Apocalipsis
Chi aapiee kajapuluʼukai wane karaloukta joʼuuchon
10 Teʼrakalaka wane aapieekaʼiya pülashi maʼi sünain nüshakatüin iipünaajee eejee Maleiwa. Je nüsheʼin, müsü aka saaʼin wane siruma. Eesü wane kaspolüin iipünaa sünain nikii. Otta nuʼupünaa, müsü aka naaʼin chi kaʼikai. Otta nüsaʼa, müsü aka saaʼin süsaʼa wane miichi eekai miyoʼuin. Chuwatsü maʼi. 2 Eesü wane karaloukta joʼuuchon najapuluʼu awastuushisü. Je tü nüsaʼa nikialuʼujeekat, niʼitaain saaʼu tü palaakat, je tü nüsaʼa nipeʼeruʼujeekat, niʼitaain saaʼu mmakat. 3 Owoorulaashi nia emetut maa aka saaʼin sulonüin wane kannajapüt. Je nuwoorulaapa, atüttaasü wane sütürüla juya akaratshitua. 4 Je taapapa tü sütürülakat juya, anaataashi taya süpüla tashajüinjatüin tü sümakat tü sütürülakat juya. Je wanaa maʼi sümaa tia, taapakalaka wane pütchi chajee iipünaajee sünain maa tamüin: “Nnojo püshajüin tü aküjünüitpakat pümüin sütüma tü sütürülakat juya. Punujulaja süchiki”, müsü.
5 Otta chi aapiee teʼrakai sünain shaʼwatüin saaʼu tü palaakat je saaʼu tü mmakat, niyalerakalaka tü nütüna nikiakat chaa iipünaamüin sünain maa: 6 “Tamüshii paala jia: Alüʼütsü jooluʼu süpüla shikeraajüinjatüin nütüma Maleiwa tü naaʼinrüinjattüjütkalia paala. Tamüsü tüü jümüin nuʼupala Maleiwa chi matüjüinkai ouktaa, chi kakumalakai kasakat süpüshuaʼaya chakat iipünaa, yaakat mmoluʼu, je tü eekat shiroku palaakat. 7 Soʼu tü kaʼi niʼyalajireetkat oʼu konneeta chi waneeshia aapiee isayüikaʼiya, nikeraajeerü chi Maleiwakai süpüshualeʼeya tü kasa naaʼinreetüjütkalia, maa aka nüküjüin paala namüin na nünüikimaajanakana, tü nnojotkat ayaawatünüin aaʼu sütüma wayuu”, nümakalaka chi aapieekai.
8 Taapakalaka joo tü pütchikat süchikua chajee iipünaajee, tü taapakat paala, sünain maa tamüin: “Puʼuna nünainmüin chi aapieekai shaʼwatakai saaʼu tü palaakat je tü mmakat, süpüla paapaainjatüin tü karaloukta jutatakat najapuluʼu”, müsü tamüin.
9 Toʼunakalaka nünainmüin chi aapieekai sünain tachuntüin nümüin tü karaloukta joʼuuchonkot. Otta chi aapieekai, nümakalaka teʼipajee: “Na, paapaapa, pikapan. Meerü aka saaʼin mapa shia pikaaiwaʼaya süka püsiain shia. Je pimiralapa shia, ishiraa meerü püleʼeruʼumüin”, nümakalaka tamüin. 10 Taapaakalaka tü karaloukta joʼuuchonkot najapuluʼujee chi aapieekai sünain teküin shia. Püsiasü maʼi shia tekaaiwaʼaya, maa aka saaʼin mapa. Otta temiralapa shia, ishiraa müsü shia taleʼeruʼumüin. 11 Nümakalaka chi aapieekai tamüin: “Anakaja püküjale püchikua süchiki tü naaʼinrüinjateetkat chi Maleiwakai naka na wayuu aluwataanakana natüma napüshua na sülaülashiikana mma saʼakajee eʼirukuukat süpüshua sainküinjee mmakat süpüshua”, nümakalaka tamüin.