Yootiraale jia namaa jüchonnii meena jülatakai nanainmüin saaʼu wanee puente.
NAMÜINJATÜ NA KACHONSHIIKANA
5 Yootiraainjana jia süchiki tü jukuwaʼipakat
¿KASA SÜNAINPÜNAAKA?
Yootiraapa na wayuu kachonshiikana namaa nachonnii, naküjiraainjatü tü jülüjakat naaʼin jee tü suluʼukat naaʼin.
¿JAMÜSÜ CHOʼUJAAKA JAAʼINRÜIN TIA?
Kapüleesü maʼin namüin na kachonshiikana yootoo nümaa wanee nachon jimaʼai jee shiale sümaa wanee majayüt. Wanaa sümaa tepichajüin naya naküjapuʼuin jümüin kasa süpüshuaʼa. Shiasaʼa jooluʼu süka nemiyoʼulainnapain, nnojoliishii maʼin yootuin naya jümaa otta nnojoluitpa jütüjaain maʼin saaʼu tü jülüjakat naaʼin jee tü suluʼukat naaʼin. Tia müsü aka saaʼin shaʼwatüle na jüchonniikana sotpaʼa wanee süchi jerutsü otta chale jia wanee saʼata tü süchikat. Choʼujaapejeʼe namüin jüchonnii yootuin jia namaa jaʼitainna müin nnojotkai yooteein naya jümaa.
¿KASA EEKA SÜPÜLA PAAʼINRÜIN?
Paashajaa nümaa püchon wanaa sümaa yooteein nia pümaa. Paaʼinra tia jaʼitairü kaʼlein aikat paaʼu sünain yootoo nümaa.
«Eesüjaʼa pümüle: ‹Yaajatü taya pümaa soʼukai, eiwaʼaitaaka neʼe yooteein pia tamaa›. Nnojotpejeʼe anain müle pünüiki nümüin wanee püchon nüküjeere pümüin tü suluʼukat naaʼin, jama shiain keeʼireein waaʼin yootuin wachonnii wamaa» (Lisa).
«Eeshi teisalaweere maalü, akaisaʼa teisalaaichin süseʼeruʼupünaa aikat süka yootuin taya namaa na tachonnii jimaʼaliikana» (Herbert).
TÜ SÜMAKAT TÜ WIWÜLIAKAT: «Tü kasa anakat süpüla jaaʼinrüin, shiainjatü tü jalouikat sümüin wayuu wainma, nnojotsü shiainjatüin neʼe tü akaaliijiakat jia jümüiwa» (1 Corinto 10:24).
Jülüja paaʼin tü namakat. Anuu nünüiki wanee wayuu kachonshi: «Eesü naatale neʼe tü jülüjakat taaʼin wanaa sümaa yootuin na tachonniikana tamaa. Jee nayaawata aaʼu tia na tachonniikana».
Müle pukuwaʼipa, piyokojoo tü telewisootkot otta eesü süpüla piyokojooin tü püserulaatsekat jee meeʼirale shia putuma. Jülüja paaʼin tü nümakat chi püchonkai pümüin, müle shia putuma piiʼiyateerü nümüin püchon kapülain paaʼin tü alatakat nümüin jaʼitairü müin malaakai saaʼin.
«Nayaawatüinjatü aaʼu na wachonniikana kapülain waaʼin nakuwaʼipa. Nnojorüle jülüjain waaʼin tü alatakat namüin nnojoleena yooteein naya wamaa otta eesüjaʼa naküjeerüle shia sümüin wayuu naatajatü» (Maranda).
«Nnojo patatüin paaʼin naküjale na püchonniikana pümüin wanee kasa nnojotka anain» (Anthony).
TÜ SÜMAKAT TÜ WIWÜLIAKAT: «Anashii müleka eere jaaʼin sünain tü pütchi jaapakat» (Lucas 8:18).
Pajayata kaʼi süpüla yootoo namaa. Eeshii na jimaʼalii kamalainkana amüin yootoo nümaa nashi jee nei namaapa naya sünain aaʼinraa wanee kasa.
«Woʼunajaapa, yootushii waya namaa na wachonniikana süka paʼataajiraain waya suluʼu tü kemionkat» (Nicole).
Anasü maʼin yootoo wekaapa.
«Wekaapa aipaʼa yootushii waya süchiki tü kasa anasü jee tü mojusü alatakat wamüin. Sutuma waaʼinrüin tia, paaʼinwajiraashii maʼin waya otta watüjaa aaʼulu nnojoluin wamüiwaʼain waya süpüla eejirawaa sümaa tü kasa mojusü alatakat wamüin» (Robin).
TÜ SÜMAKAT TÜ WIWÜLIAKAT: «Anakaja müleka eere jaaʼin sünain tü nüküjakat wane juwala jümüin sümaa nnojolüin jüsouktüin pejeewa sünainmüin tü nümakat» (Santiago 1:19).