Génesis

26 Eekalaka wanee jamü suluʼu tü mmakat süchikijee tü jamü eejatkat soʼu nükalioʼu Abrahán. Akolojooshijeseʼe Isaac suluʼu tü mmakat Guerar eere kepiain Abimélec, chi aluwataakai naaʼu na filisteokana. 2 Niiʼiyataakalaka Jehová nümüin Isaac sümaa nümüin nümüin: «Nnojo puʼunuin Egiptomüin, anashi kepiale pia suluʼu tü mma tajüteechikalü aluʼumüin pia. 3 Ayataʼaya pia sünain oʼonowaa suluʼu mmakat tüü, ayateechiaʼaya eein taya pümaa jee aneerü pukuwaʼipa tatuma. Taapeerü pümüin süpüshuaʼa mmakat tüü jee taapeerü shia namüin na püikeyuukana. Tekeraajeeriaʼaya tü tanüiki taapakat nümüin Abrahán chi püshikai wanaa sümaa tamüin nümüin: 4 ‹Wainmeena maʼin tatuma na püikeyuukana maʼaka tü shüliwala chakat iipünaa, taapeeriaʼaya namüin süpüshuaʼaleeya mmakat tüü. Aneeriaʼaya sukuwaʼipa wayuu maʼleekalia nanainjee na püikeyuukana›. 5 Taaʼinreerü tia süka noonooin Abrahán sümaa tanüiki jee naaʼinrüin tü taluwataakalü anain nia sümaa naapaain sümaa tü pütchi taikaleʼerakalü ekii». 6 Ayatakalaka kepiain Isaac Guerar.

7 «Tashunuu», maʼwaishi Isaac süchiki Rebeca nüsakinnüle natuma na wayuu kepiakana suluʼu mmakat tia, nnojotsü nüküjeein süchiki nuʼwayuusein shia süka mmoluin nia. Anasü aaʼinrü maʼin shia müsüjeseʼe müin nünüiki nüleʼeruʼu: «Suʼuteechi aaʼin taya wayuu kepiaka suluʼu mmakat tüü saaʼujee Rebeca». 8 Shiasaʼa mapa, niirakaaka Abimélec, chi aluwataakai naaʼu na filisteokana suluʼupünaa shiwentaanase nipia, niʼrakalaka Isaac sünain eeʼiyataa saalin tü nuʼwayuusekat nüpüla. 9 Ounejinnaamatüshijeseʼe Isaac nutuma Abimélec jee müshi nia nümüin: «¿Jamüshi ‹tashunuu› pümakaʼa wamüin sümaa puʼwayuusein türa wayuukot?». Asoutushijeseʼe Isaac nümüin: «Mmotshireʼe taya seema toʼutunuin aaʼin saaʼujee». 10 Anuujeseʼe nünüiki Abimélec nümüin: «¿Jamüsü makaʼa paainjala wamüin? Piaje kasitka kaainjarale waya nüinkaale wanee wayuu yaajeʼewai suluʼu tü pueulokot sümaa tü puʼwayuusekat». 11 Nuluwataakalaka joo nünüiki Abimélec sainküin tü pueulokot sünain mma: «Outeechi chi eekai jamajüin atuma Isaac sümaa tü nuʼwayuusekat».

12 Nüpünajakalaka Isaac suluʼu tia mmakat, shiasaʼa soʼu juyakat tia nukotchojokalaka poloo shikii toleeka süchon nüʼttia sünainjee waneesia toleeka waüyee nüpünajaka, müsü nukuwaʼipa süka niʼrüin anaa nutuma Jehová. 13 Wainmakalaka maʼin kasa nümaʼana Isaac jee anasü nukuwaʼipa, washitshaana nia. 14 Wainmakalaka anneerü nümaʼana, paaʼa jee wainma nüchepchia. Naʼürülaaka na filisteokana nooʼomüin saaʼujee tia.

15 Nejinaaka mma na filisteokana suluʼu tü ishi naponolokot na nüchepchiakana Abrahán kataiwaʼaya noʼu. 16 Anuukalaka nünüiki Abimélec nümüin Isaac: «Anashi pükatalaale wattamüin woulia süka wainmaitpain maʼin kasa pümaʼana». 17 Nuʼunakalaka Isaac suluʼujee tü mma kepiakalü aluʼu nia jee noʼonookalaka eekai tü nasapüshii chakat Guerar, kepiakalaka nia chayaa. 18 Nüpotirakalaka Isaac süchikuaʼa tü ishi apotuushikat paala natuma na nüchepchiakana Abrahán, tü ejinaanakalü aluʼu paala mma natuma na filisteokana süchikijee outuin Abrahán. Ayatakaʼaya sünüliain nutuma Isaac tü ishikalüirua tü sünüliatüjütkalia paala nutuma chi nüshikai.

19 Soʼu chajanain naponuin ishi süpaʼa nasapüshii na nüchepchiakana Isaac, antüshii naya sünain wanee ishi kaʼwüiraka wüin jemetüsü. 20 Nayasaʼa na arüleejülii chejeʼewaliikana Guerar, aʼülüjiraashii namaa na arüleejüliikana nümüʼlüin Isaac, müshii naya namüin: «Wasülesa ishikat tüü». Müsüjeseʼe Ésec sümünüin ishikat tia nutuma Isaac süka süʼülüjiraain wayuu saaʼujee nümaa. 21 Apototaashiijaʼa naya wanee ishiʼiya, aʼülüjiraataajaʼa naya saaʼujeʼeya, müsüjeseʼe Sitná sümünüin nutuma Isaac. 22 Noʼunakalaka mapa yalejee jee napotoko wanee ishi eere nantüin, nnojotsü aʼülüjiraanüin aaʼujee shia natuma, Rehobotkalaka sünülia nutuma Isaac sümaa nümüin: «Naapüin wamüin Jehová mma miyoʼu jee wainma waya nutuma suluʼu mmakat tüü».

23 Nuʼunakalaka Isaac chai nukua Beer-Sebamüin, 24 niiʼiyalaaka Jehová nümüin soʼu aikat tia sümaa nümüin nümüin: «Taya chi Nümaleiwasekai Abrahán chi püshikai, nnojo mmoluin pia, eeshi taya pümaa, aneerü pukuwaʼipa tatuma jee watteena naalii püikeyuu tatuma naaʼujee Abrahán, chi tachepchiakai». 25 Nüpaʼawajaaka Isaac ipa chayaa jee nuchuntakalaka nünülia Jehová, nukumajüinjeseʼe chayaa tü nipia aainjuushikat süka loona jee napotokoloko wanee ishi na nüchepchiakana.

26 Nuʼunakalaka Abimélec soʼu wanee kaʼi Guerarjee süpüla nünaʼlaain nümüin Isaac, nia oʼunaka nümaa Ahuzat, chi aküjakai nümüin Abimélec tü anakat süpüla naaʼinrüin jee eejachiaʼaya Ficol nümaa, chi süʼlaülakai nusurulaatse. 27 Asakinnüshiijeseʼe naya nutuma Isaac: «¿Jamüshii jünaʼalaakaʼa tamüin? ¿Nnojoishijasaʼa jüjütüin taya wattamüin süka jüʼürülain taya?». 28 Anuukalaka nanüiki nümüin: «Wayaawata aaʼulu pükaalinjünüin nutuma Jehová, anuukalaka tü waküjeekat pümüin: ‹Anakajaʼa paapüle pünüiki wamüin sümaa waapüin wanüiki pümüin, nnojo piyoutuin süchiki paapüin pünüiki wamüin. 29 Nnojoleena jamajüin waya putuma maʼaka nnojolin jamajüin pia watuma. Soto paaʼin anain pukuwaʼipa watuma waneepia jee wajütüin pia süka anaka akuwaʼipa wamaʼanajee. Piaichipa joo eʼraka anaa nutuma Jehová›». 30 Eekalaka wanee ekawaa nutuma Isaac, ekaashijeseʼe nia namaa. 31 Natamaakalaka waneemüin kaʼi wattaʼa maalü, naapakalaka nanüiki, apütaashiijeseʼe naya nüpüla Isaac, noʼunakalaka süka anaka akuwaʼipa.

32 Nantakalaka na nüchepchiakana Isaac soʼuleʼeya kaʼikat tia jee naküjakalaka nümüin napotuin wanee ishi. «Antüshii waya sünain wüin», namakalaka nümüin. 33 Sibákalaka sünülia tü ishikat nutuma Isaac, müsüjeseʼe ayatayülüin Beer-Seba sümünüin tia pueulokot maaʼulu yaa.

34 Shiasaʼa pienchipa shikii nuuyase Esaú nuʼwayuusesü Judit, tü nüchonkat Beerí, chi hititakai jee nuʼwayuusesiaʼaya Basemat tü nüchonkat Elón, chi hititakai. 35 Mojukalaka maʼin naaʼin Isaac sümaa Rebeca sutuma tia jieyuukalüirua.