Ouktüle wanee wapüshi

Tü wayuu makalü anüiki sümüin Bebe shia wanee saʼaleewain, sümüliajayaainjatü saaʼin süka tia süküjainruʼu. Nnojotsü yaleein Bebe nuulia chi süshikai, aishaatashi maʼin süpüla. Aija anawalain shia sutuma tia pütchi aküjünakat sümüin, mojuleesia neʼe saaʼin sutuma. «¿Jamüsü anainjatka shia?», maa müsü saaʼin Bebe. Kakalia mapa, ayatsia mojuin saaʼin nüchiirua chi süshikai, süshajüin mapa tia suluʼu wanee karaloukta.

Tü mojaakalü aaʼin kakaliasü suluʼu naaʼin wanee wayuu. Shialeekajaʼa ouktüle wanee kasacheʼechon nünain. Shiimainjaʼa mmata sünain müin aka saaʼin waʼünüü tü ouktaakat saashin tü Wiwüliakat (1 Cor. 15:26, TNM). Eeyaai saapireekai saaʼin süntajatpa, antajaʼalaa müsü neʼe. Süsütüin woulia na kasakana wanain; nnojoishi jaralüin isajüin suuliayaasaʼa. Nnojotsü kasakainjatüin watuma soʼotopa wanain tü ouktaakat, müshiijeseʼe moʼooin waya sutuma.

Eeshijaʼa püsakireʼerüichire paaʼin sünain tüü: «¿Joujeetche maʼin sujutajaaka toulia tü mojaakalü aaʼin? ¿Kasa taaʼinrajatka süpüla eejiraainjachin taya sümaa? ¿Kasa taaʼinrajatka süpüla takaaliinjain na eʼrakana tia müliaakat? ¿Kateetche noʼu nachikuaʼa na tapüshi anaajaainnakana?».