¿Sotusü paaʼin pürekutsootpuʼuin rekulaat pia?
1. ¿Kasa naʼyataaika anain wainma wawalayuu? Akatsaʼa, ¿kasa naainjaka waneeinnua?
1 Kakaliairü wainmain maʼin na wawalayuu aʼyataakana waneepia sünain «ekirajaa otta aküjaa [pütchi]» (Aluw. 5:42). Akatsaʼa eeshii na ooʼulaakana suulia pürekutsoolüin sutuma tü alatakat namüin. Shiale pukuwaʼipain tia, jülüja paaʼin tü pukuwaʼipakat maaʼulu müleka eere süpüla pürekutsoolüin pia püchikuaʼa.
2. Pürekutsootpuʼule wanee wawala, ¿jamüsüche anaka jülüjüle naaʼin tü nukuwaʼipakat maaʼulu?
2 Eeʼiratüsü wakuwaʼipa. Eesü nnojoluitpale eein tü kasa ooʼuleʼerakat pia suulia pürekutsoolüü. Shiale sutuma isain püchiki püsaʼwatüin tü 90 oora achuntünawipuʼukat, eesü süpüla püinküin joo shia süka süchuntünüein neʼe 70 oora. Jee eesü nnojoluitpale choʼujaain maʼin piʼyataain püpülamüin jee süpülamüin püpüshi. Eetaasü wanee wawala ooʼulaaka suulia pürekutsoolüin sutuma ayuulin shia, akatsaʼa pürekutsootsü shia süchikuaʼa wanaa sümaa 89 suuyase, saainjüin tia süka shiʼrüin sülatüin wanee juya sümaa nnojoluin pitaaraluʼupünaain shia.
3. ¿Kasa naainjüinjatka na wayuu kapüshikana süpüla pürekutsoolüin wanee naʼakajee?
3 Mayaapejeʼe nnojoiyülinya pürekutsoolüin pia, eeshi eere wanee püpüshi pürekutsootpuʼukai paala. Eesü nuuʼulaale shia süpüleerua naaʼinmajüin nüpüshi, maka laülaale nüshi jee shiale nii (1 Tim. 5:4, 8). ¿Eeshiche süpüla piain jee niain wanee püpüshi akaaliinjüin nia? Jaashajaajiraa jüpüshuaʼa süchiki tia (Pro. 15:22). wanaa sümaa nakaaliinjiraain na wayuu kapüshikana süpüla pürekutsoolüin wanee naʼakajee, eeshii süpüla naküjüin eein naʼyataain sünain tia.
4. ¿Kasa eeka süpüla paainjüin isale püchiki pürekutsoolüin pia püchikuaʼa?
4 Nnojo mojuin paaʼin müleka isale püchiki pürekutsoolüin pia püchikuaʼa. Talatüshia neʼe Jeowa süka piʼyataweein nümüin (2 Cor. 8:12). Ayataʼaya püküjüin pütchi süka tü pütüjakat sünainjee pürekutsoolüin pia. Ayata puʼuraajüin saaʼu tia jee ayata jülüjüin paaʼin shiiʼiratüle pukuwaʼipa (1 Juan 5:14). Watta kaʼi eesü süpüla ‹wainmain aʼyatawaa püpüleerua› nutuma Jeowa süpüla talatüin pia sutuma pürekutsoolüin rekulaat pia püchikuaʼa (1 Cor. 16:8, 9).