OBHEASACHO LEKH 36
GIT 103 Gonvlli—Jehovachem Dennem
‘Vhoddilank Apoiat’
“Tannem sobhechea vhoddilank apounchem.”—JAK. 5:14.
MUKHEL MUDʼDO
Amkam goroz asta tednam vhoddilank kiteak apounk zai?
1. Aplim menddram apleak moladik mhunn Jehovan koxem dakhoilam?
JEHOVACHIM menddram taka ekdom moladik asat. Tannem tankam Jezuchem rogot varoun viktim ghetleant. Ani tanchi kallji gheunk sobhent vhoddil nemleat. (D.I. 20:28) Jehovan Jezuk sobhecho mukheli nemla. Tor vhoddilamnim doiall toren hea menddranchi kallji ghetloli Jehovak ani Jezuk zai. Ani vhoddil Jezuchem nirdexon pallun hea menddrank Jehova sangata ek lagxilʼli ixttagot samballunk modot kortat.—Iz. 32:1, 2.
2. Jehova khas korun konnanchi khub kallji gheta? (Ezekiel 34:15, 16)
2 Jehova aplea soglea sevokanchi, ani khas korun aplea sangata ixttagot oskot zalea tanchi khub kallji gheta. Chuki keleat tankam vhoddilam udexim to modot korta. (Ezekiel 34:15, 16 vachat.) Punn ami sogleamnim goroz tednam modot ghetloli Jehovak zai. Tor ami kallzant thaun magnnem korchea borabor, tannem sobhent “gonvlli ani xikxok” mhunn nemleat tanchi pasun modot ghetloli taka zai.—Ef. 4:11, 12.
3. Jehova vhoddilank koso uzar korta tem zannam zalolean amkam sogleank koso faido zata?
3 Aplea sangata zanchi ixttagot oskot zalea tankam modot korunk Jehova vhoddilank koso uzar korta tem ami polloum-ia. Tor ami vhoddilank kednam ani kiteak apounk zai, ani te amkam koxe modot kortat tem zannam zaum-ia. Sodʼdheak Jehova sangata amchi ixttagot ghott asot ani amkam vhoddilanchea modotichi goroz na oxem disot. Punn Jehova jea toren vhoddilank uzar korta tea pasot upkariponn vaddounk ani goroz tednam tanchi modot gheunk kitem korunk zai tem zannam zaunk ho lekh amkam modot kortolo.
AMI KEDNAM ‘VHODDILANK APOUNK’ ZAI?
4. Jakob 5:14-16, 19, 20-ant Jehova sangata zanchi ixttagot piddʼddear zalea tanchea vixim sanglam mhunn koxem kolltta? (Chitram pasun polloiat.)
4 Amkam modot korunk Jehova vhoddilank koso uzar korta tem Jakoban somzailem. Tannem boroilem: “Tumchea modem konnui duent asa kai? Tor, tannem sobhechea vhoddilank apounche.” (Jakob 5:14-16, 19, 20 vachat.) Tea duent munxan eka dotorak nhoi, punn sobhechea vhoddilank apounchem mhunn Jakoban sanglem. Hantuntlean Jehova sangata ixttagot piddʼddear zalʼlea eka munxa vixim to uloitalo mhunn kolltta. Vhoddilanchi modot gheun tea munxak tachea patkanchem bhogsonnem melltta tednam, to eka orthan boro zata mhunn Jakoban sanglem. Jehova sangata ixttagot oskot zalʼlo munis, bholaiken boro naslolea munxa sarko asa. Ho munis boro zatolo zalear tannem dotorak mellonk zai, apnnak kitem zata tem sangonk zai ani dotor jem sangta tem korunk zai. Teach bhaxen, Jehova sangata ixttagot oskot zalʼlea munxan eka vhoddilak mellonk zai, aplea poristhiti vixim sangonk zai ani to Bible-antlean zo solʼlo dita tea pormonnem kam korunk zai.
Duent astat tednam ami dotora lagim voitat tea bhaxen, Jehova sangata amchi ixttagot oskot zalea mhunn kolltta tednam ami vhoddilanchi modot gheunk zai (Peregraf 4 polloiat)
5. Jehova sangata amchi ixttagot oskot zaunk laglea kai na tem amkam koxem kollttolem?
5 Tor Jehova sangata amchi ixttagot oskot zaunk laglea oxem amkam dista zalear, vhoddilanchi modot gheunk Jakob odheai 5-ant amkam urba dilea. Ami Jehovachi maniotai hogddaunchea poilim oxem korop ekdom gorjechem! Udharonnak, Jehova sangata amchi ixttagot oskot zalea astoli, punn ti ghott asa oxem ami chintʼtat zait. Punn oxem chintlear ami svotakuch fosoitolim mhunn Bible xittkaita. (Jak. 1:22) Sardis sobhentlea thoddea Kristanvank oxench ghoddlem. Tea pasot tim jem kortalim tem Jehovak manvona mhunn Jezun spoxttponnim tankam sanglem. (Prok. 3:1, 2) Tor Jehova sangata amchi ixttagot ghott asa kai na tem amkam koxem kollttolem? Hem zannam zaunk ek vatt mhunnttlear, bautizm ghetlolo tednam amkam Jehova vixim koxem bhogtalem ani atam amkam koxem bhogta tem ami sor korun pollounk zai. (Prok. 2:4, 5) Ami amkanch vicharunk zata: ‘Bible vachunk ani tacher bariksannen niallunk mhoji umed unni zalea kai? Hanv mittingechea soglea bhagam pasot toiari kortam kai, ani chukonastana mittingenk hajir zatam kai? Porgottnni korunk mhaka poilim bhaxen urba asa kai vo mhaka monoronjonak chodd vell sarunk borem dista? Hanv soglo vell poixeam vixinch chintʼtam kai?’ Jehova sangata amchi ixttagot oskot zalea mhunn amkam kolltta zalear, ti ghott korunk ami panvlam gheunk zai. Ani ami svota zaun ti ghott korunk xokonant vo ami Jehovak manvona toxem kitem kelam zalear, ami vhoddilanchi modot gheunk zai. Na zalear, Jehova sangata amchi ixttagot piddʼddear zatoli.
6. Gombhir patok adarlam tannem kitem korunk zai?
6 Thoddim patkam itlim gombhir astat ki ek munis poschatap korina zalear taka sobhentlean bhair kaddunk xoktat. (1 Kor. 5:11-13) Ami gombhir patok adarlam zalear tea vixim ami eka vhoddilak sangonk zai. Karonn gombhir patok adarta to svota zaun Jehova sangata apli ixttagot porot ghott korunk xokona. Tor soddvonne vorvim Jehovachem bhogsonnem mellonk tannem “poschatap kela mhunn dakhoitat toslim kamam” korunk zai. (D.I. 26:20) Ani hantuntlem ek kam mhunnttlear, tannem aplea patka vixim eka vhoddilak sangonk zai.
7. Anik konnem vhoddilanchi modot gheunk zai?
7 Fokot gombhir patok adarlam tankanch nhoi, punn Jehova lagim ixttagot oskot zalʼleank pasun vhoddil modot kortat. (D.I. 20:35) Udharonnak, tumchean vaitt anvddeam add zhuzonk zaunchem na oxem tumkam dista zait. Karonn Kristanv zaunchea poilim ghoddie tumi drugs ghetalim, pornography polloitalim, vo onoitik jivit jietalim. Punn hea karonnank lagon vhoddilanchi modot gheunk fattim soronakat. Tumkam ulounk sompem zatolem toslea eka vhoddila lagim uloiat. To tumchem kan diun aikotolo, tumi kitem korunk zata tem sangtolo ani vaitt anvdde nakarun tumi Jehovak khuxal korunk zata mhunn khatri ditolo. (Up. 4:12) Tumi vaitt anvddeam add zhuzot asat dekhun tumi niraxi zaleant zait. Oslea vellar vhoddil tumchea ugddasak haddttole ki tumi vhoddilam lagim modot maglea dekhun Jehova khuxal asa. Karonn tumi khalti asat ani Jehovak khuxal korunk sodhtat mhunn hem dakhoun dita.—1 Kor. 10:12.
8. Ami dor eke chuki vixim vhoddilank sangonk zai kai? Somzaiat.
8 Punn ami dor eke chuki vixim vhoddilank sangonk zai oxem nhoi. Zoxem ami eka bhavak vo bhoinnik dukhoilam zait, vo tanche lagim khub ragan uloileant zait. Hea vixim eka vhoddilak sangchea bodlek, ami poilim Jezucho solʼlo apnnaun tea bhav vo bhoinni lagim uloun bhogsonnem magonk zai. (Mt. 5:23, 24) Toxench, ami prokaxonamnim movallai, pasiens ani svotacher tabo dovrop hea gunnam vixim sodh korunk zata ani te anikui vaddounk vavr korunk zata. Punn oxem kelea uprant pasun amchea modem xanti zaina zalear, ami eka vhoddilachi modot gheunk tharait. Hea vixim amkam Euodia ani Sintike-chem udharonn asa. Tanchea modem zalʼlo vad-vivad suttavo zainaslo tednam, apostl Paulun sobhentlea eka bhavak tankam adar korunk sanglem. Oxech toren ek vhoddil amkam-i modot korunk xokta.—Filp. 4:2, 3.
AMI VHODDILANK KITEAK APOUNK ZAI?
9. Ami kelʼlea patkam vixim amkam loz dista zalear pasun ami tea vixim vhoddilank kiteak sangonk zai? (Mhonnʼnneo 28:13)
9 Ami gombhir patok adarlam zalear vo Jehova sangata amchi ixttagot oskot zata oxem amkam dista zalear, tea vixim vhoddilank sangonk amkam bhavarth ani dhirachi goroz poddttoli. Lojek lagon ami tanche lagim ulounk fattim sorchem nhoi karonn Jehovan tankam amkam modot korchi zobabdari dilea. Tor vhoddilam lagim uloun amkam Jehovacher visvas asa, ami tacheo adnea pallttat ani sarkem tem korunk amkam tachi modot zai mhunn ami dakhoitat. (St. 94:18) Tor ami kelʼlea patka vixim ami vhoddilank sangtat ani tem patok korchem soddun ditat tednam Jehova amkam bhogxitolo mhunn ami khatri dovrunk zata.—Mhonnʼnneo 28:13 vachat.
10. Amchim patkam lipounk proitn kelear kitem zaunk xokta?
10 Punn ami vhoddilanchi modot ghenant zalear, amche tras anikui vaddttole. Raza Davidak pasun oxench zalem. Tannem aplim patkam lipounk proitn kelo tednam to khub niraxi zalo. Ani apnnem Jehovachi maniotai hogddailea mhunn zannam zaun taka khont bhogli. (St. 32:3-5) Zoxem eka duensacho ilaz korunk ami jitlo chodd vell ghetolim, titlech amkam anikui tras zatole. Teach bhaxen, ami kelʼlea gombhir patka vixim vhoddilank sangonk ami vell kaddttat zalear amkam chodd tras zatole. Punn Jehovak oxem zalʼlem naka. Tea pasot to amkam “ulon polleum-ia” mhunn sangta. Tem mhunnttlear, vhoddilanchi modot gheunk sangta. Hea vorvim ami porot tachim ixttam zaunk pavtolim.—Iz. 1:5, 6, 18.
11. Ami gombhir patkam vixim vhoddilank sangonant zalear anik kitem zaunk xokta?
11 Toxench, amchim gombhir patkam lipoilear dusreancher tacho probhav poddonk xokta. Zoxem, sobhecher Jehova apli povitr xokti ghalchona, ani amkam lagon bhav-bhoinnam modem asloli xanti piddʼddear zatoli. (Ef. 4:30) Punn sobhent anik konnem gombhir patok kelam mhunn amkam kolltta zalear kitem? Ami taka tea vixim vhoddilam lagim ulounk sangonk zai.a Punn to toxem korina zalear, ami vhoddilank kollounk zai. Na zalear, ami pasun guneanvkari zatolim. (Lev. 5:1) Ami Jehovacho mog kortat dekhun tea vixim vhoddilank sangtolim. Ani oxem kelʼlean sobhentlea bhav-bhoinnanchi rakhonn zatoli, toxench patok kelam taka Jehova sangata porot ixttagot zoddunk ami modot korunk pavtolim.
VHODDIL AMKAM KOXE MODOT KORTAT?
12. Zanchi ixttagot Jehova lagim oskot zalea tankam vhoddil koxe modot kortat?
12 Zanchi ixttagot Jehova lagim oskot zalea tankam vhoddilamnim modot korchi mhunn Bible-ant sanglam. (1 Tes. 5:14) Tumi patok kelam zalear tumchim chintnam ani bhavnam zannam zaunk vhoddil prosn vicharit. (Mho. 20:5) Tumchea sobhavak, sonskrutaiek, vo lojek lagon vo her koslea-i karonnank lagon tumkam vhoddilam lagim ulounk kotthin zait. Punn toxem korunk fattim soronakat. Tumi kitem-i chukichem uloit mhunn bhienakat. (Job 6:3) Karonn bexttich tumchi nit korchea bodlek, vhoddil tumchi poristhiti bore bhaxen somzonk proitn kortole ani soglem zannam zalea uprantuch tumkam Bible-antlean solʼlo ditole. (Mho. 18:13) Toxench patok kelam taka modot korunk vell lagta mhunn vhoddil ugddas dovortat. Tea pasot te tumkam eka poros chodd pavtti mellonk xoktat.
13. Vhoddil magnnem kortat ani Bible-antlean solʼlo ditat tantuntlean amkam koso faido zata? (Chitram pasun polloiat.)
13 Vhoddil tumkam mellttole tednam te tumchea ghaveacher mitt ghalchenant. Punn te tumchea pasot magnnem kortole. Ani tanchea magnneak “khub xokti asta,” jea vorvim tumi chintunk pasun xokonant titli tumkam bhuzvonn ani ghottai mellttoli. Toxench te tumkam ‘Jehovachea nanvan tel pasun laitole.’ (Jak. 5:14-16) Hem “tel” Devachea Utrantlem sot zaun asa. Tumche poristhitik lagu zatat toslim versam uzar korun te tumkam bhuzvonn ditole, ani Jehova sangata tumchi ixttagot porot ghott korunk modot kortole. (Iz. 57:18) Te ditat tea Bible-antlea solʼleam vorvim Jehovak manvota tem korunk tumcho nichov ghott zatolo. Ani tanchea vorvim Jehova tumkam oxem sangta tem tumi aikotolim: “Hich ti vatt, tech vatten cholun voch.”—Iz. 30:21.
Vhoddil Bible uzar korun amkam bhuzvonn ani urba ditat (Peregraf 13-14 polloiat)
14. “Chukichem panvl” ghetlam tankam vhoddil koxe modot kortat? (Galasiekarank 6:1) (Chitram pasun polloiat.)
14 Galasiekarank 6:1 vachat. Ek “chukichem panvl” gheta to Kristanv, ghoddie ek chukicho nirnnoi gheit vo ek gombhir patok adarit. Oxem korta to Kristanv Devachea nitivont dorjeam add voita. Punn vhoddil tea munxacho mog kortat dekhun, te taka ‘movallaien sudharcho proitn kortat.’ ‘Movallaien sudharcho proitn korop,’ hea utrak jem Grik utor uzar kelʼlem, tem ek dotor eka munxachem moddlolem hadd sarkea zagear bosoita taka sor korunk zata. Tea munxak anik dukh zaina zaunk to dotor dhean diun tem hadd sarkea zagear bosoita tea toren, chukichem panvl gheta tea munxachem dukh vaddoinastana, vhoddil taka mogan modot korunk proitn kortat. Toxench, hea versant vhoddilank “svotacher nodor dovrunk” pasun sanglam. Tor vhoddil konnakui Bible-antlean solʼlo ditat tednam, apunn pasun chuktat mhunn te sodanch ugddas dovortat. Tor te zankam modot kortat, tanchea poros apunn bore asat oxem chintina zaunk te khub chotrai dovortat. Tor te khalti astat ani tea munxak doia-maia dakhoitat.—1 Ped. 3:8.
15. Amkam kosli-i oddchonn asa zalear ami kitem korunk zata?
15 Ami sobhentlea vhoddilancher visvas dovrunk zata. Karonn ami tankam jem sangtat tem dusreank sangona zaunk Jehovan tankam proxikxonn dilam. Toxench tankam sarkem dista tem nhoi, punn Bible-antlean solʼlo diunk ani amchea oddchonneancho fuddo korunk modot korit ravonk, Jehovan tankam xikoileat. (Mho. 11:13; Gal. 6:2) Vhoddilank veg-veglle gunn astat ani thoddeank heram poros chodd onnbhov asta tem khorem. Punn ami amchea oddchonneam vixim khoinchea-i eka vhoddilak vochon sangonk zata. Punn ami hem ugddas dovrop mhotvachem: Amkam aikonk zai toch solʼlo amkam mellosor, ami veg-vegllea vhoddilam lagim solʼlo magcho nhoi. Ami oxem kortat zalear, ami oslea munxam sarkim zatolim jim ‘apleak aikonk zai tosleoch vostu aikonk’ sodhtat ani Devachi “bori xikounn” nakartat. (2 Tim. 4:3) Tor ami eka vhoddilak amchea oddchonneam vixim sangtat tednam, hea vixim ami dusrea vhoddilam lagim uloileant kai ani tannim amkam kitem solʼlo dila tem to vicharit. Ani to khalti asa dekhun to dusrea eka vhoddilachi modot gheit.—Mho. 13:10.
AMCHI DOR EKLEACHI ZOBABDARI
16. Amkam dor ekleak kitem zobabdari asa?
16 Jehovachea menddranchi kallji ghevop vhoddilanchi zobabdari tem khorem. Punn ami koslo nirnnoi gheuncho zai tem vhoddil sangchenant. Tachea bodlek, Bible uzar korun tea vixoi-acher Jehovachem chintop kitem asa tem somzonk te amkam modot kortole, ani svotacho nirnnoi gheunk tem amcher soddttole. Ami tanche solʼle apnnaitat tednam ami “chintpachi tank” uzar korunk xiktolim ani bore nirnnoi gheunk pavtolim. (Heb. 5:14) Hem kiteak mhotvachem? Jehovak manvota toslem jivit jieunk amchi dor ekleachi zobabdari zaun asa. Ami jem kitem kortat ani uloitat tacho ami Jehovak hixob diuncho poddttolo. Punn Jehovache modotin ami taka visvaxi ravonk zata.—Rom. 14:12.
17. Ami koslo ghott nichov korunk zai?
17 Jehovachim menddram asop amkam ek moladik sueog zaun asa! Jehovan amchea pasot Jezu Krist, zo “boro gonvlli” zaun asa taka dhaddlo. Ani amkam sasnachem jivit mellonk Jezun aplo jiv bolidan kelo. (Ju. 10:11) Toxench amkam sobhent vhoddil diun Jehovan apli hi bhas purnn kelea: “Mhojea mona pormannem choltat tosle gonvlli Hanv tumkam ditolom: te tumkam zannvaien ani vivekan choroitole.” (Jer. 3:15) Tor Jehova sangata amchi ixttagot oskot vo piddʼddear zalea zalear, ami vhoddilanchi modot gheunk fattim sorchem nhoi. Jehovache he manddavollicho purnn faido gheunk ami ghott nichov korum-ia!
GIT 31 Deva Sangata Cholom-ia
a Gombhir patok adarlam tea munxan aplea patka vixim vhoddilank sangonk, taka favo to vell diat. Punn to toxem korina zalear, Jehovak visvaxi ravonk tumi vhoddilank sangonk zai.