Moisés: Wanee wayuu nnojoikai yaletüin aaʼin
¿KASA SÜNAINPÜNAAKA NNOJOLUIN YALETÜIN NAAʼIN WANEE WAYUU?
Yaletüle naaʼin wanee wayuu, alanaweeshi nia nooʼopünaa na waneeinnua. Nnojorüle yaletüin naaʼin wanee wayuu, niyaawata aaʼu eein süpüla isain nüchiki wanee kasa.
¿KASA NIIʼIYATAKA AKA MOISÉS NNOJOLUIN YALETÜIN NAAʼIN?
Nnojotsü yaletüin naaʼin Moisés sutuma laülaain nia atumawaa naaʼu na israeliitakana. Niʼitaanüle wanee wayuu süpüla aluwatawaa, pütüjaajeechi aaʼu niale wanee wayuu yaleta aaʼinchi. Robert G. Ingersoll, nia wanee eʼiküi soʼutpünaa juyaka 1800 otta müshi nia süchiki tia: «Piʼraajeere maʼin wanee wayuu, acheküsü piʼrüinjatüin jamüin nukuwaʼipa nuluwataapa». Mayaapejeʼe laülaain Moisés naaʼu na israeliitakana, nnojotsü yaletüin naaʼin.
Nütüjaa aaʼu Moisés eein tü kasa isakalü nüchiki maʼaka saaʼin tü naainjüinjatkat süka wanee mma apaalaa (Números 27:1-11). Nnojotsü shaittaain tia süka saainjünüinjatüin yalejeechiki tü kasa nüneekakat.
¿Kasa naainjaka Moisés? ¿Nütüjaa aaʼu kasainjatüin naainjüin süka nekiipüʼüin nia na israeliitakana? ¿Shia jülüjaka naaʼin nütüjüin maʼin, laülaain nia otta nütüjaain aaʼu tü kasa keeʼireekat naaʼin Maleiwa?
Shiajeʼe naainjaka tia wanee wayuu yaletakai aaʼin. Saashin tü Wiwüliakat, nüküja achikit Moisés nümüin Jeʼwaa tü kasa alatakat (Números 27:5). Mayaapejeʼe sülatüin pienchi shikii juya süchikijee nüneekünüin süpüla nekiipüʼüin na israeliitakana, ayatshia achuntüin kaaliinwaa nümüin Jeʼwaa. ¡Shiimainjaʼaya maʼin niain wanee wayuu nnojoikai yaletüin aaʼin!
Eetaayaai jülüjüin naaʼin Moisés niainjachin aluwataain nümüiwaʼa. Nnojoishi nia achunjüin süka nüneeküin Jeʼwaa waneeinnua israeliita süpüla nünüikimaainjanain Maleiwa (Números 11:24-29). Nuchuntüin chi nüshimiakai nüneeküin waneeinnua wayuu süpüla naainjüin süpüshi tü niʼyataainkat; nnojoishi aashichijaain sutuma tia (Éxodo 18:13-24). Mayaapejeʼe anayülinya nia, nuchuntüin nümüin Jeʼwaa nüneeküinjachin wanee nekiipüʼüinjachikai na israeliitakana ouktapa nia. Nia aneekünaka Josué otta nnojoishi achunjüin Moisés. Nuluwataain na israeliitakana sünain jüüjüwaa nümüin chi oʼunirüinjachikai joo naya suluʼumüin tü Mma Aapünüinjatkat namüin (Números 27:15-18; Deuteronomio 31:3-6; 34:7). Mayaapejeʼe kojutüin nümüin Moisés nüneekünüin süpüla nekiipüʼüin nia na israeliitakana sünain aʼwaajaa Maleiwa, shia keeʼireeka maʼin naaʼin niʼrüin anain nakuwaʼipa.
¿KASA SHIKIRAJAKA ANAIN WAYA NUKUWAʼIPA MOISÉS?
Nnojo yaletüin waaʼin sutuma laülaain waya saaʼu wanee kasa otta watüjüin süpüleerua wanee kasa. Talatshi maʼin Jeʼwaa nümaa wanee wayuu nnojoikai yaletüin aaʼin; nnojotsü shiain sutuma kekiin maʼin nia (1 Samuel 15:17). Shiimainre nnojoluin yaletüin waaʼin, woonoojeerü amaa pütchikat tüü: «Piʼitaa süpüshuaʼa paaʼin nünain Jeʼwaa, nnojo piʼitaain paaʼin sünain tü pütüjaakalü aaʼu» (Proverbios 3:5, 6, NM).
Wanee kasa shikirajaka anain waya nukuwaʼipa Moisés, shia nnojoluin yaletüin waaʼin sutuma waneekünüin süpüla wanee aʼyatawaa nutuma Jeʼwaa.
¿Kaseerü weʼraka nnojorüle yaletüin waaʼin? Talateena wamaa na waneeinnua otta aijeena waya napüla. Aijeena maʼin waya nüpüla Jeʼwaa süka matüjüin yaletaa naaʼin (Salmo 18:35). «Aashichijaashi Maleiwa namüin na eekai yaletayaain naaʼin suluʼu nakuaippa namüiwa, otta kamaneeshi nia namüin eekai nnojolüin pülain naaʼin suulia wayuu.» (1 Pedro 5:5.) Makalaka anain maʼin süpüla washatüin nukuwaʼipa Moisés: ¡Nnojo yaletüin waaʼin!