Namüliajia na mojukana aaʼin

‹Müliayülia süpüshua tü kasa akumajuushikalüirua› (Roma 8:22). Müliasü maʼin saaʼin wayuu wanaa sümaa süshajünüin tü pütchikat, alatüirü 1.900 juya süchikijee tia. Sutuma tia, münüshii na anoujüshiikana: ‹Jütütüleʼera naaʼin na mojukana aaʼin› (1 Tesalónica 5:14, NM).

Mülialeesia maʼin naaʼin na wayuukana maaʼulu otta wainmaleʼeya na mojukana aaʼin. ¿Ponuinjatü waaʼin tia? Nnojo, saashin tü Wiwüliakat ‹alüʼütsü maaʼulu sükalia sajaʼttüinjatüin kasa süpüshuaʼa› otta ‹müliainjatü maʼin wayuu soʼu kaʼikat tia› (2 Timoteo 3:1-5). Naashin Jesucristo sülüʼütpa tia, eeinjatü «wainma kasa keemasü» (Lucas 21:7-11, NM; Mateo 24:3-14).

Mojusü naaʼin na wayuukana shapaale naaʼin, mmorüle naya, müliale otta waneeirua kasa eeka mojuin. Mojusü maʼin naaʼin ouktüle napüshi, nooʼulaajiraale suulia kasaalüü, amülouire naʼyataain jee shiale nanain wanee ayuulii mepisat. Otta müsia, mojusü naaʼin süka nnojoluin kasain anain apüla naya naashin jee nnojoluin nekeraajüin tü achekünakat napüleerua. Eesü süpüla mojuin waaʼin sutuma wanee kasa kapüleesü alataka, akatsaʼa shapaale naaʼin wanee wayuu otta isale nüchiki nünoukteʼerüin tü alatakat nümüin eesü süpüla mojuin maʼin naaʼin.

Mapuʼusia naaʼin na wayuu namaiwajanakana. Ayuuishi maʼin Job otta alatüsü nümüin kasa mojusü. Oukteeshi Job süka nnojoluin nükaaliinjüin nia Maleiwa naashin (Job 10:1; 29:2, 4, 5). Mojusü naaʼin Jacob süka ouktüin chi nüchonkai naaʼinruʼu, niyouktaka nümüliannüin otta oukteeshi neʼe nia (Génesis 37:33-35). Sükajee tü alatakat Macedonia, müshi chi aluwataaushikai Pablo: «Mojusü maʼi taaʼin» (2 Corinto 7:5, 6; Salmo 38:6, 8).

Wainma na mojukana aaʼin maaʼulu süka naainjüin weinshi kasa isaka nachiki. Tü jiwaʼataakat aaʼin sümaa jülüjaa aaʼin kasa mojusü eeshii süpüla ayuulin naya sutuma otta sümojujaain wanee kasa sünain nekiisholoin mojuka atuma naaʼin (Puʼwanaajireʼera sümaa Proverbios 14:30).

Nükaaliinjia chi eekai mojuin naaʼin

Epafrodito, wanee anoujüshi soʼu nakalia na nikirajüinkana Jesús, chejeʼewai Filipos, ‹shapaasü maʼin naaʼin süka naapüin na naʼaleewainkana nüchiki sünain ayuulin nia›. Ayuuishi Epafrodito, süchikijee nuluwataanüin Romamüin natuma na naʼaleewainkana sünain eʼikajawaa waneeirua kasa nümüin chi aluwataaushikai Pablo, eesü jülüjüle naaʼin sutuma nnojoluin nikeraajüin tü nachekakat otta nnojoluin kasain anain apüla nia (Filipos 2:25-27; 4:18). ¿Kasa naainjaka Pablo süpüla nükaaliinjüin nia?

Niiteʼerüin Epafrodito Filiposmüin eemüin na naʼaleewainkana sümaa nülüʼüjüin wanee karaloukta, müsü sünüiki: ‹Kamanee jia nümüin Epafrodito sümaa talatüin maʼi jaaʼin nümaa. Kojutü jütüma wayuu eekai müinya aka nia› (Filipos 2:28-30). Nnojoluitpa mojuin naaʼin süka sütütüleʼennüin naaʼin nutuma Pablo otta kamaneein nümüin na kepiakana Filipos.

Shiimain anain maʼin tü sümakat tü Wiwüliakat ‹natütüleʼennüinjanain aaʼin na mojukana aaʼin›. Müsü wanee wayuu mojuka aaʼin: «Choʼujaasü pütüjaain saaʼu jülüjüin pia naaʼin na waneeinnua otta pümünüin amüin: ‹Tatüjaa aaʼu tü alatakat pümüin, aneerü pia› ».

Chi mojukai aaʼin achajaainjachi wayuu ayaawataka saaʼu tü alatakat nümüin. Chia wayuukai, naapajüinjatü nünüiki otta nnojoishi ashapajaainjachin. Nnojoishi aʼülüjüinjachin otta müinjatüin nünüiki: «Nnojotsü müinjatüin paaʼin» otta «mojusü tü jülüjakat paaʼin». Süka nnojoluin anain chi mojukai aaʼin, eesü süpüla mojuleʼeinya tü jülüjakat naaʼin nüchiki sutuma tü kasa mojusü aküjünakat.

Eesü jülüjüle naaʼin chi mojukai aaʼin nnojoluin kojutüin nia (Jonás 4:3). Akatsaʼa, sotuinjatü naaʼin kojutüin nia nümüin Maleiwa. Mayaapejeʼe ‹mojutüin› Jesús sümüin wayuu ayatüshi kojutüin nia nümüin Maleiwa (Isaías 53:3, NM). Shiimain alin pia nüpüla Maleiwa maʼaka alin maʼin nüpüla chi Nüchonkai (Juan 3:16).

Amülialaasü naaʼin Jesús naaliin na müliakana otta niiʼiyatüin namüin kojutüin maʼin naya (Mateo 9:36; 11:28-30; 14:14). Nüküjüin namüin kojutüin nümüin Maleiwa na wüchii joʼuucheinkana. Müshi Jesús: «Nnojoishi eein wanee motoko naaʼin Maleiwa». ¡Kojutüleeshiʼiya maʼin nümüin na aainjeekana tü nüchekakat! Müshi Jesús nachiki: «Jaʼitakajeʼe tü juʼwalakat, ayaawajünüsü süpüshuaʼa» (Lucas 12:6, 7, NM).

Chi mojukai maʼin aaʼin sümaa shapaain naaʼin sutuma tü isakat nüchiki, kapüleesü nümüin nünoujüin kojutüin nia nümüin Maleiwa. Saaʼin nümüin nnojoishi anain süpüla alin nia nüpüla Maleiwa otta jülüjüin nia naaʼin. Saashin tü Wiwüliakat eesü eere «wanee kasa mojuka atuma waaʼin». Akatsaʼa, ¿shia neʼe kasalainjatka atuma waya tü waaʼinkat? Nnojo, nütüjaa aaʼu Maleiwa eein süpüla mojuin wanüiki wamüinjiraa. Sutuma tia, müsü tü Wiwüliakat wamüin: ‹Miyoʼu Maleiwa suulia tü waaʼinkat otta niʼraajüin süpüshuaʼa kasa› (1 Juan 3:19, 20, NM).

Nnojotsü jülüjüin neʼe naaʼin chi Washi iipünaajachikai tü waainjalakat otta tü mojukat watuma. Nütüjaa aaʼu eein kasa kapüleesü, nütüjaa aaʼu tü alatakat wamüin, tü waainjeekat otta tü waainjakat atuma wanee kasa. Otta müsia, nütüjaa aaʼu sülataain wanain tü kaainjalaakat, tü ayuuliikat jee tü ouktaakat, makalaka wainmain kasa isaka wachiki. Mojule waaʼin otta jashichire waya wamüinjiraa, weeʼiyatüin nnojoluin kaainjaleein waya otta nnojoluin mojuleʼeinya maʼin tü waainjakat. Saashin tü Wiwüliakat nnojotsü wachekalain ‹nnojoluin shikeraajüin tü akumajünakat apüla› waya. Sutuma tia, amülialaashi Maleiwa saaliin tü alatakat wamüin otta jülüjüsü naaʼin nnojoluin anain maʼin wakuwaʼipa (Roma 5:12; 8:20).

Saashin tü Wiwüliakat «amüliajüi Jeowa otta anashi maʼin nia». «Wattasü nutuma tü waainjalakat woulia, maʼaka wattain eere niweetüin chi kaʼikai suulia eere nikerolüin.» «Niʼraajüin maʼin tü wakumajiakat ooʼulaka sotusü naaʼin sümamülain mma waya» (Salmo 103:8, 12, 14, NM). Shiimain, Jeowa nia chi ‹Wamaleiwase akaaliijakai waya. Müliale waya, akaaliijüneena waya nütüma› (2 Corinto 1:3, 4).

Akaaliinjüneena na mojukana aaʼin narütkaale nünainmüin chi Maleiwa amüliajüikai otta nacheküle ‹neʼitaain tü nachise jawatakat naaʼu Jeowa›. Eesü süpüla ‹nükaaliinjüin wayuu eekai mojuin saaʼin› (Salmo 55:22, NM; 2 Corinto 7:6). Makalaka sümüin tü Wiwüliakat wachuntajanain nümüin Jeowa: ‹Maleiwa nuuntüin naaʼinmajüin jia, jüküja nümüin süpüshuaʼa tü ashapataakat atüma jaaʼin› (1 Pedro 5:7). Shiimain, sükajee waashajaain nümaa Maleiwa, eeshii süpüla warütkaain nünainmüin otta ‹naapüin wanee anaa wamüin› (Filipos 4:6, 7; Salmo 16:8, 9).

Weeʼiratüle tü waainjakat eesü süpüla nnojoluin mojuin waaʼin. Choʼujaasü maʼin waraittüin waya otta wawanaajüin, weküin eküülü anasü, wasanalüin jouktai wulesü, weemeraain otta nnojoluin wanajüin maʼin telewisoot. Eesü wanee jiet akaaliinjaka na mojukana aaʼin sükajee waraittüin shia namaa. Sümaka wanee moju aaʼinrü sümüin: «Nnojotsü awaraijaweein taya», sümaka sümüin sümaa anain sünüiki otta yalayalain saaʼin: «Oʼunajatü pia». Müsü shia süchiki tü alatakat: ‹Waraittüshii waya 6 kiloometüro. Mapüsasü shia waleʼejapa akatsaʼa anasü saaʼin. Ooʼulakünajatü tia süpüla sütüjaanüin aaʼu anain maʼin shia›.

Eesü mepire tü mojuukat aaʼin, jaʼitairü suuʼulakünüin wainma kasa maʼaka saaʼin eiyajawaa nümaa tottoolu. Müsü wanee wayuu ataralüirü: «Tooʼulaküin kasa süpüshuaʼa akatsaʼa ayatüsia mojuin taaʼin». Maʼaka saaʼin nnojoluin süpüla anain na moʼusaliikana, na macheʼesaliikana otta na masaʼasaliikana. Akanasaʼa na mojukana aaʼin eesü süpüla sümülialaain naaʼin otta naʼatapajüin kasa anasü naashajeʼerüle waneepia tü Wiwüliakat, eere süküjünüin sajaʼttinnajatüin süpüshuaʼa ayuulii (Roma 12:12; 15:4).

Kaʼi nnojoluinjatka oʼu mojuu aaʼin

Wanaa sümaa nüküjüin Jesús tü kasa keemasü alatajatkat Mmapaʼa sülüʼütpa süpüla sajaʼttüin kasa süpüshuaʼa, müshi nia: ‹Anakajaʼa eere jaaʼin süka taashimaateenain jia› (Lucas 21:28). Aashajaashi Jesús süchiki taashinjanain waya suluʼu tü mma jeketkat eere ‹tü akumajuushikalüirua sujuittinnüinjatüin suulia sümüliala. Meeria aka shia nüchooin Maleiwa sünain anashaataleein maʼi noʼuluʼu› (Roma 8:21).

¡Aneena maʼin na wayuukana süka taashin naya suulia tü eepuʼukat, nachijiraain sümaa jutatüin naaʼin otta naainjeein maʼin weinshi naʼyataain! Nnojoleerü müliain wayuu sutuma mojuu aaʼin. Pansaasü nünüiki Maleiwa namüin na wayuukana «nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (Alateetkat Mapeena 21:3, 4).

Aluʼusaʼa waneejatüle tü eeʼiyatünakat, tü achuunajünakat suluʼujee tü Wiwüliakat suluʼujeejatü «Tü Nüchikimaajatkat Jesucristo». Tü suluʼujeejatkat Traducción del Nuevo Mundo de las Santas Escrituras (con referencias) ashajünüsü süka NM.