થેસ્સાલોનિકીઓને પહેલો પત્ર

૩ જ્યારે અમે* તમારા વગર રહી ન શક્યા, ત્યારે અમે નક્કી કર્યું કે ભલે અમે એથેન્સમાં એકલા રોકાઈએ,+ ૨ પણ આપણા ભાઈ તિમોથીને+ તમારી પાસે મોકલીએ, જે ઈશ્વરનો સેવક* છે અને ખ્રિસ્ત વિશેની ખુશખબર ફેલાવે છે. અમે ચાહતા હતા કે તે તમારી શ્રદ્ધા મક્કમ કરવા તમને દૃઢ કરે અને તમને દિલાસો આપે, ૩ જેથી આ સતાવણીઓને લીધે કોઈ ડગે નહિ.* તમે જાણો છો કે આવી સતાવણીઓ આપણે ટાળી શકતા નથી.*+ ૪ અમે તમારી સાથે હતા ત્યારે, તમને કહેતા હતા કે આપણા પર સતાવણીઓ આવશે અને તમે જાણો છો કે એવું જ થયું છે.+ ૫ એટલે જ્યારે મારાથી રહેવાયું નહિ, ત્યારે તમારી શ્રદ્ધા અડગ છે કે નહિ, એ વિશે જાણવા મેં તિમોથીને મોકલ્યો.+ કેમ કે મને ડર હતો કે શેતાને*+ કદાચ તમને લલચાવ્યા હોય અને અમારી મહેનત પર પાણી ફરી વળ્યું હોય.

૬ તિમોથી તમારા ત્યાંથી હમણાં જ પાછો આવ્યો છે.+ તે તમારી અડગ શ્રદ્ધા અને તમારા પ્રેમ વિશે સારી ખબર લાવ્યો છે. તેણે અમને જણાવ્યું કે તમે હંમેશાં અમને પ્રેમથી યાદ કરો છો અને જેમ અમે તમને જોવાની ઝંખના રાખીએ છીએ, તેમ તમે પણ અમને જોવાની ઝંખના રાખો છો. ૭ ભાઈઓ, તમારા લીધે અને તમે બતાવેલી શ્રદ્ધાને લીધે અમને અમારી બધી વિપત્તિઓમાં* અને સતાવણીઓમાં દિલાસો મળ્યો છે.+ ૮ તમે માલિક ઈસુના પક્ષમાં અડગ ઊભા છો, એ જાણીને અમારા જીવનમાં તાજગી આવી છે.* ૯ તમે અમને ઘણા ખુશ કર્યા છે, એટલે અમે ઈશ્વરનો ખૂબ આભાર માનીએ છીએ. ૧૦ અમે રાત-દિવસ પૂરા દિલથી કાલાવાલા કરીએ છીએ કે અમે તમને મળીએ* અને તમારી શ્રદ્ધા મજબૂત કરવા તમને જરૂરી મદદ પૂરી પાડીએ.*+

૧૧ અમારી પ્રાર્થના છે કે ઈશ્વર આપણા પિતા અને તેમની સાથે આપણા માલિક ઈસુ કોઈ રસ્તો કાઢે, જેથી અમે તમારી પાસે આવી શકીએ. ૧૨ અમે ચાહીએ છીએ કે માલિક ઈસુ તમારો પ્રેમ વધારે. જેમ અમને તમારા માટે પ્રેમ છે, તેમ એકબીજા માટે અને બધા માટે તમારો પ્રેમ વધતો ને વધતો જાય.+ ૧૩ આમ, આપણા માલિક ઈસુ પોતાના સર્વ પવિત્ર જનો સાથે હાજર* થાય ત્યારે,+ ઈશ્વર આપણા પિતા આગળ તે તમારું હૃદય મજબૂત કરે તેમજ તમને પવિત્ર અને નિર્દોષ ઠરાવે.+