Anasü maʼin aküjaa pütchi kaayeruʼu
1. ¿Kasa maa washataka anain nukuwaʼipa Jesuu?
1 Wanaa sümaa yaajachin Jesuu mmapaʼa jülüjüsü naaʼin aküjaa pütchi sümüin wayuu nüntiraaka amaa wopuluʼu jee eepünaale nia (Luc. 9:57-61; Juan 4:7, 8). Aküjeeshi maʼin pütchi sümüin wainma wayuu. Akaaliinjünüsü wayuu maaʼulu yaa süpüla kekiin nutuma Maleiwa sükajee süküjünüin pütchi sainküin kaaye (Pro. 1:20). Akatsaʼa aneerüin maʼin wakuwaʼipa warütkaale na wayuukana palajana otta wayaawatüle saaʼu wakuwaʼipa.
2. ¿Jamüshii wayainjanaka arütkaain na wayuukana waküjapa pütchi kaayeruʼu?
2 Wayainjana arütkaaka. Shia anaka aluʼu wayale arütkaain palajana na wayuukana suulialeʼeya shaʼwatüin jee joyotüin waya süpüla nayain antüin wanainmüin. Pukulemeraa namüin, piirakaa naya otta ana pünüiki namüin. Soto paaʼin shiain anain aluʼu paashajaale pümüiwaʼa namaa na wayuukana, jaʼitaichi pümaain wanee aküjüi pütchi. Otta müsia choʼujaasü wachajaain sukuwaʼipa süpüla waashajaain wachikuaʼa namaa na achekakana tü pütchikat. Kettaapa paashajaain, püsakira na wayuukana, müleka anale shia, jamüin sukuwaʼipa süpüla paashajaain püchikuaʼa namaa. Eeshii wawalayuu aküjawaika pütchi weinshi suluʼu wanee kaaye makalaka meitüin na wayuu naashajaakana amaa süpüla kooʼomüin tü natüjaweekat aaʼu.
3. ¿Kasa weeʼiyataka aka wayaawatüin wakuwaʼipa sünain aküjaa pütchi kaayeruʼu?
3 Wayaawata saaʼu wakuwaʼipa. Kekii pia süpüla püneeküin eeinjachire püküjüin pütchi otta na paashajaainjanakana amaa. Nnojoishii püküjüinjanain amüin pütchi napüshuaʼa na alatawaikana. Ee paaʼin nanain na wayuukana. Nnojotsüleʼe anain püshaʼwaleʼerüle wanee wayuu eekai süshapajaain. Püküjüle pütchi shiʼipoʼujee wanee oikkaalee, anakuwaʼipalüinjatü putuma süpüla nnojoluin mojushiin nümüin chi kakorotkai shia. Shia analeeka aluʼu paashajaale namaa na wayuukana nojuʼitapa suluʼujee tü oikkaaleekat. Nnojoliinjana mmoluin jee ainkuuin naaʼin pürütkaapa nanainmüin. Jee kekiinjachi pia paapüinjatpa wanee karaloukta namüin na wayuukana. Eere wayuu nnojoliyaaka jamajanain amüin tü pütchikat, anasü saapünüle namüin wanee karalouktachon suulialeʼeya wanee rewiisüta.
4. ¿Jamüsü eeka talataa aaʼin sutuma aküjaa pütchi kaayeruʼu? ¿Jamüsü anaka maʼin shia?
4 Wattapünaamaatüsü süchiki tü shiimainkat waküjüle pütchi kaayeruʼu (Ecl. 11:6). Eeshii süpüla nayain wantiraain amaa na wayuu nnojoliikana wantüin anain nepialuʼu waküjapa pütchi sainküin piichi. Eesü talataa aaʼin sutuma aküjaa pütchi kaayeruʼu otta anasü maʼin shia, makalaka anain püchajaale pukuwaʼipa süpüla paainjüin shia.