રાજ્યની ખુશખબર ફેલાવવા અમે કેવી ગોઠવણ કરીએ છીએ?

ઈસુએ પોતાના મરણના થોડા જ સમય પહેલાં જણાવ્યું હતું: ‘સર્વ પ્રજાઓને સાક્ષીરૂપ થવા માટે રાજ્યની આ ખુશખબર આખા જગતમાં પ્રગટ કરાશે અને ત્યારે જ અંત આવશે.’ (માથ્થી ૨૪:૧૪) પરંતુ, આખી દુનિયામાં આ ખુશખબર કઈ રીતે ફેલાશે? ઈસુ ધરતી પર હતા ત્યારે તેમણે જે દાખલો બેસાડ્યો એ પ્રમાણે કરવાથી.—લુક ૮:૧.

લોકોને તેઓના ઘરે મળવાનો અમે પ્રયત્ન કરીએ છીએ. ઈસુએ પોતાના શિષ્યોને ઘરે ઘરે જઈને ખુશખબર ફેલાવવાની તાલીમ આપી હતી. (માથ્થી ૧૦:૧૧-૧૩; પ્રેરિતોનાં કૃત્યો ૫:૪૨; ૨૦:૨૦) પહેલી સદીના એ શિષ્યોને કહેવામાં આવ્યું હતું કે તેઓએ ક્યાં પ્રચાર કરવો જોઈએ. (માથ્થી ૧૦:૫, ૬) એવી જ રીતે, આજે અમારા પ્રચાર કાર્ય માટે યોગ્ય ગોઠવણ કરવામાં આવી છે. દરેક મંડળને જણાવવામાં આવે છે કે તેઓ ક્યાં પ્રચાર કરશે. એનાથી અમે ઈસુની આ આજ્ઞા પાળી શકીએ છીએ: “લોકોને ઉપદેશ કરો” અને સારી રીતે “સાક્ષી આપો.”—પ્રેરિતોનાં કૃત્યો ૧૦:૪૨.

બધી જગ્યાએ લોકોને મળવાનો અમે પ્રયત્ન કરીએ છીએ. ઈસુએ દરિયાકાંઠે અને ગામના કૂવા જેવી જાહેર જગ્યાઓએ પણ લોકોને પ્રચાર કરીને દાખલો બેસાડ્યો. (માર્ક ૪:૧; યોહાન ૪:૫-૧૫) અમે પણ લોકો મળે ત્યાં તેઓ સાથે બાઇબલ વિશે વાત કરીએ છીએ. જેમ કે, રસ્તા પર, વેપાર-ધંધાની જગ્યાઓએ, બાગ-બગીચામાં અથવા ફોન પર. અમને યોગ્ય તક મળે ત્યારે પાડોશીઓ, સાથે કામ કરનારા, સાથે ભણતા વિદ્યાર્થીઓ અને સગાં-વહાલાંને પણ ખુશખબર જણાવીએ છીએ. આવા પ્રયત્નોને લીધે લાખો-કરોડો લોકો ‘તારણʼની ખુશખબર સાંભળી શક્યા છે.—ગીતશાસ્ત્ર ૯૬:૨.

ઈશ્વરના રાજ્યની ખુશખબર લોકોને સુંદર ભાવિની આશા આપે છે. શું તમારા ધ્યાનમાં કોઈ છે, જેમને તમે એ ખુશખબર જણાવી શકો? આ સંદેશો પોતાના પૂરતો જ ન રાખો. જેમ બને તેમ જલદી જ બીજાઓને જણાવો!

• કઈ ‘ખુશખબર’ ફેલાવવી જ જોઈએ?

• યહોવાના સાક્ષીઓ કઈ રીતે ઈસુની જેમ પ્રચાર કરે છે?