Tras Sosunk Jobachem Pustok Amkam Modot Korunk Xokta

1-2. Ami Jobachem pustok vachop kiteak borem?

TUMI hea disamnim Jobachem pustok vachlam kai? Tem sumar 3,500 vorsam poilim boroilʼlem. Punn tem boreantlea-borea pustokam modlem ek, oxem zaito lok mhunntta. Toxench tem somzonk sompem asa, ani kallzak lagta tea toren boroilam dekhun, zaito lok tachea boroupeak vakhanntta. Hem pustok Moizesan boroilʼlem tem khorem, punn tem borounk Jehova Devan taka uzar kelo. Tor Jehova tacho khoro Boroupi zaun asa.—2 Tim. 3:16.

² Jobachem pustok Bible-antlem ek mhotvachem pustok zaun asa. Karonn devdutamnim ani soglea munxamnim ek mhotvacho nirnnoi gheunk zai mhunn tantuntlean kolltta. To mhunnttlear, tim Jehova ani tachea nanvacho mog kortat dekhun tachi seva korunk vinchun kaddttolim vo na. Toxench, tantunt amkam Jehovachea sobit gunnam vixim kolltta. Zoxem tacho mog, neai, zannvai ani xokti. Udharonnak, Bible-antlea her khoinchea-i pustoka poros, Jobachea pustokant sogleam-von chodd pavtti Jehovak “Sorvpodvedar” mhunnttla. Tea bhair, Devan azun poriant kiteak dukh-tras kaddunk nant, ani lokanchea monant aslole her mhotvachea prosnanche zobab amkam hea pustokant mellttat.

3. Jobachea pustoka thaun ami kitem zannam zaunk xoktat?

³ Dongrachea tengxer ravon bhonvtonnim asa tem soglem amkam bore toren dixtti poddtta tea bhaxen, Jobachem pustok vachlolean amche dukh-tras Jehovache nodren pollounk amkam modot zata. Tor trasancho fuddo kortana Jobachem pustok amkam koxem modot korunk xokta tem hea lekhant polloum-ia. Toxench, Jobache ghoddnne thaun Izraelitkarank koso faido zaunk xoktalo, ani aiz amkam koso faido zaunk xokta tem-ui polloum-ia. Tea bhair hem pustok uzar korun ami dusreank koxi modot korunk xoktat tem-ui zannam zaum-ia.

DEVAN JOBACHER TRAS IEUNK DILE

4. Ejipttant ravpi Izraelitkaram ani Joba modem kitem ontor aslo?

⁴ Izraelitkaram Ejipttant gulamam aslim tednam, Job Uz desant ravtalo. Ho des Bhasailʼlea Desachea udente vatten ani Arabiachea utʼtore vatten aslo zait. Tea vellar thoddim Izraelitkaram khottea devanchi bhokti kortalim. Punn Job visvaxiponnan Jehovachi seva kortalo. (Josh. 24:14; Ez. 20:8) Tea pasot, Jehovan tachea vixim oxem mhunnttlem: “Tache oslo sonvsarant anink konnuch na.”a (Job 1:8) Job khub girest aslo ani Udentecho lok taka sogleam-von chodd man ditalo. (Job 1:3) Tor Job visvaxiponnan Jehovachi seva korta tem polloun Soitan khub ragar zala astolo nhoi!

5. Jehovan Jobacher tras kiteak ieunk dile? (Job 1:20-22; 2:9, 10)

⁵ Jobak tras sosunk poddlear, to Jehovachi bhokti korop bond kortolo mhunn Soitanan arop ghatlo. (Job 1:7-11; 2:2-5) Tednam Jehovan Soitanak to sangta tem khorem asa mhunn puravo diunk sanglem. Jehova Jobacho khub mog kortalo. Torui tannem tacher tras ieunk dile. (Job 1:12-19; 2:6-8) Soitanan Jobache sogle hindd kabar kele, tachea dha-ui bhurgeank jivexim marlim, ani tacher ek bhirankull duens haddlem. Tem mhunnttlear, tache akʼkhe kuddik sosunk zaina tosle fodd ieum-xe kele. Punn itle tras ailear pasun, Job Jehovak ovisvaxi zaunk na. (Job 1:20-22; 2:9, 10 vachat.) Vell soron gelo toso, Jehovan porot taka bori bholaiki, girestkai ani anik dha bhurgim dilim. Toxench, lok porot Jobak man diunk laglo. Tea bhair Jehovan taka ek lamb jivit dilem. To anik 140 vorsam jielo ani apleo char pillgeo pasun pollounk xoklo. (Job 42:10-13, 16) Tor Jobachea ghoddnnentlean Izraelitkarank koso faido zaunk xoktalo ani amkam aiz koso faido zaunk xokta?

6. Jobachea ghoddnnentlean Izraelitkarank koso faido zatolo aslo? (Chitr pasun polloiat.)

⁶ Izraelitkarank koso faido zaunk xoktalo? Ejipttant Izraelitkaranchem jivit sompem naslem. Zoxem, Joshua ani Kalebak aplem akʼkhem tornattponn gulam mhunn jieunk poddlem. Ani tanchi kainch chuk nastana, tankam 40 vorsam oronnʼnneant sarunk poddlim. Tor tea kalla voilea Izraelitkarank ani tanche fuddle pillgenk, Jobachea ghoddnnentlean zaito faido mellonk xoktalo. Zoxem, tancher ietat te tras Deva koddlean nhoi, punn Soitana koddlean asat hem tankam kollttolem aslem. Toxench, Dev tancher dukh-tras kiteak ieunk dita hem-ui tim zannam zatolim aslim. Ani kotthin aslear pasun apleak visvaxi ravtat tancho Jehova mog korta ani tankam inam ditolo mhunn tim zannam zatolim aslim.

7-8. Tras sostoleank Jobachea pustokantlean koxi modot zaunk xokta? Ek onnbhov sangat.

⁷ Amkam koso faido zaunk xokta? Borea lokank kiteak vaitt ghoddtta tem aiz zaiteank khobor na dekhun, tannim Devacher patievop bond kelam. Hea vixim amkam Rwanda-nt ravpi Hazel-achob onnbhov asa. Tem lhan aslem tednam, Dev asa mhunn patietalem. Punn uprant tachea jivitant vaitt ghoddnneo ghoddleo. Tachea avoi-bapaicho divors zalo ani tachi avoi dusrea dadlea lagim kazar zali. To Hazel-a sangata krur toren vagtalo. Toxench tornattponnar, eka dadlean tacho bolotkar kelo. Tor Hazel bhuzvonn mellonk tem bhokti kortalem tea zagear gelem. Punn taka bhuzvonn mellonk na. Uprant tannem Devak oxi chitt boroili: “Deva, hanvem tuje lagim magnnem kelem, hanvem borim kamam korunk proitn kelo. Punn tunvem mhojer tras haddle. Atam hanv tuka soddun ditam ani mhaka jem avoddtta tench kortolem.” Tor Hazel-a bhaxen zaiteank, Dev tancher tras dhaddtta oxem dista. Oslea lokanche amkam churchure distat nhoi?

⁸ Jobachea pustoka thaun ami xiklim ki amcher ietat tea trasancho zobabdar Dev nhoi punn Soitan zaun asa, ani adim kelʼlea patkank lagon lokancher tras ietat oxem ami mhunnonk zaina. Karonn Bible sangta ki ‘vell ani sondhi sogleank asa vo chintunk nant tosleo ghoddnneo konnakui ghoddonk xoktat.’ (Up. 9:11; Job 4:1, 8) Toxench, ami visvaxiponnan Jehovachi seva korit ravlear, Soitan fottkiro mhunn dakhounk ami Jehovak sondhi ditat mhunn amkam kollʼllem. (Job 2:4; Mho. 27:11) Tor ami Bible-antlean him sotam xikleant dekhun ami khub upkari asat nhoi! Hachea voilean ami ani amchim mogachim kiteak tras sostat tachem khorem karonn amkam kollʼllem. Hazel uprant Jehovachea Sakxeam sangata Bible xikonk laglem ani Devan tacher tras dhaddunk nant mhunn taka kollʼllem. Tem mhunntta: “Hanvem Jehova lagim porot kallzantlean magnnem korun taka sanglem ki mhaka taka soddun diunk naka. Tachi vollokh nasli mhunn hanvem poilim toxem mhunnttlolem. Punn to mhozo mog korta mhunn atam mhaka kollʼllem, ani hanv khub khuxal asam.” Tor amcher ietat te tras Dev kiteak addaina hem zannam zaun ami kitlim upkari asat nhoi! Tor trasanchea vellar Jobachea pustoka thaun amkam dor ekleak koso faido zaunk xokta tem atam polloum-ia.

JOBACHEA GHODDNNE THAUN AMI SOSNIKAI DAKHOUNK KOXIM XIKTAT?

9. Jobachi poristhiti koxi asli? (Jakob 5:11)

⁹ Jobacher tras ailʼle tednam, tachi poristhiti koxi asli tem tumchea dolleam mukhar haddat. To gobrant boslolo ani tache akʼkhe kuddik fodd ailole, zaka lagon taka sosunk zaina titli dukh zatali. Tachi kat ekdom kalli zalʼli ani to samko barik zalʼlo. Tachea lagim kitench korunk boll naslem. To matiechea aidonache kuddke gheun aple ghai khorpitalo ani apleak kitli dukh zata tea vixim gunngunnttalo. Tor oxem disot ki Job fokot tras sosun dis kaddttalo. Punn khorem mhunnttlear, to sosnikai dakhoitalo. (Jakob 5:11 vachat.) Oxem korunk taka koxi modot zali?

10. Jehova sangata Jobachi lagxilʼli ixttagot asli mhunn koxem kolltta? Somzaiat.

¹⁰ Apleak koxem bhogta tem Joban ukteponnim Jehovak sanglem. (Job 10:1, 2; 16:20) Zoxem Job odheai 3-ant sanglam ki tacher ailʼlea trasank lagon tachea monant asloli koddsann tannem bhair kaddli. Karonn tacher ietat te dukh-tras Jehova koddlean ietat oxem taka distalem. Toxench tachea chukink lagon Dev taka xikxa dita mhunn tache tin ixtt taka porot-porot sangtale tednam, aplo kainch guneanv na oxem to mhunnttalo. Tachea utram vorvim oxem dison ietalem ki thoddea vella pasot apunn Deva poros chodd nitivont mhunn tannem chintlem. (Job 10:1-3; 32:1, 2; 35:1, 2) Punn thodde pavtti tannem oxem-i sanglem ki tachim “utram khor-khos” zaun asat. (Job 6:3, 26, NW) Punn uprant odheai 31-ant, apleak zobab di ani apli kainch chuk na mhunn dakhoun di, oxem tannem Jehovak sanglem. (Job 31:35) Punn tannem oxem korop sarkem naslem. Apleacher dukh-tras kiteak aileat tem Devan apleak sangonkuch zai oxem mhunnop sarkem naslem.

11. Jehova Joba sangata koso vaglo?

¹¹ Job jea toren Jehova lagim uloilo tachea voilean Jehova sangata tachi ixttagot ghott asli, ani Jehova sarko neai kortolo mhunn taka purnn visvas aslo mhunn kolltta. Uprant, eka vadolla vorvim Jehova Joba lagim uloilo. Punn tacher tras kiteak aileat tem Jehovan taka sangonk na, ani tachea utrank lagon taka khastui lavunk na. Punn ek mogall bapai bhaxen taka somzailo. Ani oxem korop sarkem zaun aslem. Karonn apleak zaiteo vostu khobor nant mhunn Joban uprant khaltikaien manun ghetlem, ani apunn chintinastana uloilo mhunn taka dukh bhogli. (Job 31:6; 40:4, 5; 42:1-6) Tor hea ghoddnnentlean Izraelitkarank koxi modot zatoli asli ani amkam koxi modot zata?

12. Jobachea udharonnantlean Izraelitkarank koso faido zalo astolo?

¹² Izraelitkarank koso faido zaunk xoktalo? Jobachea ghoddnne thaun xikonk mellttalim tim lisanvam Izraelitkaramnim apnnailʼlim zalear tankam faido zatolo aslo. Moizesa vixim chintat. Jehovan taka Izraelacho fuddari nemlolo. Punn ti zobabdari samballop sompem naslem. Karonn oxem kortana taka zaitea oddchonneancho ani niraxiponnacho fuddo korunk poddlo. Tras ietale tednam Izraelitkaram gunngunnttalim ani Jehovachea add voitalim. Punn Moizes modoti pasot Jehovacher patietalo. (Sutt. 16:6-8; Lok. 11:10-14; 14:1-4, 11; 16:41, 49; 17:5) Torui eka vellar oxem korunk to chuklo. Udharonnak, Izraelitkaram oronnʼnneant provas kortana tim Kadeshant aslim tednam ghoddie 40-avea vorsak, Moizes ‘utavollaien vo chintinastana uloilo.’ Ani tannem Jehovak mhoima diunk na. (St. 106:32, 33) Hea pasot Jehovan taka Bhasailʼlea Desant vochonk diunk na. (D.S. 32:50-52) Jehovan Moizesak xist dili tednam taka khub vaitt dislem zait, punn tannem ti khaltikaien manun ghetli. Jobachea ghoddnnecher niall kelʼlean Izraelitkaranchea fuddlea pillgenk pasun faido zalo astolo. Tem mhunnttlear, trasanchea vellar sosnikai dakhounk, Jehova lagim ukteponnim ulounk, tim Jehova poros chodd nitivont nhoi mhunn ugddas dovrunk, ani xist melltta tednam ti khaltikaien manun gheunk tankam modot zali astoli.

13. Sosnikai dakhounk amkam Jobachem pustok koxem modot korunk xokta? (Hebrevank 10:36)

¹³ Amkam koso faido zaunk xokta? Ami kotthin vellar jietat dekhun amkam-i sosnikai dakhounchi poddtta. (Hebrevank 10:36 vachat.) Ghoddie ami duent asot vo amkam chodd usko zait vo depression asot vo amchea familint oddchonneo asot vo amcho mogacho bhair poddla zait vo ami eke vhodd oddchonnecho fuddo kortat zait. Ani oslea vellar konnui amkam utramnim vo korneamnim dukhoita tednam, sosnikai dakhounk amkam anikui kotthin zait. (Mho. 12:18) Punn Jobachea pustoka thaun amkam xikonk melltta ki amkam koxem bhogta tem ami ukteponnim Jehovak sangonk zata ani to amchem aikotolo mhunn khatri dovrunk zata. (1 Ju. 5:14) Ani kednam-i ami ‘khor-khos utram vo chintinastana uloilear,’ to ragar zaunchona. Tachea bodlek, sosnikai dakhounk to amkam ghottai ani zannvai ditolo. (2 It. 16:9; Jak. 1:5) Toxench aplem Utor Bible, Bible adarit prokaxonam, vhoddil vo amchea ixttam vorvim Jehova amchem chintop nittaier haddunk modot korit. (Heb. 12:5-7) Joba bhaxen ami khaltikaien tem apnnaitat tednam amkam faido zata. (2 Kor. 13:11) Khorench, Jobachem pustok amkam khub faideak poddtta. Hem pustok uzar korun ami dusreank koxi modot korunk zata tem atam polloum-ia.

DUSREANK MODOT KORUNK JOBACHEM PUSTOK UZAR KORAT

14. Dukh-tras kiteak asat tem somzaunk ek vatt khoinchi?

¹⁴ ‘Aiz sonvsarant dukh-tras kiteak asat,’ oxem tumkam konnem-i porgottnnent vicharlam kai? Hoi zalear, tumi taka kitem zobab dila? Tumi ghoddie Eden bagent kitem zalʼlem tem taka sanglem astolem. Tem mhunnttlear Soitan, zo ek noxtto dut zaun asa tannem poilea zoddpeak, mhunnche Adanv ani Evek Devachea add vochonk uksailim, ani tim Devachea add gelim dekhun sonvsarant dukh-tras ani moronn ailem mhunn sanglem astolem. (Ut. 3:1-6; Rom. 5:12) Ani xevottak, Soitanan sanglolem tem fott mhunn dakhounk ani beginuch apunn munxank poripurnn kortolo hi bori khobor sogleank kollounk Devan vell ghetla mhunn sanglem astolem. (Prok. 21:3, 4) Hea toren somzavop ek bori vatt zaun asa ani tumkam bore porinnam mellonk xoktat.

15. Dukh-tras kiteak asat hacho zobab diunk ami Jobachem pustok koxem uzar korunk zata? (Chitram pasun polloiat.)

¹⁵ Ami anik eke vatten, dukh-tras kiteak asat tem lokank somzaunk zata. Ami tankam Joba vixim sangonk zata. Oxem korunk ami poilim, aiknnarean ek boro prosn vicharlo mhunn sangon taka xabaski diunk zata. Uprant ami sangonk zata ki Job nanvacho ek munis zo Devak visvaxi aslo, taka pasun khub tras sosunk poddlole ani tannem-i osloch prosn vicharlolo. Toxench Devan tacher tras dhaddleat oxem taka dislem. (Job 7:17-21) Hem sanglolean, khub temp poilim jielʼlea munxankui hoch prosn aslo mhunn zannam zaun aiknnareak borem disot. Uprant ami sangonk zata ki Jobacher Devan nhoi, punn Soitanan tras haddlole mhunn Jobachea pustokantlean kolltta. Ani magir Soitanan toxem kiteak kelem tem somzaunk zata. Tem mhunnttlear, Dev munxank sogleo boreo vostu dita dekhun tim tachim seva kortat ani tras ailear tim tachi bhokti korop soddun ditolim mhunn Soitanan arop ghatlolo. Hea karonnak lagon Devan Jobacher tras ieunk dile. Punn tea trasam pasot Dev zobabdar naslo. Tor Devak munxancher visvas asa ani apleak visvaxi ravon Soitan fotting mhunn dakhounk to tankam ek sondhi dita mhunn ami sangonk zata. Xevottak, Job visvaxi ravlolean taka koslim besanvam mellʼllim tem somzaunk zata. Oxe toren ami taka khatri diunk zata ki amchea trasam pasot Dev zobabdar na.

16. Trasancho fuddo kortat tankam Jobachem pustok koxem modot korunk xokta? Ek onnbhov sangat.

¹⁶ Jobachea pustokantlean Mario-k koxi modot zali tem polloum-ia. 2021-ant, ek bhoinn fona udexim porgottnni kortali. Ticho poilo fon Mario-k laglo. Tinnem taka ek vers dakhoun, Dev amchim magnnim aikota ani to fuddarak bori poristhiti haddttolo mhunn somzailem, ani Mario tea vixim kitem chintʼta mhunn vicharlem. Mario-n sanglem ki tinnem fon korchea poilim to aplo jiv diunk chintʼtalo. Tannem sanglem, “Hanv Devacher patietam, punn taka mhoji porva na oxem aiz sokallim mhojea monant ailem.” Bhoinnin taka dusre pavtti fon kelo tednam Jobachea trasam vixim sanglem. Tor Mario-n Jobachem akʼkhem pustok vachunk tharailem. Tea pasot, bhoinnin taka jw.org-acher aslolea, Novo Sonvsar Bhaxantor Bible-achem link dhaddlem. Hacho porinnam kitem zalo? Mario-n Bible obheas suru kelo ani aplo mog kortolea ani kallji ghetolea Deva vixim anik zannam zaunk to khuxal aslo.

17. Jobachem pustok Bible-acho bhag asa mhunn ami Jehovak kiteak upkari asat? (Job 34:12)

¹⁷ Khorench, Devachea Utrak lokanchem jivit bodlunk ani tras sostoleank bhuzvonn diunk khub xokti asa. (Heb. 4:12) Jehovan Joba vixim aplea Utrant boroun dovorlem mhunn ami kitlim upkari asat nhoi! (Job 19:23, 24) Hem pustok vachlolean amkam khatri melltta ki “khoreponnim, Dev kednanch vaitt korina.” (Job 34:12 vachat.) Toxench, Devan dukh-tras kiteak kaddunk nant ani tras ietat tednam sosnikai koxi dakhounk zata tem amkam kolltta. Tea bhair, tras sostoleank koxi bhuzvonn diunk zata tem ami xiktat. Tor dusreank solʼlo ditana hem pustok amkam koxem modot korunk xokta tem fuddlea lekhant polloum-ia.