¿Kasa natüjaka wanainjee na waneeinnua?
1. ¿Kasa natüjaka nünainjee Jesuu na nikirajüinkana?
1 Müshi Jesuu: ‹Jülüʼüjiraa tamaa tü wunuʼu talüʼüjakat otta jütüja tanainjee› (Mat. 11:29, NM; nota). Shiiʼiyatüin tia, naainjüin tü nikirajakat anain na waneeinnua. Jülüjataa paaʼin tü natüjakat na nikirajüinkana Jesuu wanaa sümaa yaajachin nia. Kamaneeshi, aipürai otta anamia nia (Mat. 8:1-3; Mar. 6:30-34). Nnojotsü yaletüin naaʼin (Juan 13:2-5). Nojuʼitapa sünain aküjaa pütchi nümaa Jesuu neʼrüin nnojoluin shokulain nia otta nütüjüin ekirajaa tü shiimainkat (Luc. 8:1; 21:37, 38). ¿Jamüsü nanüiki wachiki na wayuu eʼrakana waya sünain aküjaa pütchi?
2. ¿Kaseerü naainjaka na wayuukana anale waʼanaaya otta wakuwaʼipa?
2 Na waküjakana amüin pütchi. Anale waʼanaaya, wanüiki otta jülüjüle waaʼin na wayuukana aneerü maʼin namüin tia (2 Cor. 6:3; Fili. 1:27). Otta taasia natüjaa aaʼu wekirajawalin süka tü Wiwüliakat otta nacheküin jülüjüle waaʼin nanüiki. Nnojo motuin paaʼin choʼujaain maʼin paainjüin tia süpüla naapajüin na wayuukana tü pütchi püküjakat.
3. ¿Kasa eeka süpüla naainjüin na wawalayuukana watuma?
3 Na wawalayuukana. Jülüja waaʼin tü kasa eekat süpüla naainjüin na wawalayuukana watuma. Waküjüle maʼin pütchi nashateerü shia. Maʼaka kasajiraain wanee rüi sümaa wanee rüi, meena watuma na waneeinnua yapale tü wanüikinjatkat sünain aküjaa pütchi, atüjeena naya aküjaa pütchi (Pro. 27:17). Washajüle nanülia otta eere nepia na ekirajaweekana sünain tü Wiwüliakat otta wouyantamaatüle keeʼireejeerü naaʼin naainjüin tia na waneeinnua. Waküjüle maʼin pütchi, nashateerü tia na wawalayuukana (2 Tim. 4:5, NM).
4. ¿Jamüsü wasakireʼerüinjatka waaʼin sünain tü wakuwaʼipakat?
4 Püsakireʼera paaʼin sünain tü pünüikikat otta tü paainjakat süpüla pütüjaain saaʼu tü naainjakat na waneeinnua putuma. Anale tü wakuwaʼipakat talateechi Jeowa otta eesü süpüla waküjüin tü nümakat Pablo: ‹Jüshata takuaippa maa aka tashatüin nukuaippa Cristo› (1 Cor. 11:1).