દાઉદ અને ગોલ્યાથ

યહોવાએ શમુએલને કહ્યું: ‘યિશાઈના ઘરે જા. તેનો એક દીકરો ઇઝરાયેલનો નવો રાજા બનશે.’ એટલે શમુએલ યિશાઈના ઘરે ગયા. યિશાઈના સૌથી મોટા દીકરાને જોઈને શમુએલને લાગ્યું: ‘યહોવાએ ચોક્કસ આ યુવાનને પસંદ કર્યો હશે.’ પણ યહોવાએ શમુએલને જણાવ્યું: ‘મેં તેને પસંદ કર્યો નથી. હું ફક્ત માણસનો બહારનો દેખાવ નહિ પણ તેનું દિલ જોઉં છું.’

યિશાઈ પોતાના બીજા છ દીકરાઓને શમુએલ પાસે લાવ્યા. પણ શમુએલે કહ્યું: ‘યહોવાએ આમાંથી કોઈને પણ પસંદ કર્યો નથી. શું તમારો હજુ કોઈ દીકરો છે?’ યિશાઈએ કહ્યું: ‘હા, હજુ મારો એક સૌથી નાનો દીકરો છે. તેનું નામ દાઉદ છે. તે મારાં ઘેટાં ચરાવવાં ગયો છે.’ દાઉદ ઘરે આવ્યો ત્યારે, યહોવાએ શમુએલને કહ્યું: ‘મેં તેને પસંદ કર્યો છે.’ શમુએલે દાઉદના માથા પર તેલ રેડીને અભિષેક કર્યો, જેથી તે આગળ જતાં ઇઝરાયેલનો રાજા બને.

થોડા સમય પછી, ઇઝરાયેલીઓ અને પલિસ્તીઓ વચ્ચે લડાઈ શરૂ થવાની હતી. પલિસ્તીઓનો એક સૈનિક હતો, જે બહુ કદાવર હતો. તેનું નામ ગોલ્યાથ હતું. તે દરરોજ ઇઝરાયેલીઓની મશ્કરી કરતો હતો. તે બૂમો પાડીને કહેતો: ‘મારી સામે લડવા એક માણસને મોકલો. જો તે જીતી જશે, તો અમે તમારા ગુલામ બની જઈશું. પણ જો હું જીતી જઈશ, તો તમે અમારા ગુલામ બની જશો.’

દાઉદના ભાઈઓ સૈનિકો હતા. દાઉદ પોતાના ભાઈઓ માટે ખાવાનું લઈને ઇઝરાયેલીઓની છાવણીમાં ગયો. તેણે ગોલ્યાથની વાત સાંભળી અને કહ્યું: ‘હું તેની સાથે લડીશ.’ પણ શાઉલ રાજાએ કહ્યું: ‘તું તો હજુ નાનો છે.’ દાઉદે કહ્યું: ‘યહોવા મારી મદદ કરશે.’

શાઉલે પોતાનું બખ્તર અને હથિયાર દાઉદને આપ્યાં, પણ દાઉદે કહ્યું: ‘આ બધું લઈને હું લડી નહિ શકું.’ દાઉદે પોતાની ગોફણ લીધી અને નદી પાસે ગયો. ત્યાં તેણે પાંચ સુંવાળા પથ્થર લીધા અને પોતાની થેલીમાં મૂક્યા. પછી તે ગોલ્યાથ સામે ગયો. ગોલ્યાથે બૂમ પાડીને કહ્યું: ‘ઓ છોકરા, અહીં આવ. હું તને મારી નાખીશ. પછી પક્ષીઓ અને જંગલી જાનવરો સામે નાખી દઈશ.’ પણ દાઉદ ડર્યો નહિ. તેણે પણ બૂમ પાડીને કહ્યું: ‘તું મારી સામે તલવાર અને ભાલો લઈને આવે છે, પણ હું યહોવાના નામે આવું છું. તું અમારી સામે નહિ પણ ઈશ્વર સામે લડી રહ્યો છે. અહીંયા જેટલા પણ લોકો છે, એ બધા જોશે કે યહોવા તલવાર અને ભાલા કરતાં પણ વધારે શક્તિશાળી છે. યહોવા તમને બધાને અમારા હાથમાં સોંપી દેશે.’

દાઉદે પોતાની ગોફણમાં એક પથ્થર મૂક્યો અને એને જોરથી વીંઝીને ફેંક્યો. પથ્થર સીધો ગોલ્યાથના કપાળમાં ઘૂસી ગયો. એમ થવા પાછળ યહોવાનો હાથ હતો. ગોલ્યાથ ત્યાં જ જમીન પર પડીને મરી ગયો. એ જોઈને પલિસ્તીઓ પોતાનો જીવ બચાવવા ભાગવા લાગ્યા. શું તમે દાઉદની જેમ યહોવા પર ભરોસો રાખો છો?