Palajatka karaloʼuta Samuel
5 Namaʼanapa na filisteokana tü kojon shiyaawasekat süpansaajünüin pütchi nümaa chi shiimainshikai suluʼu Maleiwain, nalüʼüjain shia suluʼujee tü mmakat Ebenézer suluʼumüin tü mmakat Asdod. 2 Shiasaʼa yalejee nalüʼüjaka na filisteokana tü kojonkot suluʼumüin tü miichi eere nuʼwaajünüin chi namaleiwase kanüliakai Dagón, neʼitaaka shia süʼütpaʼa tü niyaakuakat Dagón. 3 Nachijiraaka wattachon maalü na wayuu kepiakana suluʼu tü mmakat Asdod, woyotoko napüla niyaakua Dagón. Ojutuusü shia sümülatuʼu tü kojon shiyaawasekat süpansaajünüin pütchi nümaa Jehová. Nayaleraka shia jee neʼitaain shia süchikuaʼa eejatüle shia. 4 Natamaaka nachikuaʼa wattachon maalü, woyotokoloko napüla niyaakua Dagón sümülatuʼu tü kojon shiyaawasekat süpansaajünüin pütchi nümaa Jehová. Nousütaka soʼuluʼu tü miichikat nikii Dagón jee tü piamasükat najapü, achotooushisü shia. Nnojotpejeʼe jamajüin atumawaa tü wane naʼatakat, tü makalü aka saaʼin jime. 5 Nnojoluwaisü süʼliikatüin wayuu soʼu tü miichi eere nuʼwaajünüin Dagón, nnojotsü naʼliikatüin aaʼu tia na sacerdote aʼyataakana nümüin Dagón otta nnojotsü naʼliikatüin aaʼu tia na wayuu antakana suluʼumüin tü aʼwaajülee chakat Asdod. Ayatayülia apülajünüin tia sutuma wayuu.
6 Süsalaka nutuma Jehová na wayuu kepiakana suluʼu tü mmakat Asdod jee na kepiakana pejepünaa sünain. Ayuʼlaasü neiyoʼukiinain na wayuukana tü ayuulii kanüliakat hemorroides. 7 «Nnojotsüsa anain yaale waʼaka tü kojon shiyaawasekat süpansaajünüin pütchi nümaa chi Namaleiwasekai na israelitakana. Müliashiʼiya maʼin waya nutuma jee müliashi maʼin Dagón nutuma, chi wamaleiwasekai», namakalaka na wayuu chajanakana kepiain suluʼu tü mmakat Asdod neʼrapa tü alatakat. 8 Noutkajeʼennakalaka napüshuaʼa naʼlaülajana na filisteokana jee nasakinnaka sünain maa: «¿Kasache waaʼinrajatka süka tü kojon shiyaawasekat süpansaajünüin pütchi nümaa chi Namaleiwasekai na israelitakana?». Nasoutakalaka sünain maa: «Anasü shiʼikajaanüle tia kojonkot suluʼumüin tü mmakat Gat», eʼikajaanüsüjeseʼe shia.
9 Shiasaʼa chapa chayaa tü kojonkot, müliakalaka maʼin nutuma Jehová na wayuu sulujunakana tia mmakat, mmotkalaka maʼin naya. Süsalasü nutuma wayuu maʼleekalia, süsalashi nutuma chira eekai jintülin jee chira eekai miyoʼuin. Shiyuʼlaaka neiyoʼukiinain tü ayuulii kanüliakat hemorroides. 10 Süntinnakalaka tü kojonkot suluʼumüin tü mmakat Ecrón. Wattaka nekiisa na wayuu chajanakana suluʼu tia mmakat neʼraiwaʼaya süntinnüin tü kojonkot. Nawoottookoloko sünain maa: «Antinnüsü wamüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain, antinnüsü shia süpüla woʼutunajanain aaʼin». 11 Noutkajeʼennakalaka napüshuaʼa naʼlaülajana na filisteokana jee namünaka amüin: «Anasüsa jujuʼitirüle yaajee tü kojon shiyaawasekat süpansaajünüin pütchi nümaa chi Namaleiwasekai na israelitakana. Anasü jiiteʼerüle shia süchikuaʼa, ajaʼtteenasa waya outuin». Naküjain tia na wayuukana süka mmoluin maʼin naya seema outaa, jama müliain maʼin naya nutuma chi shiimainshikai suluʼu Maleiwain. 12 Nayasaʼa na wayuu nnojoliikana outuin, ayuʼlaasü neiyoʼukiinain tü ayuulii kanüliakat hemorroides. Müliashii maʼin na wayuu sulujunakana tia pueulokot, watta nekiisa, antüsü shia sirumatuʼumüinreeya.