ATÜJAINJACHI PIA YOOTIRAWAA
EKIRAJAAYA 6
Yalayala paaʼin
Pütchi shiyuʼluushika anainjee: «Nükatchinrapejeʼe waaʼin chi Maleiwakai süpüla waküjainjanain jümüin tü pütchi anakat maʼin nüchiki» (1 Tes. 2:2).
Tü sukuwaʼipakat nutuma Jesús
1. Pünaja tü VIDEOKOT jee shiale paashajeʼerüin Lucas 19:1-7. Süchikijee tia püsakira sünain pütchikat tüü:
1. ¿Jamüshii nnojoika kasajachin Zaqueo namüin noʼutku na wayuukana?
2. ¿Jamüshi nüküjakaʼa pütchi Jesús nümüin Zaqueo mayaainjeʼe nnojolin kasajachin nia sümüin wayuu?
Tü watüjakat nünainjee Jesús
2. Choʼujaasü yalayalainjatüin waaʼin süpüla waküjain pütchi sümüin wayuu maʼleekalia süchiki nuluwataainjachin Maleiwa.
Waaʼinra tü naaʼinrakat Jesús
3. Punouja sünain nükaalinjeechin pia Jehová. Nuuntuin Jesús nüküjain pütchi süka naapüin Maleiwa tü nüpülainkat nümüin, naapeeriaʼaya shia pümüin piakai (Mat. 10:19, 20; Luc. 4:18). Puchunta nümüin Jehová yalayalaiwa paaʼin nutuma süpüla püküjain pütchi namüin na wayuu mmotkana eema pia (Aluw. 4:29).
4. Nnojo jülüjain paaʼin wanee kasa süchiki wanee wayuu nnojorüle piʼraajüin shia. Eeshiijaʼa nnojoliire warütkaweein sünainmüin wanee wayuu sünainjee weʼrüin süpoʼu, saaʼujee wayaawatüin saaʼu wayuule washirü shia jee wayuule maʼletsesat shia, saaʼujee weʼrüin tü sukuwaʼipakat jee tü sunoujakalü anain. Soteepejeʼe paaʼin tüü:
1. Nnojotsü watüjaain aaʼu tü suluʼukat saaʼin wayuu, eekajasaʼa Jehová nümaa Jesús natüjaa aaʼu tü suluʼukat saaʼin wanee wayuu.
2. Nuuntuin Jehová nümüliajüin wayuu maʼleekalia.
5. Yalayalainjatü paaʼin, kojutuinjatpejeʼe pümüin wayuu otta eejüinjatü paaʼin (Mat. 10:16). Nnojo püʼülüjiraain sümaa wayuu. Nnojorüle saapajeein wanee wayuu tü pümakat süchiki tü pütchi anakat maʼin jee nnojorüle anain paaʼin, püpütaa süpüla tü wayuukot sümaa kamaneein pia sümüin (Prov. 17:14).