2 Timotak 3:1-4) Tea pasot promannik rajki fuddari pasun zhogddim suttavi korunk xokonant.
ZHUZANCHEA HOTʼTEARAM VIXIM
Dhei: Hotʼtearam, khas korun zaka lagon khub lok mortat, tim unnim vo kabar korop.
Oddchonn: Choddxe des hotʼtearam unnim vo kabar korunk toiar zainant. Karonn oxem kelʼlean tancho des oskot zatolo ani dusrea desan tancher akromonn kelear aplea desachi rakhonn korunk xokchenant mhunn tankam bhirant dista. Ani soglim hotʼtearam kabar kelear pasun zhuzachem mull karonn te kaddunk xokonant.
“1991-ant cold war somplem tednam zaitea raxttramnim, aplim hotʼtearam nas kortolim, vhodd-vhodd dhoke unne korunk goroz tim pavlam ghetolim ani raxttram modem zhuzam sompounk vavurtolim mhunn utor dilʼlem. Sonvsar surokxit zalolo tankam zai aslem, punn zaitea sorkaramnim apnnem dilʼlem utor samballunk na.” —“Securing Our Common Future: An Agenda for Disarmament.”
Bible Kitem Sangta? Lokamnim hotʼtearam uzar korop soddun diunk zai. Tache bodlek, tannim “apleo tolvari moddun zotam” korunk zai. (Izaias 2:4) Punn itlench kelear puro nhoi karonn hinvsa korpachim bhavnam munxachea kallzantlean bhair sortat.—Matev 15:19.
RAXTTRAM MODEM EKVOTT
Dhei: Ek des thoddea her desa sangata ixttagot korun koblat korta. Hea vorvim dusrim raxttram tancher holʼlo kelear, tanchi vangddi raxttram ektthaim zaun dusman desacher zhuz kortolim.
Oddchonn: Zaitea raxttramnim ixttagot korun koblat kelear pasun, dusman raxttr bhieun tancher zhuz korchench na oxem sangonk zaina. Tea bhair, jea raxttramnim ixttagot korun koblat kelʼlea, tim uprant dilʼlem utor samballunk fattim sortat. Toxench, dusmanancher kednam ani koso holʼlo korcho tem tim tharaunk xokonant.
“League of Nations ani uprant United Nations hea songottnen raxttram modem ekvottkai haddunk zaito proitn kelo. Torui tanche modem zatat tim zhuzam addaunk teo xokleonant.”—“Encyclopedia Britannica.”
Bible Kitem Sangta? Choddxe pavtt, lok ekvottan mellon kam kortat tednam porinnam boro zata. (Upodexok 4:12) Munxan keloleo songottneo vo sorkaram amkam sasnak togta tosli xanti ani surokxa diunk xokonant. Karonn Bible-ant mhunnttlam: “Razkarbhariancher visvas dovrum naka, osokt soimbachea monxacher patieun ravum naka: Tuka soddounk taka tank na! Prann soddlo mhonnttoch, to babddo dhulʼlintlo ailʼlo dhulʼlint portun veta; teach vellar soglleo tacheo manddnnio fiskottun geleo!”—Stotr 146:3, 4.
Zaitim raxttram xanti haddunk zaito proitn kelearui zhuzam kabaruch zainant.