Wajayata tü oora waküjakalü oʼu pütchi
Soʼu juyaka 2014 walatirüin 1.945.487.604 oora sünain aküjaa pütchi. Shiiʼiyatüin tia waʼyataain maʼin nümüin Jeʼwaa (Sal. 110:3; 1 Cor. 15:58). Watüjaa aaʼu «sajaʼtteerüin maalü tü wakalia waʼyataainjatkat oʼu nümüin [Jeʼwaa]», makalaka yootuinjanain maʼin waya soʼu tü oora waküjakalü oʼu pütchi (1 Cor. 7:29).
Müleka walatirüle wanee oora sümaa nnojoluin yootuin waya sümaa wayuu sünain aküjaa pütchi, ¿kasache waaʼinrajatka süpüla yootuin waya sümaa wainma wayuu? Mayaapejeʼe nnojoluin malirayuuin tü mma waküjakalü aluʼu pütchi, sükaaliinjeena waya pütchikalüirua tüü süpüla wajayatüin tü oora waküjakalü oʼu pütchi (1 Cor. 9:26).
Aküjaa pütchi sainküin piichi. Kakaliainna waya sünain tü aküjaakat pütchi wattaʼawai maalü sainküin piichi. Wainmapejeʼe na wayuu nnojoliikana jimatüin nepialuʼu wattaʼa maalü, anashii wantüle nepialuʼumüin motsopa kaʼikai jee aipoʼuupa. Shia anaka aluʼu waküjüle pütchi wattaʼawai maalü sainküin kaaye jee suluʼupünaa oikkaalee.
Aküjaa pütchi eere jouluin wayuu. Eʼitaanajatü tü meesakat otta tü kareetachonkot eere sülatüin wainma wayuu. Aainjünajatü tia eere waküjüin pütchi (paashajeʼera Waʼyataain Nümüin Maleiwa ojuʼitaka juulioʼu 2013, süpana 5). Müleka nnojorüle maʼin sülatüin wainma wayuu yalapünaa, eesü süpüla neeʼiratüin na laülaashiikana süpülee tü kareetachonkot. Neʼitaainjatü eere sülatüin wainma wayuu.
Ouyantaa wachikuaʼa otta ekirajaa wayuu. Eesü tü oora mojushiikalü oʼu aküjaa pütchi. Eeshii süpüla wouyantüin namaʼanamüin na wayuu waküjakana amüin pütchi jee shiale wekirajüin wayuu soʼu tia oorakat. Anale maʼin aküjaa pütchi sainküin piichi saawanoʼuluwai wattaʼa maalü, eeshii süpüla wekirajüin na wayuukana aliikawai jee aipoʼuupa. Jee kemionruʼule waya nepialuʼumüin na wayuu wouyantakana amaʼanamüin, anashii paliʼirawaire waya suluʼu wanee kemion.
Eesü süpüla wayaawajüin tü oora waküjakalü oʼu pütchi, talateetpajaʼa maʼin waaʼin müleka yootule waya sümaa wainma wayuu soʼu tü oora waküjakalü oʼu pütchi. Eere tü oora mojushiikalü oʼu aküjaa pütchi, eeshii süpüla wekirajüin na wekirajüinkana. Woʼuraaja nümüin Washikai Maleiwa nükaaliinjaiwa waya süpüla wajayatüin tü oora waküjakalü oʼu pütchi (Mat. 9:38).