Maatsoʼu

Naʼürülaa anainchi Jefté na nuwalayuukana otta nachumulashi nia. Najünajaainjeseʼe nia nuumainpaʼajee (Juec. 11:1-3). Nnojoishi nia ayouktajaain namaa, nükaaliinjain naya (Juec. 11:4-11). Tü jülüjakat naaʼin Jefté shia kojutüinjachin Jeʼwaa atumawaa suulialeʼeya wanee atkawaa. Niiʼiyateein Jefté sünain kanoulain nia nünain Jeʼwaa, makalaka anain nukuwaʼipa otta sukuwaʼipa nupueulose Jeʼwaa (Heb. 11:32, 33). ¿Kasa paaʼinrajatka süpüla püshatüinjatüin nukuwaʼipa Jefté? ¿Jameechi pia müleka naaʼinrüle kasa mojusü pümüin wanee wawala jee airuʼurule nünüiki pümüin? Jülüjeesü paaʼin palajana jamüin nünüiki Jeʼwaa suluʼu tü Wiwüliakat maʼaka saaʼin nutuma Jefté. Jaʼitairü alin maʼin pümüin tü aainjünakat pümüin, nnojo piyüülajaain suulia aʼyatawaa nümüin Jeʼwaa. Nnojo yüüü pümüin suulia tü outkajawaakat jee nnojo pükaaʼinraain noulia na wawalayuukana. Shia anaka aluʼu poonoole nümaa Jeʼwaa. Paaʼinrüle tia, eejiraajeechi pia sümaa tü alatakat pümüin otta nashateerü pukuwaʼipa na wanee wawalayuukana (Roma 12:20, 21; Col. 3:13). w16.04 1:7, 9, 10

Choʼujaasü maʼin wachecherüinjatüin waaʼin sülataleepa woulia tü müliaakat, nnojotsü wachecherüinjatüin waaʼin motsomüin neʼe. Jamüsüjaʼa shimerojoole wanee anua, katünainjana na wayuu suluʼukana tü anuakat nantaleepa sotpaʼamüin tü wüinkat jaʼitainna mapüsain maʼin naya, nnojoliin oukteein naya. Akaataajaʼa suluʼuweere waya tü Paʼaraiisükat, acheküshii eejiraain waya waneepia sümaa tü kasa alatakat wamüin, jaʼitainna müliain maʼin waya. Washata nukuwaʼipa Pablo, nnojo wooʼulaain suulia aʼyatawaa nümüin Maleiwa jaʼitainna weʼrüin maʼin wamüliala (2 Cor. 4:16). Nükaaliinjeena waya Jeʼwaa süpüla wachecherüin waaʼin suʼunnaa weʼrüin müliaa. Mapuʼusü nukuwaʼipa Pablo, niʼitaain naaʼin nünain Jeʼwaa. Anuujeseʼe nünüiki: «Jaʼitairü wainmain tü waʼünüükalüirua, shiimüin sünain wayamüleerüin ütamüinreʼeya, süka müichiain mooʼulaain Cristo suulia alin waya nüpüla. Müshi tachikua: Chi Maleiwakai, nnojoishi naʼalijirüin chi Nüchonkai, chi Wasenyotsekai Jesucristo. Nüjütüin nia waʼakamüin süpüla ouktaa waaʼujee. Sükajee tüü, tatüjaa aaʼulu sünain nnojolüin kasain asütajatüin joo waalii nüpüla Maleiwa. Jaʼitairü kasain alatüin wamüin kataiwaʼaya woʼu, jaʼitaina ouktüin waya, ayateena waya alin nüpüla. Jaʼitakaja nooʼuleʼereein chi Maleiwakai tü yolujaakalüirua ooʼulaka na aapiee chakana iipünaa suulia alin waya nüpüla, ayateena alin waya nüpüla. Jaʼitakaja tü alatakat wamüin jooluʼu je mapeena, jaʼitakaja tü naaʼinreekat na sülaülashiikana mma, jaʼitakaja tü alatakat chaa sirumatuʼupünaa je shiinaluʼupünaa mmakat, jaʼitakaja tü süchekakat wapüleerua süpüshua tü akumajuushikalüirua, nnojotsü suuʼuleʼerüinjachin chi Maleiwakai suulia alin waya nüpüla» (Roma 8:37-39). w16.04 2:17, 18

Achunteeshii waya nümüin Maleiwa kekiinjanain maʼin waya süpüla wayaawatüin saaʼu tü kasa eekat süpüla ekerotirüin waya sünainpünaa poliitika. Otta müsia achunteeshii waya kaaliinwaa nümüin Maleiwa süpüla waaʼinrüin tü anasükat. Eeshiijaʼa süpüla wapüreesajünüin sutuma waneepiain waya nümaa Maleiwa. Sülatülejeʼe tia wamüin, wachunta nümüin Maleiwa meimmoluinjanain waya süpüla waküjüin tü waneepiakalü aaʼujee waya nümaa. Shiimainshaata nükaaliinjeenain waya Jeʼwaa süpüla wachecherüin waaʼin. Eesü süpüla waashajeʼerüin wanee pütchi eeʼiyataka sünain payalain maʼin oʼuraajaa nümüin Jeʼwaa (Aluw. 4:27-31). Naapüin Jeʼwaa wamüin tü Wiwüliakat süpüla nükatsüinrüin waaʼin sünain anoujaa. Eesü wetsiikulo akaaliinjaka waya süpüla nnojoliin waya sünainpünaain poliitika. Jülüjeesü waaʼin waneepia tia wetsiikulokot otta wanaajaainjatü suluʼu wekii, nnojorüleereʼe joo wamaʼana wanee Wiwülia soʼu wanee kaʼi. Sutuma tü pütchi suluʼukat tü Wiwüliakat, achecheraasü waaʼin sünain tü kasa naaʼinrüinjatkat Jeʼwaa soʼu palit kaʼi. Choʼujaajeerü wamüin tia süpüleeruaanapa waaʼin (Roma 8:24, 25). Waneeka wetsiikulo aashajaaka süchiki tü Paʼaraiisükat, jülüja waaʼin tü kasa waaʼinreekat suluʼu Paʼaraiisüka. w16.04 4:14, 15

Na nekiipüʼükana na anoujakana nünain Jesuu naashin, nnojoishii naya aküjüin pütchi süchiki Nuluwataaya Maleiwa. Shiasejeʼe naashajaale süchiki tia, «yaasüsaʼa suluʼu waaʼin tü Nuluwataayakat Maleiwa», müshii neʼe (Luc. 17:20, 21). Nnojotsü nekirajüin wayuu sünain chain iipünaa tü Nuluwataayakat Maleiwa jee niain Jesuu chi Aluwataakai saaʼu. Aashajaashii neʼe nüchiki Jesuu sükalioʼu tü miʼiraa aainjünakat tisienpüroʼu otta Semana Santa. Nnojoishii naya ekirajüin sünain shiainjatüin Nuluwataaya Maleiwa ajaʼlajeʼerüinjatka tü kasa mojusü eekat Mmapaʼa (Alat. Map. 19:11-21). Nnojotsü natüjaain aaʼu tü naaʼinrajatkat Jesuu sükajee Nuluwataaya Maleiwa. Nnojotsü nayaawatüin aaʼu jamüin naküjüinjatka tia pütchikat. Na nikirajüinkana Jesuu, nnojoishii aküjüinjanain pütchi süpüla nakanajüinjanain nneerü jee süpüla nakumajirüinjanain piichi miyoʼuyuu (2 Cor. 2:17). Na nikirajüinkana Jesuu, nnojoishii achuntüinjanain awalaajünaa saaʼu naküjüin pütchi (Aluw. 20:33-35). w16.05 2:7, 8

Eesü kuluulu keejiaka maʼin wamüin süpüla washeʼinjatüin shia, watüjaapejeʼe saaʼu mojushiijeerüin shia namüin na wawalayuukana waʼatüle shia wanain. Nnojotpejeʼe ashajünüin suluʼu tü Wiwüliakat müleka anale shia jee mojule shia. ¿Jamüsü süpüla watüjaain saaʼu anale nümüin Jeʼwaa tü waʼanaayakat? Anuu tü pütchi sümakat tü Wiwüliakat: «Na jieyuu aʼwaajakana chi Maleiwakai, tü anainjatkat atüma nayolojo suʼupala wayuu, [shia sükajee anainjatüin sukuwaʼipa nasheʼin jee laülaainjatüin naaʼin], nnojolüinjatü sükajeejatüin naʼanaain süka kuluulu kojutkat maʼi, nnojolüinjatü sükajeejatüin aaʼinraa kasa sünain naʼwala, je nnojolüinjatü sükajeejatüin naʼanaain cheʼesaa je aüliijanaa eekai kojutüin maʼi» (1 Tim. 2:9, 10). Pütchikat tüü, namüinjatü na wawalayuu jieyuukana jee na tooloyuukana. Laülaale waaʼin, nnojoleerü waʼatüin wanain wanee kuluulu mojushiijeetka namüin na wawalayuukana. Nnojoleerü waainjain wanee kasa mojushiika namüin süka alin naya wapüla (1 Cor. 10:23, 24; Filip. 3:17). w16.05 3:14

Wanaa sümaa niʼrüijaain wayumüin Adán nümüin Maleiwa, nnojoluichipa nüchoin nia. Wainmapejeʼe na nuuʼuliwoʼu aneekakana Jeʼwaa süpüla nuluwataainjachin naaʼu (Heb. 12:1). Oonooshii naya sümaa nünüiki chi Kakumainkai naya. Mayaa neeʼiyatüin sünain kasheein naya jee niainjachin anoukteʼerüin nakuwaʼipa. Nayouktüinjeseʼe naaʼinrüin tü nümakat Satanaa (Juan 8:44). Süka waneepiain naya nümaa Maleiwa, sotojaasü waaʼin tü wetsiikulo waashajeʼerüitpakat. Wayakana anoujashiikana nünain Jeʼwaa, meesü waaʼin maʼaka naaʼin naya israeliitakana jee jüüjüweeshii waya nümüin chi Kakumainkai waya. Talatüshii maʼin waya süka Washin Jeʼwaa. Wacheküin niainjachin atüküin waya süpüla anain maʼin wakuwaʼipa. Wasakireʼera waaʼin sünain tüü: «¿Müshiche taya maʼaka saaʼin sukuwaʼipa pootshi anaka süpüla nütüküin aka Maleiwa wanee iita eekai anain maʼin? ¿Müshiiche tamüin na tawalayuukana maʼaka saaʼin sukuwaʼipa pootshi nütükayüliikana Jeʼwaa süpüla anain nakuwaʼipa?». w16.06 1:2, 3

Alüʼütshii waya süpüla wekerotüin suluʼu tü mma jeketkat otta wainma tü ooʼulakünakalü aka waaʼin süpüla sümalajeʼennüin tü wanoulakat. Choʼujaasü maʼin wayaawatüin saaʼu müleka ichere maʼin tü wanoulakat. ¿Jamüinjatü watuma? Jülüja waaʼin tü nüküjakat Jesuu suluʼu Mateo 6:33 otta wasakireʼera waaʼin sünain pütchikalüirua tüü: «¿Shiiʼiyatüinche tü kasa tasaʼwajeekat otta tü taneekakat teʼitaain taaʼin sünain tü nümakat Jesuu? ¿Nnojoleeiche taya oʼunüin sünain tü outkajawaakat shiiʼiree kojuyeein nneerü takanajüin? ¿Kaseerü taainjaka müleka siraale kaʼi taaʼu sünain aʼyatawaa jee mapüsale maʼin taya sutuma? ¿Tashateetche nakuwaʼipa na manoujainsaliikana jee ooʼulaweeiche taya suulia aʼyatawaa nümüin Jeʼwaa?». Icheerü tü waaʼinkat müleka moonooinre waya sümaa tü sümakat tü Wiwüliakat. Saashin tü Wiwüliakat, mojeerü wakuwaʼipa waʼaleewajaale sümaa wayuu mojulaasü, kamaneere waya namüin na nnojoliinnapakana naʼakain na wawalayuukana, wanajüle, waapajüle jee washaittüle kasa mojusü. ¿Kasa waaʼinrajatka süpüla watüjaain saaʼu shiimainre sünain waaʼinrüin tü nüchekakat Maleiwa? Nnojoliinjana emeejiraain waya waaʼin otta waaʼinrüinjatü tü sümakat tü Wiwüliakat süpüla wanoukteʼerüin tü kasa mojusü jülüjakat waaʼin. w16.06 2:8, 9

Eeshii waneeinnua wayuu paaʼinwaka maaʼulu yaa, aikana apüla Maleiwa otta aʼyataakana nümüin. Aküjülii pütchi nüchiki Jeʼwaa münüshii naya. Mayaapejeʼe nnojoluin lotuin nakuwaʼipa, nuʼunirüin Jeʼwaa nakuwaʼipa jee nükaaliinjain naya nükajee chi naaʼinkai. Nnojoishii jeʼrashiin neʼe na aʼwaajakana Jeʼwaa soʼu 1914. Shiasaʼa sutuma nükaaliinjain waya Jeʼwaa sünain tü aküjaakat pütchi, wattainna naalii na ayaawatüinnapakana saaʼu tü shiimain sümakat tü Wiwüliakat jee aküjüliinnapa naya pütchi nüchiki Jeʼwaa. Nüküjatüjülia Maleiwa suluʼu tü wetsiikulo waashajeʼerüitpakat müinjatüin nupueulose jee nümaka süchikijee: «Tayakai Jeʼwaa, tayeechi kooʼomüinka atuma naya». Ekeraajüsü maaʼulu yaa tia pütchikat. Wattainnapa naalii na wayuu suluʼukana nupueulose Jeʼwaa. Alatüshii suulia oocho miyoone suluʼu mmaka süpüshuaʼa. Watta maʼin naalii, eesü mma eeka nnojoluin süsaʼwatüin oocho miyoone wayuu suluʼu. w16.06 4:1, 2

Nütüjaa aaʼu Jesuu jülüjain naaʼin Jeʼwaa tü wayuukalüirua maʼaka jülüjain naaʼin tü wüchiikalüirua (1 Ped. 5:6, 7). Tütüinjanapejeʼe waya maʼaka saaʼin tü wüchiikalüirua. Apünajüinjana waya süpüla weküin süchon waʼttia otta aʼyataainjana waya süpüleerua weküin. Nükaaliinjeena waya Jeʼwaa waaʼinrüle tia. Paliʼirüle tü wanneetsekat jee shiale tü weküinkat, naapeerü Jeʼwaa wamüin tü choʼujaakat wamüin. Eesü süpüla naaʼinrüin tia nükajee chi eekai nikiraain wamaa tü niküinkat. Wanee kasa naapaka Jeʼwaa sümüin tü wüchiikalüirua shia tü shipiakat. Nukumajatüjülia Jeʼwaa tü wüchiikalüirua süpüla sütüjüinjatüin akumajaa shipia otta nukumajüin Jeʼwaa tü kasairua sukumajüinjatkalü aka shipia. Müsia neʼe wakuwaʼipa nutuma Jeʼwaa, nükaaliinjain waya süpüla wousütüin sünain eeinjanale kepiain waya sümaa wapüshi. Wanaa sümaa nüküjüin Jesuu tü wetsiikulo waashajeʼerüitpakat, eesüjaʼa jülüjale naaʼin nülüʼülüin süpüla naapajiraain nikii saaʼu wayuu süpüshuaʼa (anasü paashajeʼerüle Lucas 12:6, 7). Aapajiraashi nikii Jesuu waaʼu wayakana süpüla katüinjatüin woʼu waneepia (Mat. 20:28). w16.07 1:11-13

¿Jamüshiiche kaainjalaka jee ouktaka waya? Shia süka kaainjalain Adán paala sümaiwa saashin tü Wiwüliakat. Ouktüshii otta kaainjalashii waya süka nuuʼuliwoʼuin waya Adán (Roma 5:12, 14, 17). Mayaapejeʼe müin wakuwaʼipa, eeshii süpüla wojuʼitüin suulia süchepchia kaainjalaa (Roma 5:20, 21). Ayatayülia waleʼeruʼuin tü kaainjalaakat, nnojotpejeʼe wooʼulaain suʼunirüin wakuwaʼipa tü kaainjalaakat. Jamüshiijaʼa kaainjarale waya nuulia Jeʼwaa, achuntawaishii waya nümüin süpüla motuin naaʼin waainjala. Wainmeerü kasa anasü weʼraka kojutüle wamüin anamiain Maleiwa wamüin. Naashin Pablo, wayoukteerü «süpüshua tü kasa mojutkat akajee nia [Maleiwa] watüma» otta nnojoleerü «kachiiruain waaʼin tü kasa mojusü keejiakat namüin na manoujainsaliikana». Akaʼaya waya, laülaajeerü waaʼin, waaʼinreerü tü nüchekakat Maleiwa wapüleerua otta keisaleena waya sümüin wakuwaʼipa nuʼupala (Tito 2:11, 12). w16.07 3:5, 6

Amojujaasü nukuwaʼipa Adán sümaa Eva sünain kasaalüü sutuma nnojoluin noonooin nümaa Jeʼwaa. Emeejünüsü Eva sutuma tü wüi sümaiwajatkat. «Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat», mataasü tü wüikat sümüin Eva. Tia wüikat nia neʼe Satanaa. Shiküin Eva süchon tü wunuʼukot sümaa nnojoluin ee saashajaain nümaa chi suʼwayuusekai. Mojutsai suʼwayuuse sümüin sümaa niain chi laülaakai saaʼu. Mojutaasü joo tü naaʼinrakat Adán süka niküin tü süchon wunuʼu saapakat Eva nümüin. Sutuma müin nia, moonoolosai nümaa Maleiwa (Alat. Map. 12:9; Gén. 2:9, 16, 17; 3:1-6). Wanaa sümaa nüsakinnüin Adán sümaa Eva nutuma Jeʼwaa süchiki tü naainjakat, niʼitaain Adán sünain shiain kasirüin tü nuʼwayuusekat. Otta müsia Eva, shia shiʼitaaka sünain kasirüin tü wüikat süka shimeejüin shia (Gén. 3:12, 13). ¡Mojusü maʼin nanüiki! Eʼrüi wayumüin Adán sümaa Eva otta moonoolosalii naya. Sutuma müin naya süsalashii naainjala nutuma Jeʼwaa. ¿Kasa shikirajaka anain waya mojuin nukuwaʼipa Adán sümaa Eva? Müleka aneere nakuwaʼipa na kasaatshiikana, oonooinjana nümaa Jeʼwaa otta nnojotsü jaralüinjatüin neʼitaain sünain kasirüin tü naaʼinrakat. w16.08 1:1, 4, 5

¿Kasanainjeeshii mojujiraakana waneeinnua wayuu sümaa naʼwayuuse? Eeshii eekai mojuin naaʼin jee jashichin sutuma anainjatiain nakuwaʼipa waneepia sümaa naʼwayuuse naaʼinruʼu. Eetaashii na mojujiraakana sutuma naatain nepijia, naatawalin tü jashichikalü anainjee naya jee naatain tü talatakalü anainjee naya. Eeshii eekai mojujiraain sünainjee napüshi, saaʼu nneerü jee saaʼu nnojoluin paaʼinwaain naya sünain nepijia nachonnii. Wainmapejeʼe na wawalayuu anoukteʼerakana tü mojujiraakalü anainjee naya süka naaʼinrüin tü nümakat Jeʼwaa. Mojujiraale maʼin wanee anoujashi sümaa nuʼwayuuse, achuntajana naya kaaliinwaa namüin na laülaashiikana. Atüjashii naya wawalayuukana otta nakaaliinjeena naya süpüla naaʼinrüinjatüin tü nümakat Jeʼwaa. Nachuntüle na kaʼwayuuseshiikana chi naaʼinkai Maleiwa nümüin, naaʼinreerü tü sümakat tü Wiwüliakat otta jaʼyeerü naaʼu tü akuwaʼipaa eekat nutuma chi naaʼinkai Maleiwa (Gal. 5:22, 23). w16.08 2:11-13

Wainma maʼin kasa naaʼinraka Jesuu. Na kamalainkana amüin aapajaa nünüiki Jesuu, kachipünaasü naaʼin nünüiki otta nekirajüin naya sünain wainma kasa. Soʼu wanee kaʼi, eejatü wainma maʼin wayuu sotpaʼa wanee palaa aapajüsüirua nünüiki Jesuu. Noʼotooka suluʼu wanee anua nümaa Pedro, nikirajaka na wayuukana yalejee. Süchikijee tia, ekirajünüshi Pedro nutuma sünain wanee kasa. Naainjaka Jesuu wanee kasa pülasü süpüla nataʼülüin wainma jime. Süchikijee nüküjaka tü wetsiikulo waashajeʼerüitpakat. Saashin tü Wiwüliakat, nüpütüin Pedro otta na nümaajanakana «süpüshua tü nakorolokot süpüla oʼunaa nümaa Jesús», nümaatalashii naya soʼujeʼereʼeya tia (Luc. 5:1-11). Eetaashinka wanee wayuu ekirajaweekai sooʼomüin nüchiki Jesuu, Nicodemo nünülia. Chia wayuukai, noʼutku na aʼyataakana suluʼu tü kanüliakat Sanedrín. Eesü naaʼin suulia jamajüin nanüiki na wanee judíokana nümüin neʼrüle nia yootuin nümaa Jesuu. Müshijeseʼe nuʼunüin nümaʼanamüin Jesuu aipaʼa süpüla yootuin nia nümaa. Kamaneeshi Jesuu nümüin wayuukai otta nikirajüin nia sünain waneeirua kasa anashaatasü maʼin (Juan 3:1, 2). Ayuʼtshi Jesuu kaʼi waneepia süpüla nikirajüin wayuu sünain tü shiimainkat jee süpüla nükatsüinrüin nanoula. Ouyantüinjana waya namaʼanamüin na wayuukana soʼu tü oora anakat namüin, ayuʼlüinjana waya kaʼi süpüla wekirajüin naya. w16.08 4:10, 11

Nnojoluinjatü yaletüin waaʼin otta wayaawatüinjatü saaʼu niain Jeʼwaa chi Maleiwa wulekai akuwaʼipa. Waaʼinrüinjatü tü nümakat wamüin Maleiwa süka shiain tü aneetkalü atuma wakuwaʼipa. Nnojorüle yaletüin waaʼin, waaʼinreerü tü nümakat Maleiwa otta kojuteerü wamüin tü jülüjakat naaʼin na wayuukana suulia mojuin naaʼin watuma. Jaʼyainjatü saaʼu sukuwaʼipa waʼanaaya waʼyataaliin nümüin Jeʼwaa. Nnojotsü eein wanee kasa alanaʼleekalia suulia tü nuluwataakalü anain Maleiwa. Nnojoliipejeʼe waya oonooin sümaa tia pütchikat mojusheeka. Wepelisitaajüin na wawalayuukana saaʼu anain maʼin nayolojo jee laülaain naaʼin. Sutuma müin nakuwaʼipa, kapülasü saaʼin wayuu tü shikirajakalü anain tü Wiwüliakat, kojutüshi Jeʼwaa natuma jee talatüshi nia natuma. Jülüjale waaʼin anainjatüin maʼin sukuwaʼipa waʼanaaya, ayateechi kojutüin watuma Jeʼwaa, chi kojutükai jee anakai maʼin ayolojo. w16.09 3:18-20

Eejiraashi Jacob nümaa wanee aapiee shiiʼiree aneein nukuwaʼipa nutuma Jeʼwaa (Gén. 32:24-26). Nuuntüinjeseʼe tia. «Israeleerü pünülia. [...] Sükajee paapiraaichipain nümaa chi Maleiwakai», müshi Jeʼwaa nümüin. Anakuwaʼipaishi Jacob nutuma Jeʼwaa. Meesia wakuwaʼipa mayaa. Raquel sünülia tü nuʼwayuuse Jacob aikat maʼin nüpüla. Saʼatapajüinya maʼin Raquel nikeraajüin Jeʼwaa tü nümakat nümüin chi suʼwayuusekai. Nnojotpejeʼe süpüla kachoin shia süka maralüin shia. Soʼu tia, tü jiet eekai maralüin mojutsat shia atumawaa. Sütüjaapejeʼe aaʼu kachonjeerüin shia soʼu wanee kaʼi, müsüjeseʼe suʼuraajawalüin süpüla katsüinjatüin saaʼin. Kachonkalaka shia mapa sutuma naapüin Jeʼwaa sünüiki (Gén. 30:8, 20-24). w16.09 2:6, 7

Pikiraja püchonnii süpüla noonooin sümaa tü Wiwüliakat, talateenaka naya (Sal. 1:1-3). Eeshi süpüla pümüin namüin: «Jamüshiijaʼa juluwataanüle süpüla kepiain jia suluʼu wanee mma pasanainka sünain palaa sümaa jüneeküinjanain waneeinnua wayuu jümaainjanaka, ¿jaraleena na jüneekakana süpüla chain kepiain jümaa?». Süchikijee tia, paashajeʼereerü namüin Galacia 5:19-23 nayaawataiwa saaʼu jaraliin na wayuu nüchekakana Jeʼwaa süpüla kepiain naya suluʼu tü mma jeketkat. Paaʼinrüle tia, pikirajeena na püchonniikana sünain piamasü kasa. Palajana, nayaawateerü aaʼu nikirajüin waya Jeʼwaa süpüla talatüinjatüin waaʼin jee anajiraainjanain waya wapüshuaʼa maaʼulu yaa. Piama, nayaawateerü aaʼu nikirajüin waya Jeʼwaa süpüla kettaainjatüin wakuwaʼipa süpüla kepiain waya suluʼu tü mma jeketkat (Isa. 54:13; Juan 17:3, TNM). Eeshiʼiya süpüla pikirajüin na püchonniikana sünain tü kasa anouktaakat sünain nakuwaʼipa na wawalayuukana sutuma tü Wiwüliakat. Eesü süpüla püchajaain suluʼu tü karalouktairua eekat wamaʼana tü nachikimaajatkat na wawalayuukana, maʼaka saaʼin tü kanüliakat: «Sunoukteʼerüin nakuwaʼipa tü Wiwüliakat», ojuʼitawaika suluʼu Aapiria Wayuu. w16.09 5:13, 14

Mayaapejeʼe wainmain tü kasa waaʼinrakat, choʼujaasü wakatalüin kaʼi süpüla wekirajaain wamüiwaʼa sünain tü Wiwüliakat jee wekirajaain sümaa wapüshi (Éf. 5:15). Nnojotpejeʼe waashajeʼerüinjatüin neʼe süpüshuaʼa tü Wiwüliakat, tü wanee karalouktakalüirua jee yapain watuma tü wanüikinjatkat sünain tü outkajawaakat, wooʼulaainjatü süntüin suluʼumüin waaʼin tü Nünüikikat Maleiwa otta ichein wanoula sutuma. Wekirajaapa sünain tü Wiwüliakat, nnojotsü shiainjatüin neʼe jülüjain waaʼin tü choʼujaakat namüin na waneeinnua, jülüjeesü waaʼin tü choʼujaakat sünain wakuwaʼipa (Filip. 1:9, 10, TNM). Wekirajaapa sünain tü wanüikinjatkat sünain aküjaa pütchi, süpüla tü outkajawaakat jee süpüla wekirajüin wayuu, eesü nnojorüle jülüjain waaʼin kasain sükaaliinjain anain waya tü waashajeʼerakat. Weʼitaa wanee shiyaawase, chi eekai nüʼlakajaain, nuuʼulaküinjatü seʼejü tü nutsekat süpülapünaa niitajüin shia, nnojoipejeʼe kettaain nia sutuma nuuʼulaküin seʼejü tü eküütkat, anainjatü niküin waneepia suulia ayuuijüin nia. Müsia neʼe sukuwaʼipa wanoula, aneere wanoula ekirajaainjana waya waneepia sünain tü Wiwüliakat. Waaʼinrüle tia, katsüinjeerü wanoula. w16.10 2:10, 11

Piamasü kasa süküjaka tü Wiwüliakat süchiki tü kanoulaakat suluʼu Hebreokana 11:1, TNM. Palajana müsü mayaa: «Tü kanoulaakat shia shiimainre wamüin shikeraajeerüin tü kasa waʼatapajakat maʼin». Tü kasa waʼatapajakat shia tü naaʼinrüinjateetkat Maleiwa mapeena. Jamüshiijaʼa waya, waʼatapajüin sajaʼlajaainjatüin tü kasa mojusükat otta paʼaraiisüinjatüin tü mmakat. Anuu tü wanee kasa sümakat tü Wiwüliakat süchiki tü kanoulaakat: «Tü kanoulaakat shia [...] weeʼiyatüle shiimain wamüin tü kasa nnojotkat weʼrüin». Soʼutku tü kasa nnojotkat weʼrüin nia Jeʼwaa, Jesuu, na aapieekana otta Nuluwataaya Maleiwa. ¿Kasa waaʼinrajatka shiimainre wanoujain sünain nikeraajeerüin Maleiwa nünüiki otta shiimainre wamüin eein tü kasa nnojotkat weʼrüin? Weeʼiyatüinjatü tia sükajee wakuwaʼipa, wanüiki jee sükajee tü waaʼinrakat. w16.10 4:6

Kojutüsü nümüin Jeʼwaa otta Jesuu süpüshuaʼa tü kasa waaʼinrakat napüleerua, jaʼitasü paliʼirüin tü waaʼinrakat süka kapüleein shia wamüin (Luc. 21:1-4; 2 Cor. 8:12). Watüjaa aaʼulu kapüleein namüin na wawalayuu laülaainnakana nantawaliin sünain tü outkajawaakat jee nojuʼitawaliin sünain aküjaa pütchi. Watütüleʼera naaʼin otta waküja namüin kojutüin maʼin wamüin tü naaʼinrakat. Piʼrapa naaʼinrüin wanee wayuu kasa anasü, pipelisitaaja nia saaʼu tia. Wanaa sümaa nüntüin Pablo nümaa Bernabé Antioquíamüin chaa Pisidia, müshii na sülaülashiikana tü ekirajüleekat namüin: «Müleka eere wanee pütchi jüküjeeka süpüla jütütüleʼerüin naaʼin na wayuukana, anasü jüküjüle». Najayatüin tia Pablo süpüla nütütüleʼerüin naaʼin na wayuukana (Aluw. 13:13-16, TNM; Aluw. 13:42-44). Watütüleʼerapa naaʼin na waneeinnua, eesü süpüla natütüleʼerüin waaʼinya (Luc. 6:38). w16.11 1:3, 15, 16

Talatüsü maʼin waaʼin süka suluʼuin waya nupueulose Jeʼwaa otta sutuma watüjaain saaʼu tü keeʼireekat naaʼin waaʼinrüin. Süka watüjaaitpain saaʼu tia, oonooinjana waya sümaa nünüiki Jeʼwaa otta waaʼinrüinjatü tü anakat nümüin. Walerajüinjatü tü kasa nülerajakat Jeʼwaa, jaʼitairü wattain saalii wayuu keejiaka amüin aaʼinraa kasa mojusü (Sal. 97:10). Nnojotsü wanaawainjatüin waaʼin namaa na wayuu anakana amüin tü kasa mojusükat otta mojukana amüin tü kasa anasükat (Isa. 5:20). Talateere watuma Jeʼwaa, acheküsü wulein wanoula jee wakuwaʼipa nuʼupala (1 Cor. 6:9-11). Tü nüküjakat wamüin Jeʼwaa suluʼu tü Wiwüliakat süpülajatü anain wakuwaʼipa. Aishii waya nüpüla Jeʼwaa otta waneepieeshii waya nümaa. Waaʼinrüinjeseʼe tü nümakat wamüin süpüla anain wakuwaʼipa sümaa wapüshi, namaa na wawalayuukana, namaa na aʼyataajiraakana wamaa, namaa na koleejiajiraakana wamaa otta jalapünaale waya. w16.11 3:13

Na Ekirajaaliikana sünain tü Wiwüliakat, nnojotpuʼusü natüjaain maʼin aaʼu kasain sünainpünaain oonowaa namaa na sülaülashiikana mma. Sutuma tia, eeshii eekai sünainpünaain atkawaa jee poliitika. Jamüsüjaʼa maayoʼu 30 soʼu 1918, wanaa sümaa nuchuntüin chi aluwataakai saaʼu Estados Unidos suʼuraajüin wayuu süpüla sajaʼttüin tü atkawaakat, aküjünüsü namüin na wawalayuukana suluʼu Aapiria Wayuu noʼuraajüinjanainya. Eeshii wawalayuu aapakana nneerü süpüla tia atkawaakat. Eeshii eekai surulaalüin otta aluwataanüshii sünain atkawaa. Mayaapejeʼe choʼujaain nanoukteʼerüin nakuwaʼipa naya wawalayuukana, nnojotsü shiain achepchieein anainjee naya tia sutuma Babilonia tü Miyoʼusükat. Suʼunnaa tia, ojuʼinajüshii naya suluʼujee Babilonia tü Miyoʼusükat (Luc. 12:47, 48). w16.11 5:9

¿Jamüshii nüchiaaka Pablo na anoujashii chainjanakana chaa iipünaa suulia jülüjain naaʼin tü suchuntaakat neʼiruku? ¿Jamüsü eejüinjatka naaʼin napüshuaʼa na anoujashiikana maaʼulu sünain tü nümakat Pablo? Süka eein süpüla naaʼinrüin tü kasa mojusü suchuntaakat naaʼin. Jamüshiijaʼa noʼutku na anoujashii chajanakana Roma, süchepchiapuʼushii tü keeʼireekat naaʼin naashin Pablo. Eesüjaʼa shiale naashajaain achiki kachiiruain naaʼin naya anoujashiikana aʼluwajirawaa akuwaʼipa, ekawaa jee waneeirua kasa suchuntaaka naaʼin (Roma 16:17, 18, TNM; Filip. 3:18, 19; Jud. 4, 8, 12). Soʼu tia, eejachi wanee anoujashi corintojeʼewai aʼluwajiraakai nukuwaʼipa sümaa «tü nuʼwayuusekat chi nüshikai» (1 Cor. 5:1). Choʼujaasüjeseʼe nachiaanüin naya anoujashiikana nutuma Pablo suulia naaʼinrüin tü suchuntaakat neʼiruku (Roma 8:5, 6, TNM). Müsia maaʼulu, achiaanüshii waya suulia waaʼinrüin tia. w16.12 2:5, 8, 9

Paashajaale nümaa wanee paʼaleewain, sükaaliinjeechi pia tia süpüla jutatüin paaʼin suulia shapawaa aaʼin. Eeshi süpüla sükaaliinjain pia puʼwayuuse, wanee paʼaleewain jee wanee laülaashi suluʼu tü outkajaaleekat süpüla piyaawatüin saaʼu tü paaʼinrajatkat. Müsü tü Wiwüliakat: «Mojeerü sukuwaʼipa wanee kasa nnojorüle süsakinnüin anain, aluʼujasaʼa süsakinnüle wainma wayuu, anakuwaʼipaleerü shia» (Prov. 15:22, TNM). Woʼunawaire sünain tü outkajawaakat, nnojoleerü shapaain maʼin waaʼin. Sünain tü outkajawaakat namaashii waya na wawalayuukana; nakaaliinjeein waya jee natütüleʼereein waaʼin (Heb. 10:24, 25). Sutuma wakaaliinjiraain wapüshuaʼa sünain achecheraa waaʼin, eesü süpüla wayamülüin tü shapaakalü atuma waaʼin (Roma 1:12). w16.12 3:17, 18

Ayuuire waya jee sülatüle wamüin wanee kasa isaka wachiki wanoukteʼerüin, waküja shia nümüin Jeʼwaa otta weʼitaa waaʼin sünain naaʼinmajeenain waya (1 Ped. 5:6, 7). Akaʼaya waya, wachajaainjatü sukuwaʼipa süpüla anainjanain waya sükajee tü outkajawaakat jee waneeirua kasa eekat sutuma nupueulose Maleiwa (Heb. 10:24, 25). ¿Kasa eeka süpüla naaʼinrüin na wawalayuu ooʼulaakana achonnii suulia aʼyatawaa nümüin Jeʼwaa? Jülüjeesü naaʼin nukuwaʼipa Samuel. Nnojoishii nüpüleeruaain aaʼin Samuel na nüchonniikana süpüla waneepiainjanain naya nümaa Jeʼwaa. Ataralajüshii na nüchonniikana soʼu tia (1 Sam. 8:1-3). Nuuʼulaain niain Jeʼwaa anoukteʼerüin sukuwaʼipa tü alatakat. Nüchajaapejeʼe sukuwaʼipa Samuel süpüla waneepiainjachin nia nümaa Jeʼwaa sümaa talatüin naaʼin nutuma (Prov. 27:11). Maaʼulu yaa, wainma wawalayuu kachoinkana makana akuwaʼipa maʼaka naaʼin Samuel. Neʼitaain naaʼin sünain moteerüin naaʼin Jeʼwaa naainjala na ayaawajaakana suulia naainjala (Luc. 15:20). Shia jülüjaka naaʼin naya wawalayuukana waneepiain naya nümaa Jeʼwaa. Natüjaa aaʼu eein süpüla naleʼejüin na nachonniikana nünainmüin Jeʼwaa neʼrüle anain nakuwaʼipa napüleerua. w17.01 1:15, 16

Wanee wayuu nnojoikai yaletüin aaʼin, niyaawata aaʼu eein tü kasa isakat nüchiki naaʼinrüin otta nnojotsü nuunjulajüin süchiki tü kasa mojusü naaʼinrakat. Akaʼaya nia, kojutüsü nümüin sünüiki wayuu otta atüjashi nanainjee. Talatüshi maʼin Jeʼwaa namaa na wayuu nnojoliikana yaletüin aaʼin. Saashin tü Wiwüliakat, chi wayuu eekai nnojoluin yaletüin naaʼin, niyaawata aaʼu tü nukuwaʼipakat otta nütüjaa aaʼu tü kasa nnojotkat aapünüin ekii nümüin süpüla naaʼinrüin. Sutuma müin nukuwaʼipa, kojutüsü wayuu nümüin sümaa kamaneein nia namüin. Nnojorüle eejüin waaʼin, eeshii süpüla walaülaajaain saaʼu wakuwaʼipa sümaa nnojoluin watüjaain saaʼu. ¿Suluʼu jamüin? Eesüjaʼa jülüjale waaʼin wayain kojutüleein noulia na waneeinnua sutuma tü waʼyataainkat suluʼu tü outkajaaleekat jee sutuma naʼyataain na waʼaleewainyuukana (Roma 12:16). Eesüjaʼa wachajaale sukuwaʼipa süpüla kapülain waya saaʼin wayuu (1 Tim. 2:9, 10). Jee eesüjaʼa waküjüle namüin na waneeinnua tü naaʼinrajatkat jee tü nnojotkat naaʼinrüinjatüin (1 Cor. 4:6, TNM). w17.01 3:6-8

Aküjünüsü maʼin maaʼulu tü pütchi anasükat otta aainjünüsü tia sükajee tü tecnologíakat. Sutuma tia, eesü kapüleere namüin na wawalayuu laülaainnakana nekirajaain sünain wanee aʼyatawaa eekai jeketüin sukuwaʼipa (Luc. 5:39). Akaʼaya wayuu laülaapa nia, nnojoluichipa katsüin maʼin maʼakaapuʼu nümaiwa jimaʼaliiwaʼaya nia. Choʼujaasüjeseʼe nekirajünüin na wawalayuu tepichijakana süpüla nayainjanain aapünüin amüin sooʼomüin aʼyatawaa suluʼu nupueulose Maleiwa. Anashii nekirajünüle natuma na wawalayuu laülaainnakana noulia (Sal. 71:18). Eesü kapüleere namüin na wawalayuu wainmakana aʼyataain suluʼu nupueulose Maleiwa, nekirajüin na tepichijakana noulia süpüla nayainjanain neeʼirakain. Eesüjaʼa mojule naaʼin naya wawalayuukana sutuma nooʼulaainjanain suulia wanee aʼyatawaa kamalainka namüin. Eesü nnojoleerüle anain tü aʼyatawaakat naaʼinruʼu sutuma nnojoluin nayain oʼunirüin sukuwaʼipa. Eetaashii na nnojoliikana ekirajüin na tepichijakana noulia sutuma masetirain kaʼi napüla naashin. Nnojotpejeʼe anain süshapajaale naaʼin na wawalayuu tepichijayüliikana nnojorüle kooʼomüin atumawaa tü naʼyataainkat nümüin Jeʼwaa. w17.01 5:3, 4

Lotusü nukuwaʼipa Jesuu maʼaka paala nukuwaʼipa Adán (Juan 1:14). Waneejatpejeʼe nukuwaʼipa Jesuu nuulia Adán süka noonooin nümaa Jeʼwaa. Ayatüshia oonooin Jesuu nümaa Jeʼwaa mayaapejeʼe kapüleein maʼin tü ooʼulakünakalü aka naaʼin. Sutuma naapajiraain nikii Jesuu waaʼu, taashishii waya nutuma suulia tü kaainjalaakat jee tü ouktaakat. Naaʼinrüin Jesuu tü nnojotkat naaʼinrüin Adán. Jamüshijaʼa Jesuu, waneepiashi nümaa Jeʼwaa otta kacheʼeshi sümüin nünüiki (1 Tim. 2:6). Sutuma naapajiraain nikii Jesuu, eeshii süpüla katüin noʼu süpüla kaʼikat süpüshuaʼa na tooloyuukana, na jieyuukana jee na tepichikana (Mat. 20:28). Choʼujaashaatasü naapajiraain nikii Jesuu süpüla shikeraajüin tü keeʼireekat naaʼin Jeʼwaa (2 Cor. 1:19, 20, TNM). w17.02 1:15, 16

Tü wakuwaʼipakat müsü aka saaʼin waraittaa suluʼupünaa wanee wopu sümaa kojoin maʼin piyuushi. Eesüjaʼa püsakirüle paaʼin müleka jaʼyuujeerüle mapa. Eesü kapüleere maʼin tü alatakat wamüin otta shapaasü waaʼin sutuma. Majachinka Jesuu wanaa sümaa nüchitünüin sünain wanee wunuʼu süpüla nuʼutünüin aaʼin, müliashaanashi maʼin nia atumawaa. Keemasü maʼin tü alatakat nümüin (Heb. 12:3, TNM). ¿Kasaka akaaliinjain Jesuu süpüla nüchecherüinjatüin naaʼin? Jülüjasü naaʼin Jesuu tü kasa anasü eejeetkat sutuma nüchecherüin naaʼin, jülüjasü naaʼin wuleerüin nünülia Maleiwa otta niiʼiyateerüin sünain niain Jeʼwaa anaka süpüla aluwatawaa saaʼu kasakat süpüshuaʼa. Nütüjaa aaʼu Jesuu motsoʼoinjatüin sümaʼa tü müliaa niʼrakat, eekajasaʼa tü kasa anasü aapünüinjatkat nümüin chaa iipünaa, eeinjatü süpüla kaʼikat süpüshuaʼa. Washata nukuwaʼipa Jesuu suʼunnaa weʼrüin wamüliala. Jülüja waaʼin tü kasa anasü weʼreetkat wachechereʼerüle waaʼin suʼunnaa müliaa jee soto waaʼin motsoʼojeerüin sümaʼa. w16.04 2:10

Maaʼulu yaa, wainma wayuu nnojotka mojuin aaʼin sutuma saainjala. Nnojotsü nayaawatüin aaʼu jamüin choʼujaaka naapajiraain nikii Jesuu saaʼu wayuu. Nnojotsü nayaawatüin saaʼu kasain wayuu tü kaainjalaakat, jamüin mojuka nakuwaʼipa sutuma otta tü naaʼinrajatkat süpüla nooʼulaain suulia süchepchiaa kaainjalaa. Chi eekai anamiain, kojutüsü nümüin nütüjaapa saaʼu naapüin Maleiwa chi Nüchonkai süpüla taashin waya suulia kaainjalaa jee ouktaa. Jee müsia, nayaawata aaʼulu naaʼinrüin tia Maleiwa saaʼu alin wayuu nüpüla jee saaʼu anamiain nia (1 Juan 4:9, 10, TNM). Niiʼiyatüin Jeʼwaa sünain aishaatain maʼin wayuu nüpüla otta anamiashaatain nia sünainjee naapüin chi Nüchonkai waaʼu. Jutatsü waaʼin sutuma watüjaaitpain saaʼu nülatireerüin Jeʼwaa waainjala woulia otta wuleerüin waaʼin weʼitaale waaʼin sünain naapajiraain nikii Jesuu waaʼu (Heb. 9:14). Shia wanee kasa anashaatasü maʼin tia. Waküjeein shia sümüin wayuu süpüshuaʼa, ¿aashimüin? w16.07 4:6, 7

Nüküjüin Jeʼwaa wamüin maaʼulu yaa, nülaʼajaajeerüin waainjala weʼitaale waaʼin sünain naapajiraain nikii Jesuu waaʼu (Aluw. 3:19-21). Nüneeküin Jeʼwaa noʼutku waneeinnua wawalayuu süpüla nüchoinjanain naya jee nuluwataainjanain chaa iipünaa (Roma 8:15-17). Nuunejaainya Jeʼwaa na yaainjanakana kepiain yaa Mmapaʼa süpüla nüpüshinjanain naya. Mapa, ooʼulaküneena aaʼin nachikuaʼa, shia sajattiamüinjatka tia. Waneepiale naya nümaa Jeʼwaa, nüneekeena naya süpüla nüchonniinjanain (Roma 8:20, 21; Alat. Map. 20:7-9). Aijeena waneepia nüpüla Jeʼwaa napüshuaʼa na nüchonniikana. Jee aapüneerü wamüin kasa anasü süpüla kaʼikat süpüshuaʼa süka naapajiraain nikii Jesuu. Nüsülajüin Jeʼwaa wamüin tia, nnojotsü süpüla süsütünüinjatüin woulia. w17.02 2:15, 16

Wanaa sümaa naʼaleewain waya Jeʼwaa, nütüjaa aaʼu waleʼeruʼuin tü kaainjalaakat müshiijeseʼe woʼtchejaain sümaa waneeirua kasa. Mayaapejeʼe müin wakuwaʼipa, anasü nümüin Jeʼwaa waʼaleewainjachin nia. Sutuma aishaatain waya nüpüla Jeʼwaa, nuluwataain chi Nüchonkai yaa Mmapaʼamüin süpüla naapüinjatüin nikii saaʼu wayuu süpüshuaʼa süpüla nülaʼajaainjatüin saainjala (Juan 3:16). Waaʼinrüle wanee kasa eekai mojuin, wachunta nümüin Jeʼwaa nülatirai sooʼopünaa naaʼin waainjala. Nülatirüin Jeʼwaa sooʼopünaa naaʼin waainjala süka naapajiraaichipain nikii Jesuu saaʼu waainjala, ayatapejeʼe aleewain nia wamaa. Talatashaatasü waaʼin sutuma naʼaleewain waya Jeʼwaa mayaapejeʼe waleʼeruʼuin tü kaainjalaakat (1 Tim. 1:15). w16.05 4:6, 7