Jueces
15 Kakalia mapa soʼunnaa süshannüin tü trigokat, oʼunushi Sansón sünain anaʼlawaa sümüin tü nuʼwayuusekat jee nülüʼüjakalaka wanee kaaʼulachon. «Ekeroteeshi taya suluʼumüin sukuattase tü taʼwayuusekat», nümakalaka Sansón nümüin chi nüshimiakai. Nnojoipejeʼe nia nikerotireein. 2 «Püʼürülayaasü shia taaʼinruʼu müsüjeseʼe taapüin shia nümüin wanee wayuu eejachikai pümaa sünain tü ekawaakat. Anuʼusa tü shimiiruakat, anasü aaʼinrü shia suulia, anasü shiale puʼwayuusein», nümakalaka chi nüshimiakai nümüin. 3 Anuukalaka nünüiki Sansón: «Nnojotpejeʼe mojuinjatüin nanüiki na filisteokana tamüin sünainjee tü kasa taainjainjatkat namüin».
4 Nuʼunakalaka mapa Sansón jee nütaʼülakalaka 300 walit. Naapaakalaka wanee wunuʼu akoʼojunaka anain wanee kuluulu seitamaajatü, piamakaawasü tü walitkat nutuma sümaa nijittaain tü wunuʼukat sünain süsi. 5 Nuchuwajaakalaka Sansón tü wunuʼukat, nüjütakalaka tü walitkat saʼakamüin napünajüin na filisteokana. Saʼajaakalaka tü trigo ejinnajuushikat sümaʼaleeya tü suuʼuliakat, aʼajaasiaʼaya tü suuʼuliakat uuwa sümaa tü suuʼuliakat olivo.
6 Anuukalaka nanüiki na filisteokana: «¿Jara maka aainjala wamüin yaa?». «Nia kasitka Sansón, chi nüshimiakai chi wayuu chejeʼewaikai Timná. Aapünüsü tü nuʼwayuusekat Sansón nutuma chi nüshimiakai nümüin wanee wayuu eejachikai nümaa sünain ekawaa», namakalaka na wayuukana. Naapaiwaʼaya tia na filisteokana, noʼunakalaka nümaʼanamüin chi nüshimiakai Sansón. Naʼajakalaka nia sümaʼaleeya tü nüchonkat. 7 «Mülejeʼeya jümaʼüla tamüin, nnojoleena jia tooʼulaain juwalaajaleepaʼaya tü jaainjalakat toulia», nümakalaka Sansón namüin. 8 Nüsheʼejakalaka naya, wattaka naalii na wayuu nuʼutakana aaʼin. Nikeroloko suluʼu wanee koʼushii eejatka saʼaka wanee ipairua miyoʼuyuu kanüliakat Etam.
9 Noʼunakalaka mapa na filisteokana suluʼumüin tü mmakat Judá jee noutkajaakalaka chayaa. Ichaataa naya, iseetaa naya müshii naya suluʼupünaa tü mmakat Lehí. 10 Anuukalaka nanüiki na wayuu chejeʼewaliikana Judá namüin na filisteokana: «¿Kasa jüntaka eeʼiree? ¿Kasa waainjalaka juulia?». «Antüshii waya süpüla wataʼülajachin Sansón, wachekajüinjatü nümüin tü naainjalakat», namakalaka na filisteokana. 11 Noʼunakalaka 3.000 wayuu chejeʼewalii Judá eemüin tü koʼushii saʼakakat tü ipa miyoʼuyuu kanüliakat Etam jee nasakirakalaka Sansón sünain maa: «¿Nnojotsükai pütüjaain saaʼu nayain na filisteokana aluwataain waaʼu? ¿Jamüsü makaʼa paainjala wamüin?». Anuujeseʼe nünüiki Sansón namüin: «Shia taainjaka tü naainjakat tamüin». 12 «Antüshii waya süpüla wataʼülajachin pia jee weʼikajaainjachin pia namüin na filisteokana», namakalaka nümüin. Anuujeseʼe nünüiki Sansón namüin: «Jüküja tamüin nnojoleechin jamajüin taya jutuma». 13 «Nnojoleechi woʼutuin aaʼin pia, wataʼüleein neʼe pia süpüla weʼikajaain pia namüin na filisteokana», namakalaka nümüin.
Nejittaainjeseʼe nia süka piamasü jiiku jeketü, nayuʼluin nia suluʼujee tü koʼushiikat jee namaakalaka nia. 14 Talatakalaka maʼin naaʼin na filisteokana sümaa emetuluin maʼin nekiisa neʼraiwaʼaya nüntinnüin Sansón suluʼumüin tü mmakat Lehí. Wanaa sümaa tia, süntakalaka tü nüpülainkat Jehová naaʼu Sansón jee katchinkalaka nia sutuma. Shiasaʼa tü jiiku ejittaanakalü aka nütüna Sansón müsü susokolojookai aaʼin maʼaka susokolojooin sutuma siki wanee jiitpai aainjuushika süka lino jee müsü sururutkai aaʼin tü kachueera eʼitaanakat sünain nütüna. 15 Naapaakalaka Sansón wanee suwalainse püliikü,* nuʼutakalaka saaʼin 1.000 wayuu süka. 16 Anuujeseʼe nünüiki Sansón:
«Toʼuta aaʼinrü wayuu süka suwalainse püliikü..., pachaʼawaka naya tatuma.
Toʼuta aaʼinrü 1.000 wayuu süka suwalainse püliikü».
17 Nujutuinjeseʼe tü suwalainsekat püliikü keraapa nünüiki. Ramat-Lehí nümakalaka sümüin tia mmakat. 18 Wüinñaasükalaka Sansón jee nuchuntakalaka maʼin nümüin Jehová sünain maa: «Pükaalinjain taya süpüla takanajüinjanain wayuukana naainnua. ¿Jamakaʼa piyüülajaka taya süpüla outuinjachin taya sutuma wüinñaasü jee süpüla noʼutuinjachin taaʼin na wayuu manoujainsaliikana pünain?». 19 Eejatkalaka wanee ishi suluʼu tü mmakat Lehí, süparatkalaka wüin nutuma Maleiwa suluʼujee tia ishikat. Sükatchiraaka naaʼin Sansón nüsapa tia wüinkat. En-Hacore nümakalaka Sansón sümüin tia ishikat, ayatayülia müin sünülia tia maaʼulu yaa.
20 Nekiipüʼükalaka Sansón na israelitakana soʼunnaa piama shikii juya nakalioʼu na filisteokana.