શું સાબ્બાથના દિવસે સારું કામ કરી શકાય?

ગાલીલના જોરદાર સેવાકાર્ય દરમિયાન, ઈસુએ ઘણું બધું કર્યું હતું. જોકે, ઈસુએ કહ્યું: “ઈશ્વરના રાજ્યની ખુશખબર મારે બીજાં શહેરોમાં પણ જણાવવી જોઈએ.” એ વખતે તેમના મનમાં ગાલીલ સિવાય બીજા વિસ્તારો પણ હતા. તેથી, તે “યહુદિયાનાં સભાસ્થાનોમાં પ્રચાર કરતા ગયા.” (લુક ૪:૪૩, ૪૪) એ સારો સમય હતો, કેમ કે હમણાં વસંત ૠતુ હતી અને યરૂશાલેમમાં પાસ્ખાનો તહેવાર પાસે આવતો હતો.

ઈસુએ ગાલીલમાં કરેલા જોરદાર સેવાકાર્યની સરખામણીમાં યહુદિયાના સેવાકાર્ય વિશે ખુશખબરનાં પુસ્તકોમાં ઓછી માહિતી મળે છે. યહુદિયાના લોકો બહુ સાંભળતા ન હતા. તોપણ, ઈસુ બધી જગ્યાએ પૂરી ધગશથી પ્રચારકાર્ય અને સારાં કામો કરતા રહ્યા.

ઈસવીસન ૩૧ના પાસ્ખાના તહેવાર માટે, ઈસુ જલદી જ યહુદિયાના મુખ્ય શહેર યરૂશાલેમ તરફ આગળ વધ્યા. યરૂશાલેમમાં મેંઢાભાગળ પાસેના ભીડભાડવાળા વિસ્તારમાં, બેથઝાથા નામનો પરસાળવાળો એક મોટો કુંડ હતો. બીમાર, આંધળા અને લૂલા હોય એવા ઘણા લોકો આ કુંડ પાસે આવતા. શા માટે? એવું માનવામાં આવતું કે પાણી હલાવવામાં આવે ત્યારે, કુંડમાં ઊતરવાથી લોકો સાજા થઈ શકે છે.

હવે સાબ્બાથનો દિવસ હતો. ઈસુએ આ કુંડ પાસે ૩૮ વર્ષથી બીમાર એક માણસને જોયો. ઈસુએ તેને કહ્યું: “શું તું સાજો થવા ચાહે છે?” માણસે જવાબ આપ્યો: “સાહેબ, જ્યારે પાણી હલાવવામાં આવે છે, ત્યારે મને કુંડમાં ઉતારવા માટે કોઈ હોતું નથી; અને હજુ હું કુંડમાં ઊતરવા જાઉં, એટલામાં બીજું કોઈ મારી આગળ ઊતરી જાય છે.”—યોહાન ૫:૬, ૭.

ઈસુએ હવે જે કહ્યું એ સાંભળીને બીમાર માણસ અને આસપાસના લોકોને પણ ચોક્કસ નવાઈ લાગી હશે: “ઊભો થા! તારી પથારી ઉપાડીને ચાલ.” (યોહાન ૫:૮) તે માણસે એમ જ કર્યું. તે તરત જ સાજો થઈને પોતાની પથારી ઉઠાવીને ચાલવા લાગ્યો!

એ બનાવથી ખુશ થવાને બદલે, યહુદીઓએ એ માણસને જોઈને તેની ટીકા કરતા કહ્યું: “આજે સાબ્બાથ છે અને નિયમ પ્રમાણે તારે પથારી ઊંચકવી ન જોઈએ.” માણસે તેઓને જવાબ આપ્યો: “જેમણે મને સાજો કર્યો છે, તેમણે જ મને કહ્યું, ‘તારી પથારી ઉપાડીને ચાલ.’” (યોહાન ૫:૧૦, ૧૧) એ યહુદીઓ સાબ્બાથના દિવસે સાજા કરનાર વિશે વાંધાવચકા કાઢવા લાગ્યા.

તેઓને જાણવું હતું કે, ‘એ માણસ કોણ છે જેણે કહ્યું, “પથારી ઉપાડીને ચાલ”?’ તેઓએ કેમ એવો સવાલ પૂછ્યો? “ઈસુ ત્યાં ટોળામાં ભળી ગયા હતા” અને સાજા થયેલા માણસને તેમનું નામ ખબર ન હતી. (યોહાન ૫:૧૨, ૧૩) પણ, એ માણસને ફરીથી ઈસુનો ભેટો થયો. પછીથી, સાજો થયેલો માણસ મંદિરમાં ઈસુને મળ્યો અને તેને ખબર પડી કે કુંડ પાસે પોતાને સાજા કરનાર કોણ હતા.

સાજો થયેલો માણસ યહુદીઓને મળ્યો, જેઓએ તેના સાજા થવા વિશે પૂછ્યું હતું. તેણે જણાવ્યું કે તે ઈસુ હતા. એ જાણીને યહુદીઓ ઈસુ પાસે ગયા. શું તેઓને એ જાણવું હતું કે ઈસુએ એવાં જોરદાર કામો કઈ રીતે કર્યાં? ના. પણ, ઈસુ સાબ્બાથના દિવસે સારાં કામ કરતા હતા, એ માટે વાંક કાઢવા ગયા હતા. તેઓએ ઈસુને સતાવવાનું પણ શરૂ કર્યું.