Kemeʼeria wanüiki waküjapa pütchi
1. ¿Kasa shikirajaka anain waya sukuwaʼipa nekirajia na anoujüshii namaiwajanakana?
1 Na anoujüshii namaiwajanakana naküjüin süchiki tü pütchi anasükat sümüin wayuu naatajatka akuwaʼipa jee naatajatka anoula (Col. 1:23). Mayaapejeʼe shiain naküjüin süchiki tü Nuluwataayakat Maleiwa, naatawaisü sukuwaʼipa natuma namüin na wayuukana. Wanaa sümaa naashajaain Pedro namaa waneeinnua Judío, shia naashajaaka achiki tü nüshajakat Joel süka natüjaain saaʼu tü sümakat tü Ashajuushikat (Aluw. 2:14-17). Suluʼu Aluwataaushikana 17:22-31, naatasü sukuwaʼipa nutuma Pablo naashajaajiraapa namaa na griegokana. Eesü wayuu kojutka amüin tü sümakat tü Wiwüliakat otta aneerü namüin waküjüle pütchi sükajee. Akatsaʼa eeshii na wayuu mamalainkana amüin tü sümakat tü Wiwüliakat otta tü anoujaakat, makalaka wayaawatüinjatüin saaʼu tü wanüikinjatkat.
2. ¿Kasa waaʼinrüinjatka waküjüle pütchi namüin na wayuu anoujakana jee manoujüinkana sünain tü Wiwüliakat?
2 Waküja pütchi süka tü karalouktakalüirua. Soʼujee kashikat tüü, alatawalinjatü piama kashi süpüla suʼwanajaanüinjatüin tü karaloukta aküjünüinjatkat aka pütchi, eejeerü rewiisüta, karalouktachein otta poyeeto. Jaʼitaitka mamalain namüin na wayuukana aashajawaa süchiki tü Wiwüliakat, waashajaajeena amaa süchiki wanee kasa kamalainjeetka namüin. Eesü süpüla nnojoluin waashajaain süchiki tü Wiwüliakat jee waashajeʼerüin shia namüin, akatsaʼa kamalainre namüin tü wamakat, wayaatüinjana aaʼu nachikuaʼa süpüla nanoujüin nünain chi Maleiwakai jee sünain tü Wiwüliakat. Nayale waashajaain amaa na wayuu kojutkana amüin tü Wiwüliakat, eesüjaʼa süpüla waküjüin pütchi namüin sükajee otta waapüinjatü karaloukta aashajaaka süchiki tü sümakat tü Wiwüliakat. Eesüjaʼa süpüla waapüin namüin tü karalouktakat Kasa shikirajaka otta tü poyeetokalüirua Poonoo nümaa Maleiwa jee Poonoo nümaa Maleiwa süpüla katüin poʼu waneepia, mayaapejeʼe nnojoluin shiain tü aküjünajatkat aka pütchi soʼu kashikat tia. Tü keeʼireekat waaʼin shia kamalainjatüin tü pütchikat namüin na wayuukana.
3. ¿Jamüsü maka aka saaʼin wanee yüüja naaʼin na wayuukana?
3 Waʼyataa maʼin. Tü naaʼinkat wanee wayuu müsü aka saaʼin wanee yüüja apünajünüinjatkalü aluʼu (Luc. 8:15). Eeshii na wayuu aʼyataanüinjanakana amaa süpüla icheinjatüin suluʼu naaʼin tü shiimainkat. Anasü sukuwaʼipa naʼyataain na anoujüshii namaiwajanakana soʼu naküjüin süchiki tü shiimainkat sümüin wayuu maʼleekalia, makalaka talatüin maʼin naaʼin sutuma tia (Aluw. 13:48, 52). Akaajaa wayakana, wounteerü tia müleka jülüjüle waaʼin tü sukuwaʼipainjatkat tü pütchi waküjüinjatkat.