Piʼyataa nümüin Jeʼwaa, nnojo piʼyataain nümüin Satanás

Waneeküinjachi chi waʼyataainjachikai amüin, Jeʼwaa niataapa Satanás otta na yolujaakana. ¡Anasü maʼin aʼyatawaa nümüin Jeʼwaa!

Jeʼwaa anamia nia

Anasü maʼin namüin na yolujaakana naainjüin kasa mojusü otta nemeejüin wayuu. Jeʼwaa nnojoishi müin nia, aisü nüpüla tü wayuukalüirua maʼaka naaʼin wanee wayuu aika apüla nüchonnii. «Anasü süpüshuaʼa tü nüsülajakat» Jeʼwaa (Santiago 1:17). Nnojotsü naʼalijirüin suulia wayuu jaʼitairü kapüleein nümüin (Éfeso 2:4-7).

Kanain paaʼin tü naainjakat Jesús wanaa sümaa yaajachin nia mmapaʼa, kanüishii na manüisaliikana nutuma, koʼushii na moʼusaliikana, anashii na itta atachiikana otta na masaʼasaliikana. Sutuma tü nütchinkat Maleiwa ayuʼtshi nia yolujaa süleʼeruʼujee wayuu, niiyajüin eeka ayuulin otta nüchijireʼerüin na ouktushiikana (Mateo 9:32-35; 15:30, 31; Lucas 7:11-15).

Nnojoishii waya nimeejüin Maleiwa süka naʼalain, nüküjüin wamüin tü shiimainkat (Tito 1:2).

Nnojo paaʼinrüin kasa yarüttüsü

Maʼaka sütaʼülüüin wanee jaʼyumülerü sünain suʼula wanee alekerü, müshia na wayuukana sutuma tü alawaakat otta tü naaʼinrakat na ooʼulaküliikana. Mmotshii naya seema namaʼüjünüin, kanainsü naaʼin tü kasa alatajatkat, kamaʼanashii kasa süpüla anain nakuwaʼipa, mmotshii neema na ouktushiikana otta na yolujaakana. Na aʼyataashiikana nümüin Maleiwa nnojoishii sünainpünaain tia.

Pülashi maʼin Jeʼwaa nuulia Satanás. Piʼyataale nümüin naaʼinmajeerü pukuwaʼipa noulia na yolujaakana (Santiago 4:7). Maʼaka tü alatakat chaaʼaya Nigeria, eeshi wanee aküjüi pütchi nüchiki Jeʼwaa eiyajünüshi natuma apünüinshii ooʼulakülii. Wanaa sümaa isain nachiki nia oʼunushi waneeshia nünainmüin süpüla naashajaain nümaa suulia jamajüin nia nutuma.

Müliale pia natuma na yolujaakana paashajaa nümaa Jeʼwaa süpüla naaʼinmajüin pia (Proverbios 18:10). Süpüla naaʼinmajüin pia Maleiwa nnojo sünainpünaain pia tü naaʼinrakat na outshiikana otta nnojo puʼwaajüin na yolujaakana. Na anoujushiikana nünain Maleiwa chajanaka Éfeso naʼajüin süpüshuaʼa tü nakaraloukse sukuwaʼipamaajatkat outsü (Aluwataaushikana 19:19, 20). Müinjana maaʼulu na aʼyataashiikana nümüin Maleiwa. Nnojo jümaʼanain kasa eeka namaʼanajeejatüin na outshiikana maʼaka wunuʼu, ajapünaa, aüliijanaa pülasü otta karaloukta sukuwaʼipamaajatü outsü.

Paainja tü sümakat tü iküleesia shiimainkat

Talateere naaʼin Maleiwa putuma nnojotsü puuʼulaainjatüin müleʼe tü iküleesia nnojotka shiimain otta tü kasa mojusükat. Shia paainjüinjatka tü sümakat tü iküleesia shiimainkat. Süküjüin tü Wiwüliakat tü paainjüinjatkat:

Naʼaka pia na aküjüliikana pütchi nüchiki Jeʼwaa

Kamaajanashi Satanás wayuu eeka nekirajüin otta naainjüin kasa mojusü. Müshia Jeʼwaa kamaajanashi wayuu, naya na aküjüliikana pütchi nüchiki (Isaías 43:10). Suluʼupünaa tü Mmakat eeshii maʼaka 6.000.000 aküjülii pütchi nüchiki Jeʼwaa, nayakana aʼyataashii maʼin sünain aainjaa kasa anasü otta ekirajaa wayuu sünain tü shiimainkat. Piʼreena naya suluʼu tü Piichi outkajaaleekat otta talateena naya sutuma püntüin sünain tü outkajawaakat.

Ekirajüshii naya wayuu süpüla naʼyataainjanain nümüin Maleiwa. Eeshii naya süpüla nekirajüin pia sünain tü Wiwüliakat pipialuʼu otta sünain tü pukuwaʼipainjatkat sünain aʼwaajaa Jeʼwaa. Nnojoleena naya achekajüin pümüin saaʼu tü naainjakat. Talateena sümaa nekirajüin pia süka alin napüla na wayuukana otta Jeʼwaa.