યર્મિયા
૧૯ યહોવા કહે છે: “કુંભાર પાસે જા અને માટીનો કુંજો ખરીદી લાવ.+ લોકોમાંથી અને યાજકોમાંથી અમુક વડીલોને લઈને ૨ હિન્નોમની ખીણમાં*+ આવેલા કુંભારના દરવાજે જા. હું તને જે સંદેશો જણાવું એ ત્યાં જાહેર કર. ૩ તું તેઓને કહેજે, ‘યહૂદાના રાજાઓ અને યરૂશાલેમના રહેવાસીઓ, યહોવાનો સંદેશો સાંભળો. ઇઝરાયેલના ઈશ્વર, સૈન્યોના ઈશ્વર યહોવા કહે છે:
“‘“હું આ શહેર પર આફત લાવવાનો છું. એ વિશે જે કોઈ સાંભળશે તેને આઘાત લાગશે.* ૪ તેઓએ મને છોડી દીધો છે.+ તેઓએ આ જગ્યાને એવી કરી મૂકી છે કે ઓળખાતી નથી.+ તેઓ એવા દેવોને બલિદાનો ચઢાવે છે, જેને તેઓ કે તેઓના બાપદાદાઓ કે યહૂદાના રાજાઓ જાણતા ન હતા. અહીં તેઓએ નિર્દોષ લોકોના લોહીની નદીઓ વહેવડાવી છે.+ ૫ તેઓએ બઆલ માટે ભક્તિ-સ્થળો બાંધ્યાં છે, જેથી પોતાના દીકરાઓને અગ્નિ-અર્પણ તરીકે આગમાં હોમી શકે.+ મેં તેઓને એવું કરવાનું કહ્યું ન હતું કે આજ્ઞા આપી ન હતી, મારા દિલમાં એવો વિચાર પણ આવ્યો ન હતો.”’+
૬ “‘યહોવા કહે છે, “જુઓ, એવા દિવસો આવી રહ્યા છે, જ્યારે આ જગ્યાને તોફેથ* કે હિન્નોમની ખીણ નહિ, પણ કતલની ખીણ કહેવામાં આવશે.+ ૭ હું આ જગ્યાએ યહૂદા અને યરૂશાલેમની બધી યોજનાઓ ઊંધી વાળીશ. હું તેઓને દુશ્મનોની તલવારને હવાલે કરીશ. તેઓનો જીવ લેવા જેઓ તરસે છે, તેઓના હાથમાં સોંપીશ. હું તેઓનાં મડદાં પક્ષીઓને અને પ્રાણીઓને ખોરાક તરીકે આપીશ.+ ૮ હું આ શહેરના એવા હાલ કરીશ કે લોકો જોઈને ધ્રૂજી ઊઠશે. એની મજાક ઉડાવવા લોકો સીટી મારશે. ત્યાંથી પસાર થનાર એકેએક માણસ ચોંકી જશે અને એના પર આવેલી આફતો જોઈને સીટી મારશે.+ ૯ તેઓનો જીવ લેવા માંગતા લોકો અને બીજા દુશ્મનો તેઓને સકંજામાં લેશે, તેઓને ઘેરી લેશે. એ ઘેરો એટલો સખત હશે કે તેઓએ પોતાનાં દીકરા-દીકરીઓનું અને બીજા માણસોનું માંસ ખાવું પડશે.”’+
૧૦ “પછી તારી સાથે આવેલા માણસોના દેખતાં તું એ કુંજો તોડી નાખ. ૧૧ તેઓને કહે, ‘સૈન્યોના ઈશ્વર યહોવા કહે છે: “જેમ કોઈ માણસ માટીનું વાસણ તોડી નાખે અને પછી એ જોડી શકાતું નથી, તેમ હું આ લોકોને અને આ શહેરને તોડી નાખીશ. તેઓ તોફેથમાં એટલાં બધાં મડદાં દાટશે કે જગ્યા ખૂટી પડશે.”’+
૧૨ “યહોવા કહે છે, ‘હું આ જગ્યા અને એના રહેવાસીઓના એવા હાલ કરીશ કે આ શહેર તોફેથ જેવું બની જશે. ૧૩ યરૂશાલેમનાં ઘરો અને યહૂદાના રાજાનાં ઘરો તોફેથ+ જેવા અશુદ્ધ બની જશે. એ બધાં ઘરો અશુદ્ધ થઈ જશે, જેની છત પર તેઓ આકાશનાં સૈન્યોને બલિદાનો ચઢાવતા હતા+ અને બીજા દેવોને દ્રાક્ષદારૂ-અર્પણો ચઢાવતા હતા.’”+
૧૪ યર્મિયા તોફેથથી પાછો આવ્યો, જ્યાં યહોવાએ તેને ભવિષ્યવાણી કરવા મોકલ્યો હતો. તે યહોવાના મંદિરના આંગણામાં ઊભો રહ્યો અને લોકોને કહ્યું: ૧૫ “ઇઝરાયેલના ઈશ્વર, સૈન્યોના ઈશ્વર યહોવા કહે છે, ‘મેં કહ્યું હતું તેમ હું આ શહેર અને એનાં નગરો પર આફતો લાવું છું, કેમ કે તેઓએ અડિયલ બનીને* મારું સાંભળવાની ના પાડી છે.’”+