Rewiisüta sümüinjatü wayuu süpüshuaʼa
1. ¿Jamüsü süshatia nukuwaʼipa Pablo nutuma chi achepchiee oonookai otta kekiikai maʼin?
1 Maʼaka saaʼin nüküjüin pütchi Pablo wanaapünaa sümaa nakuwaʼipa na wayuukana süpüla ‹nükaaliinjüin wainma wayuu›, akumajünüsü tü rewiisütakalüirua nutuma chi achepchiee oonookai otta kekiikai maʼin süpüla saashajeʼerüin shia wayuu naataka akuwaʼipa otta anoula (1 Cor. 9:22-24). Anasü jülüjüle waaʼin nakuwaʼipa na wayuu akumajuushikana apüla tü rewiisütakat La Atalaya otta ¡Despertad! süpüla anain waküjia pütchi süka.
2. ¿Jaralii na wayuu kamüinjanakana tü rewiisütakat ¡Despertad! ?
2 ¡Despertad! Namüinjatü shia na wayuu makana aka naaʼin na ‹wayuu atenajeʼewalii› naashajaakana amaa Pablo (Aluw. 17:22). Nnojoishii ekirajünüin naya sünain anoujaa otta nnojotsü kasain natüjaain aaʼu süchiki nünüiki Maleiwa. Müshiʼiya neʼe na kamüinjanakana ¡Despertad! nnojotsü kasain natüjaain aaʼu süchiki tü Wiwüliakat. Eesü süpüla nnojoluin kasain natüjaain aaʼu süchiki anoujaa, nnojotsü kasajatüin namüin jee nnojotsü nayaawata aaʼu anain maʼin tü sümakat tü Wiwüliakat. Rewiisütakat tia süpülajatü maʼin natüjaain saaʼu na wayuukana eein chi Maleiwa shiimainkai. Otta müsia, süpülajatü kooʼomüin nanoula sünain tü sümakat tü Wiwüliakat otta jaʼyain naatain nakuwaʼipa na aküjüliikana pütchi suulia tü wanee iküleesiakalüirua.
3. ¿Jaralii na wayuu kamüinjanakana waneʼewai sukua La Atalaya?
3 La Atalaya. Tü sümüinjatkat wayuu süpüshuaʼa, namüinjatü na wayuu anoujakana nünain Maleiwa otta tü Wiwüliakat maʼaka naaʼin na wayuu ‹kojutkana amüin Maleiwa› naashin Pablo (Aluw. 13:14-16). Natüjaa soʼutku tü shikirajakat anain tü Wiwüliakat shiajaʼa neʼe nnojoluin nayaawatüin maʼin saaʼu. Tü namüinjatkat na aküjüliikana pütchi nüchiki Jeowa shia tü rewiisüta ekirajaanakat anain. Nütüjaa aaʼu Pablo nayaawatüin saaʼu tü sümakat tü Wiwüliakat otta natüjaain saaʼu tü shiimainkat na wayuu aashajeʼerakana tü karaloukta nüshajakat (1 Cor. 1:1, 2). Ashajünüsü tü pütchi suluʼukat wanaapünaa namaa na wayuu outkajaʼawaikana otta na ayaawatakana saaʼu nanüikipala na anoujüshiikana.
4. ¿Jamüsü watüjaainjatka aaʼu tü sümakat waneʼewai sukua tü rewiisüta waküjakat aka pütchi?
4 Mayaainjeʼe waapawalin piamaleʼeya tü rewiisütakat sünain aküjaa pütchi, waashajaʼawai achikirü waneesia. Makalaka watüjaainjatüin aaʼu tü sümakat waneʼewai sukua süpüla waashajaain süchiki wanee kasa kamalainka namüin na wayuukana.