¿Joujachi aikalaain Jesús sünain aluwatawaa nutuma Maleiwa? (Shiʼipa waneesia)

PUCHAJAA TÜ NÜTÜJAKALÜ APÜLEERUA MALEIWA

Julio: Ernesto, kamalainsü maʼin tamüin aashajawaa pümaa süchiki tü Bibliakat.a ¿Sotusü paaʼin wanaa sümaa yaajachin taya püsakirüin süchiki sukuwaʼipa aluwatawaa nutuma Maleiwa? Püsakirüin taya sünain jamüin wanoujaka nuʼttuin sünain aluwataain Jesús soʼu tü juyakat 1914.

Ernesto: Aa, süka taashajeʼerüin shia suluʼu wanee rewiisüta. Süküjain nuʼttuin Maleiwa sünain aluwatawaa soʼu tü juyakat 1914. Wainmajüsü taaʼin sutuma, mapajeʼe jünüiki tamüin suluʼujeejatüin tü Bibliakat tü junoujakalü anain.

Julio: Aa, shiimain tia.

Ernesto: Taashajeʼerüin süpüshuaʼa tü Bibliakat nnojotpejeʼe tantüin anain juyakat tia. Tachajaaka suluʼu Internet tü juyakat 1914 otta nnojotsü kasa tantayain anain.

Julio: Tepelisitaajüin pia Ernesto saaʼujee paashajeʼerüin süpüshuaʼale tü sümakat tü Bibliakat jee müsia jayasü paaʼu kojutuin pümüin shia.

Ernesto: Aa, süka shiain wanee karaloʼuta anashaataleʼeka maʼin.

Julio: Shiimain maʼin tia otta müsia tepelisitaajüin pia süka püchajaain suluʼu tü Bibliakat tü pütüjaweekalü aaʼu.b Paaʼinrüin tü süküjakat wamüin tü Bibliakat: wachajaainjatüin tü nütüjakalü aaʼu Maleiwa. ¡Anasü maʼin tü paaʼinrakat!

Ernesto: Anayaawatsü Julio. Atüjeeshi taya sooʼomüin. Taashajeʼerüin suluʼu tü karaloʼuta wekirajaakalü anain süchiki tü juyakat 1914. Süküjain süchiki wanee wunuʼulia ashottünaka otta miyoʼusü süchikuaʼaya.

Julio: Aa shiale. Shia tü nüshajakat Daniel suluʼu kapiitulo 4. Aashajaashi shia süchiki tü nüʼlapüinkat Nabucodonosor, wanee aluwataai chejeʼewai Babilonia.

Ernesto: Aa, shiaʼaya tia. Wainmatua taashajeʼerüin shia, nnojotpejeʼe tayaawatüin saaʼu shiain saashajaain achiki nukuwaʼipa Maleiwa sünain aluwatawaa soʼu tü juyakat 1914.

Julio: Poneetpejeʼe paaʼin tü tamakat pümüin. Jaʼitakajeʼe Daniel chi nünüikimaajachikai Maleiwa chi kashajalakai tia pütchikat nnojotsü niyaawatüin saaʼu jamaluʼuluin shia.

Ernesto: Akaʼa. ¿Shiimain?

Julio: Aa. Anuu tü nümakat suluʼu Daniel 12:8: «Taapüin tü pütchikat, nnojotpejeʼe tayaawatüin saaʼu».

Ernesto: Atak, tayaʼaya taaʼinrüin tamüiwaʼa chi nnojoikai ayaawatüin saaʼu tia.

Julio: ¿Pütüjaa aaʼu jamüin nnojotpuʼuka niyaawatüin shia Daniel? Süka nnojoluin shiain sükalia nutuma Maleiwa süpüla niyaawatüinjatüin saaʼu. Aluʼujasaʼa jooluʼu eeitpa süpüla wayaawatüin saaʼu tia ashajuushikat.

Ernesto: Aa, müsüla.

Julio: Aa. Aküjünüsü shia suluʼu tü wetsiikulokot 9. Piiʼiraka tü sümakat: «Nnojoleerü jaralüin ayaawatüin saaʼu tü pütchikat waneʼereeya sülüʼütpa sükalia sajaʼlajaainjatka oʼu kasakalüirua». Maʼaka piʼrüin nnojoleerü jaralin ayaawatüin saaʼu tü pütchikat waneʼereeya sülüʼülüin sajaʼttüin kasakalüirua. Maaʼulu yaa, süʼütpünaashii maʼin waya tia kaʼikat maʼaka süküjain shia tü Bibliakat. Wekirajaweerü anain tia mapa suluʼu tü karaloʼutakat.c

Ernesto: Püküja tamüin jamaluʼuluin tia pütchikat.

Julio: Anakajaʼa.

TÜ NÜʼLAPÜINKAT NABUCODONOSOR

Julio: Palajana, anasü waashajeʼerai süchiki tü nüʼlapüjaakalü amaa Nabucodonosor. Süchikijee wekirajaajeetka anain jamaluʼuluin shia.

Ernesto: Anakajaʼa.

Julio: Aʼlapüjaashi Nabucodonosor sümaa wanee wunuʼulia müleʼushaatasü maʼin antaleeka chaa sirumatuʼumüin. Nüʼlapüinruʼu naapaka nünüiki wanee aapiee nümaʼanajeejachikai Maleiwa makai mayaa: «Jushotta türa wunuʼuliakat. Shia neʼe apütaʼalainjatka tü shikiikat sümaa tü suuralakat». Sülataka «akaratshisü kaʼi» sumuloʼulaka süchikuaʼa tia wunuʼukat.d Ekeraajüsü tia ashajuushikat palajana nünain Nabucodonosor. Miyoʼu maʼin tü mma nuluwataakalü aaʼu sümaa washirüin maʼin nia. Müsü nukuwaʼipa maʼaka saaʼin tü suuʼuliakat wunuʼu antaleeka sirumatuʼu. Ooʼuleʼennapünaashi nia suulia aluwatawaa «akaratshisü kaʼi» maʼaka saaʼin sukuwaʼipa suchotoonuin tia wunuʼukat. ¿Sotusü paaʼin jamaluʼuluin tia?

Ernesto: Mmm... Nnojotpuʼusü jülüjain taaʼin tia.

Julio: Süküjain tü Bibliakat mamainnapünaain nia. Majachi nia mayaa soʼutpünaa akaratshisü juya, tia shia tü «akaratshisükat kaʼi». Jamüsaʼa shia ooʼulaapünaashi nia suulia aluwatawaa. Shiasaʼa sajaʼttapa tia akaratshisükat juya aikalaashi nia nüchikuaʼa sünain aluwatawaa.e

Ernesto: Aa, tayaawatüitpa saaʼu. Akatsaʼa, ¿jamüsü süpüla sünainpünaain tia tü sukuwaʼipakat aluwatawaa nutuma Maleiwa jee müsia tü juyakat 1914?

Julio: Soto paaʼin piantuain shikeraajia tia pütchikat. Tü palajatkat shia wanaa sümaa nuuʼuleʼennapünain Nabucodonosor suulia aluwatawaa. Tü wane shia nnojotpünaain niʼitaain Maleiwa wanee wayuu aluwataainjachikai saaʼu Israel. Wanaa sümaa tia müsü nuuʼulaapünaakai aaʼin Maleiwa suulia aluwatawaa.

Ernesto: ¿Jamüsü sütüjaaka saaʼu shikeraajüin piantua tia pütchikat?

Julio: Wayaawata aaʼulu tia sükajee tü sümakat Daniel 4:17 eere sümüin: «Süpüla sütüjaanüin aaʼu niain chi Miyoʼushikai saaʼu kasa süpüshuaʼa, chi Aluwataaikai saaʼu wayuu süpüshuaʼa otta nia aneekakai jaralin nücheküin süpüla aluwatawaa». Piʼrüin tü pütchi makat «chi Aluwataaikai saaʼu wayuu süpüshuaʼa».

Ernesto: Aa, «chi Miyoʼushikai saaʼu kasa süpüshuaʼa, chi Aluwataaikai saaʼu wayuu süpüshuaʼa».

Julio: ¿Jaʼrai saaʼin pümüin «chi Miyoʼushikai saaʼu kasa süpüshuaʼa»?

Ernesto: Niataa Maleiwa, ¿aashi müin?

Julio: Lotusü pünüiki. Wayaawatüin saaʼu sutuma tü pütchikat nnojoluin shiain neʼe nünainpünaain Nabucodonosor. Sünainpünaasü shiaʼaya sukuwaʼipa suluwataaya wayuu otta niain alanaʼaleein Maleiwa suulia suluwataaya wayuu. Wekirajaale sünain süpüshi tü ashajuushikat piyaawateerü suluʼu pansaain maʼin shia.

Ernesto: Anakajaʼa wekirajaa sünain.

TÜ SAASHAJAAKA MAʼIN ACHIKI TÜ KARALOʼUTAKAT DANIEL

Julio: Eesü wanee pütchi saashajaakalü maʼin achiki tü karaloʼutakat Daniel: nia aneekünakana Jesucristo nutuma Maleiwa süpüla nuluwataainjachin. Wekirajaa sünain wanee sukuwaʼipa. Suluʼusü shia Daniel 2:44. Jalia maa, paashajeʼera shia.

Ernesto: Aa, anakajaʼa: «Soʼunnaa naluwataain naya wayuukana, nüikaleʼerüinjatü chi Maleiwa sirumatuʼujeʼewaikai sukuwaʼipa wanee aluwatawaa eeinjatka süpüla kaʼikat süpüshuaʼa. Nnojoleerü jaralüin alaülaajaain saaʼu. Sükajee tia aluwataayakat, najaʼttireerü Maleiwa süpüshuaʼa sukuwaʼipa suluwataaya wayuu, shieetkalaka eein waneepia tü nuluwataayakat».

Julio: Anasü maʼin paashajeʼeria. Saaʼin pümüin, ¿aashajaasüche tü wetsiikulokot süchiki sukuwaʼipa aluwatawaa nutuma Maleiwa?

Ernesto: Mmm... Nnojotsü müin tayaawatakai saaʼu.

Julio: Wetsiikulokot tüü aashajaasü süchiki «wanee aluwatawaa eeinjatka süpüla kaʼikat süpüshuaʼa», nnojoleerü ajaʼttinnüin shia. ¿Jamüsüche saaʼin pümüin Ernesto? ¿Eesüche wanee aluwatawaa kakalialeeka maʼin suulia sukuwaʼipa nuluwataaya Maleiwa?

Ernesto: Nnojorüleejaʼa.

Julio: Anasü wachajaale wanee pütchi aküjünatüjütkalia achiki sukuwaʼipa nuluwataaya Maleiwa. Suluʼusü shia Daniel 7:13, 14 aküjünüsü yala nüchiki wanee wayuu aluwataainjacheechi. Ajaa, müsü mayaa: «Shiasaʼa soʼu aikat tia, teʼrakalaka niweetüin wanee wayuu saʼakajee tü sirumakat jee nüntinnakalaka eemüin chi Laülaa Eetüjüikaʼaya. Saapünaka laülawaa nümüin süpüla nuluwataainjachin jee süpüla kojutuinjachin nia atumawaa otta süpüla shiʼyataainjatüin nümüin wayuu maʼleekalia. Aluwataajeechi nia süpüla kaʼikat süpüshuaʼa otta nnojoleechi jaralin ooʼuleʼerüin nia». Sünain pütchikat tüü, eesü wanee kasa waashajaaitpakalü achiki.

Ernesto: Aa, aashajaasü süchikuaʼaya süchiki wanee aluwataaya.

Julio: Nnojotsü shiain wanee aluwataaya nutuma wanee wayuu. Maʼaka waashajeʼerüitpain aapünüsü laülawaa nümüin süpüla nuluwataainjachin, süpüla kojutuinjachin nia atumawaa otta süpüla shiʼyataainjatüin nümüin wayuu maʼleekalia. Aluwataajeechi nia saaʼu mmakat süpüshuaʼa.

Ernesto: Nnojotsü tayaawatüin aaʼu paala. Shiimainpejeʼe shia, naʼasa süküjain shia yala.

Julio: Jülüja maʼin paaʼin sajaʼttia pütchikat tia: «Aluwataajeechi nia süpüla kaʼikat süpüshuaʼa otta nnojoleechi jaralin ooʼuleʼerüin nia», müsü. ¿Aashin wanaawain sümaa tü sümakat Daniel 2:44, tü waashajeʼerüitpakat?

Ernesto: Aa, müsüsaʼaya.

Julio: Anashii wekirajaale wachikuaʼa sünain tü wekirajaaitpakalü anain. Suluʼu tü karaloʼutakat Daniel kapiitulo 4 süküjain namüin na wayuukana niain Maleiwa alanaʼaleein suulia suluwataaya wayuu. Wayaawata aaʼulu shikeraajüin pütchikat tüü nünain wanee wayuu alanaʼaleeka nuulia Nabucodonosor. Shia aküjünaka maʼin suluʼu tü karaloʼutakat Daniel naapüin aluwatawaa chi Maleiwakai nümüin Jesucristo. Sünainjee tü waashajaaitpakalü achiki wayaawata aaʼulu shiain saashajaain maʼin achiki tü karaloʼutakat Daniel kapiitulo 4 tü sukuwaʼipakat nuluwataaya Maleiwa, ¿aashi müin?

Ernesto: Aa, tayaawatüin saaʼu. Shiajaʼa neʼe nnojoluin tayaawatüin saaʼu jamüin sünainpünaakat tü juyakat 1914.

ALATAJATÜ AKARATSHISÜ KAʼI

Julio: Maʼaka waashajaaitpain ekeraajüsü tia pütchikat palajana nünain Nabucodonosor, nia niakai shiyaakuayaaka tü wunuʼukat. Nnojoipünaashi nia aluwataain soʼutpünaa akaratshisü juya süka mamainnapünaain nia. Shiasaʼa joo mapa nünaataapa, aikalaashi nüchikuaʼa sünain aluwatawaa. Tü wane shikeraajia tü ashajuushikat shia wanaa sümaa nnojoluin nüneeküin Maleiwa wanee wayuu aluwataainjachikai chaʼayaa Jerusalén. Sükajee tia, müshi nuuʼulaapünaakai aaʼin sünain aluwatawaa.

Ernesto: ¿Suluʼu jamüin? Nnojotsü tayaawatüin saaʼu.

Julio: Soʼutpünaa süshajünaka oʼu tü Bibliakat, na aluwataalii chajanakana Israel müshii nojoyolookai aaʼin saaʼu niinase Jehová.f Tia maluʼulu nüneekajalain naya Maleiwa süpüla aluwatawaa. Nuluwataapa na wayuu nüneekakana Jehová müshi niakai aaʼin aluwataain. Shiasaʼa joo mapa, eʼrüijaashii wayumüin na wayuu nüneekakana süpüla aluwatawaa jee müshiʼiya napüshuaʼale na wayuukana nuluwataakana aaʼu. Sutumajee tiaʼala nuuʼulaain Jehová sushutuin Babilonia saaʼu Israel soʼu juyakat 607 süpülapünaa wakalia. Soʼujee juyakat tia, nnojoishi wanee aluwataalii nutuma Jehová chaʼayaa Jerusalén, müshi nuuʼulaapünaaka aaʼin Maleiwa suulia aluwatawaa. Ernesto, ¿piyaawata aaʼu?

Ernesto: Aa, eesia tayaawatüin.

Julio: Tü akaratshisükat kaʼi oʼttusü sünain ayaawajünaa soʼu tü juyakat 607 süpülapünaa wakalia. Soʼujee tia, ooʼulaapünashi Maleiwa sünain aluwatawaa. Sajaʼlajaapa tia kaʼikat, nüneeküin Maleiwa wanee aluwataai nünüliamainjachikai, shiainjaʼa neʼe chainjachin aluwataain nia nutuma sirumatuʼujee. Tü waneirua ashajuushin waashajeʼerüitpaka suluʼu tü karaloʼutakat Daniel ekeraajüsiaʼaya sajaʼttapa tia kaʼikalüirua. ¿Joujaka sajaʼttüin tü akaratshisükat kaʼi? Piyaawatüle saaʼu tia, pütüjaweerü aaʼu joujachin oʼttuin Maleiwa sünain aluwatawaa.

Ernesto: ¿Shiache eera 1914?

Julio: Shiaʼaya tia Ernesto, lotusü maʼin pünüiki.

Ernesto: ¿Jamüsü watüjaaka saaʼu soʼujatüin juyakat tia?

Julio: Wanaa sümaa yaajachin Jesús saaʼu tü mmakat nüküjain nnojotyülia sajaʼttüin tia kaʼikat.g Wainma juya tü akaratshisükat kaʼi. Tü akaratshisükat kaʼi oʼttusü wainma juya süpülapünaa nüntüin Jesús otta ayatüsü shia wainma juya sooʼomüin süchikijee nüleʼejüin sirumatuʼumüin. Soto paaʼin wekirajaain sünain tü pütchi ashajünakat suluʼu tü karaloʼutakat Daniel shiyaawatüneerüin tia pütchikat sajaʼttiamüin tü kasakalüirua.h Jeʼra juya süpülapünaa tü juyakat 1900, eejana palitchon wayuu atüjaweekana saaʼu süchiki tü ashajünakat suluʼu tü karaloʼutakat Daniel. Sutuma nekirajaain maʼin sünain tia, nayaawata aaʼu sajaʼttajatüin soʼu tü juyakat 1914 tü akaratshisükat kaʼi. Sutumajee tü alatakat soʼujee tü juyakat 1914, wayaawata aaʼu aikaleʼennüitpa sukuwaʼipa nuluwataaya Maleiwa chaʼayaa sirumatuʼu otta müsia kepiashii waya soʼutpünaa tü kaʼi sajaʼttajatkalü oʼu kasakalüirua. Tatüjaa aaʼu kapüleejeerüin pümüin piyaawatüin uwatuwoʼushi.

Ernesto: Shiimainsaʼaya, choʼujaasü tekirajaʼawalin sünain süpüla tayaawatüinjatüin maʼin.

Julio: Müshia tayakaiya. Nnojotsü tayaawatamaatüin saaʼu. Anapejeʼe süka piyaawatüitpain saaʼu suluʼujeejatüin tü Bibliakat tü waküjakat wayakana aküjaliikana pütchi nüchiki Jehová süchiki sukuwaʼipa nuluwataaya Maleiwa.

Ernesto: Shiimainsaʼaya. Ponusü maʼin taaʼin süka jiʼitaain maʼin jaaʼin sünain tü sümakat tü Bibliakat.

Julio: Tayaawata aaʼu piʼitaweein paaʼin sünain tü sümakat tü Bibliakat. Eesüjaʼa tü kasa püsakireekalü anain sünainjee tü wekirajaaitpakalü achiki. Jamüsüjaʼa tü akaratshisükat kaʼi oʼttusü sünain ayaawajünaa soʼujee tü juyakat 607 süpülapünaa wakalia jee sünainpünaasü shiaʼaya sukuwaʼipa nuluwataaya Maleiwa. ¿Jamüsü wamaka sajaʼttüin tia akaratshisükat kaʼi soʼu tü juyakat 1914?i

Ernesto: Aa, tatüjawee aaʼu tia.

Julio: Süküjain wamüin tü Bibliakat jeʼrain sükalia tia akaratshisükat kaʼi. Eesü süpüla touyantaain tachikuaʼa süpüla wekirajaain sooʼomüin.j

Ernesto: Anakajaʼa, taʼatapajeechi pia.