¿Anasüche aresawaa sümüin niyaakua wanee santo?

EESHII wachuntüinnüle kaaliinwaa nümüin wanee wayuu wanaa sümaa shapaain waaʼin. Eeshi niale wachuntüin amüin kaaliinwaa wanee waʼaleewain atüjakai süpüleerua tü alatakat wamüin jee atüjakai akaaliinjaa. Chi wayuu anakai süpüla waʼaleewainwaa nia chi atüjakai süpüleerua wanee kasa otta chi atüjakai süpüleerua amüliajaa.

Eeshii na wayuu achajaakana tia wanaa sümaa noʼuraajüin. Süka pülain maʼin Maleiwa jee wattain nia noulia naashin, anasü namüin noʼuraajüle sümüin niyaakua wanee santo. Naashin na wayuukana, eʼrüshii müliaa na santokana kataiwaʼaya noʼu müsüjeseʼe nayaawatüin saaʼu tü alatakat sümüin wayuu. Na machikikana oulia wanee kasa, aresaashii nümüin san Antonio de Padua, naashin na wayuukana nia akaaliinjaka süpüla jaʼyain wanee eekai amüloulin jee suʼluwajünüin. Eeshii na aresaakana nümüin san Francisco de Asís müleka ayuuire namüʼlüin. Otta eeshii na aresaakana nümüin san Judas Tadeo müleka mojule maʼin naaʼin sutuma mepin wanee kasa namüin.

¿Jamüsü sünüiki tü Wiwüliakat süchiki aresawaa sümüin niyaakua wanee santo? ¿Naapüinche Maleiwa nünüiki wanee wayuu nüresaale sükajee niyaakua wanee santo? ¿Anasüche nümüin Maleiwa tia?

¿SÜKÜJÜINCHE TÜ WIWÜLIAKAT WARESAAINJANAIN SÜMÜIN NIYAAKUA WANEE SANTO?

Na santokana, aashajaashii nümaa Maleiwa napüleerua na wayuukana saashin tü iküleesia katoolikakat. Makalaka naresaain sümüin niyaakua wanee santo (New Catholic Encyclopedia). Aresaashii naya sümüin niyaakua wanee santo shiiʼiree nakaaliinjünüin nutuma Maleiwa. Naainjüin tia na wayuukana süka anain nakuwaʼipa na santokana nümaa Maleiwa.

¿Süküjüin wamüin tü Wiwüliakat waresaainjanain sümüin niyaakua wanee santo? Eeshii na «aa» makana otta suluʼusü shia naashin tü nüshajakat chi aluwataaushikai Pablo. Anuu süpüshi tü wersiikulo aküjakat shia naashin: «Anakaja waneepiale jia sünain achuntaa taaʼu nümüin chi Maleiwakai» (Roma 15:30). ¿Aresaashiche Pablo namüin na anoujüshiikana süpüla naashajaainjanain nümaa Maleiwa nüpüleerua? Nnojo. Mülejeʼe shia, niainjachi achuntaka Pablo napüleerua na anoujüshiikana süka niain wanee aluwataaushi nutuma Jesuu. Tü nüküjeekalü achiki Pablo namüin shia eein süpüla nuʼuraajüin wanee anoujüshi naaʼu wanee nuwala. Naata tia suulia oʼuraajaa nümüin wanee wayuu chakai iipünaa süpüla nüküjüin nümüin Maleiwa tü wachuntakat nümüin. ¿Jamüsü nnojoluinjatka waainjüin tia?

Müshi Jesuu suluʼu tü karaloukta nüshajakat Juan: «Tayakai, taya chi süntajachikai akajee wayuu nünainmüin Maleiwa [...].Chi eʼraajirakai Maleiwa, taya tayakai tamüiwa» (Juan 14:6). «Naaʼinreerü chi Tashikai jümüin süpüshua tü juchuntakat nümüin saaʼu [tanülia]» (Juan 15:16). Naashin Jesuu nnojoishi niainjachin woʼuraajüin amüin niakai jee nnojoishi achuntajachin nia nümüin Maleiwa wooʼopünaa. Niainjachi woʼuraajaka amüin Maleiwa süpüla naapajüin wanüiki otta wachuntüinjatü shia saaʼu nünülia Jesuu; nnojotsü wachuntajatüin saaʼu nünülia wanee santo.

Müshi Jesuu namüin na nikirajüinkana wanaa sümaa nachuntüin nümüin nikirajüinjanain naya sünain oʼuraajaa: «Meena jia jüchuntapa nümüin Maleiwa: ‹Taata Maleiwa› » (Lucas 11:2). Niainjachi neʼe woʼuraajaka amüin Maleiwa saaʼu nünülia Jesuu, nnojoishii aresaainjanain waya sümüin niyaakua wanee santo. Pansaasü maʼin nünüiki Jesuu wamüin, ¿aashimüin?

Wanaa sümaa woʼuraajüin nümüin Maleiwa, waʼwaajüin nia. Waʼwaajüle wanee maleiwa naata nuulia Jeʼwaa, nnojotsü pansaain tia sümaa tü sümakat tü Wiwüliakat (Juan 4:23, 24, NM; Alateetkat Mapeena [Apocalipsis] 19:9, 10).

¿MMOLUINJANA WAYA NEEMA MALEIWA?

Wanaa sümaa nikirajüin Jesuu wainma wayuu, aashajaashi nia nüchiki wanee jintüi ojulijakai pan otta jime naaʼu nüshi. ¿Naapeetche wanee ipa nümüin? ¿Naapeetche wanee wüi nümüin? (Mateo 7:9, 10.) ¿Paainjüinje tia nükajee wanee püchon aire nia püpüla?

Jülüjataa paaʼin püchajaale sukuwaʼipa süpüla aleewain maʼin pia nümaa wanee püchon otta matüjüinre pia akulajawaa aaʼin suulia yootoo nümaa. Shiasaʼa müin nuchunteeka pümüin wanee kasa, akaisaʼa nia mmotshi peema makalaka nuchuntüin nümüin naashajaaiwa pümaa nooʼopünaa. ¿Talatüsüje paaʼin sutuma tia? ¿Anasüje paaʼin kiʼrale chi püchonkai sünain tia? Tü keeʼireekat naaʼin wanee wayuu shia yooteein nüchonnii nümaa otta nnojoliinjana mmoluin saaʼu achuntaa wanee kasa nümüin.

Müshi Jesuu süchikijee naashajaain nüchiki chi jintüi achuntakai jime sümaa pan nümüin nüshi: «Eerejeʼe neʼe wayuuin kaainjaraliin jia, atüjashii jia aapaa kasa anasü namüin na jüchooinkana. Nialeeka chi Jüshikai Maleiwa chakai iipünaa, alanaʼaleeshia maʼi sünain anamiain jümüin. Naapeerü kasa anasü jümüin müleka jüchuntüle nümüin» (Mateo 7:11). Keeʼireesü naaʼin wanee wayuu naapüin kasa anasü sümüin nüchonnii. ¿¡Kasashikaʼa maʼin wayuu Maleiwa nnojoluinjatkaʼa naapüin wanüiki woʼuraajüle nümüin!?

Keeʼireesü naaʼin Maleiwa woʼuraajüinjanain nümüin niakai, jaʼitairü mojuin waaʼin saalin waainjala. Nnojoishi niʼitaain wanee wayuu woʼuraajüinjachikai amüin. Saashin tü Wiwüliakat, waküjüinjatü nümüin Jeʼwaa süpüshuaʼa tü kasa alatakat wamüin süpüla nükaaliinjüin waya (Salmo 55:22). Nnojoishii aresaainjanain waya sümüin niyaakua wanee santo. Niainjachi neʼe woʼuraajaka amüin Jeʼwaa otta nnojoliinjana mmoluin waya neema.

Jülüjüshii waya naaʼin Maleiwa waneʼewai wakua. Nükaaliinjeein waya sünain tü alatakat wamüin otta nuchuntüin wamüin warütkaain nünainmüin (Santiago 4:8). ¡Talatüsü maʼin waaʼin sutuma warütkaain nünainmüin Jeʼwaa, chi Washi aapakai sünüiki wayuu suʼuraajapa nümüin! (Salmo 65:2.)