Aaʼuriiroʼu

¿Kasa waaʼinrajatka süpüla anain wakuwaʼipa sükajee tü aneekünakalü apüla na laülaashiikana? Washateein nakuwaʼipa, sukuwaʼipa nanoula otta oonooinjana waya sümüin tü namakat wamüin suluʼujee tü Wiwüliakat (Heb. 13:7, TNM; Heb. 13:17). Aishii waya napüla na laülaashiikana otta keeʼireesü naaʼin aleewainjanain maʼin waya nümaa Jeʼwaa. Jamüshiijaʼa neʼrüle makatawaliin waya suulia tü outkajawaakat otta nnojoliire wojuʼitawaliin sünain aküjaa pütchi, nakaaliinjamaatüin waya. Shiasaʼa yootopa naya wamaa, naapajüin wanüiki, natütüleʼerüin waaʼin otta nachiaain waya sükajee tü sümakat tü Wiwüliakat. ¿Eesia jülüjain paaʼin naaʼinrüin tia na laülaashiikana süka alin pia nüpüla Jeʼwaa? Eesü kapüleere namüin na laülaashiikana nachiaain waya. Jülüjataa paaʼin tü nukuwaʼipakat Natán, chi nünüikimaajachikai Maleiwa. ¿Kasaka waaʼinrüinjatüin süpüla mapüleeinjatüin namüin na laülaashiikana nachiaain waya? Nnojotsü yaletüinjatüin waaʼin, aashajaainjana waya namaa otta kojutuinjatü wamüin tü namakat wamüin. Soteesü waaʼin nakaaliinjain waya süka alin waya nüpüla Jeʼwaa. Aneerü maʼin wakuwaʼipa waaʼinrüle tia otta talateerü naaʼin na laülaashiikana sünain aaʼinraa tü aneekünakalü apüla naya. w18.03 31 püt. 15, 16

Shiimain nnojoluin wanaawain nakuwaʼipa na tepichikana. Eeshii na ayaawatamaatakana saaʼu tü shiimainkat, atüjashii süpüleerua nakuwaʼipa otta keeʼireesü naaʼin woutiisain naya sümaa tepichijayüliin naya. Eeshii na kakaliakana süpüla aaʼinraa tia. Na wayuu ayaawatakana saaʼu tia, nnojoishii napüleeruain naaʼin na nachonniikana süpüla woutiisamaatüin naya. Tü naaʼinrakat shia nakaaliinjain naya wanaapünaa sümaa tü nakuwaʼipakat. Talatüsü naaʼin na wayuu kachonshiikana naaʼinrüle nachonnii tü sümakattü wetsiikulo waashajeʼerüitpakat. Shiapejeʼe jülüjeein naaʼin akaaliinjaa na nachonniikana süpüla noushikajaain süchiirua nukuwaʼipa Kürisüto. Jee müsia nasakireʼerüinjatü naaʼin sünain tüü: «¿Niyaawatüinche saaʼu tü shiimainkat chi tachonkai süpüla naapüin naaʼin nümüin Maleiwa jee woutiisain nia?». w18.03 10 püt. 6

«Cheenaʼaya waya» wamüle nümüin chi ounejaakai waya, anashii wekeraajüle tü wamakat nümüin. Akanasaʼa nnojoliire woʼunuin, amülouijeerü neʼe tü kasa naaʼinrakat wapüleerua chia wawalakai (Mat. 5:37). Eeshii na nnojoliikana oʼunuin eemüinjanale naya palaa süka noʼunuin sünain wanee anaʼleeka saaʼin namüin suulia tü ounejaanakalü anain naya. Naaʼinrüle tia, ¿aishiiche napüla na waneinnua jee kojutusüche namüin tü aaʼinnakat napüleerua? Waapüinjatü namüin tü analuʼutkat saaʼu tü kasa naaʼinrakat wapüleerua jee saaʼu nounejaain waya nepialuʼumüin (Luc. 10:7). Kapüleere wamüin oʼunaa nipialuʼumüin chi wawala ounejaakai waya, anashii waapiramaatüle nia. Müle shia watuma, weeʼiyateerü nümüin alin nia wapüla jee kojutuin nia wamüin. Kojuteesü wamüin nakuwaʼipa na wayuu ounejaakana waya nepialuʼumüin. Eeshii na wayuu anakana amüin nüntüle wanee wayuu sümaa nnojoluin naapirüin palajana. Shiasaʼa suluʼupünaa waneirua mma, nnojotsü choʼujaain naaʼinrüin tia. Eetaasü waneirua mma eere anashiin sümüin wayuu nayoutule paala na wayuu nounejaakana, shiasaʼa suluʼu waneirua mma nnojotsü anashiin tia sümüin wayuu. Shiapajaʼa anain maʼin anale naaʼin wamaa na wayuu ounejaakana waya. w18.03 20 püt. 20, 21

Nnojoliishii waya jüüjüümaatüin neʼe nümüin chi naaʼinkai Maleiwa sutuma watüjaain saaʼu tü pütchi suluʼukat tü (1 Rey. 4:29, 30; 11:4-6). Müsüjeseʼe nnojoluin choʼujaain neʼe wamüin watüjaainjatüin saaʼu tü sümakat tü Wiwüliakat, choʼujaasü icheinjatüin wanoula waneepia (Col. 2:6, 7). Müsüjeseʼe choʼujaain wekirajaain sünain tü karaloʼutakat Wayaawata waneepia waaliin nüpüla Maleiwa. Sükajee tia, wayaawateerü aaʼu tü waaʼinrajatkat süpüla weʼitaain suluʼu wakuwaʼipa tü pütchi sümakat tü Wiwüliakat. Wekirajaaitpale sünain tia karaloʼutakat, anashii wekirajaale sünain waneʼeya eekai sükaaliinjain waya süpüla ichein wanoula waneepia (Col. 1:23). Jee müsia wasakireʼerüinjatü waaʼin sünain tü wekirajaakalü anain otta achuntajana waya kaaliinwaa nümüin Jeʼwaa süpüla weʼitaain suluʼu wakuwaʼipa tü wekirajaakalü anain. Ekirajaainjana waya otta wasakireʼerüinjatü waaʼin süpüla keeʼireeinjatüin waaʼin talatüin Jeʼwaa watuma otta woonooin nümaa (Sal. 40:8; 119:97). Wayoutajatü tü eekai nnojoluin laülaain atuma waaʼin sünain anoujaa (Tito 2:11, 12). w18.02 24 püt. 7-9

Süpüla washatüin sukuwaʼipa nunoula Noé, wekirajaainjatü maʼin anain tü Nünüikikat Maleiwa, kojutuinjatü maʼin wamüin tü wekirajaakalü anain suluʼujee, wanouteʼerüinjatü wakuwaʼipa wanaapünaa sümaa tü wekirajaakalü anain otta atüjüinjana waya aneeka tü anakat süpüla waaʼinrüin (1 Ped. 1:13-15). Shiasaʼa sutuma müin anain tü wanoulakat otta kekiin maʼin waya, nnojoleena waya emeejünüin nutuma Satanaa jee nnojoleerü washatüin nakuwaʼipa na manoujainsaliikana (2 Cor. 2:11). Wainma wayuu keejiakana amüin tü mojulawaakat otta tü amaʼüjirawaakalü akuwaʼipa. Shia neʼe kachiiruakana naaʼin tü kasa mojusü suchuntaakat naaʼin (1 Juan 2:15, 16). Nnojotsü nayaawatüin saaʼu sülüʼülüin sükalia süpüla sajaʼttüin kasakat süpüshuaʼa. Matsüinre wanoula, nnojoleerü eejüin waaʼinya süpüla tia kaʼikat. Naashin Jesuu, müsü sukuwaʼipa wayuu maaʼulu maʼaka saaʼin sukuwaʼipa wayuu nükalioʼu Noé. Nnojotpejeʼe shiain naashajaain achiki tü mojulawaakat jee tü amaʼüjirawaakat akuwaʼipa, shia naashajaaka achiki tü kasa eekat süpüla motuin anainjee waaʼin tü wanoulakat (Mat. 24:36-39, TNM). Püsakireʼera paaʼin sünain tüü: «¿Jaʼyasüche sünain takuwaʼipa sünain teʼraajüin Jeʼwaa? ¿Taaʼinrüinche tü anakat noʼuluʼu Jeʼwaa sutuma kanoulain taya nünain otta tekirajüinche wayuu sünain aaʼinraa tü keeʼireekat naaʼin Jeʼwaa?». Pusoutapa shiʼipajee asakiraakat tüüirua pütüjaajeerü aaʼu müleka shiimainre poonooin nümaa Jeʼwaa maʼaka naaʼin Noé (Gén. 6:9). w18.02 11, 12 püt. 8-10

Shiimainpejeʼe nnojoluin süpüla wakatalaain noulia na wayuu makana akuwaʼipa. Eeshii waʼyataale namaa, koleejiale waya namaa otta kepiale waya namaa. Nnojotpajaʼa wanaawain waaʼin namaa otta nnojotsü waaʼinrüin tü naaʼinrakat. Suulia washatüin tü nakuwaʼipakat ekirajaainjana waya sünain tü Wiwüliakat süpüla aleewain maʼin waya nümaa Jeʼwaa otta aleewainjana neʼe waya namaa na aikana apüla nia. Wakaaliinjeein na wayuukana süpüla neʼraajüin Jeʼwaa. Müshiijeseʼe waküjain pütchi sümüin wayuu eepünaale waya. Eesü süpüla wachuntüin nümüin Jeʼwaa nükaaliinjaiwa waya süpüla watüjainjanain süpüleerua wanüiki. Waküja namüin na waneinnua aküjaliin waya pütchi nüchiki Jeʼwaa. Kojuteechikalaka Maleiwa sutuma wayuu woulia wayakana neʼrapa anain maʼin wakuwaʼipa. «Nüchiajaain waya chi Maleiwakai suulia süpüshua tü kasa mojutkat akajee nia watüma je suulia kachiiruain waaʼin tü kasa mojusü keejiakat namüin na manoujainsaliikana. Tü nüchekakat chi Maleiwakai wapüleerua maaʼulu yaa, shia laülaainjatüin waaʼin, waaʼinrüinjatüin tü nüchekakat wapüleerua, je keisalainjanain waya sümüin wakuaippa nuʼupala» (Tito 2:11-14). Washatüle nukuwaʼipa Jeʼwaa otta waaʼinrüle tü keeʼireekat naaʼin wapüleerua shiʼreerü wayuu tia otta eeshii süpüla eein wayuu eekai namüin wamüin: «Oʼuneeshii waya jümaa süka waapüin jüchiki sünain eein chi Maleiwakai jümaa» (Zac. 8:23, TNM). w18.01 32 püt. 17, 18

Eejeena na «wayuu eekai kapülain naaʼin nakuaippa neʼe namüiwa», müshi Pablo. ¿Maluʼutche tia mojuin alin waya wapülajiraa? Nnojo. Choʼujaasü wamüin alin waya wapülajiraa süka aleinjatüin shia nutuma Jeʼwaa. Anuu nünüiki Jesuu: «Anasü aire püpüla wayuu süpüshua maa aka alin pia püpülajiraa» (Mar. 12:31). Nnojotsü süpüla alin wayuu wapüla nnojoliire alin waya wapülajiraa. Müsü tü Wiwüliakat wamüin: «Jia tooloyuukana, anakaja müleka aire jüpüla juʼwayuuse waneʼewaʼire jukua, [...] maa aka alin jia jüpülajiraa. Chi wayuu eekai alin nüpüla nuʼwayuuse, aijiraashi nia nüpüla süka tia. Wane wayuu, nnojotsü kanain naaʼin niʼiruku, shia eeka naaʼinmajüin shia» (Éf. 5:28, 29). Shiimain anain aire waya wapülajiraa, nnojotpajaʼa alanaʼaleeinjatüin waalin wapülajiraa. Nnojotsü anain sukuwaʼipa wayuu sutuma tü akuwaʼipaa aküjünakat suluʼu 2 Timoteo 3:2. Na makana akuwaʼipa aʼwaataashii suluʼu nakuwaʼipa namüiwaʼa (Roma 12:3). Shia neʼe jülüjaka naaʼin nakuwaʼipa namüiwaʼa noulia na waneinnua. Shiasaʼa mojule wanee kasa natuma, naata neʼe na neʼitaakana saaʼu tü naainjalakat. Na wayuu makana akuwaʼipa nnojotsü talatüin naaʼin. w18.01 22 püt. 4, 5

Soto paaʼin paapajüin nünüiki Jeʼwaa pikirajaapa sünain tü Wiwüliakat. Shiasaʼa puʼuraajapa, aashajaashi pia nümaa Jeʼwaa. Nnojoishi neʼe oʼuraajüinjachin pia süpüla kiʼrainjachin neʼe pia sünain jee shiiʼiree anainjatüin wanee kasa putuma. Shiimain naapüin pünüiki Chi Kakumalakai pia puʼuraajapa nümüin. Soto paaʼin naapeein Jeʼwaa tü puchuntakat nümüin (Filip. 4:6). «Piʼitaa naaʼu Jeʼwaa tü kasa jawatakat pümüin», müsü tü Wiwüliakat. Shia paaʼinrajatka tia shapaale paaʼin saaʼu wanee kasa (Sal. 55:22, TNM). Wainma maʼin wawalayuu jutatakana aaʼin sutuma naaʼinrüin tü sümakat tia pütchikat. Akaataajaʼa piakai, jutateerü paaʼin püküjale nümüin Jeʼwaa tü shapaakalü atuma paaʼin. Nnojoipejeʼe oʼuraajüinjachin neʼe pia nümüin Jeʼwaa choʼujaapa wanee kasa pümüin. Eesüjaʼa shapaale paaʼin sutuma jülüjain paaʼin waneepia tü kasa alatakat pümüin jee moto müsia paaʼin süpüshuaʼa tü kasa anasü eekat pümaʼana. Shia anaka süpüla paaʼinrüin tüü: jülüja paaʼin soʼukaiwai apünüinsü kasa paapajatka aaʼu analuʼut nümüin Jeʼwaa. w17.12 24 püt. 10-11

Wainmainna wayuu ekirajaakana sünain tü Wiwüliakat aapakana naaʼin nümüin Jeʼwaa jee woutiisakana. Wainma na jimaʼalii ekirajünakana sünain tü shiimainkat tepichiiwaʼaya naya jee aneekakana tü akuwaʼipa anasükat (Sal. 1:1-3). Piʼyataale nümüin Jeʼwaa, eesüjaʼa piʼreere amüin tü kaʼi woutiisakalü oʼu püchonnii (anasü paashajeʼerüle 3 Juan 4). Akaʼaya piakai süka piʼyataain nümüin Jeʼwaa, pücheküin napüleerua püchonnii neʼraajüin tü ashajuushikat süka hebreo otta griego. Jaʼitainna joʼuuyüliin püchonnii eesü süpüla natüjaain saaʼu tü süküjakat tü Wiwüliakat nachiki waneinnua wayuu namaiwajana. Eesü sutuma nupueulose Jeʼwaa karaloʼutairua jee wainma video eeka süpüla nekirajüin aka nachonnii na kachonshiikana. Choʼujaasü namüin na jüchonniikana neʼraajüin tü sümakat tü Wiwüliakat süpüla aleewain naya nümaa Jeʼwaa. w17.12 15 püt. 1; 16 püt. 4

Manoujainre chi puʼwayuusekai nünain Jeʼwaa sümaa mojulaain nia pümüin, ¿shiache anaka püʼülüjaajiraale nümaa sutuma tü naaʼinrakat? ¿Aʼyataajeeiche nia nümüin Jeʼwaa sutuma shiimain tü pümakat nümüin? Eesüjaʼa süpüla nnojoluin shiʼyataweein naaʼin nümüin Jeʼwaa. Eekajasaʼa piiʼiyatüle nujutü nümüin sutuma niain laülaain paaʼu, nnojoleerü eein tü mojujirawaakat chaa pipialuʼu, kojuteechi Jeʼwaa putuma otta eeshi süpüla niʼyataain mapa nümüin Jeʼwaa chi puʼwayuusekai. Eesüjaʼa süpüla jiʼrüin jiakana piamaleʼeya tü kasa anasü naapüinjatkat Jeʼwaa jümüin (1 Ped. 3:1, 2). Manoujainre tü puʼwayuusekat nünain Jeʼwaa sümaa mojutuin pia sümüin, ¿shiache anaka püʼülüjüle sümüin süpüla kojutuin pia sümüin? Nnojotsü shiain sukuwaʼipain tia. Tü keeʼireekat naaʼin Jeʼwaa shia püshatüin nukuwaʼipa Jesuu otta alin puʼwayuuse püpüla. Jamüshijaʼa Jesuu, nia laülaaka waaʼu waya anoujakana nünain Jeʼwaa, aishii waya nüpüla otta nnojoishi kaashichijaaralin nia wamüin (Luc. 9:46-48). Püshatüle nukuwaʼipa Jesuu, eesüjaʼa süpüla shiʼyataweejeerüin saaʼin puʼwayuuse nümüin Jeʼwaa. w17.11 31 püt. 13, 14

Wanaawale waaʼin namaa na manoujainsaliikana, mojuteerü wamüin tü nümakat Jeʼwaa. Otta ashakajaajeerü sütsüin wanoula shiʼipaʼaya. Waapawalin waneepia tü jülüjakat naaʼin na manoujainsaliikana suluʼu telewisoot, Internet, waʼyataaleruʼu otta koleejialuʼu. Wainma wayuu sainküin tü mmakat manoujainka nünain Maleiwa. Eeshiijaʼa nnojoyüliire nekirajaain nüchiki Maleiwa, shiapejeʼe keeʼireein naaʼin taashin nakuwaʼipa süpüla aaʼinraa tü naaʼinreekat (Sal. 10:4). Eeshi na kekiikana maʼin naashin müle nanüiki mayaa: «Nnojotsü choʼujaain tanoujain sünain eein Maleiwa süpüla wayuuinjachin anamiaa taya». ¿Shiimainche nnojoluin eein chi Kakumalakai tü kasakat süpüshuaʼa? Nnojorüleejeeria sunoujain wayuu tia shiale nekirajaain anain tü namakat na cientiificokana. Nnojotpejeʼe kapüleein atüjawaa saaʼu tia. Eeshi chi kakumainkai süpüshuaʼa tü kasa eekai katüin soʼu. w17.11 22 püt. 2-4

¿Jamüsü kojutuka maʼin wamüin tia outkajawaakat? Shia süka waʼwaajüin Jeʼwaa sükajee tia. Nütüjaa aaʼulu Jeʼwaa nümaa Jesuu süpüshuaʼa tü waaʼinrakat süpüla woʼunüinjanain sünain tia outkajawaakat juyawai, aluʼusaʼa isaleereeya maʼin wachiki oʼunaa sünain. Wanaa sümaa woʼunuin sünain tia outkajawaakat, weeʼiyatüin nümüin Jeʼwaa kojutuin shia wamüin, müle shia watuma niʼitaajeerü wanülia suluʼu «tü karalouktakat kaluʼukot nanülia» na katüinjanaka oʼu waneepia nutuma (Alat. Map. 20:15). Süpülapünaa tü Outkajawaakat eere Sotuin Waaʼin Outuin Jesuu, oʼuraajüinjana waya nümüin Jeʼwaa jee jülüjainjatü waaʼin kasain waaʼinrajatüin süpüla aleewain maʼin waya nümaa (2 Cor. 13:5). w18.01 10 püt. 4, 5

Nnojoishi jamüin atumawaa chi uwomuyuukai suluʼupa nia tü pueulo ounjulaayakat. «Juunjulaayainjatü shia», müshi Jeʼwaa süchiki tia pueulokalüirua (Jos. 20:2, 3). Nnojotsü nüküjain Jeʼwaa süsalainjachin piantua chi uwomuyuukai saaliijee naainjala. Akaʼaya chi pasalaainjachikai, nnojoishi ooʼulaanüin nikerotüin suluʼumüin tia pueulokalüirua süpüla nuʼutuin naaʼin chi uwomuyuukai. Aaʼinmajünüshi nutuma Jeʼwaa suʼunnaa suluʼuin nia tü pueulo ounjulaayakat. Nnojoipejeʼe püreesain nia. Eeshi süpüla niʼyataain, nükaaliinjain wayuu otta nuʼwaajüin Jeʼwaa sümaa jimatüin naaʼin otta talatüin nia. Eeshii wawalayuu ayaawajaainnakana suulia naainjala, ayatapejeʼe mojuin naaʼin saaliijee tia naaʼinrakat. Eeshii eekai nnojoleerüin motuin naaʼin Jeʼwaa tü naainjalakat naashin. Müle tü jülüjakat paaʼin, piʼitaa paaʼin sünain motuitpain naaʼin Jeʼwaa tü paainjalakat. Nnojotsü anain mojule paaʼin waneepia saaliijee tia. w17.11 11 püt. 6; 13 püt. 13, 14

Jülüjainjatü waaʼin kasain kayaawasein tü pankat otta tü wiinokot süpüla paaʼinwain maʼin waya namaa na wawalayuukana. Müinjatü shia watuma süpülapünaa otta suʼunnaa outkajawaakat tia (1 Cor. 11:23-25). Tü pan nnojotkat ejitünüin aʼaka soolojia, shiyaawasesü tü niʼiruku Jesuu naapajiraakat waaʼu sümaa maainjalain nia otta tü wiinokot shiyaawasesü nüsha Jesuu. Nnojotpajaʼa neʼe watüjaainjatüin saaʼu kasain kayaawasein tia. Sotuinjatü waaʼin waakajinnüin süka piamain na aikana maʼin apüla waya: Jeʼwaa süka naapüin nikii chi Nüchonkai waaʼu otta Jesuu süka nnojoluin naapajiraain nikii waaʼu mojusheeka. Jülüjale waaʼin tia, aijeena maʼin naya wapüla otta paaʼinweena waya namaa na wawalayuukana. w18.01 13 püt. 11

Kojutushaatasü nümüin Jeʼwaa wayuu süpüshuaʼa. Aishaatashii waya nüpüla, naapüinjeseʼe nikii chi Nüchonkai süpüla nuʼtteʼerüin waya suulia outaa, kateerü woʼu suluʼu kaʼikat süpüshuaʼa sutuma tia (Juan 3:16, TNM). Nnojorüle naaʼinrüin Jeʼwaa tü nümakat, nüküjainje Satanaa alaain Jeʼwaa jee nüküjainje niain Jeʼwaa wanee aluwataai mojulaashi süka nnojoluin naapüin namüin na wayuukana tü kasa choʼujaakat namüin. Alaayüireje Jeʼwaa shimeeʼerainpalashije nia tü nüʼünüükalüirua sünain maa: «¿Pansaayaasükalajeʼe tü namakat na nünüikimaajanakana Maleiwa sünain niitaainjachin Cristo? ¿Jalakaʼa nia? Nnojotsü kasain eeʼiranajaayaain süchikijee ouktüin na watuushinuukana. Müsü wanaawakai saaʼin wamüin kasa süpüshua maa aka paala sümaiwa sükumajaiwaʼaya tü mmakat» (2 Ped. 3:3, 4). Na wayuu oonookana nümaa Jeʼwaa, nayeena oʼttaakana nutuma, tia kottaleesia sümaa niiʼiyatüinjatüin Jeʼwaa niain anain süpüla aluwatawaa (Isa. 55:10, 11). Shia jaʼyaka sünain nuluwataaya Jeʼwaa aipüralin maʼin nia. Müsüjeseʼe watüjaain saaʼu aijeenain nüpüla suluʼu kaʼikat süpüshuaʼa na wayuu waneepiakana nümaa (Éx. 34:6). w17.06 16 püt. 7

Soʼujee nüküjain Jeʼwaa naapüinjachin chi Nüchonkai süpüla naakajirüin wayuu, jaʼyasü saaʼu nünüiki sünain nikeraajeerüin tia, aküjünüsü tia suluʼu Génesis 3:15. Maʼaka 4.000 juya süchikijee tia, naapüin chi waneeshikai Nüchon saaʼu wayuu mayaapejeʼe alin maʼin tia nümüin (Juan 3:16, TNM). Talatüshii maʼin waya saaʼu alin waya nüpüla Jeʼwaa. Eesü süpüla alin maʼin wayuu wapüla süka nukumajüin waya Jeʼwaa sünain müin aka naaʼin. Eesü süpüla wainküin tia jaʼitairü kapüleʼewalin wamüin saaʼu waleʼeruʼuin tü kaainjalaakat. Ichaʼasaʼa niiʼiyatüin Abel alin Jeʼwaa nüpüla, nüsülajüinjeseʼe saʼanasiain nümüʼlüin nümüin Jeʼwaa (Gén. 4:3, 4). Niiʼiyatüin Noé alin wayuu nüpüla, müshijeseʼe nüküjain namüin Nünüiki Maleiwa mayaapejeʼe nnojoluin jaralin oonooin sümaa tia pütchikat (2 Ped. 2:5). Akaataajaʼa Abrahamya, niiʼiyatüin muloʼuin naalin Maleiwa nüpüla, müshijeseʼe naapüinjatiain nikii Isaac, chi nüchonkai (Sant. 2:20, 21). Washateein sukuwaʼipa saalin wayuu napüla wayuukana naainnua jaʼitairü kapüleein aaʼinraa shia. w17.10 4 püt. 3, 4

Maaʼulu yaa, süka Sacerdootein Jesuu wapüleerua weʼitaʼaleeipa waaʼin sünain sümülialaain naaʼin Jeʼwaa waalin jee «sünainjee naʼanasia, nükaaliijeena waya soʼu tü kaʼi wachuntakat oʼu nümüin» (Heb. 4:15, 16). Punoujainjatü anain sujutü nüsha Jesuu. Nnojotsü neʼe jülüjainjatüin paaʼin naakajirüin Jeʼwaa wayuu süpüshuaʼa, naaʼinrüinya tia Jeʼwaa süpüla anainjachin pia sünainjee (Gal. 2:20, 21, TNM). Punouja sünain nülatirüitpain Jeʼwaa paainjala saaʼu naakajirüin pia. Punouja sünain kateerüin poʼu waneepia sutuma tü aakajiraakat otta naapüin Jeʼwaa nikii chi Nüchonkai paaʼu. Sümaiwa paala, nikerotapa chi uwomuyuukai suluʼumüin tü pueulo ounjulaayakat, nnojoishi mmoluin seema süsalain nia nutuma nüpüshi chi nuʼutakai aaʼin (Salmo 103:8-12). Niaʼala neʼe Jeʼwaa chi anakai süpüla wounjulaayain. w17.11 13, 14 püt. 14-17

Soʼu tü ai naainjakalü oʼu Jesuu tü ekawaa aipaʼajatkat namaa na nikirajüinkana, oʼuraajüshi nia nümüin Jeʼwaa süchiki paaʼinwain nia nümaa. Akaʼaya nia, achuntüshi napüleerua na nikirajüinkana süpüla paaʼinwain naya maʼaka nayakana. Naapüin Jeʼwaa tü nuchuntakat chi nüchonkai nümüin. Anaʼleesia maʼin tü Outkajawaakat eere Sotuin Waaʼin Outuin Jesuu, suulialeʼeya wanee outkajawaa süka paaʼinwain waya aküjaliikana pütchi nüchiki Jeʼwaa sutuma tia. Maaʼulu yaa, watta maʼin saalii wayuu sainküin tü mmakat jee sünainjee eʼirukuukat süpüshuaʼa outkajaakana süpüla neeʼiyatüin nanoujain sünain nuluwataain Jeʼwaa chi Nüchonkai yaa mmapaʼa. Eesü mma eere ponuin saaʼin wayuu kottuin na naatakana eʼiruku sünain tia outkajawaakat süka nnojoluin anashiin tia namüin. Anashaatapejeʼe nümüin Jeʼwaa otta Jesuu paaʼinwain na aʼyataashiikana nümüin sünain tia outkajawaakat. Nnojotsü ponuin waaʼin paaʼinwain nupueulose Jeʼwaa maaʼulu yaa süka nüküjatüjülin shia (Ezeq. 37:15-17; Zac. 8:23). w18.01 11 püt. 7-9

«Na akumajülii» ayoutakana chi Mesíaskai naya na nekiipuʼukana na judíokana. Nnojoishi neʼe mojutüin Jesuu namüin jee nnojoluin nanoujain niain chi Mesíaskai. Wainma maʼin na judío achuntakana nümüin Pilato nuʼutunüin aaʼin Jesuu (Luc. 23:18-23, TNM). Nayakalaka kasirüin outuin Jesuu. Ayoutunüshi jee oʼutuna aaʼinchi Jesuu, ¿jamaka süpüla niainjachin «tü ipa jaʼijaasükat»? Asoʼireʼennaa aaʼinchi süpüla tia. Anuu nünüiki chi aluwataaushikai Pedro: «Jesucristokai chii, niaʼa neʼe chi juʼutitkalinka aaʼin süka jükacherirüin sünain wane [wunuʼu lotusü], chi anii nüsoʼireʼerüin aaʼin Maleiwakai süchikijee ouktaa». Nümaka süchikijee, «‹tü ipa ayouktünakat paala natüma na akumajüliikana miichi, eʼitaanüsü shia sünain shiain jaʼijaasüin maʼi süpüla akumajia tü miichikat›. Je maa aka shiyouktünüin tü ipa jaʼijaasükat, müshia Jesús, ayouktünüshi jütüma» (Aluw. 3:15; 4:5-11; 1 Ped. 2:5-7). Soʼujee nüsoʼireʼennüin aaʼin Jesuu niashi «neʼe niakai nümüiwa eeka süpüla oʼtteʼer[üin] wayuu» (Aluw. 4:12; Éf. 1:20). w17.12 10, 11 püt. 6-9

Anuu nünüiki Jesuu süchiki tü müliaa miyoʼu weʼreetkat soʼu palit kaʼi: «Eʼnneerü chaa sirumatuʼu wane kasa atüjaaneetkat atuma saaʼu sünain tantamaateechin tayakai chi Shipayakai Wayuu. Je shiʼreechi taya wayuu, tayakai, chi Shipayakai Wayuu, sünain antaa saʼaka tü sirumakat [...]. Eweeteerü wane shipijana jontoroyoi emetuluinjatü maʼi. Je ajütüneena na aapiee nümaʼanajeejanakana Maleiwa süpüla nakotchajüinjatüin tü wayuu aneekuushikalüirua nütüma sainküinjee tü mmakat süpüshuaʼale» (Mat. 24:29-31). Nüsaajeena Jesuu na aneekuushii chainjanakana iipünaa yaayüliikana saaʼu tü mmakat süpüla kottuin naya. Alateerü tia süchikijee suʼttuin tü müliaa miyoʼusükat jee süpülapünaa tü atkawaa kanüliakat Armagedón. Sünain tia atkawaakat, akanajuujeena napüshuaʼa na aluwataaliikana saaʼu tü mmakat nutuma Jesuu namaa na 144.000 anoujashii (Alat. Map. 17:12-14). Tia outkajawaa aainjüneetkat süpülapünaachon nüsaajüin Jesuu na chainjanakana iipünaa, nnojoleerü aainjünüin piantua. w18.01 14 püt. 15

Nnojolichipa süchepchiain nia tü ouktaakat». Jee chaa iipünaa «ayateechi [...] katüin oʼu süpüla kaʼikat süpüshua» (Roma 6:9; Alat. Map. 1:5, 18; Col. 1:18; 1 Ped. 3:18). Nüküjain Jesuu namüin na nikirajüin waneepiakana nümaa naluwataainjanain nümaa chaa iipünaa (Luc. 22:28-30). «Jee jooluʼu atameʼennüitchipa Kürisüto naʼakajee na outushiikana: chi palajachikai naʼakajee na outakana», müshi Pablo. Akaʼaya nia, nüküjain eeinjanain waneinnua asoʼireʼennüinjanakana aaʼin süpüla chainjanain chaa iipünaa. «Katatüinjana waneʼewai nakua: palajana nia Kürisüto, süchikijee na nümaakana Kürisüto suʼunnaa tü nükaliakat» müshi Pablo (1 Cor. 15:20, 23, TNM). Wayaawatüin sünainjee tü nüküjakat Pablo joujeenain nasoʼireʼennüin aaʼin na chainjanakana iipünaa. Suʼunnaainjatü nükalia Kürisüto. Kakaliairü naküjain na aküjaliikana pütchi nüchiki Jeʼwaa süka tü Wiwüliakat suʼttüin «nükalia» Kürisüto soʼujee 1914. Kepiashii waya suʼunnaa tia «nükaliakat» otta alüʼütsü maʼin süpüla sajaʼttüin süpüshuaʼa tü kasa mojusükat. w17.12 12 püt. 11; 13 püt. 14-16

Outuinna kasa nünain chi Washikai Jeʼwaa, chi amüliajakai waya. Anaa nanülia: Abraham, Isaac, Jacob, Moisés otta David (Núm. 12:6-8; Mat. 22:31, 32; Aluw. 13:22). Keeʼireeshaatasü naaʼin Jeʼwaa süntüin tü kaʼi nüsoʼirüinjanakalü oʼu naya (Job 14:14, 15). Soʼu kaʼikat tia, talateena maʼin naya otta nnojoleena naya ayuulin. Oʼutunushinka aaʼin chi Nüchonkai Jeʼwaa, aishaatashi maʼin nia nüpüla (Prov. 8:22, 30). Isasü wachiki wayaawatüin saaʼu aishaatain nümüin Jeʼwaa wanaa sümaa outuin chi Nüchonkai (Juan 5:20; 10:17). Weʼitaashaata waaʼin sünain nükaaliinjeenain waya Jeʼwaa. Waküja nümüin süpüshuaʼa tü suluʼukat waaʼin. Jimatüsü waaʼin sutuma niyaawatüin saaʼu Jeʼwaa jamüin waaʼin sülatüle wamüin wanee kasa jee amülialaasü naaʼin waalin (2 Cor. 1:3, 4). w17.07 10 püt. 3-5

Watta maʼin naalii na wayuu aʼyataakana nümüin Jeʼwaa maaʼulu. Asülajüshii naya süka naaʼin namüiwaʼa süpüshi tü kasa kojutusü eekat namaʼana maʼaka saaʼin nanneetse, naʼyataain jee ayuʼtshii naya kaʼi süpüla naʼyataain suluʼu tü aʼwaajülee Maleiwa eekat maaʼulu (Prov. 3:9). Akaʼaya tü waʼyataainkat nümüin Jeʼwaa, nnojoleerü motuin naaʼin jee nnojoleerü motuin naaʼin tü naalinkat wapüla. Süpüshuaʼa tü kasa nountakat naaʼinrüin na aʼyataashiikana nümüin Jeʼwaa maaʼulu, shia sutuma nükaaliinjain naya Jeʼwaa otta niain Jesuu nekiipüʼüjanain. Suluʼushii waya maaʼulu wanee organización anashaatasü, eere anain waya otta süpülajatü kaʼika süpüshuaʼa. Müsüjeseʼe kojutuinjatüin wamüin tü waʼyataainkat nümüin Jeʼwaa maaʼulu otta oonooinjana waya sümaa nünüiki. Waaʼinrüle tia, naaʼinmajeena waya Jesuu, chi Aluwataakai waaʼu sümaa Sacerdootein nia otta jülüjeena waya naaʼin na aapiee suluʼukana tü kareetakalüirua. Ayataʼaya pia sünain tü aʼwaajaa shiimainsükat, naaʼinmajeechika pia Jeʼwaa maaʼutpünaa yaa jee süpüla kaʼikat süpüshuaʼa. w17.10 26 püt. 18, 19

Naashin Ezequiel otta Sofonías, malieerü tü oorokot jee tü pülaatakat mayaapejeʼe kakaliairüin oikünüin otta ayaʼlajünüin kasa sükajee (Ezeq. 7:19; Sof. 1:18). ¿Jameerü waaʼin müleka sülüʼürüle wakalia süpüla outaa otta weʼrüle wapütüin tü washirüü shiimainsükat süpüleerua tü washirüü mojusükat? Meerü waaʼin maʼaka naaʼin chi wayuu atüjaakai saaʼu nnojoluin shiimain tü nneerü outiraakalü achiirua nia soʼu wainma juya (Prov. 18:11). Ajaʼttajatü tü washirüü eekat maaʼulu. Müsüjeseʼe anain kaʼaleewainre waya chaa iipünaa sükajee tia washirüükat. Talateerü waaʼin sutuma süpüshuaʼa tü waaʼinrakat nüpüleerua Jeʼwaa otta süpüleerua Nuluwataaya. w17.07 8 püt. 16

Eeshii wawalayuu eekai kaainjalain otta nnojotsü naküjain süchiki suulia neʼrüin japülii jee suulia mojuin naaʼin na waneinnua natuma (Prov. 28:13). Neeʼiyatapejeʼe maalin wayuu napüla, süka jamüin, mojuin nakuwaʼipa otta mojuin naaʼin na waneinnua natuma. Shiasaʼa sutuma tia, nnojoleechi eein chi naaʼinkai Maleiwa naaʼu na wawalayuukana otta eeshii süpüla mojujiraain naya sünainjee tia (Éf. 4:30). Chi anoujashi eekai shiimain alin nüpüla na nuwalayuukana, nüküjain namüin na laülaashiikana süchiki naainjala süpüla nükaaliinjünüin natuma (Sant. 5:14, 15). Tü alanaʼaleekat sünain wakuwaʼipa shia aipüralin waya wayuu (1 Cor. 13:13). Sükajee tia, atüjaana aaʼu wayain na shiimainshiikana oushikajaain süchiirua nukuwaʼipa Jesuu jee atüjaana aaʼu washatüin nukuwaʼipa Jeʼwaa, chi shikiishikai tü aliikalü apüla wayuu Naashin Pablo, maalinre wayuu nüpüla nnojotsü kasain saapüin tia nümüin (1 Cor. 13:2). Nnojotsü waküjainjatüin neʼe namüin na wawalayuukana alin naya wapüla, waaʼinrüinjatü tü kasa anasükat napüleerua (1 Juan 3:18). w17.10 8 püt. 17, 18

Jülüjataa waaʼin nukuwaʼipa José. Jaʼyasü naaʼu yalayalain naaʼin wanaa sümaa nüpüleeruaanüin aaʼin sutuma nuʼwayuuse Potifar süpüla nüinkaainjachin sümaa. Nütüjaa aaʼu José eein süpüla nuʼutunüin aaʼin niyoutajaale sümaa, nnojoipejeʼe mmoluin nia seema outaa, müshijeseʼe nüpattajaain suulia (Gén. 39:10, 12). Wekirajaa jooluʼu süchiki tü saaʼinrakat Rahab, chejeʼewat shia Jericó. Wanaa sümaa nantüin na piamashii israeliita ajayajakana tia mmakat, nnojotsü shia mmoluin otta sükaaliinjain naya. Suunjula achikichii naya otta sükaaliinjain naya süpüla naʼluwataainjanain (Jos. 2:4, 5, 9, 12-16). Wanaa sümaa süpülajünüin noulia natuma na saduceokana nekirajüinjanain nüchiki Jesuu, nnojoishii naya oonooin namaa (Aluw. 5:17, 18, 27-29). Niʼitaain suluʼu naaʼin José, Rahab, Jesuu otta na aluwataaushiikana naaʼinrüinjatüin tü kasa anasükat. Yalayala aaʼinchii naya sutuma neʼitaain naaʼin nünain Jeʼwaa, nnojotsü neʼitaain naaʼin nanainjiraa. Akaʼaya wayakana, weʼitaainjatü waaʼin nünain Jeʼwaa choʼujaapa wamüin meimmoluinjanain waya (2 Tim. 1:7). w17.09 28 püt. 6-9

Choʼujaasü nükaaliinjain waya Jeʼwaa süpüla weeʼiratüin wakuwaʼipa, isasü wachiki waaʼinrüin tia wamüiwaʼa. Nükaaliinjapejeʼe waya Jeʼwaa sükajee tü Nünüikikat otta nükajee chi naaʼinkai (Luc. 11:13; Heb. 4:12, TNM). Aneerüya wakuwaʼipa wayakanaya waashajeʼerüle tü Wiwüliakat waneepia, wasakireʼerüle waaʼin sünain otta wachuntule nümüin Jeʼwaa kekiinjanain maʼin waya jee mapüleeinjatüin wamüin oonowaa sümaa Nünüiki (Jos. 1:8; Sal. 119:97; 1 Tes. 5:17). Wekirajaale sünain tü pütchi süpülajatkat tü outkajawaakat otta woʼunule sünain, aneerü wakuwaʼipa sutuma sünüiki tü Wiwüliakat jee nükaaliinjeena waya chi naaʼinkai Maleiwa (Heb. 10:24, 25). Jee müsia, ekirajaainjana waya sünain tü rewiisütakalüirua, wanajüinjatü tü videoirua ojuʼitakat suluʼu JW Broadcasting, eeinjatü wamaʼana JW Library otta wanaʼlaainjatü tü suluʼukat jw.org (Luc. 12:42). Nnojotpejeʼe shiainjatüin neʼe waaʼinrüin tia süpüla anain wakuwaʼipa noʼuluʼu Maleiwa. Choʼujaasü weeʼiratüin wakuwaʼipa sümaa wachecheraain süchiirua tia (Col. 3:10). w17.08 20 püt. 16, 17

Watta saalii tü kasa mojusü aainjünakat nümüin David. Mayaainjeʼe nüneeküin nia Jeʼwaa tepichiiwaʼaya süpüla nuluwataain saaʼu Israel, eetaasü maʼaka 15 juya naʼatapajüin süpüla nuluwataain naaʼu na nuuʼuliwoʼukana Judá (2 Sam. 2:3, 4). Soʼu tia, ounjulaashi nia nuulia Saúl, chi oʼuteekai maʼin naaʼin. Müshijeseʼe nuʼluwataain David wattamüin suulia nuumain jee ounjulaʼawaishi nia suluʼu koʼushii chaa isashiipaʼa. Mapa, outushi Saúl sünain atkawaa namaa na niʼipolokana. Mayaainjeʼe sülatüin tia, ayatüshia David aʼatapajüin akaratshi juya süpüla nüikalaainjachin sünain aluwatawaa saaʼu Israel (2 Sam. 5:4, 5). ¿Jamüsü nnojotka süshapalaain naaʼin David? Nütüjaa aaʼulu David alin nia nüpüla Jeʼwaa otta waneepieechin nia nümaa. Naʼatapajüin maʼin David sümaa talatüin naaʼin tü kaʼi nüsünneʼerüinjatkalü oʼu Maleiwa nuulia tü alatakat nümüin. Jee müsia jülüjasü naaʼin tü naaʼinrakat Maleiwa sümaiwa süpüla nükaaliinjain nia (Sal. 13:6). Nütüjaa aaʼu David nnojoleerüin amülain neʼe naʼatapajüin nükaaliinjain nia Jeʼwaa. w17.08 7 püt. 14, 15

Tü wanüikikat nnojotsü müin aka saaʼin sünüiki wayuu sümaiwajatü, eeʼiratüsü maʼin sukuwaʼipa. Müsia neʼe sukuwaʼipa nanüikipala na hebreokana otta na griegokana maaʼulu, naatajatshaana suulia nanüikipala na ashajakana tü Wiwüliakat. Müsüjeseʼe choʼujaain sülatinnüin tü Wiwüliakat suluʼu tü anüikii naashajaakalü aka na wayuukana, jaʼitainna natüjain hebreo sümaa griego. Eeshii eekai jülüjain naaʼin natüjaweerüin saaʼu tü sümakat tü Wiwüliakat natüjale süpüleerua nanüikipala na hebreokana otta na griego namaiwajanakana, nnojotpejeʼe choʼujaain tia namüin. Talatüshii maʼin waya süka süshajünüin tü Wiwüliakat suluʼu 3.000 anüikii. Eesü süshajünüle süpüshuaʼa tü karaloʼuta eekat suluʼu jee shiale neʼe alatinnüin tü karaloʼutakat Mateo sünainmüin Alateetkat Mapeena. Keeʼireesü maʼin naaʼin Jeʼwaa sütüjaain saaʼu «eʼirukuukat süpüshua» tü sümakat tü Wiwüliakat (Alat. Map. 14:6). Aleeweeshii maʼin waya nümaa Jeʼwaa sutuma alin waya nüpüla otta süka nnojoluin koʼuin nukuwaʼipa sümüin wayuu w17.09 16 püt. 4

Eere wanee wapüshi eekai nujuʼitinnüin naʼakajee na wawalayuukana, wachecherüinjatü waaʼin süpüla nnojoliinjanain yootuin waya nümaa. Süpüla nnojoluin kapüleein wamüin aaʼinraa tia, anasü jülüjale waaʼin niain washatüin akuwaʼipa Jeʼwaa otta woonooin sümaa nünüiki. Wanee wayuu anakai süpüla washatüin akuwaʼipa nia chi aluwataaikai David. Wanaa sümaa nuʼutuneein aaʼin nutuma Saúl nnojoishi aashichijaain nooʼomüin eerejeʼe wainmain nusurulaatse. Akaataajaʼa neʼe wanaa sümaa wattain saalii nünüiki Simeí nümüin, nnojoishi jamüin nutuma (1 Sam. 26:9-11; 2 Sam. 16:5-10). Nnojotpajaʼa nüchecherüin naaʼin waneepia. Watüjaa aaʼu tia sutuma kaainjalain nia sümaa Bat-seba jee sutuma naashichijaain sutuma tü naaʼinrakat Nabal nümüin (1 Sam. 25:10-13; 2 Sam. 11:2-4). ¿Kasa watüjaka sünainjee tü nukuwaʼipakat David? Nachecherüinjatü naaʼin na laülaashiikana suulia nalanaʼaleein sünain aluwatawaa naaʼu na wawalayuukana. Jee müsia nnojoliinjana aʼwaataain waya suluʼu wakuwaʼipa sünain nnojoleenain waaʼinrüin kasa mojusü waashin. Eejüinjatü waaʼin wayakana wapüshuaʼa (1 Cor. 10:12). w17.09 6 püt. 12, 13