‹Amüliajüliinjana maʼin waya›
1. ¿Kasa choʼujaaka maʼin sümüin wayuu?
1 Wainma maʼin wayuu achuntaka kaaliinwaa maaʼulu yaa. Mojusü maʼin saaʼin wayuu sümaa shapaain saaʼin sutuma keemain tü kasa alatakat sainküinpünaa mmaka. Watüjaa aaʼu wainmain wayuu choʼujaaka amüin kaaliinwaa, otta wamüliajüinjana naya (Mat. 22:39; Gal. 6:10). Wekirajaa sünain tü waaʼinrajatkat süpüla wakaaliinjüin wayuu süka süpüshuaʼa waaʼin.
2. ¿Kasa maʼin weeʼiyataka aka wamüliajüliin?
2 Waainjüin sutuma wamüliajüliin. Nia amüliajüika maʼin Maleiwa (2 Cor. 1:3, 4). Nüchuntüin wamüin Jeowa ‹wamüliajüliinjanain maʼin› maʼaka naaʼin niakai otta nuluwataain waya sünain aküjaa tü pütchi anasükat süchiki tü Nuluwataayakat namüin na kepiakana waʼütpaʼa (1 Ped. 3:8, NM). Waainjüle maaʼin tia, wamülialüin naaʼin «na mojukana aaʼin» süka shieerüin neʼe ajaʼttirüin Nuluwataaya Maleiwa tü müliaakat (Isa. 61:1, NM). Alüʼütsü süpüla najaʼttirüin Jeowa tü kasa mojusükat otta eein nutuma wanee mma jeketü süka alin nümüin namüliala na aʼyataakana nümüin (2 Ped. 3:13).
3. ¿Jamüsü süpüla washatüin tü nukuwaʼipakat Jesuu sünainmüin tü wayuukalüirua?
3 Kojuta wamüin wayuu maʼaka nutuma Jesuu. Kojutüsü wayuu waneʼewai sukua nutuma Jesuu mayaainjeʼe nüküjüin pütchi sümüin wainma wayuu. Nütüjaa aaʼu choʼujaain Maleiwa sümüin wayuu waneʼewai sukua otta nikirajeein wayuu sümaa nnojolin naashichijaain süka alin nümüin müin aka saaʼin anneerü eekai memekeetsein (Mar. 6:34). Washatüle nukuwaʼipa Jesuu sünain tia, keeʼireejeerü waaʼin wamüliajüin wayuu jee jaʼyeerü tia sünain woʼupünaa otta wanüiki. Otta müsia aküjeena maʼin waya pütchi jee jülüjeerü waaʼin sukuwaʼipa wayuu waneʼewai sukua (1 Cor. 9:19-23, NM).
4. ¿Jamüsü ‹kachiiruainjatka waaʼin wamüliajüliin›?
4 Wainma maʼin wayuu anaka amüin tü süchikimaajatkat Nuluwataaya Maleiwa otta kamalainsü namüin wakaaliinjeein naya. Müleka ‹kachiiruale waaʼin wamüliajüliin›, kojutüshi sümaa talatüin watuma Jeowa, chi Wamaleiwase amüliajüikai (Col. 3:12).