Anasü maʼin aküjaa pütchi eere jouluin wayuu
1. ¿Kasa achuntünaka namüin na wawalayuukana eere jouluin maʼin wayuu?
1 Achuntünüsü namüin na wawalayuukana naküjüinjanain pütchi eere jouluin maʼin wayuu. Neʼitaainjatü wanee meesa sümaa karaloukta jee shiale wanee kareetachon. Süküjünüle pütchi süka wanee kareetachon, eeinjana piamashii wawalayuu jee waneeshiale nia yala süʼütpaʼa, nnaajaʼa nakuwaʼipa shaʼwatüle naya jee joyotule naya. Süküjünüle pütchi süka wanee meesa, eeinjana piamashii wawalayuu. Kamaneeinjana naya. Sürütkaale wanee wayuu nanainmüin, eeshii süpüla namüin: «¿Jamüsüche paashin sünüiki tü Wiwüliakat süchiki pütchikat tüü?». Eeshii süpüla yalain waneeshia jee piamashii wawalayuu sünain aküjaa pütchi süʼütpünaa tü meesakat.
2. Püküja kasain eein sünainjee süküjünüin pütchi eere jouluin wayuu.
2 Sükajee süküjünüin pütchi eere jouluin wayuu, wainmainna na wayuu ekirajaakana sünain tü Wiwüliakat. Jamüsüjaʼa wanee wayuu koleejiaka suluʼu wanee eʼikülee miyoʼu, ashajüinjatü shia wanee pütchi nachiki na Aküjüliikana Pütchi. Shiasaʼa müin nnojoluin suusütüin anain wanee Piichi Outkajaalee. Wanee semaana süchikijee tia, shiʼraka wanee meesa sümaa karalouktairua suluʼu tü eʼiküleekat miyoʼu. Shikirajaaka sünain tü Wiwüliakat otta woutiisaka shia. Maaʼulu yaa, aküjüsü shia pütchi eere jouluin maʼin wayuu.
3. ¿Jamüsü nanüiki na wayuu aküjakana pütchi eere jouluin wayuu?
3 Müsü wanee wawala aküjaka pütchi eere jouluin wayuu: «Eeshii na wayuu arütkaakana sünain naapaain tü rewiisütakat. Eeshii na wayuu nnojoyüliikana aapüin nachiki na aküjüliikana pütchi nüchiki Jeʼwaa. Wainma na wayuu eʼraajakana Jeʼwaa». Müsü wanee wawalaya: «Naatasü maʼin sukuwaʼipa aküjaa tü pütchikat, nayashii arütkaaka pünainmüin na wayuukana».
4. ¿Jamüsü nnojoluinjatka yalejeekuʼu sümüinjatüin tü meesakat?
4 Nnojotsü yalejeekuʼu müinjatüin tü meesakat otta tü kareetachonkot. Nnojotsü eitüinjatüin tü soʼoorainkat otta tü sükaliakat. Kiʼreena na wayuukana sünain neʼrüin tü meesakat otta arütkaamaateena naya sünain asakiraa otta achuntaa karaloukta. Püchajaa sukuwaʼipa süpüla püküjüinjachin pütchi eere jouluin wayuu. Aainjünüsü tia süpüla süküjünüin pütchi «sümüin wayuu süchiki nukuaippa Maleiwa sünain aluwatawaa» (Luc. 9:60).