Palajatka karaloʼuta Samuel
4 Nüküjawalin Samuel nünüiki Maleiwa namüin napüshuaʼa na israelitakana.
Shiasaʼa soʼunnaa tia, natkaakalaka na israelitakana namaa na filisteokana. Noutkajaaka na israelitakana suluʼu tü mmakat Ebenézer, outkajaashiijeseʼe na filisteokana suluʼu tü mmakat Afec. 2 Noutkajaakalaka na filisteokana süpüla natkaainjanain namaa na israelitakana. Akanajuushiijeseʼe na israelitakana natuma, noʼutakalaka naaʼin maʼaka naaʼin 4.000 israelita. 3 Anuujeseʼe nanüiki na laülaashiikana napüleerua na israelitakana naleʼejapa na surulaatkana: «¿Jamüshii niyüülajakaʼa waya Jehová süpüla nakanajüinjanain waya soʼukai na filisteokana? Anasü wasaajüle suluʼujee tü mmakat Siló tü kojon shiyaawasekat süpansaajünüin pütchi nümaa Jehová. Anasü walüʼüjale shia süpüla nuʼtteʼerüin waya Maleiwa noulia na waʼünüükana». 4 Ajütünüshiijeseʼe waneinnua wayuu suluʼumüin tü mmakat Siló. Nantiraka tü kojon shiyaawasekat süpansaajünüin pütchi nümaa Jehová, chi laülaashikai naaʼu na aapiee chakana iipünaa, chi makai joyotokoi naaʼin naaʼu na querubínkana. Antüshiʼiya na piamashiikana nüchonnii Elí, Hofní nümaa Finehás. Antüshii naya wanaa sümaa süntinnüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain.
5 Naʼwaatayaa namaka napüshuaʼa na israelitakana neʼraiwaʼaya süntinnüin tü kojon shiyaawasekat süpansaajünüin pütchi nümaa Jehová. Emetutsü maʼin nekiisa, akutkujaasü tü mmakat natuma. 6 Anuukalaka nanüiki na filisteokana naapapa shikiisa wayuu: «¿Kasache maka atuma nekiisa na wayuu hebreokana?». Nayaawatapa saaʼu chajatüin namaʼana na israelitakana tü kojon shiyaawasekat süpansaajünüin pütchi nümaa Jehová, 7 mmotkalaka na filisteokana. «Antüshiaʼala maʼin Maleiwa waʼakamüin», müshii. «Aluʼuwatshii waya, eeʼiwalajatü alatüin wamüin wanee kasa makalü aka saaʼin tüü. 8 Aluʼuwatshii waya. ¿Jara akaalinjeenaka waya nuulia chi Maleiwa pülakai maʼin? Watta saalii kasa mojusü nuluwataaka namüin na egipciokana. Nuʼuta aaʼinna watta naalii egipcio chaa isashiipaʼa. 9 Yalayala jaaʼin jia wayuu filisteokana jee toolo jaaʼin. Nnojorüle jaaʼinrüin tia nachepchieena jia na wayuu hebreokana maʼaka jüchepchiain naya. Toolo jaaʼin jee jütkaa namaa». 10 Natkaakalaka na filisteokana jee nakanajuukalaka na israelitakana natuma. Napantajaayaa namaka na israelitakana nepialuʼumüin. 30.000 na surulaat israelita outakana soʼu tia. 11 Sülüʼüjünakalaka natuma na filisteokana tü kojon shiyaawasekat süpansaajünüin pütchi nümaa Maleiwa. Outakalaka Hofní nümaa Finehás, na nüchonniikana Elí.
12 Nüpantajaaka wanee nülüin Benjamín naʼakajee na wayuu atkaakana jee nüntakalaka suluʼumüin tü pueulokot Siló soʼuleʼeya kaʼikat tia. Chatatuasü nüsheʼin jee mmasuasü nikiuuta. 13 Joyotushi Elí sotpaʼa tü wopukot wanaa sümaa nüntüin chia wayuukai. Jiwaʼatüsü naaʼin süchiirua tü kojon shiyaawasekat süpansaajünüin pütchi nümaa chi shiimainshikai suluʼu Maleiwain. Nüntapa chi wayuukai suluʼumüin tü pueulokot jee nüküjapa süchiki tü kasa alatakat, emetutsü maʼin nekiisa na wayuukana. 14 «¿Kasakai alataka?», nümakalaka Elí naapaiwaʼaya shikiisa wayuu. Nuwataakalaka chi wayuukai nünainmüin Elí süpüla nüküjainjatüin nümüin süchiki tü kasa alatakat. 15 Mekietsat shikii mekiisatmüin nuuyase Elí. Chüntüsü neʼe noʼu, jama moʼupaʼain nia. 16 Anuukalaka nünüiki chi wayuukai nümüin Elí: «Chajachi taya sünain tü atkawaakat, aʼluwataashi taya chejee müshijeseʼe tantüichin». «¿Kasakaʼa alatüin tachonchee?», nümakalaka Elí nümüin. 17 Anuukalaka nünüiki chi wayuu pütchimaajachikai nümüin Elí: «Apantajaashii na israelitakana napüleerua na filisteokana, jama nakanajuuin natuma, watta naalii na wayuu outakana. Outushi Hofní nümaa Finehás, na püchonniikana jee alüʼüjünüsü natuma na filisteokana tü kojon shiyaawasekat süpansaajünüin pütchi nümaa chi shiimainshikai suluʼu Maleiwain».
18 Naapapa Elí süchiki sülüʼüjünüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain, oʼnnojooshi nia soʼuluʼu tü miichikat, nüsapükashi nia saaʼujee niinase. Ashataasü nunut jee outakalaka nia, laülaaichi nia sümaa kaüsüin nia. Nekiipüʼüshi Elí na israelitakana soʼu pienchi shikii juya. 19 Jakütüsü maʼin tü nuʼwayuusekat Finehás soʼunnaa tia. Saʼalijaaka sümaa jemeyuluin shia saapaiwaʼaya süchiki sülüʼüjünüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain jee saapaiwaʼaya süchiki outuin chi saüikai nümaa chi suʼwayuusekai. 20 Anuukalaka nanüiki na jieyuu yalajanakana süʼütpaʼa neʼrapa mayein maʼin shia: «Nnojo shapaain paaʼin, jemeyuluitpa pia, toolochon püchon». Nnojotkalaka susoutuin namüin jee nnojotsü jamajatüin sümüin nanüiki. 21 Icabod nünülia sutuma chi süchonkai süka «alüʼüjünüsü tü kasa kojutukalü anainjee Israel», sümüin. Süküjain tia süka sülüʼüjünüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain jee süküjainña tia süka outuin chi saüikai nümaʼaleeya chi suʼwayuusekai. 22 Anuukalaka sünüiki tia wayuukat: «Alüʼüjünüsü tü kasa kojutukalü anainjee Israel, jama sülüʼüjünüin tü kojon shiyaawasekat süpansaajünüin pütchi nümaa chi shiimainshikai suluʼu Maleiwain».