Kasiisü nunuʼuse Aarón

PIIRAKAA sümüin nunuʼuse Aarón kasiisü otta kachonsü shia saʼwaijee. Wekirajaa sünain jamüsü sülataka tia.

Kakalia kepiain na israeliitakana isashiipaʼa. Coré, Datán, Abiram otta 250 nekiipuʼujana na israeliitakana nnojoishi nacheküin Moisés süpüla nekiipuʼuin otta Aarón süpüla laülaain napüleerua na sacerdotekana. Namaka nümüin Moisés: ‹¿Jamüshi pülanaweeka sünain aluwatawaa waaʼu?›

Nümaka Moisés nümüin Coré otta na nümaajanakana: ‹Wattaʼa, wattaʼa maalü jüntira suluʼumüin tü aʼwaajüleekat wanee aʼajia sümaa tü wunuʼu jemetakat eejuu. Watüjaajeechika aaʼu chi nüneeküinjachikai Jeʼwaa›.

Nüntaka waneemüin kaʼi Coré otta na 250 nümaajanakana suluʼumüin tü aʼwaajüleekat otta waneeinua. Jashichika maʼin Jeʼwaa. Nümaka Moisés namüin: ‹Jüsünnaa suulia nepia na wayuu mojulaashiikana, nnojo jaapaain kasa eeka nakoroloin›. Nasünnaaka na wayuukana suulia nipia Coré, Datán otta Abiram.

Nümaka Moisés: ‹Awajaajeerü tü mmakat shimiraleenaka na wayuu mojulaashiikana süpüla jütüjaainjachin aaʼu chi nüneekakai Jeʼwaa›.

Kettaapa nünüiki Moisés suwajaaka tü mmakat. Shimiralaka tü mmakat Datán, Abiram otta na nümaajanakana sümaʼalee nepia otta kasa eeka nakoroloin. Naapapa na wayuukana nekiisa na ojutuushiikana namaka: ‹¡Juwataa! ¡Shimiraleena waya tü mmakat!›

Chashi Coré otta na 250 nümaajanakana eeka tü aʼwaajüleekat. Eejaaka nutuma Jeʼwaa wanee siki iipünaajee, jotoka naya napüshuaʼa. Nuluwataaka Jeʼwaa Eleazar sünain akotchojoo naʼajia na ouktushiikana süpüla naainjüinjatüin shirousein tü aʼajüleekat mürüt. Tia süpülajatü sotuin naaʼin na israeliitakana niainjachin neʼe Aarón otta na nüchonniikana sacerdotein.

Niiʼiyateein Jeʼwaa niainjachin Aarón otta na nüchonniikana nüneeküin süpüla sacerdotein. Nümaka nümüin Moisés: ‹Nantira nanuʼuse na shikiishiikana napüshi. Naʼakajee na leviitakana chi antirüinjachikai nunuʼuse nia Aarón. Piʼitaa tü wunuʼukalüirua suluʼu tü aʼwaajüleekat sümülatuʼu tü jurasükeetkat. Kasiijeerü nunuʼuse chi wayuu taneekakai süpüla sacerdotein›.

Niʼraka Moisés shia jaʼipa kaʼika, ¡kasiisü otta kachonsü nunuʼuse Aarón! ¿Pütüjaaipa aaʼu jamüsü kasiika nunuʼuse Aarón nutuma Jeʼwaa?