Génesis

38 Soʼutpünaa tia, akatalaashi Judá noulia na nuwalayuukana, nukumajakalaka tü miichi aainjuushikat süka loona süpüla nipiayaainjatüin shia nüʼütpaʼa wanee wayuu kanüliashi Hirá, wayuu adulamita chia makai. 2 Niʼraajakalaka Judá chayaa wanee jiet, nüchon shia Súa, wayuu cananeo chia makai, nuʼwayuusekalaka tü wayuukot jee nüinkaakalaka sümaa. 3 Ipuotkalaka tü wayuukot nutuma. Jemeyutsüjeseʼe shia nümaa wanee nüchon Judá, niʼitaakalaka Er nünülia chi nüchonkai. 4 Ipuotkalaka shia süchikuaʼa. Jemeyutsüjeseʼe shia nümaa wanee joʼuu, shiʼitaakalaka Onán nünülia. 5 Jemeyutkalaka shia süchikuaʼa mapa, Selá nünülia chi süchonkai sutuma. Chajachi Judá suluʼu tü mmakat Aczib wanaa sümaa jemeyuluin tü nuʼwayuusekat.

6 Mapa maʼin, nüchajaakalaka Judá wanee wayuu nuʼwayuuseinjatka Er chi nüchon eʼirumaakai, shiakalaka nuʼwayuusein nutuma wanee wayuu kanüliasü Tamar. 7 Niyoutapejeʼe Jehová süchiki tü nukuwaʼipakalü Er, chi niʼirumakai Judá. Nuʼutunakalaka aaʼin Er nutuma Jehová. 8 Anuukalaka nünüiki Judá nümüin Onán sünainjee tü kasa alatakat: «Anakajaʼa puʼwayuusere tü nuʼwayuusekat chi pipaya anaajaakai, eisalüinjachi pia sümüin süka shiain nuʼwayuusepuʼuin müliashii. Anakajaʼa püinkaale sümaa süpüla müinjanain nüchonniikai naaʼin chi pipayakai na püchooinjanakana sümüin». 9 Nütüjaapejeʼe saaʼu Onán nnojolin neʼraajünüinjanain suluʼu nüchonniin na süchooinjanakana Tamar. Müsüjeseʼe amülain mmoluʼumüin nutuma tü nuwasainkat nüinkaapa sümaa suulia ipuoluin shia. 10 Mojupejeʼe nümüin Jehová tü naaʼinrakalü Onán, müshijeseʼe nuʼutunüin aaʼin nutuma. 11 Anuukalaka nünüiki Judá sümüin Tamar, tü naʼüikat: «Anakajaʼa puʼunule nipialuʼumüin chi püshikai, ayataʼaya maʼwayuusein pia waneʼereeya miyoʼupa Selá chi tachonkai». Naaʼinrüin tia Judá süka maa müin nünüiki nüleʼeruʼu: «Outaleere joo chi tachonkai maʼaka outuin na nuwalayuukana». Oʼunusüjeseʼe Tamar jee kepiakalaka shia nümaʼana chi süshikai.

12 Sünaajaakalaka mapa tü nuʼwayuusekat Judá, tü nüchonkat Súa. Sülatapa tü kaʼi niʼyalajakalü oʼu Judá saaʼu tü nuʼwayuusekat, nuʼunakalaka nümaa chi naʼaleewain kanüliakai Hirá, chi wayuu adulamitakai, oʼunushi nia chamüin Timná eejanale na aüjüliikana soi naʼanneetse. 13 «Ichaa oʼunuin chi paʼüikai chamüin Timná süpüla nüüjirüin soi naʼanneetse», sümünakalaka amüin Tamar. 14 Saakatakalaka Tamar tü süsheʼin shiyaawasekat wayuuin outa aʼwayuuset shia, saʼataka sünain wanee kuluulu jee sükoʼoyoloko shikii süka wanee kiaala süpüla nnojoluinjatüin jaʼyain suʼupünaa, aikalasüjeseʼe shia soʼuluʼu tü pueulo kanüliakalü Enaim tü chakat süpünaluʼu Timná. Saaʼinrüin tia Tamar süka sütüjaain saaʼu miyoʼuchipain Selá jee nnojolin saapünüin nümüin süpüla nuʼwayuuseinjatüin shia.

15 Koʼoyoosü suʼupünaa Tamar süka wanee kuluulu, müsüjeseʼe wayuuyaain maaʼinsat shia naaʼinruʼu Judá niʼraiwaʼaya shia. 16 Nujununtaakalaka Judá jee nürütkaaka sünainmüin Tamar, anuukalaka nünüiki sümüin süka nnojoluin nütüjaain saaʼu shiain tü naʼüikat: «Anakajaʼa püinkaale tamaa». «¿Kaseetkaʼa paapüin tamüin tainkaale pümaa?», sümakalaka nümüin. 17 «Taapeechi pümüin wanee kaaʼulachon saʼakajee tü tamüʼlüinkalüirua», nümakalaka Judá sümüin. «¿Kaseetkalaka püpütüin tapüla shiyaawase puwalaajeerüin taya?», sümakalaka Tamar nümüin. 18 Nüsakitkalaka shia Judá sünain maa: «¿Kasa tapütajatka püpüla shiyaawaseinjatka pümüin tawalaajüinjatüin pia?». Anuukalaka sünüiki nümüin: «Püpüta tapüla tü püsüttiijase süpülajatkalü eʼitawaa ‹sello› sümaʼaleeya tü süpükat jee püpüta tapüla tü waraarat pajapüipakat». Naapüinjeseʼe shia sümüin, nüinkaakalaka sümaa Tamar jee ipuotkalaka shia nutuma. 19 Süchikijee tia suʼunakalaka Tamar, saakatakalaka tü kuluulu saʼatakat sünain paala sümaʼaleeya tü shikiaalaja koʼoyookalü aka suʼupünaa, saʼataka süchikuaʼa tü süsheʼin shiyaawasekat wayuuin outaa aʼwayuuset shia.

20 Nüjütünakalaka nutuma Judá chi naʼaleewain adulamitakai süpüla niʼikajaainjachin chi kaaʼulachonkai jee süpüla shiiteʼennüinjatüin nümüin tü nüpütakat paala shiyaawase nuwalaajüinjachin sümüin saaʼu süinkaain nümaa, nnojotpejeʼe shia nüpüla chi naʼaleewainkai Judá. 21 Nüsakiraka chi naʼaleewainkai Judá na wayuu kepiakana suluʼu tia mmakat: «¿Jalasü jiʼrüin tü wayuu maaʼinsat* yaapuʼukat sotpaʼa tü wopukot yaa Enaim?». «Matüjainsat eewaa wanee wayuu maaʼinsat yaʼayaa», namakalaka na wayuukana nümüin. 22 Nüleʼejaaka mapa chi wayuu adulamitakai nümaʼanamüin Judá sümaa nümüin nümüin: «Nnojotsüsaʼa wayuukot tapüla. ‹Matüjainsat eewaa wanee wayuu maaʼinsat yaʼayaa›, müshii tamüin na wayuu nepiajanakana». 23 Anuukalaka nünüiki Judá nümüin: «Puuʼulaamata tü kasa tapütakat sümaʼana shimeeʼerainpalashiitaa neʼe waya. Taluwataapejeʼe sümüin chi kaaʼulachonkai shiajaʼa neʼe nnojoluin shia püpüla».

24 Maʼaka apünüin kashi süchikijee tia süküjünakalaka wanee pütchi nümüin Judá müsü mayaa: «Wayuuipasa neʼe maaʼinsat Tamar tü paʼüikat. Saaʼujee sümaaʼinjaain, ipuoluipa neʼe». Anuujeseʼe nünüiki Judá: «Pujuʼitira anooipaʼamüin süpüla saʼajünajatüin». 25 Suluwataakalaka sünüiki Tamar nümüin chi saʼüikai wanaa sümaa shiyuʼnnuin anooipaʼamüin, anuu sünüiki: «Nia ipuotka atuma taya chi wayuu apütakai tamaʼana kasakalüirua tüü». Ayatakalaka saashajaain sünain maa: «Anakajaʼa pünaʼrüle jaralüin kasüttiijasein tü süttiija süpülajatkalü eʼitawaa ‹sello› sümaʼaleeya tü süpükat jee müsia tü waraaratkat». 26 Nünaʼalakalaka Judá jaralüin kakoroloin tia kasakalüirua, anuukalaka nünüiki: «Lotoleesia sukuwaʼipa türa wayuukot toulia süka nnojoluin taapüin shia nümüin Selá chi tachonkai süpüla nuʼwayuuseinjatüin shia». Nnojoireekaʼa nüinkaain Judá sümaa Tamar.

27 Shiasaʼa wanaa sümaa saʼalijaain, senkeyuukalaka na süchonniikana. 28 Wanaa sümaa jemeyuluin shia eweetüsü palajana nütüna chi süchonchonkai, saapaamaatakalaka tü wayuu eemeijüsükat wanee jiitpai ishosü maʼin najapünayaaka shia sutuma sümaa müin sünüiki: «Nia eweetaka palajana chii». 29 Shikerojooka süchikuaʼa tü najapükat niakalaka eweetüin palajana chi nuwalakai. Anuujeseʼe sünüiki tü wayuu eemeijüsükat: «Eʼikaasü tü püikat putuma».* Müshijeseʼe Pérez nümünüin atumawaa. 30 Niweetakalaka chi nuwalakai nüchiiruajee, chi kajapünayaakai atumawaa tü jiitpai ishokot maʼin. Eʼitaanüsü Zérah nünüliain.